“Tebetembwa 13–19. Reirei ao Berita aika Tabu 102–105: ‘Bwa i mwin karawawata aika Mwaiti … E na roko te Kakabwaia,’” Nakomai, Iriirai—Ibukiia Aomata n Tatabemaniia ao Utu: Reirei ao Berita aika Tabu 2021 (2020)
“Tebetembwa 13–19. Reirei ao Berita aika Tabu 102–105,” Nakomai, Iriirai—Ibukiia Aomata n Tatabemaniia ao Utu: 2021
C. C. A. Christensen (1831–1912), Kaebwan Tion, c. 1878, tempera on muslin, 78 × 114 inti. Brigham Young University Museum of Art, aia bwaintangira tibun C. C. A. Christensen, 1970
Tebetembwa 13–19
Reirei ao Berita aika Tabu 102–105
“Bwa i mwin Karawawata aika Mwaiti … E na roko te Kakabwaia”
Tera reirei man Reirei ao Berita aika Tabu 102–5 aika kaineti nakoim? Iangoa tauan mwin am iango ma namakin n reirei aikai.
Korea Am Namakin
Aika Itiaki i Kirtland a uruaki nanoia ngke a ongo bwa tariia ma mwaneia ake i Jackson County, Missouri, a kakionakoaki man mwengaia. Bon te kaunganano, n te tai arei, ngke e katanoata te Uea bwa “kamaiuan Tion” e na “roko man te mwaaka” (Reirei ao Berita aika Tabu 103:15). Ma te berita anne i nanoia, e riaon 200 mwaane, n ikotaki ma 25 aine ao ataei, ake a kaaina te waaki ae aranaki bwa Kaembwan Iteraera, are kinaaki rimwi bwa Kaembwa Tion. Ana mition bon te mwaati nako Missouri ao ni kamaiua Tion.
Nakoia kaain te kaebwa, kamaiuan Tion e nanonaki ni kaokakia Aika Itiaki nako abaia. Ma bon imwain rokon te taanga aei i Jackson County, te Uea e tuanga Iotebwa Timiti bwa e na katoka ao e na kamaenakoa ana Kaembwa Tion. Tabeman kaain te taanga aei a mengo ao a un n te kaetieti ae boou aei; irouia, e a aki koro nanon te mwananga ao a na berita te Atua a bon aki koro nanoia. Ma, tabeman, e okoro iangoana irouia. E ngae ngke Nake a Mwananga a aki okira Jackson County, te kakatai anne e uota aron te “kamaiuaki” nakon Tion, ao e bon “roko man te mwaaka.” Kaain ana Kaembwa Tion aika kakaonimaki, a mwaiti aika riki imwiina bwa taan kairiiri n te Ekaretia, a kakoaua bwa te kakatai e kamatoaa aia onimaki n mwaakan te Atua, n wetean Iotebwa Timiti ae tabu, ao i Tion—tiaki tii Tion te tabo ma Tion ana aomata te Atua. N aki nanokokoraki ni kakaawakin te katabeaki ae aki koro nanona aei, a reiakinna bwa te tabe raoi bon iriiran te Tia Kamaiu, e ngae ngkana tiaki oota ni bwaai ni kabane. Aio aron te waaki are Tion, n tokina, e na bon kamaiuaki.
Tara Aika Itiaki, 1:194–206; “The Acceptable Offering of Zion’s Camp,” Te Kaotioti n te Oi n Iango, 213–18.
Ana Kaembwa Tion a tiku i etan te Karaanga ae Little Fishing, n aron tamneina aei.
Iango ibukin te Kamatebwai i bon Iroum ni Koroboki aika Tabu
Reirei ao Berita aika Tabu 102:12–23
Tera oin bukin kaetieti n kiibu aikai?
Mwakoro 102 iai inanona kabwarabwaraan te bowi are i Kirtland, Ohio, are e moan kateaki iai te moan kauntira ae rietata n te Ekaretia. Kiibu 12–23 e kabwarabwara kawai aika a riai n irii kauntira aika rietata ngkana a karaoi reirei ibukin te booaki ibukiia naake a tia n karaoi buure aika kakaiaki.
E reirei Beretitenti M. Russell Ballard, “N tabetai a titiraki membwa bwa bukin tera e karaoki te bowi ibukin boaaki n te Ekaretia. Bon teniua oin bukina: ni kamaiua tamnein te tia bure, ni kamanoa ae akea ana bure, ao ni kamanoa itiakin, raoiroin, ao kinaakin te Ekaretia” (“A Chance to Start Over: Church Disciplinary Councils and the Restoration of Blessings,” Ensign, Tebetembwa. 1990, 15).
Tara naba Gospel Topics, “Church Disciplinary Councils,” topics.ChurchofJesusChrist.org.
Reirei ao Berita aika Tabu 103:1–12, 36; 105:1–19
E tii kona ni kateaki Tion iaon rerein te raoiroi.
Bukin tera Aika Itiaki a kabuaa abaia ni berita are i Missouri? Ao bukin tera e aki kariaia te Uea bwa a na kaoka nakoia abaia? Akea te nanokokoraki bwa aia mwakuri n kakeru taan iowawa i Missouri bon teuana bukina, ao ana kowana Missouri e berita bwa e na buokiia Aika Itiaki ma akea te bwai ae karaoia. Ma e taku te Uea bwa “ngkana tiaki ibukin riaoan te tua irouia au botanaomata,” Tion “ana kaman tia ni kamaiuaki” (Reirei ao Berita aika Tabu 105:2). Ngkai ko wareka Reirei ao Berita aika Tabu 103:1–12, 36; 105:1–19, ko kona n noori tabeua bwaai ake a tuuka katean Tion i Missouri ao tabeman ake a kona n ibuobuoki. Tera ae ko reiakinna ae kona n buokiko ni katea Tion i nanom ao ni mwengam?
Reirei ao Berita aika Tabu 103:12–13; 105:1–6, 13–19
A roko kakabwaia i mwin karawawata ao kataakin te onimaki.
N kawai aika bati, kaainakin ana Kaembwa Tion boni kataan te onimaki. E abwabwaki te mwananga, e kabuebue kanoan te bong, ao n tabetai e uarereke te amwarake ma te ran. Ao i mwin are a teimatoa inanona, a aki oki rikaaki Aika itiaki nakon abaia. Iangoia bwa a na kanga reirei ake n Reirei ao Berita aika Tabu 103:12–13 ao 105:1–6, 13–19 ni buokiia kaain ana Kaembwa Tion ake a nanokokoraki bwa te wewete ni katea ana kaembwa Tion e bon roko mairoun te Atua n te moan tai. A na kanga reirei aikai ni buobuoki n kataakin oin am onimaki?
Ko kona naba ni wareki rongorongoia kaain ana Kaembwa Tion n “Bwanaa Aika a Manga Kaokaki” n banen te kabwarabwara aei. Tera ae anaa nanom ni kateia kain ana kaembwa Tion? Tera ae ko kona n reiakinna man aia katooto?
Tara naba David A. Bednar, “On the Lord’s Side: Lessons from Zion’s Camp,” Ensign, Turai 2017, 26–35.
Reirei ao Berita aika Tabu 104:11–18, 78–83
Ngaia te “tia tararua iaon kakabwaian te aonaba.”
N reitaki ma kakatai i Missouri, n 1834, te Ekaretia e kaitara ma te kangaanga n te mwane, kanoan aei bon te tarau korakora ao te kabanemwane. N mwakoro 104 te Uea e anga te kaetieti iaon aron ana mwane te Ekaretia. Ko na kanga n kauaei reirei n kiibu 11–18 ao 78–83 nakon aron kabonganaan am mwane?
N reiakina taekan teuana ana kawai ae te Uea e katauraoa te Ekaretia bwa e na tokanikai man ana taurekereke te taarau, mataku n “Treasure in Heaven: The John Tanner Story” (witeo, ChurchofJesusChrist.org).
N reiakina ae bati riki n “oin ana kawai” te Uea (kibu 16) ni katauraoi ibukiia ana aomata Aika Itiaki, ko kona ni kamatebwaia ana marooro Dieter F. Uchtdorf “Ibuobuoki n Ana Kawai te Uea” (Ensign ke Riaona, Nobembwa. 2011, 53–56).
Iango ibukin Kamatebwai ni Koroboki aika Tabu n te Utu ao te Bootaki n Utu n te Tairiki
-
Reirei ao Berita aika Tabu 103:12, 36; 105:9–13.Iai kaain am utu (ke temanna am bakatibu) ae e a tia n tuangaki bwa e na karaoa te bwai teuana ma mwina e aki boraoi ma are ko kantaningaia? Tera ae ko reiakinna man aroia kaain ana Kaembwa Tion ngke mwanangaia e aki roko n aron are a kantaningaia? (tara “Bwanaa Aika a Manga Kaokaki” n banen te kabwarabwara aei).
-
Reirei ao Berita aika Tabu 104:13–18.Tera ae e a tia n anganira te Atua? Tera ae E kantaningaia bwa ti na karaoi ma bwaai ake e a tia n anganiira?
-
Reirei ao Berita aika Tabu 104:23–46.Am utu a kona n ukori kiibu aikai n noria bwa mwaitira te tai are e berita iai te Uea bwa e na “kataboroi kakabwaia” (verse 23) ibukiia naake a kakaonimaki. Tao aio te tai ae tamaroa n “wareki am bwai” (“Wareki Am Bwai,” Anene n Taromauri, nambwa. 241) ao marooroakinna bwa e na kanga warekan am kakabwaia ni buokiira n taai ni kangaanga. Ataei aika uarereke a na kan korei tamnein kakabwaia riki ake a karabwarabwa iai.
-
Reirei ao Berita aika Tabu 105:38–41.Ti na kanga ni karaoi “bubuti ibukin te rau” (kibu 40) ngkana aki akoi ao a ribuaka tabeman nakoira? Tera ae ti kona ni karaoia n riki bwa “kanikinaean te raoi” (kibu 39) inanon mwengara?
Ibukin iango riki tabeua ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.
Te anene ae tamaroa: “Wareki am Bwai,” Anene n Taromauri, nambwa. 241.
Bwanaa aika a Manga Kaokaki
Ana Kaembwa Tion
Ibukina bwa ana Kaembwa Tion e aki kaokiia Aika Itiaki nako abaia i Jackson County, a mwaiti aomata aika a taku bwa aia kekeiaki ni kataia ni kaoka Tion e aki koro bukina. Ma, e mwaiti kaain ana Kaembwa Tion ae a tanrikaaki n noora are a rinanona ao n nooria bwa e kanga te Uea ni kakoroa nanon te kantaninga ae rietata riki n maiuia ao n Abanueana. Aikai tabeua aia koaua.
Iotebwa Timiti
E riaon 40 ririki imwin ana Kaembwa Tion, Joseph Young, are bon kaain naba te mwananga anne, e ribootinna bwa Iotebwa Timiti e taekina aei:
“Tariu, tabeman mai ibuakoami a un irou, bukina bwa kam aki un i Missouri; ma N na tuangkami, e aki tangiria te Atua bwa kam na un. E aki kona ni bairea ana abanuea ma tengaun ma uoman aomata ni kona ni uota te euangkerio nakoia aban te aonaaba, ao ma itingaun mwaane iaan aia kairiiri n iri aia kaetieti , ti ngkana e anaiia man aia kurubu mwaane ake a tia n anga maiuia, ao ake a tia n anga aia karea ae moan te kakawaki n aron ae e karaoia Aberaam.
“Ngkai, E a tia te Uea ni kuneia Ana Abotoro ao ana Kaitingaun, ao e na iai riki kooram n Itingaun ae a na weteaki, are a na karaoa te anga karea, ao naake a tuai karaoa aia anga karea ao aia karea ngkai, a na karaoi imwiina.”1
Bringham Young
“Ngke ti roko i Missouri e taetae te Uea nakon ana toro Iotebwa ao e taku, ‘I a kariaia am karea,’ ao bon te kabwaia nakoira ni manga okirii mweengara. Ngke I a oki a mwaiti raoraou ake a titirakinai bwa tera bongan weteaia mwaane ni kitan aia mwakuri ni katoabong nako Missouri ao n manga oki, n akea te mwakuri ae tia ni karaoaki. ‘Antai ae kabwaia iai?’ a titiraki. ‘Ngkana e tua te Uea bwa e na karaoaki, tera ana kouru are E kantaningaia bwa e na riki ni karaoana?’ … I tuangia taari akekei bwa e korakora kaniwangau (n tamneiu)—e kaboaki iaon are boona—eng bwa te kabwaia ae i karekea e bon rangin n taonakobongana ma te taneiai are I a tia ni karekea ni mwanangau ma te Burabeti.”2
Wilford Woodruff
“I mena naba inanon ana Kaembwa Tion ma ana Burabeti te Atua. I noori ana mwakuri te Atua irouna. I noora mwaakan te Atua irouna. I noria bwa boni ngaia te Burabeti. Te bwai are kaotaki nakoina man mwaakan te Atua ibukin te Mition anne e bati kakawakina irou ao nakoia naake a butimaei ana kaetieti.”3
“Ngke a weteaki kaain ana Kaembwa Tion e mwaiti iroura ae ti tuai man nonooriira mai imwaina; bon irua ngaira imarenara ao a mwaiti aika a tuai man noora te burabeti. Ti a tia ni maeka n tabo aika kakaokoro, n aron te koon ae uamae n te ang, n kabuta te aba. Bon kairake ni mwaane ngaira, ao ti teweaki n bong akekei bwa ti na nako ni kamaiua Tion, ao te bwai are ti na karaoia ti na karaoia man te onimaki. Ti bootaki man Abamakoro aika kakaokoro i Kirtland ao ti mwananga nako n kamaiuia Tion, n kakoroa nanon ana tua te Atua nakoira. E butimwaei ara mwakuri te Atua n aron are E karaoia nakon ana mwakuri Aberaam. E bati ae ti karaoia, e ngae ngke aomata aika bwaka ao taan kakewekewe e bati aia tai n titiraki ‘tera ae ko karaoia?’ Ti karekea te atatai are e aki kona n reke iroura [n] te anga riki teuana. E reke tibwangara n noora ubun te burabeti, ao e reke tibwangara n mwananga ma ngaia inanon tengaa te maire, ao n noora ana mwakuri tamnein te Atua irouna, ao ana kaotioti Iesu Kristo nakoina ao kakoroan nanon kaotioti akanne. Ao e bootiia tabekoraki uabubua unimwaane man aonon te aba n boong akekei ao e kanakoira nakon te aonaba n tataekina ana euangkerio Iesu Kristo. Ngke I aki ira ana Kaembwa Tion N na bon aki mena ikai n te bong aei [i Salt Lake City, n beku n te Kooram n te Tengaun ma Uoman]. … Man mwanangara nako ikekei ti kanakoaki nakon te ne ni kurebe n tataekina te euangkerio, ao te Uea e butimwaei ara mwakuri. Ao n ara mwakuri ao bwainikirinara ni bane, ma maiura ae kuri kangaa n angin te tai, ti bon riai n mwakuri ao n maiu man te onimaki.”
“Te atatai are [ti] karekea ni mwanangara n ana Kaembwa Tion e bobuaka riki nakon te koora.”
Ana Kaembwa Tion (Ana Kaembwa Tion i Karaanga ae Fishing), iroun Judith A. Mehr