Refuge, jān Shaelynn Abel

Juļae 5–11

Katak im Bujen Ko 76

“Eļap Naaj Men Eo Wōņāer im Indeeo Naaj Aer Aiboojoj”

Ilo am̧ ekkatak Katak im Bujen Ko 76, kejekļo̧kjeņ kōn ta eo Jemedwōj Ilan̄ ekōņaan bwe ajri ro ilo kūlaaj eo am̧ ren jeļā kōn E, Rilo̧mo̧o̧r eo, er make, im mejānkajjik eo indeeo aer.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k n̄an ajri ro pija ko ak peij in m̧akūtkūt ko jān unin tōl eo an wiik in ak unin tōl ko im̧aanļo̧k. Kōm̧m̧an bwe ren jiron̄ eok ta eo rej loe ilo pija kein im ta eo rej keememej ekkatak jāni.

Katakin Katak eo: Ajri ro Reddikļo̧k

Katak im Bujen Ko 76:24

Jej aolep ajri ro nejin Anij.

Būreejtōn Dallin H. Oaks eaar ba bwe eļan̄n̄ jej katakin “juon armej edik ļōmņak ko rekajoor bwe e ej juon nejin Anij,” jemaron̄ leļo̧k n̄an e “kautiej an juon make eo im kōllewetak eo n̄an em̧m̧akūt ņae inepata ko an mour” (“Powerful Ideas,” Ensign, Nob. 1995, 25).

M̧akūtkūt ko Maron̄ Kōm̧m̧ani

• N̄an jipan̄ ajri ro meļeļe kōjatdikdik eo aer n̄an erom āinwōt Anij, pukōt wāween ko n̄an kwaļo̧k n̄an er bwe koon in menin mour ko rej rūttoļo̧k n̄an erom āinwōt ro jineer im jemāer—bōlen ajri ro remaron̄ kajetjet pija in menin mour ko ippān pija ko an koon ko nejin menin mour ko. Kōpeļļo̧k jeje ko rekwoarjar n̄an Katak im Bujen Ko 76:24, im jiron̄ ajri ro bwe jej aolep “m̧aan im kōrā ro nejin keotak n̄an Anij.” Kwaļo̧k naan in kam̧ool eo am̧ bwe Anij ej Jemed im bwe jemaron̄ eddōkļo̧k n̄an erom āinwōt ro Jined im Jemād Ilan̄.

• Al ippān doon “Nā Nejin Anij” (Al in Ajri, 2-3), im kajjitōk ippān ajri ro n̄an jitōn̄ er make n̄e rej al “N̄a.” Kajjitōk ippāer n̄an al al eo bar juon alen, bōk jikin “N̄a” kōn “kwe” im jitōn bar juon ilo kūlaaj eo.

Katak im Bujen Ko 76: 40–42

Jisōs Kraist ej Rilo̧mo̧o̧r an Laļ in.

Naan eo gospel ej meļeļe in naan eo em̧m̧an. Naan eo em̧m̧an me gospel eo ej bōktok ej bwe Jisōs Kraist “eaar itok n̄an laļ in … n̄an karreoik e jān aolep jab weeppān” (eoon 41).

M̧akūtkūt ko Maron̄ Kōm̧m̧ani

• Jiron̄ ajri ro kōn juon naan eo em̧m̧an kiiō ejjab to kwar ron̄. Kajjitōk ippāer n̄an kwaļo̧k naan eo em̧m̧an eo raar ron̄. Innām kwaļo̧k ippāer naan eo em̧m̧an kōn gospel eo kōn riiti Katak im Bujen Ko 76:41–42. Kajjitōk ippān ajri ro ekōjkan an naan in em̧m̧an kōm̧m̧an menin aer en̄jake. Kwaļo̧k ippāer lan̄lōn̄ eo naan in em̧m̧an ej bōktok n̄an kwe.

• Kwaļo̧k juon pija in Jisōs Kraist. Kajjitōk ippān ajri ro eļan̄n̄e rejeļā ta eo Jisōs Kraist ekar kōm̧m̧an n̄an kōj. Kwaļo̧k n̄an ajri ro juon men ettoon im juon men erreo (āinwōt juon an̄kijep mouj ak juon kilin peba), im kōmeļeļeik bwe jerawiwi ej āinwōt bwidej ilo jetōb ko ad, bōtaab Jisōs Kraist ekar itok n̄an jipan̄ kōj erom bar erreo.

  

  Suffer the Children, jān J. Kirk Richards

Katak im Bujen Ko 76:62

Jemedwōj Ilan̄ jekōņaan bwe in bar ro̧o̧l n̄an mour Ippān n̄an indeeo.

Visōn eo an Josep Smith im Sidney Rigdon kōn aiboojoj in aļ ekar kwaļo̧k kōjeraam̧m̧an ko reļļap Anij ekar kōpooji n̄an ajri ro Nejin, barāinwōt men ko jej aikuj kōm̧m̧ani n̄an bōk kōjeraam̧m̧an ko.

M̧akūtkūt ko Maron̄ Kōm̧m̧ani

• Jiron̄ ajri ro kōn aelōn̄ in kiin̄ in aiboojoj ko jilu me Josep im Sidney raar loi ilo visōn eo aer. (Komaron̄ riiti n̄an ajri ro jidik in ak aolepān “Chapter 26: The Three Kingdoms of Heaven” [Doctrine and Covenants Stories, 97–103] ak kwaļo̧k pija in alooj eo kake ilo ChurchofJesusChrist.org.) Kajjitōk ippān ajri ro ta eo rej em̧m̧an ippaer kōn visōn eo. Pedped wōt ioon eļap tata kōn kōmeļeļe eo an laļ eo an aiboojoj in aļ, im kam̧ool bwe en̄in ej ijo Jemedwōj Ilan̄ ekōņaan bwe kajjojo iaad en pād ie.

• Riit n̄an ajri ro Katak im Bujen Ko 76:62, im kajjitōk ippān ajri ro n̄an jin̄aik pijaier make ippān Jemedwōj Ilan̄ im Jisōs Kraist ilo laļ eo an aiboojoj in aļ.

Katakin Katak eo: Ajri ro Rerūttoļo̧k

Katak im Bujen Ko 76:5, 41–42, 69

Jisōs Kraist ej aō Rilo̧mo̧o̧r.

Jipan̄ ajri ro meļeļe bwe kōjeraam̧m̧an ko raiboojoj Anij ej kallim̧ur kaki n̄an ro retiljek ilo mour eo tok juon rej pidodo wōt kōnke kōn Rilo̧mo̧o̧r Jisōs Kraist.

M̧akūtkūt ko Maron̄ Kōm̧m̧ani

• Je ioon boot eo Ta eo Jisōs Kraist ekar kōm̧m̧ane n̄an eō? Kajjitōk ippān kajjojo ajri n̄an riit ilo ejjeļo̧k ainikien eoon 5, eoon ko 41–42, ak eoon 69 ilo jekjōn 76, kappukōt uwaak ko remaron̄e kajjitōk eo ioon boot eo. Kōm̧m̧an bwe ren kwaļo̧k uwaak ko aer (lale barāinwōt “He Sent His Son,” Children’s Songbook, 34–35). Ekōjkan ad maron̄ kwaļo̧k kam̧m̧oolol eo ad kōn ta eo Rilo̧mo̧o̧r eaar kōm̧m̧an n̄an kōj?

• Je laajrak in tōmak kein kajilu ioon boot eo, likūt būļaan̄ ko ilo jikin naan ko raorōk. Leļo̧k n̄an ajri ro naan kein rejako ioon peba jiddik ko, im kajjitōk ippāer n̄an likūt naan ko aer ioon jikin ko rejim̧we ioon boot eo. Ta eo laajrak in tōmak in ej katakin kōj kōn etke jej aikuji Jisōs Kraist? (lale barāinwōt pija in alooj eo “Why We Need a Savior,” ChurchofJesusChrist.org).

Katak im Bujen Ko 76:12, 15–19, 114–16

Ekkatak jeje ko rekwojarjar emaron̄ jipan̄ eō “meļeļe men ko an Anij.”

Josep Smith im Sidney Rigdon raar bōk Katak im Bujen Kok 76 ke raar kōļmānļo̧kjeņ kōn jeje ko rekwojarjar. Jipan̄ ajri ro lo ekōjkan an ekkatak jeje ko rekwojarjar maron̄ bōktok revelesōn kōn Jetōb Kwojarjar.

M̧akūtkūt ko Maron̄ Kōm̧m̧ani

• Kajjitōk ippān ajri ro eļan̄n̄e rejeļā ta eo Josep Smith im Sidney Rigdon raar kōm̧m̧ane ke raar lo visōn eo ilo Katak im Bujen Ko 76. Kajjitōk ippāer n̄an riiti eoon ko 15–19 n̄an lale. Kwaļo̧k juon iien ke kwar bōk im̧we ilo am̧ riiti jeje ko rekwojarjar, im kajjitōk ippān ajri ro n̄an kōnono kōn en̄jake ko ilo jetōb ewōr ippāer ke rej riiti jeje ko rekwojarjar.

• Kajjitōk ippān ajri ro n̄an kiil mejāer im kajjieon̄ kōm̧m̧ane juon jerbal, āinwōt kōļare juon pija ak kōpeļļo̧k jeje ko rekwojarjar n̄an juon eoon ejenolo̧k. Ta jet iaan men ko me reppen n̄an kōm̧m̧ani n̄e māj ko mejād rej kilōk ilo jetōb? Riiti ippān doon Katak im Bujen Ko 76:12, 15–19, 114–16 n̄an pukōt ta eo jej aikuji n̄an kōm̧m̧an bwe māj ko mejād ren peļļo̧k ilo jetōb.

Katak im Bujen Ko 76:50–70

Jemedwōj Ilan̄ ekar kōpooj laļ eo an aiboojoj in aļ n̄an n̄a.

Jeļā kōn aiboojoj in aļ Anij ekar kōpooje emaron̄ jipan̄ ajri ro n̄an“anjo̧ ioon jān tōmak” (eoon 53) mālijjon̄ ko im kapo ko rej jelm̧ae.

M̧akūtkūt ko Maron̄ Kōm̧m̧ani

• Eļan̄n̄e juon ekar kajjitōk ippād, “Etke ij aikuj ļoor Jisōs Kraist imi kōjparok kien ko An?” ta eo jenaaj kar ba? Kajjitōk ippān ajri ro n̄an kappukōt uwaak ko ilo Katak im Bujen Ko 76:50–70, eo ej kōmeļeļeik ro me rej bōk mour indeeo ilo aelōn̄ in kiin̄ an aibojooj in aļ. Kōm̧m̧an bwe ajri ro ren kamelmel uwaak kajjitōk. Kwaļo̧k naan in kam̧ool eo am̧ kōn kōjeraam̧m̧an ko reļļap an Jemedwōj Ilan̄ ekar kōpooji eļan̄n̄e jej ļoor Jisōs Kraist

• Jin̄aik juon pija in aļ ioon juon m̧ōttan peba, im m̧wijiti n̄an jejjo m̧ōttan bajōļ. Leļo̧k n̄an kajjojo ajri juon m̧ōttan, ippānļo̧k juon iaan eoon in jipan̄ keini n̄an riiti: Katak im Bujen Ko 76:51; 76:52; 76:53; 131:1–2. Kajjitōk ippān ajri ro n̄an pukōt ilo eoon ko aer juon men me jej aikuj kōm̧m̧ane n̄an bōk mour indeeo ilo laļ eo an aiboojoj in aļ (jet eoon ko ekoba elōn̄ļo̧k juon uwaak ie), im je ioon peba ko aer aļ eo. Ilo aer jerbal ippān doon n̄an kobaik bajōļ eo, kwaļo̧k lōke eo am̧ ilo er bwe kōn jipan̄ eo an Rilo̧mo̧o̧r eo, remaron̄ karbōb n̄an aelōn̄ in aiboojoj an aļ.

Kōketak Ekkatak ilo M̧weo

Kajjitōk ippān ajri roo n̄an kōjerbal peij in m̧akūtkūt eo an wiik in n̄an katakin baam̧le ko aer ta raar ekkatak kōn visōn eo an Josep Smith im Sidney Regdon.

Kōkōm̧anm̧anļo̧k Ad Katakin

Kōjerbal jeje ko rekwojarjar Jekdo̧o̧n n̄e ajri ro kwoj katakin er rejjab maron̄ riit de, kōmakijkij kōjerbal jeje ko rekwojarjar ilo am̧ katak in er. Kōm̧m̧an bwe ren lo bwe m̧ool ko kwoj kwalo̧ki rej itok jān jeje ko rekwojarjar.