“7–13 junio. Tzol’leb’ ut Sumwank 63: “Li k’a’ru nachal chaq taqe’q loq’,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“7–13 junio. Tzol’leb’ ut Sumwank 63,” Kim, Taaqehin—Choq’ reheb’ li komon ut li junkab’al: 2021
Tzuul Spring, Condado Daviess, Missouri, xb’aan laj Garth Robinson Oborn
7–13 junio
Tzol’leb’ ut Sumwank 63
“Li k’a’ru nachal chaq taqe’q loq’ ”
Li Qaawa’ kixye, “Nekek’ul li Musiq’ej rik’in tijok ” (Tzol’leb’ ut Sumwank 63:64). K’oxla xpatz’b’al rik’in tijok naq li Musiq’ej tatxb’eresi naq yookat chi tzolok.
Tz’iib’a li nakak’oxla
Ak sik’b’il chaq ru li na’ajej choq’ re li tenamit Sion. Eb’ laj jolominel re li Iglees ak ke’rula’ani chaq li na’ajej ut ke’rosob’tesi choq’ xna’aj li ch’utub’aak choq’ reheb’ laj santil paab’anel. Jo’ kixye laj Jose Smith, “li ch’och’ Sion a’an li jun chi ruchich’och’il na’leb’ q’axal nim ru li wan chiqu” (Tzolʼlebʼ ut Sumwank 63, xjolomil li tasal). A’b’an jalan jalanq li k’oxlanb’il chirix Sion. Naab’aleb’ laj santil paab’anel k’eek’ookeb’ xch’ool chixch’utub’ankil rib’eb’ aran Missouri. Chi junpak’al chik, ke’wan kristiaan, jo’ laj Ezra Booth, li ink’a’ kiwulak chiruheb’ li ch’och’ Sion ut ke’xk’e chi nawmank lix na’leb’eb’ chirix. Naq laj Jose kisutq’i chaq Missouri toj Kirtland, kixtaw naq okenaq li jachok-ib’ ut li q’etok paab’ank sa’ li Iglees naq maa’ani wan aran. Naq yoo chaq chi k’ulmank chixjunil a’an, kik’ule’ li k’utb’esinb’il na’leb’ wan sa’ Tzolʼlebʼ ut Sumwank 63. Arin li Qaawa’ ki’aatinak chirix xloq’b’al li ch’och’ ut xnumsinkileb’ laj santil paab’anel toj aran Missouri. A’b’an, sa’ xyanqeb’ li ruchich’och’il k’anjel a’an kiwan jun aajel ruhil jultikahom: “K’ehomaq reetal, laa’in, li Qaawa’, nink’e chi aatinak lix yaab’ inkux, ut paab’anb’ilaq” (raqal 5). Lix yaab’ xkux a’an, li rajom, lix taqlahom—chixjunil li “nachal chaq taqe’q”—ink’a’ naru taqak’ul sa’ b’achb’achil malaj chi ink’a’ k’eek’o qach’ool. A’an “loq’, ut tento taayeemanq chi k’eeb’il reetal” (raqal 64).
Li na’leb’ re xtzolb’aleb’ li loq’laj hu aajunes
Tzolʼlebʼ ut Sumwank 63:1–6, 32–37
Lochlo xjosq’il li Qaawa’ chirixeb’ laj maak ut laj po’resihom ch’oolej.
Naq laj Jose Smith kixk’ul li k’utb’esinb’il na’leb’ a’in, yoo chaq chi jite’k xb’aan junjunqeb’ li komon sa’ li Iglees li ke’xpo’resi xch’ooleb’ chirix (chi’ilmanq “Ezra Booth e Isaac Morley,” Revelaciones en contexto, 138–145). K’a’ruheb’ li q’usum kixk’e li Qaawa’ sa’ Tzol’leb’ ut Sumwank 63:1–6, 32–37 chirixeb’ “laj maak ut laj po’resihom ch’oolej”? Chan ru naq eb’ li q’usum a’aneb’ reetalil lix rahom li Dios?
Neke’chal li eetalil xb’aan li paab’aal ut li rajom li Dios.
Li paab’aal li nakana moko na’ux ta xb’aan xjuneseb’ li eetalil ut sachb’a-ch’oolej. Sa’ xtiklajik li chihab’ 1831, laj Ezra Booth, jun pastor aj Metodista aran Kirtland, kixsik’ ru xk’ub’sinkil xha’ chirix naq kiril laj Jose Smith chixk’irtesinkil lix tel li ramiiw, li xElsa Johnson.
A’b’anan, chirix xnumik yal junjunq po, ak sachenaq xpaab’aal laj Ezra ut ki’ok chixjitb’al li Profeet. Chan ru naq kik’ulman a’in, chirix naq kiril jun sachb’a-ch’oolej? K’oxlan chirix a’in naq yooqat chirilb’al ru Tzol’leb’ ut Sumwank 63:7–12. Naru tatk’oxlaq ajwi’ chirix k’a’ut naq wankeb’ li ani neke’xk’ul eetalil “re xchaab’ilaleb’ li winq choq’ re lix loq’alil [li Dios]” (raqal 12) ut jalaneb’ chik neke’xk’ul “re xk’utb’aleb’ xmaak” (raqal 11). Rik’in li k’a’ru xawil ru, k’a’ru nakak’oxla naq li Qaawa’ naraj naq taak’oxla ut taaweek’a chirixeb’ li eetalil?
Chi’ilmanq ajwi’ Mateo 16:1–4; Jwan 12:37; Mormon 9:10–21; Eter 12:12, 18.
Li saq ru ch’oolej naraj naxye naq saqeb’ ru lin k’oxlahom ut lin b’aanuhom.
Lix k’ihaleb’ li kristiaan neke’xye naq moko us ta li muxuk sumlaak. A’b’an sa’ Tzol’leb’ ut Sumwank 63:13–19, li Qaawa’ naxye chi saqen ru naq li atawank sa’ ch’oolej naxk’am ajwi’ chaq li nimla tojb’a-maak sa’ musiq’ej. “K’a’ut naq li atawank a’an jun maak jwal xuwajel?” kixpatz’ li Elder Jeffrey R. Holland. “Xb’aan naq ink’a’ ka’ajwi’ naxsach li musiq’ejil wank sa’ li qaam, nink’oxla naq maak a’an xb’aan naq naxmux ru li komonil q’axal taqenaq ut sant li naxk’e qe li Dios sa’ li yu’am a’in—li rahok neke’xra wi’ rib’ jun winq ut jun li ixq, ut li rajomeb’ chixk’amb’aleb’ chaq kok’al sa’ jun li junkab’al li taawanq chi junelik” (“No hay lugar para el enemigo de mi alma,” Liahona, mayo 2010, 44).
K’a’ru naxye li Qaawa’ sa’ Tzol’leb’ ut Sumwank 63:13–19 chirix li k’a’ru te’xk’ul li ani ink’a’ neke’xjal xk’a’uxl chirixeb’ li maa’usil k’oxlahom ut b’aanuhom? K’e reetaleb’ li osob’tesink yeechi’inb’ileb’ xb’aan li Kolonel sa’eb’ li raqal 20 ut 23 choq’ reheb’ li tiikeb’ chi paab’ank. Chan ru nakat-osob’tesiik sa’ laa yu’am rik’in xpaab’ankil li chaq’rab’ re saq ru ch’oolej? Chan ru nakatxtenq’a li Qaawa’ chi kanaak malaj ok chi saq ru aach’ool?
Chi’ilmanq ajwi’ Tzol’leb’ ut Sumwank 121:45; Linda S. Reeves, “K’ulub’ejo choq’ re li qayeechi’inb’il osob’tesihom,” Jolomil ch’utub’aj-ib’ re octubre 2015.
Noko’osob’tesiik naq saq ru li qak’oxlahom ut li qab’aanuhom.
Li Qaawa’ naxb’eresi lix musiq’ejil ut lix ruchich’och’il k’anjeleb’ lix santil paab’anel.
Chirix naq li Qaawa’ kixye b’ar taakab’lamanq Sion, eb’ laj santil paab’anel sa’ Ohio toj ke’raj ru xb’eresinkileb’ chirix jo’q’e te’ok chi xik aran ut b’ar te’xtaw li tumin re xloq’b’al li ch’och’. Naq yooqat chirilb’al ru Tzol’leb’ ut Sumwank 63:24–46, sik’eb’ li musiq’ejil jo’ ajwi’ li ruchich’och’il b’eresihom kixk’e li Qaawa’ chirix Sion. K’a’ruheb’ li musiq’ejil ut ruchich’och’il b’eresihom naxk’e li Qaawa’ aawe laa’at?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Tzol’leb’ ut Sumwank 63:7–12.Li seraq’ chirix li relik chaq laj Ezra Booth sa’ li Iglees us ta kiril chi k’irtesiik li xElsa Johnson naru tixtikib’ li aatinak chirixeb’ sachb’a-ch’oolej (chi’ilmanq li k’a’ru tz’iib’anb’il chirix sa’ “Li na’leb’ re xtzolb’aleb’ li loq’laj hu aajunes” ut li jalam-uuch wan sa’ li tusleb’ aatin a’in). Maare eb’ li komon sa’ laa junkab’al taaruuq te’aatinaq chirixeb’ sachb’a-ch’oolej li xe’xkawob’resi xpaab’aaleb’, jo’ li k’a’ru xek’ul sa’ lee junkab’al malaj li k’a’ru ke’xk’ul lee xe’toonil. Chan ru naq ke’xk’anjela li paab’aal li ki’ajman ru re xk’ulb’al li sachb’a-ch’oolej a’in? K’a’ru naxk’ut Tzol’leb’ ut Sumwank 63:7–12 chirix chan ru neke’xk’am rib’ li paab’aal ut eb’ li sachb’a-ch’oolej?
-
Tzol’leb’ ut Sumwank 63:13–19.Chan ru naru taqakol qix chiru li k’a’ru moko k’ulub’ej ta, jo’ li pornografia? (Naru xtawb’aleb’ li k’anjeleb’aal re xtenq’ankileb’ li junkab’al sa’ AddressingPornography.ChurchofJesusChrist.org.) K’a’ruheb’ li osob’tesink neke’chal rik’in xpaab’ankil li chaq’rab’ re saq ru ch’oolej?
-
Tzol’leb’ ut Sumwank 63:23.Chan ru naru taatenq’a laa junkab’al chixtawb’al ru chan ru naq eb’ “li muqmuukil na’leb’ re li awa’b’ejihom,” malaj eb’ li yaalil na’leb’ re li evangelio, chanchaneb’ jun “yo’leb’aal li yo’yookil ha’ ”? Qayehaq, texruuq chi xik sa’ jun yo’leb’aal ha’ malaj nima’ nach’ wan eerik’in (malaj k’ut jun lix video malaj xjalam-uuch). Chan ru naq eb’ li yaalil na’leb’ re li evangelio chanchaneb’ li ha’?
-
Tzol’leb’ ut Sumwank 63:58.K’a’ruheb’ li tijom naqataw sa’ li tasal 63? K’a’ruheb’ li tijom neke’qab’i chixyeeb’al li qajolominel sa’ li Iglees anajwan?
-
Tzol’leb’ ut Sumwank 63:58–64.K’ut chiru laa junkab’al jun b’ihomal k’uulanb’il xb’aaneb’. Chan ru naq jalan li naqab’aanu rik’in li b’ihomal a’an chiru li k’a’ru kub’enaq chik xloq’al? K’a’ru naxk’ut chiqu Tzol’leb’ ut Sumwank 63:58–64 chirix k’a’ru naru taqab’aanu re roxloq’inkil li k’a’ru sant?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Li oxloq’ink,” B’ichleb’aal choq’ reheb’ li Kok’al, 12.
Xchaab’ilob’resinkil li tzolok aajunes
Yu’ami li k’a’ru nakak’ut. “Naq nakaweek’a li sahil ch’oolejil li nachal rik’in xtawb’al ru li evangelio, taawaj xyu’aminkil li nakatzol”. Yal aaq’e chi wank sa’ laa yu’am a’ yaal li k’a’ru nakataw ru. Xb’aanunkil a’an tixkawob’resi laa paab’aal, laa na’leb’, ut lix nawom aach’ool” (Predicad mi Evangelio, 19).
Xk’irtesinkil lix tel li xElsa Johnson, xb’aan laj Sam Lawlor