“Juļae 12–18. Katak im Bujen Ko 77–80: ‘Inaaj Tōlļo̧k Kom̧,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Juļae 12–18. Katak im Bujen Ko 77–80,” Itok, Ļoor Eō—N̄an Kajjojo Armej im Baam̧le ko: 2021
Going Home, jān Yongsung Kim
Juļae 12–18
Katak im Bujen Ko 77–80:
“Inaaj Tōlļo̧k Kom̧”
Irooj ekar jiron̄ļo̧k Josep Smith bwe Enaaj “kōnono ilo [lo̧jiln̄in] naan ko in mālōtlōt” (Katak im Bujen Ko 78:2). Ta naan ko in mālōtlōt kwoj būki ilo am̧ ekkatak Katak im Bujen Ko 77–80?
Je En̄jake ko Rej Im̧we Eok
Edikļo̧k jān ruo iiō ko ālkin an Kabun̄ eo an Jisōs Kraist kar jepļaaktok, ekar eddōkļo̧k n̄an elōn̄lo̧k 2,000 membōr ro im ekar m̧ōkaj an ajeded. Ilo M̧aaj 1832 eo Josep Smith ekar kweilo̧k ippān ritōl ro an Kabun̄ in “n̄an ekōnono kōn jerbal ko (business)”: aikuj eo n̄an wia bwidej n̄an aintok, im kōjparok ro rijeram̧ōl (lale Katak im Bujen Ko 78, taitōļ in jekjōn). N̄an wōnm̧ae aikuj ko, Irooj ekar kūr juon oran eo edik in ritōl ro an Kabun̄ in n̄an ejake Kumi in Bōrokuk eo, juon kumi me enaaj kar kobaik kijejeto ko aer n̄an “iuunm̧aanļo̧k jibadbad eo” an Irooj (eoon 4) ilo jikin kein. Bōtaab jekdo̧o̧n kain jerbal in tōl ko, Irooj ekar pedped wōt ioon men ko an indeeo. Aliktata, jibadbad eo an juon printing press ak juon joko—āinwōt aolep men ko jet ilo aelōn̄ in kiin̄ eo an Anij—ej n̄an kōpooj ajri ro Nejin n̄an bōk “juon jikin ilo laļ eo selestial” im “m̧weiie ko an indeeo” (eoon 7, 18). Im eļan̄n̄e kōjeraam̧m̧an korej ped n̄an keidi kiiō, ilo ioļapļap in poub ko an mour aolep raan, Ej ba kapen n̄an kōj “Kom̧in m̧ōņōņō, bwe Inaaj tōlļo̧k kom̧” (eoon 18).
Ļōm̧ņak ko n̄an Ekkatak Jeje Ko Rekwojarjar Ippam̧ Make
Anji ej kwaļo̧k ittiņo̧ ko An n̄an ro rej kappukōt n̄an jeļā kaki.
Jon̄oulruo iiō ko ālkin Visōn eo M̧oktata, kajjitōk eo ilo Jemes 1:5 n̄an “kajjitōk ippān Anij” ekar wōnm̧aanļo̧k wōt n̄an tōl Josep Smith ke ekar jabwe mālōtlōt ippān. Ke e im Sidney Rigdon ekar wōr kajjitōk ko aer kōn bok in Revelesōn ilo aer kar jerbale ukok eo an eim̧we an Baibōļ eo, Josep make ekar kappukōt mālōtlōt jān Anij. Ilo am̧ riiti Katak im Bujen Ko 77, ļōmņak in je kōļmenļo̧kjeņ ko am̧ ilo jepta ko rejetjet ilo bok in Revelesōn.
N̄an kakobaba, kejekļo̧kjeņ kōn ekōjkan am̧ maron̄ ļoor waanjon̄ak eo an Rikanaan Josep n̄e kwoj ekkatak jeje ko rekwojarjar. Komaron̄ kajjitōk ippān Jemedwōj Ilan̄, “Ta eo ij aikuj meļeļe?”
Translation of the Bible, jān Liz Lemon Swindle
Kar ta eo Kumi in Bōrokuk?
Kumi in Bōrokuk eo ekar ejaak n̄an kōtōbalbal jikin publish eo im jerbal in pejnej ko an Kabun̄ in ilo Ohio im Missouri. Ekar jutak kōn Josep Smith, Newel K. Whitney, im ritōl ro jet an Kabun̄ in ro raar kobaik kein jipan̄ ko aer n̄an tōpar aikuj ko an kanniōk an Kabun̄ eo eddōkļo̧k. Ejerata, Kumi in Bōrokuk eo ekar pād ilo m̧uri im ekar makunļo̧k ilo 1834 eo ke m̧uri ko raar erom jab maron̄ kōm̧adm̧ōdi.
Lale barāinwōt “Newel K. Whitney and the United Firm,” Revelations in Context, 142–47; “United Firm,” Church History Topics, ChurchofJesusChrist.org/study/church-history.
Imaron̄ jipan̄ “iuunm̧aanļo̧k jerbal eo” an Kabun̄ in.
Irooj ekar jiron̄ Josep Smith im ritōl ro jet an Kabun̄ in bwe kōtōbalbal juon joko im juon jikin print enaaj kar jipan̄ “iuunm̧aanļo̧k jibadbad eo, eo kom̧ ar atbo̧kwōje” (Katak im Bujen Ko 78:4). Ta eo komaron̄ ba ej “jibadbad eo” an Kabun̄ in? Kejekļo̧kjeņ menin ilo am̧ riiti Katak im Bujen Ko 78:1–7. Bōlen ļōmņak kōn eoon kein emaron̄ kareel wāween am̧ kakūrm̧ool kūr eo an ilo Kabun̄ in ak jerbal n̄an baam̧le eo am̧. Ekōjkan an jerbal in jipan̄ eo am̧ maron̄ “iuunm̧aanļo̧k jibadbad eo” an Irooj? Ekōjkan an kōpooj eok n̄an “juon jikin ilo laļ eo selestial”? (eoon 7).
Irooj enaaj tōlļo̧k eō.
Kwonan̄n ke kar en̄jake āinwōt juon ajri edik, bōlen kōnke kōn juon men kwar “jan̄in de meļeļe kake” ak “jab maron̄ ineke”? (Katak im Bujen Ko 78:17–18). Kappukōt kapilōk eo ilo eoon kein me emaron̄ jipan̄ eok “m̧ōņōņō” (eoon 18) ilo kain iien kein. Etke kwoj ļōmņak Irooj jet iien ej kūr ro rej ļoor E “ajri reddik”? (eoon 17). Komaron̄ barāinwōt kejekļo̧kjeņ kōn ekōjkan an Irooj maron̄ in “tōl[ļo̧k] kom̧” (eoon 18).
Kūr eo n̄an jerbal n̄an Anij eaorōkļo̧k jān ia eo ij jerbal ie.
Ikkijien Katak im Bujen Ko 80, Elder David A. Bednar eaar katakin, “Bōlen juon iaan katak ko an Rilo̧mo̧o̧r ej katakin kōj ilo revelesōn in ej bwe kappe n̄an jerbal ilo juon jikin ekkar im eaorōk ak ejjab lukkuun aorōk jān kūr n̄an jerbal in” (“Kūr n̄an Jerbal in,” Ensign ak Liaona, Māe 2017, 68). Ļōmņak kōn kūr eo am̧ kiiō ak m̧oktaļo̧k ilo Kabun̄ in. Ta en̄jake ko me rekar jipan̄ eok ekkatak bwe naan ko an Elder Bednar rej m̧ool? Ta dam̧oļo̧k in katak ko komaron̄ loi ilo Katak im Bujen Ko 79–80 me remaron̄ jipan̄ juon eo ej kab bōk juon kūr kāāl?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 77:2.Ālkin riiti eoon in, ro uwaan baam̧le eo remaron̄ jin̄aik pija ko kōn “menin mour ko rekamijak, … men ko rej tabōlbōl, … [ak] bao in mejatoto ko” rem̧m̧an tata ippāer kar kōm̧anm̧an jān Anij Ta eo jej ekkatak kōn kōm̧anm̧an ko an Anij jān eoon in? (lale barāinwōt Katak im Bujen Ko 59:16–20). Kom̧ maron̄ barāinwōt al juon al kōn kōm̧anm̧an ko an Anij, eo āinwōt “My Heavenly Father Loves Me” (Children’s Songbook, 228–29), im kwaļo̧k jin̄an ko me rej itok ippān unin tōl in.
-
Katak im Bujen Ko 77:14.Eoon in ej kōmeļeļeik bwe Jon ekar kan̄ bok eo me ej jutak kōn mijen eo an n̄an ain Israel. Ta eo kakōļļe eo an kan̄e ej kwaļo̧k kōn ekōjkan ad aikuj ļōmņak kōn jerbal eo ad ilo aintok Israel ak kōm̧m̧ani men ko jet Irooj ekōņaan bwe jen kōm̧m̧ane? Erkein jet iaan eoon ko me m̧ōn̄ā kar kōjerbali n̄an katakin juon m̧ool ilo jetōb: Jon 6:48–51; 2 Nipai 32:3; Moronai 4. Bōlen komaron̄ kōm̧m̧ane juon m̧ōn̄ā eo enno tata ippān baam̧le eo n̄an m̧ōn̄ā ippān doon ilo iien ekōnono in.
-
Katak im Bujen Ko 78:17–19.Ro uwaan baam̧le eo remaron̄ jin̄aik pija in kōjeraam̧m̧an ko jān Anij rej kam̧m̧oolol kaki. Ta eo jej kōm̧m̧ane n̄an kwaļo̧k kam̧m̧olol eo ad kōn kōjeraam̧m̧an kein? Komaron̄ barāinwōt ekōnono kōn ekōjkan an baam̧le eo am̧ ļoor kapilōk n̄an bōk “aolep men ko otemjeļo̧k kōn kam̧m̧oolol” (eoon 19). Ta eo Irooj ekar kallim̧ur kake n̄an ro rej kōm̧m̧ane?
-
Katak im Bujen Ko 79:1.Kwaļo̧k naan in kam̧ool eo am̧ kōn “kajoor eo” kwar bōke ke kwar ekkapit ak kōjeno̧lok n̄an kūr ko an Kabun̄ in. Ta menin letok ko im im̧we eo rejeno̧lok Irooj ekar kōjeraam̧man eok kake ke kwar jerbal?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “N̄e Kwoj Ion Buktak Ko An Mour In,” Al Ko Al In Ajri, nō. 6.
Kōkōm̧anm̧anļo̧k Ad Katakin
Jin̄aik juon pija. Āinwōt juon baam̧le, kom̧ maron̄ riiti jejjo eoon ko innām kōtļo̧k iien n̄an an ro uwaan baam̧le jin̄aik juon men me ej iokļo̧k ta eo kom̧ij riiti. Kwaļo̧k pija ko ipeļaakin m̧weo im̧ōmi n̄an kakeememej baam̧le eo am̧ kōn pedped in katak ko kwar ekkatak.
God’s Garden, jān Sam Lawlor