li Jesus rik’ineb’ li karneer

Saʼ raam laj Ilol Karneer, xb’aan laj Simon Dewey

28 junio─4 julio

Tzolʼlebʼ ut Sumwank 71–75

“Maajun k’anjeleb’aal li yiib’anb’il re eepleetinkil taa’usaaq”

Li Elder Quentin L. Cook kixk’ut, “Nachal lix wankil li Santil Musiq’ej naq na’ux xtzolb’aleb’ li loq’laj hu ut li tijok sa’ li ochoch” (“Jalok ch’oolej li cham ut li nakana chirix li qaChoxahil Yuwa’ ut li Qaawa’ Jesukristo,” Jolomil ch’utub’aj-ib’ re noviembre 2018).

Tz’iib’a li nakak’oxla

Chalen chaq xka’ch’inal, ke’wan li ke’xwech’ rix laj Jose Smith—jo’ ajwi’ li xik’ ke’ilok re—naq yoo chaq chixyalb’al xq’e chixb’aanunkil lix k’anjel li Dios. A’b’an k’a’jo’ wi’chik tana’ naq kiyot’e’ li raam sa’ xraqik li chihab’ 1831 naq laj Ezra Booth chi k’utk’u ki’ok chixsachb’al xwankil li Iglees, xb’aan naq a’an kiwan chaq junxil jo’ aj paab’anel. Laj Ezra kiril chaq laj Jose chiroksinkil lix wankil li Dios re xk’irtesinkil jun li ixq. Kik’ehe’ xb’oqb’al chirochb’eeninkil laj Jose sa’ li xb’een b’eenik re rilb’al li ch’och’ Sion sa’ Missouri. A’b’an chirix a’an kisach xpaab’aal, ut re xsachb’al xwankil li Profeet, kixpuktesi junjunqeb’ li hu sa’ jun periodico aran Ohio. Ut ki’usa b’ayaq lix k’anjel, xb’aan naq wan “li ra ki’eek’aman chirix li iglees” sa’ li na’ajej a’an (Tzol’leb’ ut Sumwank 71, xtiklajik li tasal). K’a’ raj ru tento te’xb’aanu laj paab’anel naq na’uxman chanchan a’an? Moko jun ajwi’ ta li sumehom li taak’anjelaq sa’ chixjunileb’ li hoonal, a’ut chi kok’ aj xsa’, jun raqal lix sumehom li Qaawa’ a’an xkolb’al rix li yaal ut xq’axb’al ru li tik’ti’ rik’in “xjultikankil li evangelio” (raqal 1). Junelik te’wanq ani te’wech’oq chirix lix k’anjel li Qaawa’, a’b’an sa’ roso’jik, “maajun k’anjeleb’aal li yiib’anb’il re xpleetinkil taa’usaaq” (raqal 9).

Chi’ilmanq “Ezra Booth e Isaac Morley,” Revelaciones en contexto, 143.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 71

Li Qaawa’ tixsach xna’leb’eb’ li ani neke’xwech’ rix lix k’anjel sa’ li kutan k’oxlanb’il xb’aan a’an.

Maare yoo qak’a’uxl naq neke’qab’i li kristiaan chixwech’b’al rix malaj chixse’enkil li Iglees malaj eb’ laj jolominel re, tz’aqal wi’chik naq naqaxuwa naq eb’ li nawb’ileb’ ru ut raab’ileb’ qab’aan te’xk’e xxik chirab’inkil li wech’ok-ix a’an. Naq kik’ulman a’in sa’ Ohio sa’ 1831 (chi’ilmanq xtiklajik li tasal Tzol’leb’ ut Sumwank 71), li raatin li Qaawa’ re laj Jose Smith ut laj Sidney Rigdon a’an chirix li paab’aal, ink’a’ li xiw. Naq yooqat chixtzolb’al Tzol’leb’ ut Sumwank 71, k’a’ru nakataw li naxnimob’resi laa paab’aal chirix li Qaawa’ ut lix k’anjel? K’a’ru naxtoch’ aach’ool chirix li na’leb’ kixk’e li Qaawa’ reheb’ lix moos sa’ li hoonal a’an?

Chi’ilmanq ajwi’ Robert D. Hales, “Valor cristiano: El precio del discipulado,” Liahona, noviembre 2008, 72–75; Jörg Klebingat, “Cómo defender la fe,” Liahona, septiembre 2017, 29–33.

Tzolʼlebʼ ut Sumwank 72

Li obiisp a’an aj mertoom sa’ xb’een li musiq’ejil ut li ruchich’och’il k’anjel re lix awa’b’ejihom li Qaawa’.

Naq laj Newel K. Whitney kib’oqe’ choq’ xkab’ obiisp re li Iglees, jalan b’ayaq li teneb’anb’il sa’ xb’een rik’in li teneb’anb’il sa’ xb’eeneb’ li obiisp sa’ li kutan a’in. Qayehaq, li Obiisp Whitney kixjolomi li k’anjel re q’axtesink li eechej jo’ ajwi’ li sik’ok liceens re te’xxaqab’ rib’ aran Missouri, sa’ li ch’och’ Sion. A’ut naq yooqat chirilb’al ru li tz’iib’anb’il chirix lix b’oqb’al ut lix k’anjel sa’ Tzol’leb’ ut Sumwank 72, maare taak’e reetal chan ru naq naxk’am rib’ a’an rik’in li neke’xb’aanu li obiisp sa’ li kutan a’in—maare ink’a’ juntaq’eet li junjunq k’anjel neke’xb’aanu, a’b’an juntaq’eet li musiq’ej li neke’xb’aanu wi’. Qayehaq, chan ru “nakaq’axtesi jun esil” re laa obiisp? (raqal 5). Chan ru naq laa obiisp “naxk’uula lix k’uuleb’aal kab’l li Qaawa’ ” ut naxk’e chi k’anjelak li k’a’ru q’axtesinb’il xb’aaneb’ li komon sa’ lix teep? (che’ilmanq li raqal 10, 12). Chan ru naq xatxtenq’a laa obiisp?

Chi’ilmanq ajwi’ Temas del Evangelio, “Obispo,” topics.ChurchofJesusChrist.org.

eb’ li barril ut b’oolx nujenaq rik’in tzakemq

Laj Newel K. Whitney kixb’eresi lix k’uuleb’aal li obiisp.

Tzolʼlebʼ ut Sumwank 73

Naru tinsik’eb’ hoonal re xwotzb’al li evangelio.

Chirix naq laj Jose Smith ut laj Sidney Rigdon ke’sutq’i chaq sa’ xjultikankil li evangelio re xtuqub’ankil ru li sachk yoob’anb’il xb’aan laj Ezra Booth (chi’ilmanq Tzol’leb’ ut Sumwank 71), li Qaawa’ kixye reheb’ naq te’ok wi’chik chixjaltesinkil ru li Santil Hu (chi’ilmanq li K’utul Raqal reheb’ li Loq’laj Hu, “Xjaltesinkil ru li Santil Hu xb’aan laj Jose Smith”). A’ut kiraj ajwi’ naq toj yooqeb’ chixjultikankil li evangelio. Naq yooqat chirilb’al ru Tzol’leb’ ut Sumwank 73, k’oxlan chirix chan ru naq naru tatwanq rajal chixjultikankil li evangelio “a’ yaal jo’ naruhan”(raqal 4) sa’ laa yu’am sa’ xyanq chixjunil chik li teneb’anb’il sa’ aab’een.

Tzol’leb’ ut Sumwank 75:1–12

Li Qaawa’ narosob’tesiheb’ li neke’jultikank re lix evangelio chi tiikeb’ xpaab’aal.

Re xpaab’ankil li taqlahom “ayuqex sa’ chixjunil li ruchich’och’ ” re xjultikankil li evangelio (Tzol’leb’ ut Sumwank 68:8), naab’aleb’ li xb’eenil li tiikeb’ chi paab’ank ke’xsik’ xkomon li na’leb’ chirix chan ru naraj li Qaawa’ naq te’xtz’aqob’resi ru li taqlahom a’in. K’a’ruheb’ li aatin ut ch’ol aatin nakataw sa’ Tzol’leb’ ut Sumwank 75:1–12 li nakate’xtenq’a chixtawb’al ru chan ru xjultikankil li evangelio chi chaab’il? K’a’ruheb’ li osob’tesink naxyeechi’i li Qaawa’ reheb’ lix misioneer li tiikeb’ chi paab’ank? K’oxlan chirix chan ru naq eb’ li na’leb’ ut osob’tesink a’in wankeb’ rilom aawik’in naq yookat chixwotzb’al li evangelio.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzolʼlebʼ ut Sumwank 71.K’a’ru kipatz’man naq te’xb’aanu laj Jose Smith ut laj Sidney Rigdon naq wankeb’ li yookeb’ chixwech’b’al rix li Iglees ut eb’ li neke’jolomink re? Chan ru “naqakawresi li b’e” re naq eb’ li tenamit te’xk’uleb’ lix k’utb’esinb’il na’leb’ li Dios? (Tzolʼlebʼ ut Sumwank 71:4).

Tzol’leb’ ut Sumwank 72:2.Chan ru x’osob’tesiik li qajunkab’al xb’aaneb’ li obiisp? K’a’ru xpatz’ li qa’obiisp naq taqab’aanu, ut chan ru naru taqaxxaqab’ xwankil? Maare laa junkab’al taaruuq te’xyiib’ jun ch’ina hu re xb’antioxinkil re li obiisp li k’anjel naxb’aanu.

Tzol’leb’ ut Sumwank 73:3–4.Ma usaq choq’ re laa junkab’al xtzolb’al xkomon li na’leb’ chirix lix jaltesinkil ru li Santil Hu xb’aan laj Jose Smith? (chi’ilmanq li K’utul Raqal reheb’ li Loq’laj Hu, “Xjaltesinkil ru li Santil Hu xb’aan laj Jose Smith”). Taaruuq teeril ru junjunqeb’ li raqal li ke’jalman sa’ Xjaltesinkil ru li Santil Hu xb’aan laj Jose Smith (JJS) ut tex’aatinaq chirix li yaalil na’leb’ loq’eb’ li kixk’utb’esi li Qaawa’ rik’in li Profeet. Jo’ eetalil, chi’ilmanq JJS Genesis 14:25–40; Genesis 50:24–38; Mateo 4:1, 5–6, 8–9; ut Lukas 2:46 li wan chirix li K’utul Raqal reheb’ li Loq’laj Hu

Tzol’leb’ ut Sumwank 74:7.K’a’ru naxk’ut li raqal a’in chirix li Jesukristo ut eb’ li kok’al?

Tzolʼlebʼ ut Sumwank 75:3–5, 13, 16.Naru taatenq’a laa junkab’al chixtawb’al ru chan ru naq li Qaawa’ naraj naq took’anjelaq chiru rik’in aatinak chirix k’a’ru xjalanil naq “wank qaq’emal” rik’in naq “nokok’anjelak rik’in xnimal qametz’ew.” Maare taaruuq taasik’ ru junjunqeb’ li k’anjel nekeb’aanu sa’ ochoch ut taakanab’eb’ li komon sa’ li junkab’al chixk’utb’al chan ru xb’aanunkileb’ li k’anjel a’an rik’in q’emal ut chirix a’an chan ru xb’aanunkileb’ rik’in xnimal xmetz’eweb’. Chan ru naru took’anjelaq chiru li Qaawa’ rik’in xnimal qametz’ew? Jo’ yeeb’il sa’ Tzol’leb’ ut Sumwank 75:3–5, 13, 16, k’a’ru naxyeechi’i a’an reheb’ lix moos li tiikeb’ chi paab’ank?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Sa’ xk’anjel li Dios chiqayal tz’aqal qaq’e,” Eb’ li B’ich, 155.

Xchaab’ilob’resinkil li tzolok aajunes

Sik’eb’ li aatin ut li ch’ol aatin li nawulak chawu. Naq yookat chi tzolok, li Musiq’ej naru tatxmusiq’a chixk’eeb’al reetal junaq ch’ol aatin malaj raqal. K’oxla xtz’iib’ankileb’ li aatin malaj ch’ol aatin sa’ Tzol’leb’ ut Sumwank 71–75 li nakate’xmusiq’a.

saaj winq rik’in jun aj jolominel re li tijonelil

Xjalam-uuch jun saaj winq rik’in jun aj jolominel re li tijonelil, xb’aan laj D. Keith Larson