Saʼ raam laj Ilol Karneer, xb’aan laj Simon Dewey

28 junio─4 julio

Tzolʼlebʼ ut Sumwank 71–75

“Maajun k’anjeleb’aal li yiib’anb’il re eepleetinkil taa’usaaq”

Eb’ li kok’al nakatzoleb’ naru neke’xtzol naab’al xna’leb’eb’ sa’ li tzoleb’aal, a’b’an mas naab’al wi’chik li te’xtzol wi neke’xk’aytesi rib’eb’ chixtzolb’aleb’ li loq’laj hu sa’ kab’l. K’oxla chan ru naru taawaklesi xch’ooleb’ ut chan ru taatenq’aheb’ chixtzolb’al li evangelio sa’ kab’l.

Tz’iib’a li nakak’oxla

Xkanab’ankileb’ chi wotzok

Kana’b’eb’ li kok’al chi chunlaak chiru li tz’ak sa’ jun sirso ut tolk’osi jun b’olotz’ re jun reheb’. Kanab’ li ch’ina al a’an chixwotzb’al k’a’ruhaq xtzol toje’ chirix li evangelio sa’ kab’l malaj sa’ li Tzoleb’aal reheb’ li Kok’al. Chirix a’an kanab’ li ch’ina al chixtolk’osinkil li b’olotz’ re anihaq chik. B’aanu a’an toj reetal naq li junjunq chi kok’al xru xwotzb’al k’a’ruhaq.

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 72:2, 10

Li Qaawa’ xb’oq jun li obiisp re naq tinixtenq’a.

Eb’ li kok’al toj ka’ch’ineb’ xyu’am maare ink’a’ mas neke’xnaw k’a’ru naxb’aanu li obiisp re k’anjelak chiruheb’ a’an ut chiruheb’ li komon re li teep. Naru nakatenq’aheb’ chixb’antioxinkil lix k’anjel li obiisp.

Kok’ k’anjel naru chi b’aanumank

• K’ameb’ k’a’aq re ru sa’ li tzoleb’aal li te’reetali lix teneb’ankil jun obiisp, jo’ jun li hu re li lajetqil, eb’ li loq’laj hu, malaj xjalam-uuch junaq obiisp naq yoo chixk’eeb’al xna’leb’ anihaq (chi’ilmanq li jalam-uuch li wan sa’ xraqik li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Il ru Tzol’leb’ ut Sumwank 72:2, ut ch’olob’ naq li Qaawa’ naxb’oq jun li obiisp re naq tooxtenq’a. Oksiheb’ li k’a’aq re ru taak’am sa’ li tzoleb’aal re xtenq’ankileb’ li kok’al chixtawb’al ru junjunq k’a’aq re ru naxb’aanu li obiisp re k’anjelak sa’ li teep.

• K’ameb’ li kok’al sa’ lix oficiin li obiisp (wi nakawaj, naru nakak’uub’ a’an rik’ineb’ jalaneb’ chik aj k’utunel). Ch’olob’ junjunqeb’ li na’leb’ li aajel wi’ ru aatinak rik’in li obiisp sa’ lix oficiin (jo’ jun aatinak chirix li kub’iha’ malaj aatinak chirix li lajetqil). Seraq’i reheb’ chan ru naq lix k’anjel li obiisp nakatrosob’tesi laa’at.

• Tenq’aheb’ li kok’al chixyiib’ankileb’ kok’ hu choq’ re li obiisp, b’ar wi’ te’xb’antioxi re li naxb’aanu re tenq’ank sa’ lix k’anjel li Qaawa’.

Tzol’leb’ ut Sumwank 75:3

Naru ninyal tz’aqal inq’e sa’ xk’ab’a’ li Qaawa’.

Us ta toj kok’eb’, eb’ li kok’al naru neke’xtaw xsahileb’ xch’ool naq neke’xyal tz’aqal xq’e chixpaab’ankileb’ lix taqlahom li Qaawa’.

Kok’ k’anjel naru chi b’aanumank

• Kanab’eb’ li kok’al chixk’eeb’aleb’ xhoonal chirib’ileb’ rib’ re xk’utb’esinkil chan raj ru te’xb’aanu junaq k’anjel re tenq’ank, jo’ xmesb’al li kapiiy malaj xch’ajb’aleb’ li plaat sa’ kab’l. Il ru Tzol’leb’ ut Sumwank 75:3, ut kanab’eb’ li kok’al chixk’utb’al chan raj ru te’xb’aanu rik’in q’emal naq laa’at taaye “chi moko taawanq eeq’emal” ut te’xk’e xch’ool chi k’anjelak naq taaye “texk’anjelaq b’an rik’in xnimal eemetz’ew.” K’a’ut naq aajel ru naq taqayal tz’aqal qaq’e chi k’anjelak chiru li Qaawa’?

• Seraq’i reheb’ li kok’al li kok’ esil chirix li trab’aaj neke’tawman sa’ li raatin li Elder Dieter F. Uchtdorf “Dos principios para cualquier economía” (Liahona, noviembre 2009, 55–58). K’a’ru naqeek’a xb’aan xnawb’al naq xqayal tz’aqal qaq’e?

• B’ichahomaq sa’ komonil jun li b’ich na’aatinak chirix li trab’ajik sa’ komonil, jo’ “Naq yooko chi tenq’ank” (B’ichleb’aal choq’ reheb’ li Kok’al, 108). Tenq’aheb’ li kok’al chixk’oxlankileb’ eek’asink-ib’ li te’xk’am rib’ rik’in raatinul li b’ich.

  

  Li xb’eenileb’ komon re li Iglees wan naq ke’xk’e li tzakemq re li Iglees re xtenq’ankileb’ jalaneb’ chik kristiaan.

Xk’utb’al li tzol’leb’: Kok’al ak ninqeb’

Tzolʼlebʼ ut Sumwank 71

Naru ninkol rix li yaal rik’in xwotzb’al lix nawom inch’ool.

Li Qaawa’ moko naroyb’eni ta naq eb’ li kok’al te’xsumeheb’ li neke’wech’ink re li Iglees jo’ chanru kixye reheb’ laj Jose Smith ut laj Sidney Rigdon naq te’xb’aanu. A’b’anan, naru nakatenq’aheb’ chixtawb’al ru naq ka’ajwi’ lix nawom xch’ooleb’ chirix li yaal naru naxb’aanu xnimal k’anjel sa’ xyu’ameb’ li ras riitz’in.

Kok’ k’anjel naru chi b’aanumank

• Oksi xjolomil Tzol’leb’ ut Sumwank 71 malaj li seraq’ “Ch’ol 25: Laj Jose Smith ut laj Sidney Rigdon neke’xik sa’ jun taqlanb’il k’anjel” (Eb’ li Esilal sa’ li Tzol’leb’ ut Sumwank, 96) re xk’utb’al chiruheb’ li kok’al li kik’ulman naq kimusiq’aak li tasal 71. Il ru Tzol’leb’ ut Sumwank 71:1 rik’ineb’ li kok’al ut tenq’aheb’ chixtawb’al k’a’ru kiraj li Qaawa’ naq laj Jose ut laj Sidney te’xb’aanu chirix li “ra ki’eek’aman” xb’aaneb’ li kristiaan chirix li Iglees (xjolomil li tasal). K’a’ru kixye a’an naq tixk’e reheb’ re xtenq’ankileb’? Chan ru naru nokowan jo’ laj Jose ut laj Sidney?

• Kanab’eb’ li kok’al chi wank sa’ ka’kab’il re te’xtzol chan raj ru te’xye li neke’xnaw chirix li Iglees reheb’ jalan chik kristiaan. Qayehaq, naru neke’xwotz lix nawom xch’ooleb’ malaj te’xye jun reheb’ lix Raqalil li Paab’aal.

Tzol’leb’ ut Sumwank 72:8

Li Qaawa’ naxb’oqeb’ obiisp re naq te’xtenq’a chixk’eeb’al chi uxmank lix k’anjel.

Jun obiisp naru naxtoch’ xch’ool junaq ch’ina al malaj saaj, chi kaw ut chi chaab’il. K’a’ru naru nakab’aanu re xtenq’ankileb’ li kok’al re naq te’ril li obiisp jo’ jun aj k’ehol ruuchil li Qaawa’ Jesukristo?

Kok’ k’anjel naru chi b’aanumank

• Ch’olob’ naq sa’ 1831 li Qaawa’ kixb’oq jun obiisp re li Iglees, laj Edward Partridge, re naq taanume’q chi wank aran Kirtland, Ohio, ut a’anaq li obiisp aran Independence, Missouri (chi’ilmanq “Ch’ol 17: Eb’ li xb’een obiisp sa’ li Iglees,” Eb’ li Esilal sa’ li Tzol’leb’ ut Sumwank, 64–66). Il ru Tzol’leb’ ut Sumwank 72:8 rik’ineb’ li kok’al ut k’e xb’oqb’aleb’ chirab’inkil ani kixb’oq li Qaawa’ re naq taak’anjelaq jo’ li ak’ obiisp aran Kirtland. K’a’ut naq li Qaawa’ naxb’oqeb’ obiisp? Seraq’i reheb’ li kok’al jun aanumsihom b’ar wi’ li obiisp xb’aanu junaq k’anjel li xatrosob’tesi.

• Kanab’eb’ chixtz’iib’ankil xtusulal junjunqeb’ reheb’ li k’a’aq re ru rilomeb’ chixb’aanunkil li obiisp re xtenq’ankileb’ li komon re li teep. Patz’ reheb’ naq te’xyiib’ junaq xjalam-uuch li obiisp naq yoo chixb’aanunkil junaq re li k’anjel xe’xtz’iib’a. Ch’olob’ xyaalal naq li obiisp kib’oqe’ xb’aan li Qaawa’ re wank choq’ xmoos. K’a’ut naq naqab’antioxi naq li Qaawa’ kixb’oq jun li obiisp sa’ li qateep?

Tzol’leb’ ut Sumwank 73:3

Li Qaawa’ kixtaqla laj Jose Smith chixk’ojob’ankil wi’chik li xchaq’al ru yaal li ke’sach sa’ li Santil Hu.

Jo’ xcha’al lix b’oqb’al jo’ profeet, li Qaawa’ kixtaqla naq tixtz’il rix li Santil Hu rik’in li Musiq’ej. Li tz’ilok-ix a’an, li kixk’ab’a’i li Qaawa’ jo’ “jaltesink” (Tzol’leb’ ut Sumwank 90:13), ke’xk’ojob’ wi’chik aajel ruhil yaal li ke’sach malaj ke’isiman chaq sa’ li Santil Hu chiru xnumikeb’ k’iila cient chihab’.

Kok’ k’anjel naru chi b’aanumank

• Ch’olob’ naq chirix naq laj Jose Smith ut laj Sidney Rigdon ke’q’aj chaq sa’ li mision ke’xb’aanu chaq nach’ rik’in Kirtland, Ohio, li Qaawa’ kixpatz’ reheb’ naq te’xb’aanu jun chik k’anjel aajel ru. Kanab’eb’ li kok’al chirilb’al ru Tzol’leb’ ut Sumwank 73:3 ut te’xsik’ k’a’ru li k’anjel a’an. Re xtenq’ankileb’ li kok’al chixtawb’al ru k’a’ru kiraj li Qaawa’ naq laj Jose ut laj Sidney te’xjaltesi ru, il ru rik’ineb’ a’an xcha’al li tasal “Lix Jaltesinkil ru li Santil Hu xb’aan laj Jose Smith” sa’ li K’utul Raqal reheb’ li Loq’laj Hu.

• Numsi junaq li Santil Hu sa’ xyanqeb’ li kok’al ut kanab’eb’ chixteeb’al ut chirilb’al jarub’ xk’ihal li perel wan chi sa’. Patz’ reheb’ naq te’xk’oxla naq xpatz’man reheb’ naq te’xjaltesi ru li Santil Hu sa’ jalan chik aatinob’aal. Jo’ k’ihal raj li sachk te’xk’ul sa’ xb’aanunkil a’an? Ch’olob’ naq sa’ li jaltesink-u malaj yal tz’iib’ank ke’xb’aanu li kristiaan rik’in li Santil Hu rub’elaj xkutankil laj Jose Smith, ke’xk’ul k’iila sachk ut wan naq ke’risi junjunq li aajel ruhil yaal. Li Qaawa’ kixtaqla li profeet aj Jose Smith chixyiib’ankileb’ a’an. K’a’ut naq aajel ru choq’ qe li k’anjel kixb’aanu laj Jose Smith?

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chixk’ojob’ankil k’a’ru naru neke’xb’aanu xb’aan li xe’xtzol anajwan, jo’ xb’antioxinkil chiru li obiisp lix k’anjel malaj xtzolb’aleb’ lix Raqalil li Paab’aal re xkawresinkileb’ rib’ chixkolb’al rix lix paab’aaleb’.

Xchaab’ilob’resinkil li qak’utum

Oksiheb’ li junxaqalil. “Lix k’ihaleb’ li kok’al (ut eb’ li ak ninqeb’) neke’tzolok chi us wi neke’roksi lix junxaqalileb’. Sik’ chan ru naru nakatenq’aheb’ li kok’al rik’in li ilok, rik’in li ab’ink, ut rik’in li ch’e’ok naq yookeb’ chi tzolok” (Li k’utuk jo’ li Kolonel, 25).