jun choql chahim

Li muheb’aal, xb’aan li xShaelynn Abel

5–11 julio

Tzolʼlebʼ ut Sumwank 76

“Nimaq ru lix q’ajkamunkileb’ ut chi junelik taawanq lix loq’aleb’ ”

Naq yooqat chixtzolb’al Tzol’leb’ ut Sumwank 76, tz’il rix k’a’ru naraj li qaChoxahil Yuwa’ naq te’xnaw li kok’al chirix a’an, chirix li Kolonel, chirixeb’ a’an ajwi’, ut li naru neke’xk’ul sa’ li junelik q’e kutan.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’uteb’ chiruheb’ li kok’al jalam-uuch malaj perel re kok’ k’anjel re li tusleb’ aatin re li xamaan a’in malaj re tusleb’ aatin ak xe’nume’. Kanab’eb’ chixyeeb’al aawe k’a’ru neke’ril sa’eb’ li jalam-uuch ut k’a’ru najultiko’ reheb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

Tzol’leb’ ut Sumwank 76:24

Chiqajunilo ralal xk’ajolo li Dios.

Li Awa’b’ej Dallin H. Oaks kixye naq “wi naqak’e sa’ xk’a’uxleb’ li saaj naq a’aneb’ ralal xk’ajol li Dios, te’qatenq’a chiroxloq’inkileb’ rib’ ut chixwaklesinkileb’ xch’ool chixnumsinkileb’ li ch’a’ajkilal re li yu’am” (“Conceptos excelentes”, Liahona, enero 1996, 28).

Kok’ k’anjel naru chi b’aanumank

• Re xtenq’ankileb’ li kok’al chixtawb’al ru li wankilal wan rik’ineb’ re wulak jo’ li Dios, sik’ chan ru taak’ut chiruheb’ naq li raleb’ li xul neke’k’i toj reetal naq neke’ninqan jo’ lix na’ xyuwa’eb’—maare eb’ li kok’al naru neke’xk’uliheb’ xjalam-uucheb’ junjunq li xul naq toj kok’eb’ ut naq ak ninqeb’. Teheb’ li loq’laj hu sa’ Tzol’leb’ ut Sumwank 76:24, ut ye reheb’ li kok’al naq chiqajunilo laa’o “alalb’ej ut rab’inb’ej chiru li Dios.” Ch’olob’ xyaalal naq li Dios a’an li qaYuwa’ ut naq naru nokowulak jo’eb’ li qaChoxahil Na’ qaYuwa’.

• B’ichahomaq sa’ komonil “Laa’in jun ralal li Dios” (B’ichleb’aal choq’ reheb’ li Kok’al, 2–3) ut kanab’eb’ li kok’al chixk’utb’aleb’ rib’ chi ruq’eb’ rajlal sut naq te’xb’icha “laa’in.” Patz’ reheb’ naq te’xb’icha wi’chik li b’ich, te’xjal li aatin “laa’in” rik’in “laa’at” ut te’xk’ut chi ruq’ jun chik ch’ina al sa’ li tzoleb’aal.

Tzol’leb’ ut Sumwank 76:40–42

Li Jesukristo a’an aj Kolol re li ruchich’och’.

Li aatin evangelio naraj naxye chaab’il esil. Li chaab’il esil li naxk’am chaq li evangelio a’an naq li Jesukristo “kichal sa’ li ruchich’och’ … re xch’ajob’resinkil chiru chixjunil li maa’usilal” (raqal 41).

Kok’ k’anjel naru chi b’aanumank

• Seraq’i reheb’ li kok’al junjunqeb’ li chaab’il esil toje’ xawab’i. Kanab’eb’ chi aatinak chirixeb’ chaab’il esil xe’rab’i a’an. Chirix a’an wotz rik’ineb’ li chaab’il esil re li evangelio rik’in rilb’al ru Tzol’leb’ ut Sumwank 76:41–42. Patz’ reheb’ k’a’ru neke’reek’a chirixeb’ li chaab’il esil a’an. Wotz rik’ineb’ a’an li sahil ch’oolejil nakaweek’a xb’aaneb’ li chaab’il esil a’an.

• K’ut jun xjalam-uuch li Jesukristo. Patz’ reheb’ li kok’al ma neke’xnaw k’a’ru kixb’aanu li Jesukristo choq’ qe. K’ut chiruheb’ jun k’a’aq re ru tz’aj ru ut jun chik saq ru (jo’ jun li sut malaj jun perel li hu), ut ch’olob’ naq li maak a’an chanchan li tz’aj sa’ li qamusiq’, a’b’an li Jesukristo kichal chiqatenq’ankil re naq saqaq wi’chik qu.

  li Jesus rik’ineb’ li kok’al

  Kanab’eb’ li kok’al, xb’aan laj J. Kirk Richards

Tzol’leb’ ut Sumwank 76:62

Lin Choxahil Yuwa’ naraj naq tinwulaq wi’chik chi wank rik’in a’an chi junelik.

Lix k’utb’esinb’il matk’ laj Jose Smith ut laj Sidney Rigdon chirix li choxahil awa’b’ejihom kixk’utb’esiheb’ xninqal osob’tesihom kawresinb’il xb’aan li Dios choq’ reheb’ li ralal xk’ajol, jo’ ajwi’ li k’a’aq re ru tento te’qab’aanu re xk’ulb’aleb’.

Kok’ k’anjel naru chi b’aanumank

• Aatinan rik’ineb’ li kok’al chirixeb’ li oxib’ chi awa’b’ejihom ke’ril laj Jose ut laj Sidney sa’ li k’utb’esinb’il matk’. (Naru nakawil ru xcha’al li “Ch’ol 26: Li oxib’ chi awa’b’ejihom re li choxa” [Eb’ li Esilal sa’ li Tzol’leb’ ut Sumwank, 97–103] malaj chixjunil li ch’ol, malaj ut, k’ut li video natawman sa’ ChurchofJesusChrist.org.) Patz’ reheb’ li kok’al k’a’ru nawulak chiruheb’ sa’ li k’utb’esinb’il matk’. K’e aach’ool chixch’olob’ankil chi us li choxahil awa’b’ejihom ut ch’olob’ xyaalal naq aran naraj li qaChoxahil Yuwa’ naq toowanq.

• Il ru choq’ reheb’ li kok’al Tzol’leb’ ut Sumwank 76:62, ut kanab’eb’ chixyiib’ankileb’ xjalam-uucheb’ a’an rik’in li qaChoxahil Yuwa’ ut li Jesukristo sa’ li choxahil awa’b’ejihom.

reetalil li k‘utuk

Xk’utb’al li tzol’leb’: Kok’al ak ninqeb’

Tzol’leb’ ut Sumwank 76:5, 41–42, 69

Li Jesukristo a’an lin Kolonel.

Tenq’aheb’ li kok’al chixtawb’al ru naq li xchaq’al ruheb’ osob’tesihom naxyeechi’i li Dios choq’ reheb’ li tiikeb’ sa’ li yu’am chalel naru neke’uxman sa’ xk’ab’a’ li Kolonel Jesukristo.

Kok’ k’anjel naru chi b’aanumank

• Tz’iib’a chiru li pizarron: K’a’ru xb’aanu li Jesukristo choq’ we? Kanab’eb’ li kok’al chirilb’al ru sa’ xch’ooleb’ li raqal 5, eb’ li raqal 41–42 malaj li raqal 69 sa’ li tasal 76, ut te’xsik’ xsumenkileb’ li patz’om wan chiru li pizarron. Kanab’eb’ chixwotzb’al lix sumehomeb’ (chi’ilmanq ajwi’ “Kixtaqla li Ralal,” B’ichleb’aal choq’ reheb’ li Kok’al, 20–21). Chan ru naru naqak’ut qab’antioxihom chirix li k’a’ru kixb’aanu li Kolonel choq’ qe?

• Tz’iib’a li rox xraqalil li paab’aal chiru li pizarron, ut kanab’eb’ junjunq yamyo sa’ xna’ajeb’ junjunq aatin aajeleb’ ru. K’e reheb’ li kok’al junjunq kok’ setb’il hu b’ar wi’ tz’iib’anb’ilaqeb’ li aatin maak’a’eb’ ut kanab’eb’ chixk’eeb’aleb’ li kok’ hu sa’ lix na’ajeb’ chiru li pizarron. K’a’ru naxk’ut lix raqalil li paab’aal chirix k’a’ut naq naqaj ru li Jesukristo? (chi’ilmanq ajwi’ li video “Por qué necesitamos un Salvador,” ChurchofJesusChrist.org).

Tzolʼlebʼ ut Sumwank 76:12, 15–19, 114–16

Lix tzolb’aleb’ li loq’laj hu naru nikinixtenq’a “chixtawb’al ru li k’a’aq re ru re li Dios.”

Laj Jose Smith ut laj Sidney Rigdon ke’xk’ul Tzol’leb’ ut Sumwank 76 naq yookeb’ chaq chi k’oxlak chirixeb’ li loq’laj hu. Tenq’aheb’ li kok’al chirilb’al chan ru naq xtzolb’aleb’ li loq’laj hu naru naxk’e xb’oqb’al lix k’utb’esihom li Santil Musiq’ej.

Kok’ k’anjel naru chi b’aanumank

• Patz’ reheb’ li kok’al ma neke’xnaw k’a’ru yookeb’ chixb’aanunkil laj Jose Smith ut laj Sidney Rigdon naq ke’ril li k’utb’esinb’il matk’ wan sa’ Tzol’leb’ ut Sumwank 76. Kanab’eb’ chirilb’al ruheb’ li raqal 15–19 re xtawb’al a’an. Wotz resil junaq hoonal rik’ineb’ b’ar wi’ xak’ul aamusiq’ankil naq yookat chaq chirilb’aleb’ ru li loq’laj hu ut kanab’eb’ chi aatinak chirixeb’ lix musiq’anb’il eek’ahom naq neke’rileb’ ru li loq’laj hu.

• Patz’ reheb’ li kok’al naq te’xmutz’ li ru ut te’xyal xb’aanunkil k’a’ruhaq jo’ xb’onb’al junaq jalam-uuch malaj xteeb’al junaq reheb’ li loq’laj hu b’ar wi’ natawman junaq raqal nawb’il ru. B’ar wan junjunqeb’ li k’a’aq re ru li ch’a’ajaq raj chiqu xb’aanunkil wi ta tz’aptz’ookeb’ li qamusiq’ejil uhej? Ilomaq ru sa’ komonil Tzol’leb’ ut Sumwank 76:12, 15–19, 114–16 re xtawb’al k’a’ru tento taqab’aanu re naq te’teemanq xsa’eb’ li qamusiq’ejil uhej.

Tzolʼlebʼ ut Sumwank 76:50–70

Li qaChoxahil Yuwa’ ak xkawresi jun choxahil awa’b’ejihom choq’ we.

Li xnawb’al chirix li choxahil awa’b’ejihom xkawresi li Dios naru naxmusiq’aheb’ li kok’al “chi q’axok-u rik’in paab’aal” (raqal 53) li yale’k-ix ut li aaleek te’xk’ul.

Kok’ k’anjel naru chi b’aanumank

• Wi ani raj tixpatz’, “K’a’ut naq tento tintaaqe li Jesukristo ut tinpaab’eb’ lix taqlahom?” k’a’ raj ru taqaye? Kanab’eb’ li kok’al chixtawb’aleb’ sumenk sa’ Tzol’leb’ ut Sumwank 76:50–70, b’ar wi’ na’aatinak chirixeb’ li ani neke’xk’ul li junelik yu’am sa’ li choxahil awa’b’ejihom. Kanab’eb’ chixk’utb’esinkil lix sumenkil li patz’om. Ch’olob’ xyaalaleb’ li xninqal osob’tesihom li kawresinb’ileb’ xb’aan li qaChoxahil Yuwa’ choq’ qe wi naqataaqe li Jesukristo.

• Yiib’ xjalam-uuch jun nimla saq’e chiru jun perel li hu ut set jo’ chanru jun jorb’a-k’a’uxlej. Jek’iheb’ lix cha’alil sa’ xyanqeb’ li kok’al rochb’een jun reheb’ li raqal a’in reheb’ li loq’laj hu re naq te’ril ru: Tzol’leb’ ut Sumwank 76:51; 76:52; 76:53; 131:1–2. Kanab’eb’ chixtawb’al sa’eb’ li raqal xe’tz’aq k’a’ruhaq tento te’xb’aanu re xk’ulb’al li junelik yu’am sa’ li choxahil awa’b’ejihom (sa’ junjunq reheb’ li raqal wan wiib’ oxib’ li sumenk) ut te’xtz’iib’a chiru lix cha’al li saq’e. Naq yooqeb’ chi k’anjelak sa’ komonil re xyiib’ankil li jorb’a-k’a’uxlej, ye reheb’ laa woyb’enihom rik’ineb’ naq rik’in xtenq’ li Kolonel, naru neke’wulak chi wank sa’ li choxahil awa’b’ejihom.

reetalil li tzolok

Xb’oqb’aleb’ chi tzolok sa’ kab’l

K’e xb’oqb’aleb’ li kok’al chiroksinkil li perel re kok’ k’anjel re li xamaan a’in re xk’utb’al chiruheb’ lix junkab’al li xe’xtzol chirix li k’utb’esinb’il matk’ ke’xk’ul laj Jose Smith ut laj Sidney Rigdon.

Xchaab’ilob’resinkil li qak’utum

Oksiheb’ li loq’laj hu. Us ta toj maji’ neke’xnaw ilok ru hu li kok’al nakatzoleb’, oksiheb’ li loq’laj hu chi kok’ aj xsa’ naq nakatk’utuk. K’e chixnaweb’ naq eb’ li yaal nakak’ut chiruheb’ neke’el chaq sa’eb’ li loq’laj hu.

perel re kok’ k’anjel: naru ninwan rik’in lin Choxahil Yuwa’ sa’ li choxahil awa’b’ejihom