C. C. A. Christensen (1831–1912), Keba kei Saioni, c. 1878, tempera ena muslin, 78 × 114 na idi. Brigham Young University Museum of Art, isolisoli ni na makubui C. C. A. Christensen, 1970

13–19 ni Sepiteba

Vunau kei na Veiyalayalati 102–105

“Ena Qai Yaco na Veivakalougatataki … Ni sa Oti na Veivakararawataki”

Na ivakavuvuli cava mai na Vunau kei na Veiyalayalati 102–5 era vakaibalebale vakalevu vei iko? Sa rawa mo vola na nomu nanuma kei na vakasama me baleta na ivakavuvuli oqo.

Vola na Veika o Uqeti Kina

E a mosi sara na yalodra na Yalododonu mai Kirtland ni ra sa rogoca na tacidra kei na ganedra mai Jackson County, Missouri ni ra sa cemuri tani mai na nodra itikotiko. E a rairai veivakauqeti, ena gauna o ya, ni sa kaya na Turaga ni “vakabulai nei Saioni” ena “yaco mai ena kaukauwa” (Vunau kei na Veiyalayalati na 103:15). Ni sa kovuti tu na yalayala o ya e yalodra, e sivia na 200 na tagane, vata kei na 25 na marama kei na gone, era sa lewena yani na ka e vakatokai me Keba kei Isireli, e muri a qai vakayacani me Keba kei Saioni. E a kena inaki me tayabe ki Missouri me laki vueti Saioni.

Vei ira na lewe ni keba, na kena laki vueti o Saioni sai koya nodra vakalesuitale na Yalododonu ki na nodra qele. Ni ra vakarau yaco yani na keba ki Jackson County, sa kaya na Turaga vei Josefa Simici mera tu vakadua ka vakasuka na Keba kei Saioni. Eso na lewe ni keba era a veilecayaki ka rarawa sara ena ivakasala vou oqo; kivei ira, sa kena ibalebale sa mai druka na sasaga o ya ka sa sega ni yaco na yalayala ni Turaga. Ia, eso vei ira, a duatani na nodra rai. Dina ni ra a sega tale ni lesu ki Jackson County o ira na Yalododonu vulagi, na veika a yaco a kauta mai e dua na itagede ni kena “vakabulai” o Saioni, ka “yaco mai ena kaukauwa.” Era a vakadinadinataka na lewe yalodina ni Keba kei Saioni, e vuqa vei ira era a qai iliuliu ni Lotu, ni veika era a sotava a vakatitobutaka na nodra vakabauta na kaukauwa ni Kalou, na kacivi vakalou nei Josefa Simici, vakakina vei Saioni—sega ni vanua o Saioni ia o Saioni na tamata ni Kalou. Era a sega ni vakataroga lesu na yaga ni cakacaka oqo a rairai dredre toka, era sa vulica ga ni sasaga dina o ya me muri na iVakabula, ena gauna mada ga eda sega tu ni kila na veika kece. Oqo na sala, me na laki yaco o Saioni, me vueti kina.

Raica na Saints, 1:194–206; “The Acceptable Offering of Zion’s Camp,” Revelations in Context, 213–18.

E a tiko na keba kei Saioni ena bati ni Uciwai o Little Fishing, me vaka ena itaba oqo.

Vakasama ni Vuli iVolanikalou ni Tamata Yadua

Vunau kei na Veiyalayalati 102:12–13

Na cava na inaki ni ivakasala era tiko ena veitikina oqo?

E tiko enaWase 102 na itukutuku ni soqoni mai Kirtland, Ohio, na vanua a tauyavutaki kina na imatai ni matabose e cake ni Lotu. Era vakamacalataka natikina e 12–23 na ituvatuva mera muria na matabose e cake ena gauna me vakayacori kina na matabose ni veivakadodonutaki me baleti ira era sa cakava na ivalavala ca bibi.

E vakavuvulitaka o Peresitedi M. Russell Ballard, “Eso na gauna era dau taroga na lewenilotu na vuna me dau vakayacori kina na matabose ni veivakadodonutaki ni Lotu. Na kena inaki e taqaitolu: me vakabula na yaloi koya a caka cala, me taqomaki kina o ira na tawacala, ka taqomaki na savasava, dodonu, kei na yaca vinaka ni Lotu” (“A Chance to Start Over: Church Disciplinary Councils and Restoration of Blessings,” Ensign, Sepi. 1990, 15).

Raica talega na Gospel Topics, “Matabose ni Veivakadodonutaki ni Lotu,” topics.ChurchofJesusChrist.org.

Vunau kei na Veiyalayalati 103:1–12, 36; 105:1–19

E rawa ni tarai cake walega o Saioni ena ivakavuvuli ni buladodonu.

Na cava na vuna era a vakayalia kina na Yalododonu na nodra vanua yalataki mai Missouri? Kei na cava na vuna a sega ni vakatara kina na Turaga na Keba kei Saioni mera vakalesui ki na nodra vanua? Dina ni a oka talega eke na nodra cakacaka vakarerevaki na dauvakacaca e Missouri, ka a qai yalataka kina na kovana e Missouri me sa tokoni ira na Yalododonu ia a sega ni cakava. Ia a qai kaya na Turaga ni “kevaka era a sega ni talaidredre tiko na noqu tamata,” o Saioni “ke ra a sa vueti oti ena gauna oqo” (Vunau kei na Veiyalayalati 105: 2). Ni o wilika na Vunau kei na Veiyalayalati 103:1–12, 36; 105:1–19, o na raica beka eso na ka a tarovi kina na kena tauyavutaki o Saioni e Missouri vata kei ira eso a rawa ni veivuke kina. Na cava o sa vulica me rawa ni vukei iko mo tauyavutaki Saioni kina e yalomu kei na nomu itikotiko?

Vunau kei na Veiyalayalati 103:12–13; 105:1–6, 13–19

Ena yaco mai na veivakalougatataki ni oti na veivakararawataki kei na vakatovolei ni vakabauta.

Ena vuqa na sala, na vakaitavi ena keba kei Saioni a vakatovolei kina na vakabauta. A balavu na ilakolako, a katakata na draki, kei na kakana kei na wai a kunei dredre ena so na gauna. Mai na veika kece era sa bula vosota tiko, se sega tikoga ni rawa vei ira na Yalododonu mera lesu tale ki na nodra vanua. Sa rawa mo raica na sala a rairai veivuke kina na ivakavuvuli era tiko ena Vunau kei na Veiyalayalati 103:12–13 kei na 105:1–6, 13–19 vei ira na lewe ni Keba kei Saioni ni ra a lomatarotaka tiko se sa lako dina mai vua na Kalou ena imatai ni gauna na kena tauyavutaki. E rawa ni vukei iko vakacava na ivakavuvuli oqo ena gauna e vakatovolei kina na nomu vakabauta?

Sa rawa talega mo wilika na veika era a sotava o ira na lewe ni Keba kei Saioni ena “Domo ni Veivakalesui Mai” ena mua ni ituvatuva oqo. Na cava o taleitaka me baleta na nodra ivakarau? Na cava o vulica rawa mai na nodra ivakaraitaki?

Raica talega na David A. Bednar, “On the Lord’s Side: Lessons from Zion’s Camp,” Ensign, Jiulai 2017, 26–35.

Vunau kei na Veiyalayalati 104:11–18, 78–83

Oi au e dua na “ivakatawa ni veivakalougatataki e vuravura.”

Me ikuri ni veivakatovolei e Missouri, ena 1834 a sotava na Lotu na bula dredre vakailavo, ka okati kina na dinau kei na vakayagataki ilavo levu. Ena wase e 104 a solia na Turaga na ivakasala me baleta na ituvaki vakailavo ni Lotu. O na vakayagataka vakacava na ivakavuvuli ena tikina e 11–18 kei na 78–83 me baleta na nomu lewa vakailavo?

Mo vulica me baleta e dua vei ira na sala sa vakarautaka na Turaga ki na Lotu me rawa ni sereki mai na veivakabobulataki ni dinau, sarava na “Treasure in Heaven: The John Tanner Story” (video, ChurchofJesusChrist.org).

Mo vulica eso tale na “nona sala” na Turaga (tikina e 16) me karoni ira kina na Nona Yalododonu, sa rawa mo vulica na itukutuku nei Peresitedi Dieter F. Uchtdorf “Veivukei ena Sala ni Turaga” (Ensign se Liaona, Nove. 2011, 53–56).

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 103:12, 36; 105:9-13.Sa dua beka nomu matavuvale (se dua vei ira na nomu qase e liu) a bau kerei me cakava e dua na ka a qai sega ni vakayacori ena sala o a namaka tiko? Na cava o rawa ni vulica mai na nodra itovo na lewe ni Keba kei Saioni ena gauna a sega ni yaco kina na veika era a namaka tiko? (raica na “Domo ni Vakalesui Mai” ena mua ni ituvatuva oqo).

Vunau kei na Veiyalayalati 104:13–18.Na cava sa solia mai na Turaga kivei keda? Na cava e namaka o Koya meda cakava ena veika oqo?

Vunau kei na Veiyalayalati 104:23–46.Sa rawa ki na nomu vuvale me vakasaqara ena veitikina oqo na levu ni gauna a yalataka kina na Turaga me “vakaikuritaka na veivakalougatataki” (tikina e 23) vei ira sa yalodina. E rairai me sa gauna vinaka oqo mo “wilika na nomu kalougata” (“Wilika Na Nomu Kalougata,” Serenilotu, naba 144) ka veitalanoataka ni vakayacori oqo ena rawa me vukei keda ena veigauna dredre. Sa rawa mera marautaka na gone mera droinitaka na iyaloyalo ni veivakalougatataki era sa vakavinavinaka kina vakalevu.

Vunau kei na Veiyalayalati 105:38–41.Ena sala cava meda na “kerea na veisaututaki” (tikina e 40) ni ra caka cala se tawadodonu vei keda eso na tamata? Na cava e rawa ni da cakava me da “tawake ni veisaututaki” (tikina e 39) ena noda itikotiko?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere vakaturi: “Wilika Na Nomu Kalougata,” Sere ni Lotu, naba 144.

Domo ni Vakalesuimai

Na Keba kei Saioni

Ena vuku ga ni Keba kei Saioni a sega ni vakalesui ira na Yalododonu ki na nodra qele e Jackson County, era a nanuma kina e vuqa na tamata ni sa vakadrukai na nodra sasaga. Ia, e vuqa vei ira na vakaitavi tiko ena Keba kei Saioni era a raicalesu na veika era a sotava ka raica na sala a vakayacora kina na Turaga e dua na inaki cecere ki na nodra bula vakakina ena Nona matanitu. Oqo eso na nodra ivakadinadina.

Josefa Simici

Ni oti e 40 na yabaki ni sa cava na Keba kei Saioni, a kaya kina o Joseph Young, e dua na lewe ni keba, ni a kaya oqo o Josefa Simici:

“Kemuni na taciqu, eso vei kemuni sa cudruvi au, baleta ni ko ni sega ni laki vala e Missouri; ia meu kaya mada vei kemuni, a sega ni vinakata na Kalou mo ni vala. A sega ni rawa me tauyavutaka na nona matanitu ena tinikarua na turaga mera laki dolava na katuba ni kosipeli ki na veimatanitu e vuravura, kei na vitusagavulu na tagane ena ruku ni nodra veidusimaki mera muria na mawedra, vakavo ga ke kauti ira mai na dua na ilawalawa tagane era a solia na nodra bula, ka ra a cakava na solibula cecere me vakataki Eparama.

“Ia oqo, era sa tu oqo na nona Le Tinikarua kei na nona Vitusagavulu, ka ra na kacivi eso tale na kuoramu ni Vitusagavulu, era na cakava na solibula, kei ira era se bera ni cakava na nodra solibula kei na nodra isolisoli ena gauna oqo, era na qai cakava ena veigauna mai muri.”¹

Brigham Young

“Ni keitou sa yaco yani ki Missouri, a qai vosa na Turaga vei nona tamata o Josefa ka kaya, ‘Au sa ciqoma na nomu vakacacabo,’ ia a neimami na madigi me keimami lesu tale. Niu sa lesu mai e vuqa na noqu itokani era taroga na cava na yaga ni nodra kacivi eso mai na cakacaka mera gole ki Missouri ka qai lesu tale mai, ka sega na ka era a laki rawata rawa. ‘Sa yaga beka vei cei?’ era a taroga. ‘Kevaka sa vakarota na Turaga me vakayacori, na inaki cava sa raica tu o Koya me vakayacora kina?’ … Au a tukuna vei ira na veitacini niu sa saumi vakavinaka—saumi ena isolisoli levu—io na noqu ivakarau a sinai vutucoqa ena noqu kila niu sa lako yani vata kei na Parofita.”²

Wilford Woodruff

“Au a tiko ena Keba kei Saioni kei na Parofita ni Kalou. Au a raica vei koya na cakacaka ni Kalou. Au a raica vei koya na kaukauwa ni Kalou. Au a raica ni Parofita o koya. Na veika a vakaraitaki vua ena kaukauwa ni Kalou ki na ilesilesi o ya a yaga cecere sara vei au kei ira kece era a ciqoma na nona ivakasala.”³

“Ni ra sa kacivi na lewe ni Keba kei Saioni e vuqa vei keimami a sega mada ni bau veirai mata e liu; keimami a sega tu ni veikilai ka vuqa era se bera vakadua ni raica na parofita. Keimami sa veisebayaki tu, me vaka na sila sa tavuloni ena vulo, ena vanua taucoko. Keimami a se cauravou kina, ka keimami sa kacivi ena kena se qai tekivu me laki vakabulai o Saioni, kei na ka me keimami cakava me caka ena vakabauta. Keimami a soqoni vata mai na vei Yasana duidui ki Kirtland ka gole yani me vakabulai o Saioni, me vakayacori kina na ivakaro ni Kalou vei keimami. A ciqoma na Kalou na neimami cakacaka me vakataka ena cakacaka i Eparama. Keimami a vakayacora rawa e levu na ka, e dina ga ni ra taroga tiko na vukitani kei na tawavakabauta ‘na cava o ni sa bau cakava?’ Sa yaco me keimami kila-ka ena sala a sega ni rawa me keimami rawata rawa mai na dua tale na sala. Keimami a kalougata me keimami raica na matai parofita, kei na madigi ni lakova yani e udolu na maile vata kei koya, ka raica vua na cakacaka ni yalo ni Kalou, kei na ivakatakila i Jisu Karisito ki vua kei na vakayacori ni ivakatakila oqori. Ka qai vakasoqona mai e rauta ni ruanadrau na italatala qase mai na vanua taucoko ena itekivu ni gauna o ya ka vakauti keimami me laki kakaburaki ki vuravura ena kena vunautaki na kosipeli i Jisu Karisito. Keu a sega beka ni gole yani ki na Keba kei Saioni a sega ni dodonu meu na tiko eke nikua [e Salt Lake City, ka veiqaravi tiko ena Kuoramu ni iApositolo Le Tinikarua]. … Ena neimami gole kina ki kea keimami a biu yani ki na lomaniwere me vunautaka na kosipeli, ka sa ciqoma na Turaga na neimami cakacaka. Ia ena neimami cakacaka kei na veivakacacani taucoko, ka keimami rawa ni mate kina, keimami sa cakacaka ga yani ka bula voli ena vakabauta.”

“Na kila-ka [keimami] a rawata ena ilakolako tiko ni Keba kei Saioni sa uasivia cake na koula na kena yaga.”

iDusidusi

1. Ena Joseph Young Sr., History of the Organization of the Seventies (1878), 14

2. “Discourse,” Deseret News, Tise. 3, 1862, 177.

3. Ena Conference Report, Epe. 1898, 29–30; raica talega na Nodra iVakavuvuli na Peresitedi ni Lotu: Wilford Woodruff (2004), 135.

Na Keba kei Saioni (na Keba kei Saioni ena Uciwai na Fishing), mai vei Judith A. Mehr