“Juļae 5–11 Katak im Bujen Ko 76: ‘Eļap Naaj Men eo Wōņāer im Indeeo Naaj Aer Aiboojoj,’” Itok, Ļoor Eō—N̄an Kajjojo Armej im Baam̧le ko: Katak im Bujen Ko 2021 (2020)
“Juļae 5–11 Katak im Bujen ko 76,” Itok, Ļoor Eō—N̄an Kajjojo Armej im Baam̧le Ko: 2021
Refuge, jān Shaelynn Abel
Juļae 5–11
Katak im Bujen Ko 76
“Eļap Naaj Men eo Wōņāer im Indeeo Naaj Aer Aiboojoj”
Ilo jekjōn 76, Irooj ekar kwaļo̧k ewi jon̄an An kōņaan kwaļo̧k m̧ool eo n̄an kōj (lale eoon ko 7–10). Riiti jeje ko rekwojarjar kōn tōmak bwe Emaron̄ im naaj kwaļo̧k n̄an eok “men ko an Aniji” (eoon 12) me kwoj aikuj in jeļā. Innām ļo̧o̧ke kōļmenļo̧kjeņ ko kwoj būki “ke [kwoj] pād wōt ilo Jetōb eo” (eoon ko 28, 80, 113).
Je En̄jake ko Rej Im̧we Eok
“Ta eo enaaj waļo̧k n̄an eō ālkin aō mej?” Eitōn enan̄in aolep kabun̄ ko ilo laļ in rej kōnono kōn kajjitōkin ilo jet jekjek ko ak bar jet. Ium̧win buki iiō ko, elōn̄ iminene ko an Rikūrijin, pedped wōt ioon katak ko an Baibōļ eo, kar katakin kōn lan̄ im hell, kōn pedetaij n̄an ro rejim̧we im en̄taan n̄an ro renana. Bōtaab aolepān baam̧le eo an armej emaron̄ ke ajej ilo juon jekjek eo ekanooj pen n̄an em̧m̧an im nana? Im ta naan eo lan̄ meļeļe in lukkuun? Ilo Pāpode in 1832 eo, Josep Smith im Sidney Rigdon raar kōņaan jeļā eļan̄n̄e ebar lōn̄ eļapļo̧k n̄an jeļā kōn unin kōnono eo (lale Katak im Bujen Ko 76, taitōļ in jekjōn eo).
Aaet ekar wōr. Ilo aer kar kejekļo̧kjeņ kōn men kein, Irooj “Irooj eaar un̄ūr mejān meļeļe ko [aer] im rekar peļļo̧k” (eoon 19). Josep im Sidney raar bōk juon revelesōn kōn ekanooj ļap bwilōn̄, ekanooj ļap an tōr jān jon̄an, ekanooj ļap an kalikkar, bwe Armej ro Rekwojarjar raar ņan etan “Visōn eo.” Visōn eo ekar kōpeļļo̧k wintōn ko an lan̄ im letok n̄an ajri ro nejin Anij juon meļeļe edepakpak kōn mour indeeo. Visōn eo ekar kwaļo̧k bwe lan̄ ekanooj ļap im depakpak im eko̧kuktok jān an elōn̄ wōt armej kar m̧oktaļo̧k kōtmene. Eļapļo̧k an Anij tūriam̧o kake im jim̧we jān ad maron̄ keidi. Im ajri ro nejin Anij ewōr juon mejān kajjik indeeo aer eļapļo̧k an aiboojoj jān ad maron̄ pijaikļo̧k.
Lale Saints, 1:147–50; “The Vision,” Revelations in Context, 148–54.
Ļōm̧ņak ko n̄an Ekkatak Jeje Ko Rekwojarjar Ippam̧ Make
Lo̧mo̧o̧r ej itok kōn Jisōs Kraist, Nejin Anij.
Ke Wilford Woodruff ekar riiti visōn eo kar kōmeļeļeik ilo jekjōn 76, eaar ba, “Iaar en̄jake n̄an iakwe Irooj eļapļo̧k jān kar m̧okta ilo mour eo aō” (lale “Ainikien ko an Jepļaaktok eo” ilo jem̧lo̧k in unin tōl in). Bōlen ekar wōr am̧ kain en̄jake rōt in ke kwar riiti revelesōn in. Āļkin men otemjej, ejjeļo̧k iaan kōjeram̧m̧an ko raiboojoj kar kōmeļeļeik ilo jekjōn 76 enaaj kar pidodo n̄e ejako Rilo̧mo̧o̧r eo. Bōlen komaron̄ kar kile kajjojo eoon ilo jekjōn 76 me ej kōnono kōn Irooj Jisōs Kraist. Ta eo eoon kein rej katakin eok kōn E im jerbal eo An ilo karōk eo an Anij? Ekōjkan aer kareel wāween eo kwoj en̄jake kōn E? Ilo am̧ riit im kōļmenļo̧kjeņ, komaron̄ bōk im̧we ko kōn ekōjkan am̧ maron̄ “[bōk] naan in kam̧ool kōn Jisōs” im ļapļo̧k am̧ “kajoor” ilo e (eoon ko 51, 79).
Katak im Bujen Ko 76:39–44, 50–112
Anij ej kōņaan lo̧mo̧o̧ren “aolep jerbal ko an pein.”
Jet armej, ekoba jet membōr ro an Kabun̄ in jinoin tata, raar jum̧ae visōn eo ilo jekjōn 76 kōnke ekar katakin bwe enan̄in aolep renaaj kar lo̧mo̧o̧r im bōk jet aiboojoj in laļ ko. Jum̧ae ko aer remaron̄ kar itok, jidik in, jān juon likjab in meļeļe kōn Anij im kadkad eo An n̄an kōj. Ilo am̧ riiti revelesōn in, ta eo kwoj ekkatak kōn piktok eo an Anij im karōk eo An n̄an ajri ro Nejin?
Ļōmņake oktak ko ikōtaan lo̧mo̧o̧ren (jān mej an kanniōk im jetōb, lale eoon ko 39, 43–44) im mour āinwōt Anij (mour ippān Anij im erom āinwōt E; lale eoon ko 50–70).
Lale barāinwōt Jon 3:16–17; Katak im Bujen Ko 132:20–25.
Katak im Bujen Ko 76:50–70, 92–95
Jema Ilan̄ ekōņaan bwe in bōk mour indeeo ilo aiboojoj eo an jiļiejtōļ.
Kwonan̄in ke kar ļōmņak—ak kar inepata—kōn eļan̄n̄e ak jaab kwonaaj karbōb n̄an aiboojoj in jiļiejtōļ? N̄e kwoj riiti kōmeļeļe eo an ro me rej bōk aiboojoj in (lale eoon ko 50–70, 92–95), ijello̧kin lale wōt juon laajrak in men ko kwoj aikuj kōm̧m̧ani, kappukōt ta eo Anij ekar kōm̧m̧ane—ij kōm̧m̧ane—n̄an jipan̄ eok eromļo̧k āinwōt E. Riiti visōn in ilo wāween in ej ke jelet wāween am̧ en̄jake kōn kijejeto ko am̧ make?
Komaron̄ barāinwōt ļōmņak kōn kōjeraam̧m̧an eo eļap ej n̄an jeļā tipdik in meļeļe kin kōn aelōn̄ in kiin̄ eo an jiļiejtōļ. Ekōjkan an visōn in an aiboojoj eo an jiļiejtōļ jelet wāween am̧ lale im kōņaan mouri mour eo am̧ kajjojo raan?
Lale barāinwōt Moses 1:39; Joy D. Jones, “Aorōk jān jabdewōt Jon̄ok,” Ensign ak Liaona, Nob. 2017, 13–15; J. Devn Cornish, “Ebwe Ke Aō Em̧m̧an? Inaaj Ke Tōpare?” Ensign ak Kweilo̧k eo Eļap, Nob. 2016, 32–34.
Josep Smith ekar lo visōn eo kōn aiboojoj ko ilo ruum̧ in.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota
-
Katak im Bujen Ko 76:22–24, 50–52, 78–79, 81–82.Ta eo jej ekkatak jān eoon kein kōn aorōk eo an naan in kam̧ool ko ad? Ta eddo eo naan in kam̧ool ko ad rej kōm̧m̧ane ilo mejānkajjiōk eo ad indeeo? Emaron̄ in jipan̄ n̄an kappukōt meļeļe ko an valiant(kajoor) n̄an ekōnono kōn ekōjkan ad “kajoor ilo naan in kam̧ool kōn Jisōs” (eoon 79). Kom̧ maron̄ barainwōt al “I Will Be Valiant” (Children’s Songbook, 162).
-
Katak im Bujen Ko 76:24.Baam̧le eo am̧ emaron̄ kile ikkejel ko ikōtaan m̧ool ko ilo jekjōn 76 im ko kar katakin ilo “Nā Nejin Anij” (Al in Ajri, 44); juon iaan m̧ool kein ej loe ilo Katak im Bujen Ko 76:24. Ekōjkan an laļ in maron̄ in oktak eļan̄n̄e aolep raar meļeļe bwe jej aolep ajri ro nejin Anij? Ekōjkan an m̧ool in jelet wāween ad kōm̧m̧an n̄an ro jet? Bōlen lale pija ko an ļaddik ro im leddik ro nejin Anij rellukkuun oktak ioon laļ in emaron̄ jipan̄ baam̧le eo am̧ kōļmenļo̧kjeņ kōn kajjitōk in. (Lale barāinwōt “Video Presentation eo: I Am a Child of God,” ChurchofJesusChrist.org.)
Ļōmņak in al “Nā Nejin Aniji” ippān doon im kappukōt ekkejel ko jet n̄an pedped in katak ko ilo jekjōn 76 (lale, n̄an waanjon̄ak. eoon ko 12, 62, 96).
-
Katak im Bujen Ko 76:40–41.Eļan̄n̄e jaar tōn ba ilo tukadu in “naan ko rem̧m̧an” (eoon 40), ak naan em̧m̧an, ilo eoon kein ilo juon nuujpeba ak tweet, ta eo jenaaj kar ba? Ta naan ko rem̧m̧an jet jej loi ilo jekjōn 76?
-
Katak im Bujen Ko 76:50–70.Ekōjkan am̧ naaj kar jipan̄ baam̧le eo am̧ erreim̧aanļo̧k im m̧aanjabpopo n̄an mour indeeo ilo aelōn̄ in kiin̄ an jiļiejtōļ? Kom̧ maron̄ jerbal ippān doon n̄an pukōt pija ko, eoon ko, im katak ko an rikanaan n̄an etal ippān eoon ko ilo Katak im Bujen Ko 76:50–70. Kom̧ maron̄ loi men kein ilo māākjin ko an Kabun̄ in, ilo ChurchofJesusChrist.org, ak i lo footnote ko an jeje ko rekwojarjar. Innām kom̧ maron̄ ain pija kein, eoon ko, im katak ko ilo juon peba ekilep me emaron̄ kakeememej baam̧le eo ami kōn menin kōttōpar ko ami indeeo.
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Al eo kar elmakote: “Ij Jela Bwe Aō Dri Pinmuur Ej Mour,” Al ko Al in Ajri, nō. 28.
Ainiikien ko an Jepļaaktok eo: Naan in Kam̧ool ko kōn “Visōn eo”
Wilford Woodruff
Wilford Woodruff ekar kobatok ilo Kabun̄ in ilo Tijemba in 1833 eo, epaakeļo̧k enan̄in ruo iiō ko āļkin an Josep Smith im Sidney Rigdon kar bōk visōn eo kar ļo̧o̧ke ilo Katak im Bujen Ko 76. Ekar jokwe ilo New York ilo iien eo im ekkatak kōn “Visōn eo” jān mijenede ro rej jerbal ilo eria eo. Iiō ko tokālik eaar ekōnono kōn im̧we ko an kōn revelesōn in.
“Kar katakin eō jān ajri ro nejū bwe ekar wōr juon Lan̄ im juon Hell, im kar jiron̄ eō bwe aolep ro renana ewōr juon aer kaje im ro rejim̧we juon aiboojoj. …
“… Ke iaar riiti visōn eo … , ekar kōmeramļo̧k ļōmņak eo aō im kar letok n̄an eō eļap lan̄lōn̄, eaar alikkar n̄an n̄a bwe Anij eo ekar kwaļo̧ktok pedped in katak eo n̄an armej eaar mālōtlōt, jim̧we im m̧ool, ewōr ippān jim̧or m̧wil ko rem̧m̧an tata im en̄jake eo em̧m̧an im jeļāļo̧kjeņ eo, iaar en̄jake E ekar jab m̧wijkōk kōn jim̧or iakwe, tūriam̧o kake, jim̧we im ekajet, im iaar en̄jake n̄an iakwe Irooj eļapļo̧k jān m̧okta ilo mour eo aō.”1
“‘Vision’ eo [ej] juon revelesōn eo ej letok eļapļo̧k meram, eļapļo̧k m̧ool im eļapļo̧k pedped in katak jān jabdewōt revelesōn epād ilo jabdewōt bok ko jet jaar riiti. Ej kōm̧m̧an an pidodo n̄an meļeļe eo ad kōn jekjek eo ad kiiō, ia eo jaar itok jān e, etke jej pād ijin, im ia eo jenaaj etal n̄an e. Jabdewōt armej emaron̄ jeļā jān revelesōn jab in ta eo koņaan im jekjek eo enaaj.”2
“M̧okta jān aō kar lo Josep iaar ba ijjab kea ewi rūtto in kar, ak ewi dik in kar, ijjab kea ekar āindeet kōjāllin—men̄e koran bōran ekar aitok ak kadu, armej eo me ekar bōk revelesōn jab eo eaar juon rikanaan an Anij. Iaar jeļā kōn n̄a make.”3
Phebe Crosby Peck
Ke Phebe Peck eaar ron̄ kōn an Josep im Sidney katakin kōn “Visōn eo,” liin eaar jokwe ilo Missouri im karrūtoļo̧k ajri ro ļalem nejin āinwōt juon m̧am̧a eo ejjeļo̧k rejtan. Visōn eo ekar kanooj in kabwilōn̄ im im̧we liin jon̄an ekar je menin n̄an kwaļo̧ke ta eo ekar ekkatak ippān ro nukin ilo baam̧le eo:
“Irooj ej kwaļo̧k ittiņo ko an aelōn̄ in Kiin̄ eo an lan̄ n̄an ro Nejin. … Josep Smith im Sidney Rigdon raar kōm̧m̧ane juon iien lotok kōm ilo jibūriin̄ eo ļo̧k, im ekar lōn̄ iien am kar kweilo̧k rekam̧ōņōņō ippān doon ilo aer kar pād ijin, im ekar lōn̄ menin ittiņo ko kar waļo̧k n̄an kōm, eo ekar letok n̄an eō juon kaenōm̧m̧an eļap. Kom̧ maron̄ kar lo ettā eo an Anij ilo kōpooj jikin aenōm̧m̧an ko n̄an ajri ro nejin. Im ro rejjāmin bōk tarlep in gospel eo im jutak āinwōt ritariņae ro rekajoor ilo jerbal eo an Kraist ejjab maron̄ jokwe ilo im̧aan mejān Anij im Nejin. Bōtaab ewōr juon jikin kar kōpooje n̄an aolep ro me rejjab bōke, bōtaab juon jikin eo me ekanooj dikļo̧k aibooj eo an jān n̄an jokwe ilo aelōn̄ in kiin̄ eo an Jiļiejtōļ. Ijjāmin naaj kajjieon̄ in ba elōn̄ļo̧k ikkijien men kein āinwōt aer kiiō jeje im renaaj ilo̧k n̄an laļ in. Im kom̧ bolen naaj bōk juon iien em̧m̧an n̄an riiti kōn kom̧ make, im eļan̄n̄e kom̧ij, ij kōjatdikdik kom̧ naaj riiti kōn juon būruwōn mejmejkaruo im jar, bwe men kein rej aorōk kōn kili. Im ij ikideelel bwe kom̧ maron̄ etali, bwe e eo me ej letok n̄an m̧ōņōņō eo ad ilo laļ in im ilo laļ eo ej itok.”4
Glory by Degrees, jan Annie Henrie Nader