“Tebetembwa 6–12. Reirei ao Berita aika Tabu 98–101: ‘Tiiku n Rau ao Ataia Bwa Ngai te Atua’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Tebetembwa 6–12. Reirei ao Berita aika Tabu 98–101,” Nakomai, Iriirai—Ibukiia Aomata n Tatabemaniia ao Utu: 2021
C. C. A. Christensen (1831–1912), Aika Itiaki a Kakionakoaki mai Jackson County Missouri, c. 1878, tempera on muslin, 77 ¼ × 113 inti. Brigham Young University Museum of Art, aia bwaintangira tibun C. C. A. Christensen, 1970
Tebetembwa 6–12
Reirei ao Berita aika Tabu 98–101
“Tiiku n Rau ao Ataia Bwa Ngai te Atua”
Ngkai ko wareka Reirei ao Berita aika Tabu 98–101, taratarai iango ao namakin ake a na roko. E na kanga maiuakinaia n buokiko n riki bwa te aomata are e tangiria te Atua ibukim?
Korea Am Namakin
Ibukiia Aika Itiaki n te 1830 tabun, Independence, Missouri bon te aba n berita irouia. Bon “ana Tienta” Tion (taraa Reirei ao Berita aika Tabu 57:3)—ana kaawa te Atua iaon te aba—are a korakai n anga nanoia ni kateia. Irouia Aika Itiaki n 1830, bootakia Aika Itiaki i Independence, Missouri bon te katauraoi ae kaunganano man mimitong nakon te Kauaoki. Ma kaain rarikiia n te aono anne a taraia Aika Itiaki n te kawai ae kaokoro. Aomata ake a maeka i Independence aki kukurei ma te taeka are e a tia te Atua n anga te aba nakoia Aika Itiaki, ao a mwengabuaka n te aro n tautaeka, n bwaibwai, ao n reitaki irouia aomata aika bati man te aro ae boou ake a mwaing nakon te aono n te tai ae waekoa. N tai ae waekoa e bitaki te raraoma nakon te kakamaaku, ao te kakamaaku nakon te aki rau ma te iowaawa. N Turai 1833, e uruakaki ana tabo n booreti te Ekaretia, ao inanon Nobembwa a kairoroaki Aika Itiaki bwa a na kitani mwengaia i Jackson Couty, Missouri.
Raroan Iotebwa Timiti bon 1288 te kiromiita i Kirtland, ao te rongorongo aei e roko irouna imwin tabeua wiki. Ma te Uea e ataa te bwai ae riki, ao E kaotia nakon Ana burabeti reirein te rau ma te kaunganano are e na karau nanoia Aika Itiaki—reirei are a kona naba n buokira ngkana ti kaitarai aki rau, ngkana a aki koro nanon nanora aika itiaki, ke n te tai are ti kainnanoa iai te kauring bwa n tokin te tai rawawatara n tebong koraki, a na , “mwakuri ni kabane ibukin [ae] raoiroi ibukira” (Reirei ao Berita aika Tabu 98:3).
Tara Aika Itiaki, 1:171–93; “Tataningaan ana Taeka te Uea,” Kaotioti n Oi n Iango, 196–201.
Iango ibukin te Kamatebwai i bon Iroum ni Koroboki aika a Tabu
Reirei ao Berita aika Tabu 98:1–3, 11–14; 101:1–16
Kataakiu a kona n reitaki ni mwakuri ibukin ae raoiroi ibukiu.
Tabeua rawawatara n te maiu aei a riki bon man ara rinerine. Tabeua a riki man aia rinerine aomata tabeman. Ao n tabetai akea ae na bukinaki n rawawatara—a bon riki irouia kangaanga. Bwa tera ae riki mai iai, te kangaanga e kona n buoka koron nanon baika tabu. Ngkai ko wareka ana taeka te Uea ibukin aia kaangaanga Aika Itiaki n Reirei ao Berita aika Tabu 98:1–3, 11–14 ao 101:1–16, Tera ae ko kunea ae kona n buokiko ni kataakim? A kanga kiibu aikai n bita aron am taratara ni kakaewenako ake ko kaitarai? Karaua iangoia bwa a kanga kataakim n reitaki n mwakuri ibukin ae raoiroi ibukim ao n kakoroa nanon te Atua n maium.
Tara naba 2 Nibwaai 2:2; Reirei ao Berita aika Tabu 90:24.
Reirei ao Berita aika Tabu 98:23–48
E tangirai te Uea bwa na ukora te rau n Ana kawai.
E ngae ngke tiaki bwaai ni kabane n Reirei ao Berita aika Tabu 98:23–48 ae e na kaineti nakon oin am reitaki ma aomata, tera reirei aika ko kunei ae kona n kairiko ngkana iai ae bure nakoim? E kona n ibuobuoki mwaakenan taeka ao mwakoro n taeka are e kabwarabwara nanon te Uea n aron butimwaen te itabarara irouia Aika itiaki i Missouri.
Tara naba Jeffrey R. Holland, “The Ministry of Reconciliation,” Ensign ke Riaona, Nobembwa. 2018, 77–79.
Kabwarabwara man Kristo ao te Ataeinimwaane ae te Kaubwai, iroun Heinrich Hoffman
Reirei ao Berita aika Tabu 100
Te uea e tabeakinia naake a beku i Rouna.
Bon tabeua te wiki imwin are Iotebwa e ataa te kangaanga i Missouri, temanna ae e a tibwa rairaki e butiia bwa e na mwananga nako Canada n tibwaa te euangkerio ma natina mwaane. E kariaia Iotebwa, e ngae ngke e raraoma n katikuia ana utu, riki n te kangaanga ao te kakamaaku nakoia ana utu ao te Ekaretia. Inanon kawaia nako Canada, Iotebwa ao toana ae, Sidney Rigdon, a tataro ibukin te rau, ao mwakoro 100 bon ana kaeka te Uea nakoia. Tera ae ko kunea n ana kaeka te Uea are tao e karau nanoia ao n buokiia?
Tao iai naba taai are e kairoroko bwa ko na kabaeraenta am raraoma ibukin katabeam n te Ekaretia ao am raraoma ibukin am utu. E na kanga ana taeka te Uea n mwakoro 100 ni buokiko n aaro akanne?
Tara naba “Te Mition nako Canada,” Te Kaotioti n te Oi n Iango, 202–7.
Reirei ao Berita aika Tabu 101:43–65
Iriiran ana taeka te Atua e ibuobuoki ni kamanoai.
Te taetae ni kaikonaki n Reirei ao Berita aika Tabu 101:43–62 e karokoaki bwa te kabwarabwara bwa bukin tera e kariaia te Uea bwa a na kakionakoaki Aika Itiaki mai Tion. Ngkai ko wareki kiibu aikai, iai baika ko titebo iai ma tooro akanne n te taetae ni burabeti anne? Ko kona n bon titirakiniko: I a tia n raraoma n ana tua te Atua? E na kanga kerikakin te onimaki ao te motinnano n kariaia “ara kairiribai” n roota maiu? N na kanga n kaotia nakon te Atua bwa I “tauraoi n kairaki n te kawai ae eti man raoiroi ibukin [kamaiuau]”? (tara kiibu 63–65).
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Reirei ao Berita aikaTabu 98:16, 39–40.Tera ae iai n kiibu aikai ae kona n buokira n karekea te rau ae bati riki n ara utu? Kam kona n anaa te anene ae taekina te rau ke te ikabwarabure , n aron “Truth Reflects upon Our Senses” (Boki n Anene, nambwa. 273). Ataei aika uarereke tao a na kan karaoa te ikabwarabure imarenaia.
-
Reirei ao Berita aika Tabu 99.Ngke John Murdock e weteaki bwa e na kitana mwengana “n tataekina [te] euangkerio ae akea tokina” (kibu 1), e a bon tibwa karairaki naba man ana mition i Missouri ae kangaanga man maan (tara “John Murdock’s Missions to Missouri,” Te Kaotioti n te Oi n Iango, 87–89). Tera ae ti kunea n mwakoro 99 are tao e a tia n ibuobuoki ke n kaunganano nakon te tari Murdock? Tera ana rongorongo te Uea nakoira n te kaotioti aio?
-
Reirei ao Berita aika Tabu 100:16; 101:3–5, 18.Imwin warekan kiibu aikai, ko kona n marooroakina aroia taan karaobiti n riai n kakorakora kabuean te biti n kanakoi bareka ao imwina kabobongana nakon teina man amanakina n te tai ae bati (tara te witeo “The Refiner’s Fire” iaon ChurchofJesusChrist.org). Kam kona n uaia n reirei bwa a kanga ni katiakaki bwaai ake tabeua, n aron te ran ke te taoro. Tao kam kona n raumwea ke ni kaitiaka te bwai teuana n ami utu. Bukin tera ti tangiria bwa ti na itiaki? Tera ae reireinira kiibu aikai n aron ana ibuobuoki kataakira n riki bwa “aomata aika itiaki”?
-
Reirei ao Berita aika Tabu 101:22–36.A kanga kiibu aikai n buokia Aika Itiaki ake a kaitara te bwainikirinaki? A na kanga n buokia aomata ake a namakina te maaku n aron te waaki n ara aonaba ngkai?
Ibukin iango riki tabeua ibukin reiakinaia ataei, taraa te kamataata n te wiiki aei inanon Nakomai, Iriirai—Ibukin te Moanrinan.
Te anene ae tamaroa: “Help Me, Dear Father,” Children’s Songbook, 99.
Kanakoraoan Am Kamatebwai
Tarai reirei. E reirei Unimwaane Richard G. Scott: “Ngkai ko ukora ana rabakau te tamnei, tarai reirei. … Reirei bon koaua ae bati kanoaia, e bati kanoana ibukin mwakurian baika a kakaokoro ” (“Acquiring Spiritual Knowledge,” Ensign, Nobembwa. 1993, 86).
Kabuekan Missouri, iroun Glen S. Hopkinson