revelation manuscript book in display case

21–27 junio

Tzolʼlebʼ ut Sumwank 67–70

“Wan xloq’al … jo’ xb’ihomal chixjunil li Ruchich’och’ ”

Us ta naab’al reheb’ li k’utb’esinb’il na’leb’ sa’ li Tzol’leb’ ut Sumwank ke’k’eeman re junjunq li kristiaan choq’ re li ch’a’ajkilal li wankeb’ wi’ a’an, toj “wankeb’ xchaab’ilal choq’ reheb’ chixjunil li winq” (“Lix Ch’olob’ahomeb’ li Kab’laju chi Apostol chirix lix yaalalil li hu Tzol’leb’ ut Sumwank,” xtikib’ankil re li Tzol’leb’ ut Sumwank). Naq yooqat chi tzolok, sik’eb’ li yaal ut na’leb’ li wankeb’ xchaab’ilal choq’ aawe laa’at.

Tz’iib’a li nakak’oxla

Chiruheb’ li chihab’ 1828 toj 1831, li Profeet aj Jose Smith kixk’ul k’iila k’utb’esinb’il na’leb’ rik’in li Qaawa’, sa’ li wankeb’ wi’ li choxahil na’leb’ choq’ re junjunqeb’ li kristiaan, na’leb’ chirix chan ru xjolominkil li Iglees, ut k’utb’esinb’il matk’ chirix roso’jikeb’ li kutan. A’b’an ke’wan naab’aleb’ li komon li maji’ neke’ril ruheb’. Maji’ puktesinb’ileb’ chaq li k’utb’esinb’il na’leb’, ut ke’wan chi tz’iib’anb’il yal sa’ junjunqeb’ li perel hu li ke’jek’iman sa’ xyanqeb’ li komon ut k’amb’ileb’ xb’aaneb’ li misioneer.

Sa’ noviembre re 1831, laj Jose kixch’utub’eb’ laj jolominel re li Iglees re te’aatinaq chirix xpuktesinkileb’ li k’utb’esinb’il na’leb’. Chirix xsik’b’al li rajom li Qaawa’, eb’ laj jolominel ke’xk’uub’ xpuktesinkil li Hu re Taqlahom—a’an jun li hu li taa’ok moqon choq’ li Tzol’leb’ ut Sumwank. Sa’ junpaat chik chixjunileb’ te’ruuq chirilb’al ru li raatin li Dios chi k’utb’esinb’il rik’in xtz’uumal re jun yo’yookil profeet, tz’aqal reetalil naq “lix laawil li muqmuukil na’leb’ re li rawa’b’ejihom li qaKolonel k’eeb’il wi’chik sa’ ruq’eb’ li winq.” Xb’aan a’in ut xkomoneb’ chik li na’leb’, eb’ laj santil paab’anel sa’ li kutan a’an jo’ ajwi’ sa’ li kutan a’in neke’xk’oxla naq eb’ li k’utb’esinb’il na’leb’ a’in, “wankeb’ xloq’al … jo’ xb’ihomal chixjunil li Ruchich’och’ ” (Tzol’leb’ ut Sumwank 70, xtiklajik li tasal).

Chi’ilmanq Santos, 1:143–146.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 67:1–9; 68:3–6

Li Dios naxxaqab’eb’ xwankil lix moos ut li aatin neke’xye sa’ lix k’ab’a’.

Chanchan naq moko ch’a’aj ta xsik’b’al ru xpuktesinkileb’ li na’leb’ li ke’k’utb’esiman chiru laj Jose Smith, a’b’an ke’wan junjunq reheb’ laj jolominel li ke’wan xk’a’uxl chirix. Jun lix k’a’uxl a’an xmajelal li aatin kiroksi laj Jose Smith sa’ xtz’iib’ankileb’ li k’utb’esinb’il na’leb’. Li k’utb’esinb’il na’leb’ wan sa’ li tasal 67 kichal jo’ xsumenkil li k’a’uxlej a’an. K’a’ru nakatzol chirixeb’ li profeet ut li k’utb’esinb’il na’leb’ sa’eb’ li raqal 1–9? K’a’ chik ru li na’leb’ nakak’ul sa’ 68:3–6?

Rub’elaj naq kik’uub’aman li Hu re Taqlahom, ke’wan junjunq laj jolominel re li Iglees li ke’xjuch’ xk’ab’a’eb’ chiru jun hu li kixch’olob’ naq yaaleb’ li k’utb’esinb’il na’leb’ wankeb’ sa’ li hu. Re rilb’al ru lix ch’olob’ahomeb’, chi’ilmanq “Testimony, circa 2 November 1831,” Revelation Book 1, 121, josephsmithpapers.org.

Tzol’leb’ ut Sumwank 68:1–8

Lix musiq’ahom li Santil Musiq’ej naxk’ut li rajom li Qaawa’.

Kiyeeman li aatin sa’eb’ li raqal a’in naq laj Orson Hyde ut xkomoneb’ chik ke’xk’ul xb’oqb’aleb’ “chixch’olob’ankil li evangelio li junelik nakana, rik’in lix Musiq’ li yo’yookil Dios, chiru li junjunq teepal, ut sa’ li junjunq chi ch’och’ ” (raqal 1). Chan raj ru naq li aatin wan sa’ li raqal 4 taaruuq tixtenq’a anihaq li taqlanb’il chixjultikankil li evangelio? Chan ru naq wan rilom li aatin a’in aawik’in? K’oxla jun hoonal naq “xat-eek’asiik xb’aan li Santil Musiq’ej” (raqal 3) chixyeeb’al malaj chixb’aanunkil k’a’ruhaq. K’a’ru nakataw sa’eb’ li raqal a’in li naru tixk’e xkawilal aach’ool chixtaaqenkileb’ li reek’asihom li musiq’ej?

Tzolʼlebʼ ut Sumwank 68:25–28

Teneb’anb’il sa’ xb’eeneb’ li na’b’ej yuwa’b’ej xtzolb’aleb’ lix kok’al.

Li Hermana Joy D. Jones, Jolomil Awa’b’ej re li Tzoleb’aal reheb’ li Kok’al, kixye: “Jun laaw re xtenq’ankileb’ li kok’al chixtz’eqtaanankil li maak, a’an naq naqatikib’ xk’utb’al chiruheb’ rik’in rahok li xb’eenil tzol’leb’ ut na’leb’ re li evangelio naq toj ka’ch’ineb’—jo’eb’ li loq’laj hu, eb’ lix Raqalil li Paab’aal, li hu Choq’ re Xkawilaleb’ li Saaj, eb’ li b’ich re li Tzoleb’aal reheb’ li Kok’al, li jun ch’ol chik chi b’ich, ut lix nawom qach’ool laa’o—li te’xk’ameb’ xb’e li kok’al rik’in li Kolonel” (“Jun tasal tenamit li naxtz’eqtaana li maak,” Jolomil ch’utub’aj-ib’ re abril 2017).

Jo’ yeeb’il sa’ Tzol’leb’ ut Sumwank 68:25–28, k’a’ru junjunq reheb’ li “xb’eenil tzol’leb’ re li evangelio” kixye li Hermana Jones naq eb’ li na’b’ej yuwa’b’ej tento te’xk’ut chiruheb’ lix kok’al? K’a’ut naq k’eeb’il li aajel ruhil teneb’ank a’in sa’ xb’eeneb’ li na’b’ej yuwa’b’ej? K’a’ raj ru taaye re jun na’b’ej malaj yuwa’b’ej li ink’a’ nareek’a’ naq moko tz’aqal ta xna’leb’ re xk’utb’al li k’a’aq re ru a’in chiruheb’ lix kok’al?

Chi’ilmanq ajwi’ Tad R. Callister, “Los padres: Principales maestros del Evangelio para sus hijos,” Liahona, noviembre 2014, 32–34.

jun junkab’al yookeb’ chi tzolok

Li ochoch a’an li na’ajej q’axal chaab’il choq’ reheb’ li kok’al re xtzolb’al li evangelio.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 67:10–14.Chan ru naq li sowenal, li xiw, ut li q’etq’etil nokohe’xram chi nach’ok rik’in li Qaawa’? K’a’ut naq li “ruchich’och’il winq” ink’a’ naru chixkuyb’al wank chiru li Qaawa’? (raqal 12; chi’ilmanq ajwi’ Mosiah 3:19). K’a’ru naqataw sa’eb’ li raqal a’in li nokoxmusiq’a “chi kanaak chi wanq qakuyum toj reetal naq tz’aqob’resinb’il qe qu”? (raqal 13).

Jo’ junkab’al, naru ajwi’ teeril wi’chik ru li raatin li Elder Jeffrey R. Holland, Tz’aqalaq eere eeru—junaq kutan” (Jolomil ch’utub’aj-ib’ re octubre 2017).

Tzol’leb’ ut Sumwank 68:3–4.Eb’ li komon sa’ li junkab’al taaruuq te’xwotz xnumsihomeb’ li ke’xkawob’resi lix paab’aaleb’ chirix naq li raatineb’ lix moos li Qaawa’, a’an “li rajom li Dios,” “lix k’oxlahom li Dios,” ut “lix wankilal li Dios choq’ re li kolb’a-ib’ ” (raqal 4). Malaj taaruuq te’xsik’ jun aatin re jun jolomil ch’utub’aj-ib’ toje’ xnume’ li wan rilom rik’in jun ch’a’ajkilal yookex chi nume’k wi’ jo’ junkab’al.

Tzol’leb’ ut Sumwank 68:25–35.Sa’eb’ li raqal a’in, wankeb’ li aajel ruhil na’leb’ choq’ reheb’ “li wankeb’ Sion” (raqal 26). K’a’ru musiq’anb’ilo chixchaab’ilob’resinkil chirix rilb’aleb’ ru li raqal a’in? Maare taawulaq cheru xyiib’ankileb’ xjalam-uuch junjunqeb’ li na’leb’ wankeb’ sa’eb’ li raqal a’in ut xmuqb’aleb’ sa’ lee rochoch. Moqon, naq anihaq tixtaw jun jalam-uuch, taaruuq taawoksi li hoonal a’an re k’utuk chirix li na’leb’ a’an. K’a’ut naq li ochoch a’an li na’ajej q’axal chaab’il choq’ reheb’ li kok’al re xtzolb’al li k’a’aq re ru a’in?

Tzol’leb’ ut Sumwank 69:1–2.Laj Oliver Cowdery kitaqlaak Missouri rik’ineb’ xhuhil li na’leb’ k’utb’esinb’il chiru li profeet, re xk’uub’ankil choq’ hu, ut kixk’am ajwi’ tumin re tenq’ank chixkab’lankil li Iglees aran. K’a’ru li na’leb’ kixk’e li Qaawa’ sa’ li raqal 1 chirix lix b’eenik laj Oliver? K’a’ut naq aajel ru wank sa’ xyanqeb’ li kristiaan “li tiikaqeb’ xch’ool ut xaqxooqeb’ chi paab’ank”? (raqal 1). Ma wan hoonal b’ar wi’ junaq qamiiw xooxk’e chixsik’b’al ru xb’aanunkil li us malaj li ink’a’ us? Chan ru naru taqatenq’aheb’ li qas qiitz’in chixb’aanunkil li us?

Tzol’leb’ ut Sumwank 70:1–4.Li Qaawa’ kixteneb’ sa’ xb’een junjunqeb’ li xb’eenil naq te’xb’eresi xpuktesinkileb’ li k’utb’esinb’il na’leb’. Us ta laa’o moko teneb’anb’ilo ta chi jo’kan, chan ru naq laa’o ajwi wanko “choq’ mertoom sa’ xb’eeneb’ li k’utb’esinb’il na’leb’ ut li taqlahom”? (raqal 3).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li ochoch chanchan choxa,” Eb’ li B’ich, 191.

Xchaab’ilob’resinkil li qak’utum

Xjuntaq’eetankileb’ li loq’laj hu rik’in li qayu’am. Chirix rilb’al ru jun raqal sa’eb’ li loq’laj hu, k’e xb’oqb’aleb’ li komon sa’ li junkab’al chixyu’aminkil. Qayehaq, taaruuq taak’e xb’oqb’aleb’ chixk’oxlankil k’a’ru naru neke’xk’ul sa’ li taaruuq taa’oksimanq wi’ li na’leb’ a’an re li evangelio.

k’uubleb’aal hu re laj Grandin

Li Hu re Taqlahom, li kiwan moqon jo’ li Tzol’leb’ ut Sumwank, kik’uub’aman sa’ jun k’uub’leb’aal hu chanchan li jun a’in.