jun awimq sa’ eq’la

Condado Daviess, Missouri

14–20 junio

Tzol’leb’ ut Sumwank 64–66

“Li Qaawa’ naxpatz’ li aamej, ut li k’a’uxlej li k’eek’o xch’ool”

Li Awa’b’ej Henry B. Eyring kixye: “Kok’ aj xsa’ nawileb’ ru li loq’laj hu rik’ineb’ li patz’om a’in sa’ ink’a’uxl: “K’a’ru naraj li Dios naq tinb’aanu?” malaj “K’a’ru naraj naq tinweek’a?” Rajlal sut nintaweb’ ak’ na’leb’ ut k’oxlahom maajun wa ink’ulum junxil” (“How God Speaks to Me through the Scriptures,” 6 febrero, 2019, blog.ChurchofJesusChrist.org).

Tz’iib’a li nakak’oxla

Sa’eb’ li tiqwal kutan re agosto re 1831, junjunqeb’ li xb’eenil yookeb’ chi sutq’iik Kirtland chirix rilb’al li ch’och’ Sion sa’ Missouri jo’ taqlanb’il xb’aan li Qaawa’. Moko sa ta xb’eenikeb’. Laj Jose Smith, laj Oliver Cowdery, laj Sidney Rigdon, laj Ezra Booth, ut xkomoneb’ yookeb’ xtiq ut tawasinb’ileb’, ut xb’aan a’in naq ki’ok li wech’ok-ib’ sa’ xyanqeb’. Maare ke’xk’oxla naq k’iila kutan taa’ajmanq re xkab’lankil Sion, jun tenamit re rahok, junajil, ut tuqtuukilal.

A’ut re xkab’lankil Sion—aran Missouri sa’ 1831 malaj sa’ li qach’ool ut li qateep sa’ li kutan a’in—ink’a’ na’ajman ru naq tz’aqalaq qe qu. Li Qaawa’ b’an kixye, “sa’ eeb’een laa’ex teneb’anb’il xkuyb’aleb’ maak,” sa’ (Tzol’leb’ ut Sumwank 64:10). A’an naxpatz’ “li aamej, ut li k’a’uxlej li k’eek’o xch’ool” (raqal 34). Ut a’an naxpatz’ li kuyum ut li sak’ahil, xb’aan naq kab’lanb’il Sion sa’ xb’een xk’ojleb’aal “li k’a’ru ka’ch’in,” xb’aaneb’ li ani ink’a’ “neke’lub’ sa’ xb’aanunkil li us” (raqal 33).

Chi’ilmanq ajwi’ Santos, 1:136–137, 139–140.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 64:1–11

Tento tinkuyeb’ xmaak chixjunileb’.

Naq yooqat chirilb’al ru Tzol’leb’ ut Sumwank 64:1–11, k’oxlan chirix jun hoonal naq li Qaawa’ kixkuy laa maak laa’at. Maare naru taak’oxla anihaq tento taakuy xmaak. Chan ru naq li ruxtaan li Kolonel naxjal li nakaweek’a chawix laa’at ut chirixeb’ laa was aawiitz’in? K’a’ut nakak’oxla naq li Qaawa’ nokoxtaqla “chixkuyb’aleb’ xmaak chixjunil”? (raqal 10). Wi ch’a’aj chawu kuyuk maak, k’oxla li k’a’ru k’utb’il sa’eb’ li k’anjeleb’aal a’in chirix chan ru naq li Kolonel naru chatenq’ankil: Jeffrey R. Holland, “Li k’anjel re k’amok-ib’ wi’chik sa’ usilal,” Jolomil ch’utub’aj-ib’ re octubre 2018; K’utul Raqal reheb’ li Loq’laj Hu, “Kuyuk Maak.”

Tzol’leb’ ut Sumwank 64:31–34

Li Dios naxpatz’ li waam ut ut naq k’eek’ooq inch’ool.

Ma aaweek’ahom jun sutaq naq “lub’luukat” xb’aan xyalb’al aaqe’ “chixb’aanunkil li us”? Sik’ li raatin li Qaawa’ choq’ aawe sa’ Tzol’leb’ ut Sumwank 64:31–34. K’a’ru naraj naxye xq’axtesinkil “li aamej, ut li k’a’uxlej li k’eek’o xch’ool” re li Dios? (raqal 34).

Tzol’leb’ ut Sumwank 64:41–43

Sion taawanq choq’ “xaqxookil eetalil choq’ reheb’ li tenamit.”

Li eetalil a’an, a’an “jun t’ikr malaj xaqxookil eetalil li neke’ch’utla wi’ li tenamit re te’wanq sa’ junajil sa’ li rajomeb’ ” (K’utul Raqal reheb’ li Loq’laj Hu, “Eetalil tasqinb’il”). Chan ru naq Sion—malaj lix Iglees li Qaawa’—nawan choq’ xaqxookil eetalil choq’ aawe laa’at? K’oxla k’a’ chik ru nataqsiman, jo’ jun xaqxookil eetalil, re rosob’tesinkileb’ li kristiaan: Numeros 21:6–9; Mateo 5:14–16; Alma 46:11–20. K’a’ru neke’xk’ut li raqal a’in chawu chirix chan ru naru taatenq’a li Iglees chi wank choq’ xaqxookil eetalil sa’ li na’ajej wankat wi’? Sik’eb’ xkomon chik li na’leb’ naroksi li Qaawa’ re xch’olob’ankil Sion sa’ Tzol’leb’ ut Sumwank 64:41–43.

laj Moroni, aj taqlanel

Laj Moroni aj taqlanel naxk’am li eetalil re ach’ab’aak, xb’aan laj Gary E. Smith

Tzolʼlebʼ ut Sumwank 65

“Tuqub’omaq lix b’e li Qaawa’.”

Laj Mateo kixtz’iib’a resil laj Jwan aj Kub’sihom Ha’ naq kixye: “Tuqub’omaq lix b’e li Qaawa’ ” (Mateo 3:3; chi’ilmanq ajwi’ Isaias 40:3). Sa’ Tzol’leb’ ut Sumwank 65, li Qaawa’ naroksi ajwi’ aatin chanchan a’an re xch’olob’ankil lix k’anjel sa’ roso’jikeb’ li kutan. K’a’ru nakawil sa’ li kixb’aanu laj Jwan aj Kub’sihom Ha’ (chi’ilmanq Mateo 3:1–12) li chanchan li naraj li Qaawa’ naq taqab’aanu laa’o sa’ li kutan a’in? K’a’ru nakataw sa’ li k’utb’esinb’il na’leb’ a’in li nakatxmusiq’a chixtz’aqob’resinkil ru li profeetil aatin wan chi sa’? K’oxla k’a’ru naru taab’aanu re “xk’eeb’al chi nawmank lix sachb’a-ch’oolejil k’anjel li Dios sa’ xyanqeb’ li tenamit” (raqal 4).

Tzolʼlebʼ ut Sumwank 66

Li Qaawa’ naxnaw lix k’oxlahom inch’ool.

Toje’aq rokik sa’ li Iglees, laj William E. McLellin kixpatz’ re laj Jose Smith naq tixk’utb’esi chiru k’a’ru naraj li Dios choq’ re. Chi ink’a’ nawb’il xb’aan laj Jose, ke’wan oob’ xpatz’om laj William li kiroyb’eni naq te’sumeeq xb’aan li Qaawa’ rik’in xtz’uumal re lix profeet. Ink’a’ naqanaw k’a’ruheb’ lix patz’om laj William, a’b’an naqanaw naq li k’utb’esinb’il na’leb’ k’eeb’il re, li wan sa’ Tzol’leb’ ut Sumwank 66, kixsumeheb’ chi junjunq lix patz’om laj William “chi tz’aqal re ru ut jo’ kiraj” (“Las cinco preguntas de William McLellin,” Revelaciones en contexto, 147).

Naq yooqat chirilb’al ru li tasal 66, k’oxlan chirix k’a’ru kixnaw li Qaawa’ chirix laj William McLellin ut lix k’oxlahom ut rajom lix ch’ool. Chan ru naxk’utb’esi li Qaawa’ naq naxnaw aawu? Wi wan aawik’in jun rosob’tesihom li yuwa’b’ejil aj k’anjel, k’oxla xtz’ilb’al rix. Naq nakab’aanu, k’a’ru nakatxtenq’a li Santil Musiq’ej chixtawb’al ru chirix li rajom li Dios choq’ aawe?

Chi’ilmanq ajwi’ Santos, 1:141–143; Temas del Evangelio, “Bendiciones patriarcales,” topics.ChurchofJesusChrist.org.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 64:8–10.Naq wanko sa’ junkab’al, k’iila sut naxk’e rib’ chiqu xtzolb’al li kuyuk maak. Jo’ junkab’al maare taaruuq tex’aatinaq chirix chan ru x’osob’tesiik lee junkab’al naq xekuy eemaak cherib’il eerib’. Chan ru xooxtenq’a li Qaawa’ chixkuyb’al qamaak chiqib’il qib’? Chan ru naq “nokotawasiik” (raqal 8) naq ink’a’ naqakuy xmaakeb’ li qas qiitz’in?

Tzol’leb’ ut Sumwank 64:33.K’a’ru naraj li qaChoxahil Yuwa’ naq tixb’aanu laa junkab’al re xk’eeb’al chi uxmank li “xnimal ru xk’anjel”? Maare naraj naq texxik sa’ li santil ochoch, teewotz li evangelio rik’in eerech kab’al, malaj naq teeq’ax ru li wech’ok-ib’. Maare li junjunq komon sa’ li junkab’al taaruuq tixtaqsiheb’ kok’ k’a’aq re ru, jo’ pek malaj boton malaj kok’ putz’ re jorb’a-k’a’uxlej choq’ reetalil li “k’a’ru ka’ch’in” naru taqab’aanu wulaj wulaj re “xk’eeb’al xk’ojob’ankil” li xnimal ru xk’anjel li Dios. Jo’ junkab’al, sik’omaq ru sa’ xyanq li k’a’ru ka’ch’in k’a’ruhaq teeyal xb’aanunkil chiru li xamaan a’in.

Tzol’leb’ ut Sumwank 66:3.Chan ru taak’ut x’aajelil ru li jalb’a-k’a’uxlej? Taaruuq taak’e li tzakemq sa’ jun sek’ ink’a’ ch’ajb’il chi tz’aqal ut taawil ru li raatin li Qaawa’ choq’ re laj William McLellin: “Ch’ajb’ilat, a’b’an moko chixjunil ta.” Chirix a’an taaruuq taach’aj li sek’ ut sa’ komonil teetzeka li tzakemq naq yooqex chi aatinak chirix chan ru naq li Jesukristo nokoxtenq’a chi saqob’resiik qu sa’ musiq’ej.

Tzol’leb’ ut Sumwank 66:10.Chan ru naru laa junkab’al chixtaaqenkil lix na’leb’ li Qaawa’: “Chasik’ risinkil li taa’aalob’resinq raj aawe,” a’an naq ink’a’ too’aalob’resiiq rik’in naab’aleb’ li k’anjel. Taaruuq taawotz li resil li xMaria ut xMarta (chi’ilmanq Lukas 10:38–42), ut tex’aatinaq chirix chan ru naq jo’ junkab’al texruuq chirisinkil li k’a’ru taa’aalob’resinq raj eere li maak’a’ na’ok wi’ sa’ li junelik q’e kutan.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Chinaatenq’a re tinkuyeb’ lix maak,” B’ichleb’aal choq’ reheb’ li Kok’al, 52.

Xchaab’ilob’resinkil li qak’utum

Chatwanq rik’ineb’ ut chawab’iheb’. Wan naq li k’utuk q’axal chaab’il natikla naq wan li patz’om malaj li ch’a’ajkilal sa’ xch’ooleb’ li komon sa’ li junkab’al. K’eheb’ li komon sa’ laa junkab’al chixnaw rik’in laa waatin ut rik’in laa b’aanuhom naq wan aach’ool chirab’inkileb’. (Chi’ilmanq Li k’utuk jo’ li Kolonel, 16.)

jun ixq wiq’wo chixk’atq li Jesus

Kuyb’il xmaak, xb’aan laj Greg K. Olsen. Oksinb’il rik’in liceens. www.GregOlsen.com