Tzuul Spring, Condado Daviess, Missouri, xb’aan laj Garth Robinson Oborn

7–13 junio

Tzolʼlebʼ ut Sumwank 63

“Li k’a’ru nachal chaq taqe’q loq’ ”

Li na’leb’ nak’utman sa’ Tzol’leb’ ut Sumwank 63 naru naxtenq’aheb’ li kok’al chixnimob’resinkil lix paab’aaleb’ chirix li qaChoxahil Yuwa’ ut li Jesukristo. Xb’aan naq b’ab’ay ajwi’ li hoonal nakatwan rik’ineb’, k’oxla b’ar wan reheb’ li yaal li taak’anjelaq reheb’, a’ yaal li rajomeb’ ru.

Tz’iib’a li nakak’oxla

Xkanab’ankileb’ chi wotzok

K’uub’eb’ kok’ chaab’il na’leb’ re chan ru xk’eeb’aleb’ xhoonal li kok’al chixwotzb’al li yookeb’ chixtzolb’al. Qayehaq, kawresiheb’ kok’ setb’il hu jalan jalanq xninqal ut kanab’eb’ li junjunq chi kok’al chixsik’b’al ru junaq. Patz’ re li ch’ina al li nachapok re li mas nim re naq taa’aatinaq xb’een wa.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 63:23

Lin Choxahil Yuwa’ naraj naq tintzol li evangelio.

Eb’ li kok’al junelik yookeb’ chi tzolok. Tenq’aheb’ chirilb’al naq li qaChoxahil Yuwa’ tixtenq’aheb’ chi tzolok chirix a’an wi neke’xpaab’eb’ lix taqlahom.

Kok’ k’anjel naru chi b’aanumank

• Il ru Tzol’leb’ ut Sumwank 63:23 choq’ reheb’ li kok’al ut ye reheb’ naq te’rab’i k’a’ru tixk’e qe li Dios wi neke’qapaab’ lix taqlahom. Tenq’aheb’ chixtawb’al ru naq eb’ “li muqmuukil na’leb’ ” a’aneb’ k’a’aq re ru b’ar wi’ li Dios naru naxk’ut chiqu xkomon li na’leb’; qayehaq, chan ru wank chi us jo’ li Jesukristo.

• K’ameb’ jalam-uuch li neke’reetali junjunq na’leb’ re li evangelio li naru neke’xtzol wi’ xkomon xna’leb’eb’ li kok’al, jo’ li kub’iha’, li Kolonel, li santil ochoch, ut wankeb’ chik xkomon. K’eheb’ chiru li pizarron chi huphu ut kanab’eb’ li kok’al chixk’eeb’aleb’ xhoonal chirib’ileb’ rib’ chixb’alq’usinkileb’. Kanab’eb’ chixyeeb’al li neke’xnaw chirix a’an ut te’xpatz’ k’a’ruhaq li te’raj xnawb’al chirix li junjunq chi na’leb’.

Tzol’leb’ ut Sumwank 63:49

Tinwakliiq chi yo’yo.

Maare anajwan malaj moqon, eb’ li kok’al nakatzoleb’ te’xk’ul xk’ojob’ankil xch’ooleb’ rik’in xnawb’al naq sa’ xk’ab’a’ lix tojb’al rix li maak kixb’aanu li Kolonel, chixjunileb’ li kamenaqeb’ te’wakliiq chi yo’yo sa’ jun kutan.

Kok’ k’anjel naru chi b’aanumank

• K’ut chiruheb’ li kok’al xjalam-uuch jun komon sa’ laa junkab’al li ak kamenaq ut seraq’i reheb’ jun seraq’ chirix li kristiaan a’an. Il ru Tzol’leb’ ut Sumwank 63:49 choq’ reheb’ li kok’al ut ch’olob’ xyaalal naq sa’ jun kutan li kristiaan a’an “taawakliiq chaq sa’ xyanqeb’ li kamenaq” re naq maajun wa chik taakamq. Patz’ reheb’ li kok’al ma kamenaq junaq kristiaan neke’xnaw ru. Ch’olob’ xyaalal naq chiqajunilo toowakliiq chi yo’yo sa’ xk’ab’a’ li Jesukristo.

• K’uteb’ xjalam-uuch lix muqlajik, ut lix waklijik chi yo’yo li Kolonel (chi’ilmanq Hu reheb’ li Jalam-uuch re li Evangelio, 58, 59). Kanab’eb’ chi aatinak chirix li yoo chi k’ulmank sa’eb’ li jalam-uuch. Kanab’eb’ li kok’al chi yoklaak chiru li tz’ak naq yooqat chixseraq’inkil reheb’ lix muqlajik li Jesus ut te’wakliiq naq taaseraq’i lix waklijik chi yo’yo. Il ru Tzol’leb’ ut Sumwank 63:49, ut ch’olob’ xyaalal naq sa’ jun kutan chiqajunilo toowakliiq chaq sa’ xyanqeb’ li kamenaq jo’ kixb’aanu li Jesus.

  

  Li muqleb’aal sa’ li Awimq, xb’aan laj Jon McNaughton

Tzol’leb’ ut Sumwank 63:64

Tento tinwileb’ li k’a’aq re ru loq’ rik’in oxloq’.

Wanko sa’ jun kutankil naq li k’a’aq re ru loq’ namajewaak ut toj reetal naq na’eetz’uman. Laa’at naru nakatenq’aheb’ li kok’al chixchaab’ilob’resinkil lix wankilaleb’ re roxloq’inkileb’ li k’a’aq re ru loq’.

Kok’ k’anjel naru chi b’aanumank

• Il ru choq’ reheb’ li kok’al sa’ Tzol’leb’ ut Sumwank 63:64: “Li k’a’ru nachal chaq taqe’q loq’.” Kanab’eb’ chixjultikankil junaq k’a’aq re ru neke’xra, jo’ jun b’atz’uul malaj jun li hu nawulak chiruheb’. Chan ru neke’ril ut chan ru neke’xk’uula? Tenq’aheb’ chixjultikankileb’ k’a’aq re ru raarookeb’ xb’aan, malaj loq’eb’ choq’ re li qaChoxahil Yuwa’. Chan ru tento too’aatinaq chirixeb’ li k’a’aq re ru a’an? Chan ru tento te’qil?

• B’ichahomaq sa’ komonil jun li b’ich na’aatinak chirix li oxloq’ink, jo’ “Tuqtuuko, ch’anch’ooko” (B’ichleb’aal choq’ reheb’ li Kok’al, 11). Tenq’aheb’ chixk’oxlankil chan ru naru neke’xk’ut roxloq’ihom choq’ reheb’ li k’a’aq re ru loq’.

Xk’utb’al li tzol’leb’: Kok’al ak ninqeb’

Tzol’leb’ ut Sumwank 63:9–10

Eb’ li eetalil neke’chal rik’in li paab’aal ut li rajom li Dios.

Laj Ezra Booth ki’ok jo’ komon sa’ li Iglees chirix naq kiril laj Jose Smith chixk’irtesinkil lix tel xElsa Johnson. A’b’anan, moqon chik laj Ezra ki’oso’ xpaab’aal ut kixwech’i li Profeet. Sa’ Tzol’leb’ ut Sumwank 63 neke’tawman li q’usum chirix xk’ojob’ankil li qapaab’aal rub’eleb’ xwankil li eetalil, jo’eb’ li sachb’a-ch’oolejil k’irtesiik, sa’ xna’aj lix k’utum li Musiq’ej chirix li yaal.

Kok’ k’anjel naru chi b’aanumank

• K’ut li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut seraq’i reheb’ li kok’al naq laj Jose Smith kiroksi li tijonelil re xk’irtesinkil lix tel xElsa Johnson, li ink’a’ naru chaq chiroksinkil chiru wiib’ chihab’. Kanab’eb’ li kok’al chirilb’al ru Tzol’leb’ ut Sumwank 63:9–10, ut patz’ reheb’ naq te’xye k’a’ru naxye li Qaawa’ chirix li paab’aal ut eb’ li eetalil (malaj eb’ li sachb’a-ch’oolej).

• Kanab’eb’ chixyiib’ankil xjalam-uuch junaq ochoch sa’ xb’een junaq kaaxukuut ut jun chik sa’ xb’een junaq oxxukuut. Ye reheb’ naq li ochoch nareetali li qapaab’aal ut lix nawom qach’ool. Patz’ reheb’ naq te’ril ru Tzol’leb’ ut Sumwank 63:9–10 ut Helaman 5:12. Chirix a’an kanab’eb’ chixtz’iib’ankil sa’ li kaaxukuut k’a’ru tento taqak’ojob’ wi’ li qapaab’aal ut sa’ li oxxukuut k’a’ru ink’a’ tento taqak’ojob’ wi’. Ye reheb’ naq li kaaxukuut naxk’e jun kawil k’ojleb’aal b’ar naru kab’lank, ut naq li oxxukuut moko chaab’il ta jo’ k’ojleb’aal. K’a’ut naq aajel ru xk’ojob’ankil li qapaab’aal chirix li Jesukristo sa’ xna’aj xk’ojob’ankil sa’ jalan chik k’a’aq re ru?

Tzol’leb’ ut Sumwank 63:23

Wi ninpaab’eb’ lix taqlahom, li Dios tixk’uteb’ chiwu lix yaalil na’leb’.

Li “muqmuukil na’leb’ re li rawa’b’ejihom li Dios” wankeb’ ka’ajwi’ choq’ reheb’ li ani neke’paab’ank re lix taqlahom. Xb’aan a’an naq toj a’an muqmuukil na’leb’ choq’ reheb’ naab’al li kristiaan. Li na’leb’ a’in tixtenq’aheb’ li kok’al naq yooqeb’ chixsik’b’al li yaal.

Kok’ k’anjel naru chi b’aanumank

• K’ut chiruheb’ xjalam-uuch jun xjulel li ha’ ut kanab’eb’ chixyiib’ankil xjalam-uuch junaq. Chirix naq teeril ru sa’ komonil Tzol’leb’ ut Sumwank 63:23, tenq’aheb’ chixjultikankileb’ li yaal neke’xnaw chirix li evangelio ut kanab’eb’ chixtz’iib’ankileb’ chire xjulel li ha’ sa’ li jalam-uuch. Chan ru naq eb’ li yaal a’an chanchaneb’ li “yo’yookil ha’ ”?

Tzol’leb’ ut Sumwank 63:58–64

Tento naq moko tinwoksi ta xk’ab’a’ li Dios chi maak’a’ xyaalal.

Eb’ li kok’al nakatzoleb’ naru neke’rab’iheb’ jalan chik kristiaan chiroksinkil xk’ab’a’ li Dios chi maak’a’ oxloq’ ut chi muxb’il. Chan ru naru nakatenq’aheb’ chixtawb’al ru naq lix k’ab’a’eb’ li qaChoxahil Yuwa’ ut li Jesukristo “tento taayeemanq chi k’eeb’il reetal”? (Tzolʼlebʼ ut Sumwank 63:64).

Kok’ k’anjel naru chi b’aanumank

• Il ru choq’ reheb’ li kok’al Tzol’leb’ ut Sumwank 63:58: “A’in jun kutan re tije’k.” Kanab’eb’ chi aatinak chirixeb’ li tije’k neke’rab’i rik’ineb’ lix na’ xyuwa’, aj k’utunel, ut eb’ aj jolominel sa’ li Iglees. Chirix a’an tenq’aheb’ chixtawb’aleb’ li tije’k naxk’e li Qaawa’ sa’eb’ li raqal 58–64. B’ar wankeb’ li chaab’il hoonal re “roksinkil lix k’ab’a’ li Qaawa’ ”? (raqal 62).

• Ilomaq sa’ komonil “Li aatinak” sa’ Choq’ re Xkawilaleb’ li Saaj (perel 20–21). Kanab’eb’ li kok’al chixtz’iib’ankileb’ chiru perel hu k’a’ru xe’xtzol chirix chan ru roksinkileb’ xk’ab’a’ li qaChoxahil Yuwa’ ut li Jesukristo li neke’raj xjultikankil.

• B’ichahomaq sa’ komonil jun li b’ich na’aatinak chirix li oxloq’ink, jo’ “Li oxloq’ink” (B’ichleb’aal choq’ reheb’ li Kok’al, 12). Chan ru naru naqak’e reetal naq noko’oxloq’in naq noko’aatinak chirix li qaChoxahil Yuwa’ ut li Jesukristo?

Xb’oqb’aleb’ chi tzolok sa’ kab’l

Wi ink’a’ xwan eehoonal chixtz’aqob’resinkil ru li perel re kok’ k’anjel re li xamaan a’in sa’ li tzoleb’aal, k’oxla xk’eeb’al reheb’ li kok’al li perel a’an re naq te’xk’am sa’ kab’l ut te’xtz’aqob’resi ru rik’ineb’ lix junkab’al.

Xchaab’ilob’resinkil li qak’utum

K’e chi k’iik lix paab’aaleb’ li kok’al. Maare junjunqeb’ li kok’al te’reek’a naq moko te’ruuq ta chixtzolb’al li evangelio xjuneseb’ rib’. Naru naniman xkawileb’ xch’ool wi nakawaklesiheb’ xch’ool rajlal sut naq neke’tz’aqon sa’ li tzoleb’aal. Ye reheb’ naq li Santil Musiq’ej tixtenq’aheb’ naq yooqeb’ chi tzolok.