revelation manuscript book in display case

21–27 junio

Tzolʼlebʼ ut Sumwank 67–70

“Wan xloq’al … jo’ xb’ihomal chixjunil li Ruchich’och’ ”

Rub’elaj rilb’al ruheb’ li na’leb’ neke’k’eeman sa’ li tusleb’ aatin a’in, tzol Tzol’leb’ ut Sumwank 67–70 ut tz’iib’a li musiq’anb’il na’leb’ taak’ul. Eb’ li musiq’anb’il na’leb’ a’an tate’xtenq’a chixyiib’ankil jun musiq’anb’il k’uub’anb’il na’leb’ re k’utuk. Chirix a’an tz’aqob’resi ru li k’uub’anb’il na’leb’ rik’ineb’ li na’leb’ wankeb’ sa’ li tusleb’ aatin a’in, sa’ Kim, Taaqehin—Choq’ reheb’ li komon ut li junkab’al, malaj sa’eb’ li kok’ hu re li Iglees.

Tz’iib’a li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixyiib’ankil xjalam-uuch k’a’ruhaq xe’xtz’ol sa’ xtzolb’aleb’ li loq’laj hu sa’ kab’l malaj sa’ li Tzoleb’aal reheb’ li Kok’al. Wi ch’a’aj chiruheb’ xk’oxlankil k’a’ru te’xyiib’, naru nakajultika reheb’ junjunq li na’leb’ neke’tawman sa’ Tzol’leb’ ut Sumwank 67–70, jo’ li kub’iha’, li xtawb’al junaq xnawom ch’oolej chirixeb’ li loq’laj hu, malaj li xk’utb’al li evangelio neke’xb’aanu li na’b’ej yuwa’b’ej reheb’ li ralal xk’ajol.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzolʼlebʼ ut Sumwank 67

Sa’ li hu Tzol’leb’ ut Sumwank wankeb’ lix k’utb’esinb’il na’leb’ li Dios.

Sa’ noviembre re 1831, eb’ laj jolominel re li Iglees ke’xk’uub’ naq te’xyiib’ jo’ jun hu eb’ li k’utb’esinb’il na’leb’ kixk’ul laj Jose Smith re naq chixjunileb’ te’ruuq chirilb’al ru. Sa’eb’ li kutan a’in, eb’ li k’utb’esinb’il na’leb’ a’an wankeb’ chi tz’iib’anb’il sa’ li Tzol’leb’ ut Sumwank.

Kok’ k’anjel naru chi b’aanumank

• Seraq’i reheb’ li kok’al chan ru naq eb’ li k’utb’esinb’il na’leb’ kixk’ul laj Jose Smith ke’isiman chiru hu (chi’ilmanq “Ch’ol 23: Tzol’leb’ ut Sumwank”, Eb’ li Esilal sa’ li Tzol’leb’ ut Sumwank, 90–92, malaj li video natawman sa’ ChurchofJesusChrist.org). Wotz lix nawom aach’ool chirix naq sa’ li Tzol’leb’ ut Sumwank wankeb’ li k’utb’esinb’il na’leb’ li naru nokohe’xtenq’a sa’eb’ li kutan a’in. Wotz junaq raqal nawulak chawu sa’ li Tzol’leb’ ut Sumwank.

• K’uteb’ chiruheb’ li kok’al li loq’laj hu chi junjunqal, ut naq chapchooq li junjunq aab’aan chi kutankil, seraq’i b’ayaq resilal chan ru naq kiwulak sa’ quq’ (chi’ilmanq li resilal li junjunq chi hu sa’ li K’utul Raqal reheb’ li Loq’laj Hu). Naq taak’ut li hu Tzol’leb’ ut Sumwank, seraq’i reheb’ k’a’ru xjalanil chiruheb’ lix komon (qayehaq, wankeb’ chi sa’ li k’utb’esinb’il na’leb’ k’eeb’ileb’ sa’ qakutankil).

Tzol’leb’ ut Sumwank 68:25–28

Naru nakub’e inha’ naq wanq we waqxaqib’ chihab’.

Sa’ Tzol’leb’ ut Sumwank 68:25–28, li Qaawa’ kixye re laj Jose Smith naq eb’ li kok’al tento te’wanq xpaab’aal chirix li Jesukristo, te’xjal xk’a’uxl, ut te’kub’eeq xha’ naq neke’xket waqxaqib’ chihab’. Kixye ajwi’ naq tento te’xtzol tijok ut xpaab’ankileb’ lix taqlahom li Dios.

Kok’ k’anjel naru chi b’aanumank

• Kanab’eb’ li kok’al chi ajlank toj sa’ waqxaqib’ rik’ineb’ ru’uj ruq’. K’a’ru xchaab’ilal xketb’al waqxaqib’ chihab’? Tenq’aheb’ li kok’al chixk’eeb’al reetal naq jo’q’e te’xket waqxaqib’ chihab’ naru te’kub’eeq xha’. Rik’in roksinkileb’ aatin ut ch’ol aatin neke’tawman sa’ Tzol’leb’ ut Sumwank 68:25–28, wotz rik’ineb’ a’an junjunq k’a’aq re ru naraj li Qaawa’ naq te’xtzol rub’elaj naq te’xket waqxaqib’ chihab’ (chi’ilmanq ajwi’ Eb’ lix Raqalil li Paab’aal 1:4). Tenq’aheb’ chixtawb’aleb’ ru li na’leb’ li maare ink’a’ neke’xnaweb’ ru.

• B’icha rik’ineb’ li kok’al jun li b’ich chirix li kub’iha’, jo’ “Li kub’iha’ ” malaj “Naq nakub’e lin ha’ ” (B’ichleb’aal choq’ reheb’ li Kok’al, 54–55, 53). Kanab’eb’ li kok’al chixwotzb’al k’a’ru neke’reek’a chirix lix kub’ikeb’ xha’ ut k’a’ru naru neke’xb’aanu re xkawresinkileb’ rib’.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwan 67:4, 9

Eb’ li k’utb’esinb’il na’leb’ li k’eeb’ileb’ chaq re laj Jose Smith tz’aqal yaaleb’.

Lix k’ihaleb’ li na’leb’ neke’tawman sa’ Tzol’leb’ ut Sumwank 67–70 wankeb’ rilom rik’in lix yalb’aleb’ xq’e laj santil paab’anel re xpuktesinkileb’ li k’utb’esinb’il na’leb’ kixk’ul laj Jose Smith. A’in jun chaab’il hoonal re xtenq’ankileb’ li kok’al chixk’eeb’al reetal naq sa’eb’ li k’utb’esinb’il na’leb’ a’an li neke’puktesiman anajwan sa’ Tzol’leb’ ut Sumwank naru naqataw xyaab’ xkux li Qaawa’.

Naq yooqat chixkawresinkil aawib’ re k’utuk, naru nakawil ru Santos, 1:143–146 malaj “Ch’ol 23: Tzol’leb’ ut Sumwank” (Eb’ li Esilal sa’ li Tzol’leb’ ut Sumwank, 90–92).

Kok’ k’anjel naru chi b’aanumank

• K’ut chiruheb’ li kok’al li Santil Hu, lix Hu laj Mormon, li Tzol’leb’ ut Sumwank, ut li Q’ol Nim Xtz’aq. Tenq’aheb’ chixtz’iib’ankil jun tusulal chiru li pizarron re k’a’ru jalan sa’eb’ li junjunq chi loq’laj hu ut k’a’ru li juntaq’eeteb’ chi sa’. Wi neke’raj ru xtenq’, wotz’ rik’ineb’ a’an lix ch’olob’ankileb’ li hu a’in li wan sa’ li K’utul Raqal reheb’ li Loq’laj Hu. Patz’ reheb’ li kok’al chan ru naru naqanaw ma tz’aqal yaaleb’ li loq’laj hu. K’a’ru naqatzol sa’ Tzol’leb’ ut Sumwank 67:4, 9 chirixeb’ li k’utb’esinb’il na’leb’ kixk’e li Qaawa’ re laj Jose Smith?

• Wotz junaq raqal re li Tzol’leb’ ut Sumwank li naxch’olob’ chawu “lix yaalalileb’ li taqlahom a’in” (raqal 4). K’eheb’ xhoonal li kok’al re te’aatinaq chirix junaq raqal nawulak chiruheb’. Ch’olob’ chiruheb’ naq sa’ li hoonal a’an eb’ laj jolominel re li Iglees ke’xk’uub’ xpuktesinkil lix ch’olob’ahomeb’ chirixeb’ li k’utb’esinb’il na’leb’ k’eeb’ileb’ re laj Jose Smith. Naq ke’xb’aanu, laj Levi Hancock, jun reheb’ laj jolominel, kixtz’iib’a chixk’atq lix k’ab’a’, “Maajun wa ta raj taasachq” (chi’ilmanq “Testimony, circa 2 November 1831,” Revelation Book 1, 121, josephsmithpapers.org). K’a’ut naq laj Levi Hancock kiraj naq “maajun wa taasachq” lix k’ab’a’ sa’ li ch’olob’ank kipuktesiik? K’e xhoonaleb’ li kok’al chixtz’iib’ankil lix nawom xch’ooleb’ chirix li yookeb’ chixtzolb’al sa’ li Tzol’leb’ ut Sumwank.

  eb’ li kok’al neke’ril li hu

  Li Dios naxpatz’ qe naq te’qatzol li loq’laj hu.

Tzolʼlebʼ ut Sumwank 68:3–4

Naq eb’ laj jolominel sa’ li Iglees neke’aatinak rik’in li Musiq’ej, neke’xye “li raatin li Qaawa’.”

Naq eb’ lix moos li Qaawa’ neke’aatinak rik’in xwankil li Santil Musiq’ej, li raatineb’ a’aneb’ li rajom, lix k’oxlahom, li raatin, ut lix yaab’ xkux li Qaawa’ (chi’ilmanq li raqal 4). Xnawb’al li yaal a’in naru naxtenq’aheb’ li li kok’al chirajb’al rab’inkil ut xtaaqenkil lix k’utumeb’ a’an.

Kok’ k’anjel naru chi b’aanumank

• Kanab’eb’ li kok’al chirilb’al ru Tzol’leb’ ut Sumwank 68:3–4 sa’ kok’ ch’uut ut te’xwotz chirib’ileb’ rib’ li neke’xtzol sa’eb’ li raqal a’an. Kanab’eb’ chixtz’iib’ankil chiru li pizarron k’a’ruhaq xe’xtzol. K’a’ut naq aajel ru xnawb’al li yaal a’an?

• Chirix rilb’al ru sa’ komonil Tzol’leb’ ut Sumwank 68:3–4, jek’i reheb’ li kok’al junjunq reheb’ li aatin xe’yeeman sa’ li jolomil ch’utub’aj-ib’ toje’ xnume’. Kanab’eb’ chixtawb’al li yaal kixk’ut chiqu li Qaawa’ rik’ineb’ lix moos.

Tzol’leb’ ut Sumwank 69:1–2

Naru ninwan “chi tiik inch’ool ut chi xaqxooq inpaab’aal.”

Naq laj Oliver Cowdery tento xko’o aran Missouri, li Qaawa’ kixb’oq laj John Whitmer, jun winq “tiik xch’ool ut xaqxo chi paab’ank” (raqal 1), re naq taarochb’eeni. Chan ru naq eb’ li kok’al naru neke’wan chi tiik xch’ooleb’ ut chi xaqxo xpaab’aaleb’ jo’ laj John Whitmer?

Kok’ k’anjel naru chi b’aanumank

• Seraq’i reheb’ li kok’al naq, sa’ li hoonal naq li Qaawa’ kixtaqla laj Oliver Cowdery aran Missouri, a’an kixye naq jun “tiik xch’ool ut xaqxo chi paab’ank” raqal 1) tento taaxik chirix, jo’kan naq kixtaqla ajwi’ laj John Whitmer. K’a’ru naraj naxye li wank chi tiik ch’oolej ut chi xaqxo chi paab’ank? Chan ru naru naqak’e reetal ma wanko chi tiik qach’ool ut chi xaqxo qapaab’aal re naq li Qaawa’ naru nokoroksi re rosob’tesinkileb’ li qas qiitz’in?

• Kanab’eb’ junjunq li kok’al chi aatinak chirix jun kristiaan neke’xnaw ru li “tiik xch’ool ut xaqxo chi paab’ank.” Chan ru neke’xnaw naq li kristiaan a’an tiik xch’ool ut xaqxo chi paab’ank? Tenq’aheb’ chixtawb’al ru naq li Qaawa’ kixk’ojob’ xch’ool sa’ xb’een laj John Whitmer xb’aan naq sa’ li hoonal a’an tiik xch’ool ut xaqxo chi paab’ank (chi’ilmanq Tzol’leb’ ut Sumwank 69:1–2). B’ichahomaq sa’ komonil jun li b’ich li tixwaklesi xch’ooleb’ li kok’al chi wank chi tiikeb’ xch’ool ut chi xaqxookeb’ xpaab’aal jo’ li Kolonel, jo’ “Chinwanq raj jo’ li Jesus” (B’ichleb’aal choq’ reheb’ li Kok’al, 40).

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixch’olob’ankil chiru anihaq sa’ lix junkab’aleb’ k’a’ru li Tzol’leb’ ut Sumwank, b’ar nachal chaq, ut k’a’ut naq aajel ru choq’ reheb’.

Xchaab’ilob’resinkil li qak’utum

Jaleb’ li kok’ k’anjel a’ yaal lix chihab’eb’ li kok’al nakatzoleb’. Eb’ li kok’al toj ka’ch’ineb’ xyu’am maare te’raj wi’chik ru xk’amb’aleb’ xb’e naq te’b’oqe’q chi aatinak. Eb’ li kok’al ak ninqeb’ wankeb’ chik xnawomeb’ chi us ut maare moko ch’a’ajaq ta chik choq’ reheb’ xwotzb’al lix na’leb’eb’. Jultikaq aawe chixjunil a’an naq nakak’uub’eb’ li kok’ k’anjel.

perel re kok’ k’anjel: naru nakub’e inha’