“12–18 julio. Tzolʼlebʼ ut Sumwank 77–80: “Laa’in tink’am eeb’e cheru,” ” Kim, Taaqehin—Choq’ reheb’ li komon ut li junkab’al: Li Tzol’leb’ ut Sumwank 2021 (2020)
“12–18 julio. Tzolʼlebʼ ut Sumwank 77–80,” Kim, Taaqehin—Choq’ reheb’ li komon ut li junkab’al: 2021
Sutq’iik sa’ ochoch, xb’aan laj Yongsung Kim
12–18 julio
Tzolʼlebʼ ut Sumwank 77–80
“Laa’in tink’am eeb’e cheru”
Li Qaawa’ kixk’ut chiru laj Jose Smith naq “tixye sa’ lix xik li aatin re chaab’il na’leb’ ” (Tzol’leb’ ut Sumwank 78:2). K’a’ruheb’ li aatin re chaab’il na’leb’ nakak’ul naq yookat chi tzolok sa’ Tzol’leb’ ut Sumwank 77–80?
Tz’iib’a li nakak’oxla
Maji’ numenaq wiib’ chihab’ chaq xk’ojlajik wi’chik lix Iglees li Jesukristo, ut ak ke’wan numenaq wiib’ mil xkomon ut yoo chi k’iik sa’ junpaat. Sa’ marzo re 1832 laj Jose Smith ut xkomoneb’ aj jolominel re li Iglees ke’xch’utub’ rib’ “re te’aatinaq chirix junjunq xk’anjel li Iglees”: li k’anjel re xpuktesinkileb’ li k’utb’esinb’il na’leb’, re xloq’b’al li ch’och’ choq’ re li ch’utub’aak, ut re rilb’aleb’ li neb’a’ (chi’ilmanq Tzol’leb’ ut Sumwank 78, xtiklajik li tasal). Re xtenq’ankileb’, li Qaawa’ kixtaqla jun ch’ina ch’uut chi aj jolominel re li Iglees chixtikib’ankil li Molam sa’ Junajil, jun molam li tixyal xq’e “re xwaklesinkil lix na’leb’ ” li Qaawa’ (raqal 4) chirixeb’ li k’anjel a’in. Ut us ta yoo chaq chixtusub’ankil li ruchich’och’il k’anjel a’in, li Qaawa’ jayalinb’il rib’ sa’ li k’a’ re ru re li junelik q’e kutan. Sa’ roso’jik, li rajom jun li k’uub’leb’aal hu malaj jun li k’uuleb’aal kab’l—ut chixjunil chik li wan sa’ li rawa’b’ejihom li Dios—a’an xkawresinkileb’ li ralal xk’ajol a’an chixk’ulb’al “jun na’ajej sa’ li choxahil ruchich’och’ ” ut “li b’ihomal re junelik q’e kutan” (raqal 7, 18). Ut wi ch’a’aj xtawb’aleb’ ru li osob’tesink a’an anajwan sa’ xyi xlaatz’il li qayu’am wulaj wulaj, a’an naxye qe, “Chiwanq xsahil eech’ool, xb’aan naq laa’in tink’am eeb’e cheru” (raqal 18).
Li na’leb’ re xtzolb’aleb’ li loq’laj hu aajunes
Li Dios naxk’utb’esiheb’ lix muqmuukil na’leb’ chiruheb’ li neke’xsik’ xnawb’aleb’ ru.
Kab’laju chihab’ chirix li Xb’een K’utb’esink, li aatin sa’ Santiago 1:5 naq “chixtz’aamaq re li Dios” toj yoo chixb’eresinkil laj Jose Smith naq yoo chi majelo’k xna’leb’. Naq a’an ut laj Sidney Rigdon ke’wan xpatz’om chirix li hu Apokalipsis naq yookeb’ chixjaltesinkil ru li Santil Hu, laj Jose Smith kixsik’ xk’ulb’al xna’leb’ rik’in li Dios. Naq yooqat chirilb’al ru Tzol’leb’ ut Sumwank 77, k’oxla xtz’iib’ankil li na’leb’ nakak’oxla sa’ xmaril li perel reheb’ li ch’ol na’aatinak wi’ sa’ li hu Apokalipsis.
Jo’kan ajwi’, k’oxlan chirix chan ru naru taataaqe xna’leb’ li Profeet aj Jose naq yookat chixtzolb’aleb’ li loq’laj hu. Maare taapatz’ re laa Choxahil Yuwa’, “K’a’ru tento tintaw ru?”
Xjaltesinkil ru li Santil Hu, xb’aan li xLiz Lemon Swindle
K’a’ru li Molam sa’ Junajil?
Li Molam sa’ Junajil kik’uub’aman re xb’eresinkil lix k’anjel li Iglees chirix li puktesink hu ut chirix li eechej sa’ Ohio ut Missouri. Sa’ li molam a’in ke’wan laj Jose Smith, laj Newel K. Whitney, ut xkomoneb’ aj jolominel re li Iglees li ke’xch’utub’ li k’a’ru wan reheb’ re xk’eeb’al li k’a’ru taak’anjelaq choq’ re xk’iijik li Iglees. A’b’anan, li Molam sa’ Junajil ki’ok sa’ k’as ut kiraqman sa’ 1834 naq ink’a’ chik ke’ru chixkuyb’al xnimal li k’as.
Chi’ilmanq ajwi’ “Newel K. Whitney y la Firma Unida,” Revelaciones en contexto 151–157; “Firma Unida,” Temas de la historia de la Iglesia, ChurchofJesusChrist.org/study/church-history.
Ninru chixtenq’ankil “xwaklesinkil lix na’leb’ ” li Iglees.
Li Qaawa’ kixye re laj Jose Smith ut xkomoneb’ laj jolominel re li Iglees naq xb’eresinkil jun li k’uuleb’aal kab’l ut jun k’uub’leb’aal hu taatenq’anq “chixwaklesinkil li na’leb’, li k’ulub’anb’il eeb’aan” (Tzol’leb’ ut Sumwank 78:4). K’a’ru li “na’leb’ ” re li Iglees jo’ taaye laa’at? K’oxlan chirix a’in naq yooqat chirilb’al ru Tzol’leb’ ut Sumwank 78:1–7. Maare xk’oxlankileb’ li raqal a’in taaruuq tatxtenq’a chixtz’aqob’resinkil ru laa b’oqb’al sa’ li Iglees malaj chi k’anjelak chiru laa junkab’al. Chan ru naq laa k’anjel laa’at naru “tixwaklesi lix na’leb’ ” li Qaawa’? Chan ru naq a’an yoo chakawresinkil choq’ re “jun na’ajej sa’ li choxahil ruchich’och’ ”? (raqal 7).
Li Qaawa’ tixk’am inb’e chiwu.
Ma wan hoonal naq nakaweek’a naq chanchanat jun ch’ina al, maare xb’aan naq wan k’a’ruhaq “toj maji’ nakataw ru” malaj “ink’a’ nakatru chixkuyb’al”? (Tzol’leb’ ut Sumwank 78:17–18). Sik’ li na’leb’ sa’eb’ li raqal a’in li naru tatxtenq’a “chi wank xsahil aach’ool” (raqal 18) sa’eb’ li hoonal jo’ a’an. K’a’ut nakak’oxla naq li Qaawa’ wan naq naxye “kok’al” reheb’ laj taaqenel re? (raqal 17). Taaruuq ajwi’ tatk’oxlaq chirix chan ru naq li Qaawa’ “yoo chixk’amb’al aab’e chawu” (raqal 18).
Li b’oqok chi k’anjelak chiru li Dios aajel wi’chik ru chiru li na’ajej b’oqb’ilin wi’ chi k’anjelak.
Li Elder David A. Bednar kixk’ut li na’leb’ a’in chirix Tzol’leb’ ut Sumwank 80, “Sa’ li k’utb’esinb’il na’leb’ a’in li Kolonel naxk’ut chiqu naq aajel ru li b’oqok chi k’anjelak sa’ junaq li na’ajej, a’ut kub’enaq lix aajelil ru li na’ajej chiru li b’oqok chi k’anjelak” (“B’oqb’il sa’ li k’anjel,” Jolomil ch’utub’aj-ib’ re abril 2017). K’oxla chirix laa b’oqb’al sa’ li Iglees anajwan malaj li ke’wan junxil. K’a’ru aak’ulum li xatxtenq’a chixtzolb’al naq yaal li raatin li Elder Bednar? K’a’ruheb’ chik li na’leb’ naru nakataw sa’ Tzol’leb’ ut Sumwank 79–80 li te’ruuq chixtenq’ankil anihaq li toje’ xk’ul jun xb’oqb’al?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Tzol’leb’ ut Sumwank 77:2.Chirix rilb’aleb’ ru li raqal a’in, eb’ li komon sa’ li junkab’al taaruuq te’xyiib’ xjalam-uucheb’ “li xul, … li k’a’ru naxjukuki rib’, … [malaj] li xik’anel xul rub’el choxa” li yo’ob’tesinb’ileb’ xb’aan li Dios. K’a’ru naqatzol chirixeb’ lix yo’ob’tesihom li Dios sa’ li raqal a’in? (chi’ilmanq ajwi’ Tzol’leb’ ut Sumwank 59:16–20). Taaruuq ajwi’ teeb’icha jun li b’ich chirixeb’ lix yo’ob’tesihom li Dios, jo’ “Raab’ilin xb’aan li Dios sa’ choxa” (B’ichleb’aal choq’ reheb’ li Kok’al, 16–17), ut taak’ut li jalam-uuch wan sa’ li tusleb’ aatin a’in.
-
Tzol’leb’ ut Sumwank 77:14.Li raqal a’in naxch’olob’ naq laj Jwan kixk’ux jun li ch’ina hu li nareetali lix taqlanb’il k’anjel chixch’utub’ankil Israel. K’a’ru naxk’ut li eetalil re wa’ak chirix chan ru tento taqil li qak’anjel sa’ xch’utub’ankil Israel, malaj chan ru taqab’aanu xkomoneb’ chik li k’anjel naraj li Dios naq taqab’aanu? Wahe’ junjunqeb’ chik li raqal b’ar wi’ li wa’ak nareetali jun musiq’ejil yaal: Jwan 6:48–51; 2 Nefi 32:3; Moroni 4. Maare taaruuq taak’uub’ jun tzakemq nawulak chiru li junkab’al re teetzeka sa’ komonil naq yooqex chi aatinak.
-
Tzol’leb’ ut Sumwank 78:17–19.Eb’ li komon sa’ li junkab’al taaruuq te’xyiib’ xjalam-uucheb’ li osob’tesink naxk’e li Dios li neke’xb’antioxi. K’a’ru yooko chixb’aanunkil re xk’utb’al li qab’antioxihom choq’ reheb’ li osob’tesink a’an? Taaruuq ajwi’ tex’aatinaq chirix chan ru naq jo’ junkab’al yookex chixtaaqenkil li na’leb’ re xk’ulb’al “chixjunil li k’a’aq re ru rik’in b’antioxink” (raqal 19). K’a’ru naxyeechi’i li Qaawa’ reheb’ li neke’xb’aanu a’an?
-
Tzol’leb’ ut Sumwank 79:1.Wotz lix nawom aach’ool chirix li “wankilal” xak’ul naq xatk’ojob’aak sa’ li tijonelil malaj sa’ junaq aab’oqb’al sa’ li Iglees. K’a’ruheb’ li maatan ut li musiq’ahom li xatrosob’tesi wi’ li Qaawa’ naq xatk’anjelak chiru?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “K’e sa’ ajl li k’iila usilal,” Eb’ li B’ich, 153.
Xchaab’ilob’resinkil li qak’utum
Yiib’ jun jalam-uuch. Jo’ junkab’al, naru teeril ru junjunq raqal, ut taakanab’eb’ li komon sa’ li junkab’al chixyiib’ankil jun jalam-uuch chirix li k’a’ru xe’ril ru. K’eheb’ chi k’utk’u li jalam-uuch sa’ lee rochoch re xjultikankil re laa junkab’al eb’ li na’leb’ xetzol.
Li rawimq li Dios, xb’aan laj Sam Lawlor