“Septyembre 27–Oktubre 3. Doktrina ug mga Pakigsaad 109–110: “Kini mao ang Imong Balay, usa ka Dapit sa Imong Pagkabalaan,’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Septyembre 27–Oktubre 3. Doktrina ug mga Pakigsaad 109–110,” Dali, Sunod Kanako—Alang sa mga Indibidwal ug mga Pamilya: 2021
Templo sa Kirtland, ni Jon McNaughton
Septyembre 27–Oktubre 3
Doktrina ug mga Pakigsaad 109–110
“Kini mao ang Imong Balay, usa ka Dapit sa Imong Pagkabalaan”
Nagpasabut sa Doktrina ug mga Pakigsaad 109:24–28, si Elder David A. Bednar miingon, “Ako modapit kaninyo sa pagbalik-balik sa pagtuon ug sa pagpamalandong sa mainampoong paagi sa paggamit niini nga mga kasulatan diha sa inyong kinabuhi ug alang sa inyong pamilya” (“Madungganon nga Paghupot og usa ka Pangalan ug Katungdanan,” Liahona, Mayo 2009, 99). Hunahunaa kini nga pagdapit samtang ikaw nagtuon.
I-rekord ang Imong mga Pagbati
Ang mga pultahan ngadto sa Templo sa Kirtland dili pa angay nga moabli hangtud sa alas 8:00 sa buntag sa Marso 27, 1836. Apan ang mga Santos kinsa naglaum nga motambong sa mga serbisyo sa pagpahinungod misugod sa paglinya ingon ka sayo sa alas 7:00. Sa dihang ang mga bangko ug mga agianan sa tunga ug sa kilid dali nga napuno sa naghinam-hinam nga mga manimbahay, misugyot si Joseph Smith og lain nga lugar alang sa dili maarang sa sulod. Sa dihang kana napuno, ikaduha nga sesyon giplano. Ug dili lamang ang mga buhi ang matinguhaong motambong. Nagkalainlaing mga saksi mipamatuod nga sila nakakita og mga anghel, sulod sa templo ug gani diha sa atup, atol ug human sa pagpahinungod. Kini sa tinuod ingon og “ang mga kasundalohan sa langit” miabut sa [pag-] awit ug [pag-] singgit” uban sa mga Santos sa Ulahing mga Adlaw (“Ang Espiritu sa Dios,” Mga Himno, nu. 2).
Nganong dako nga kaukyab––sa langit ug sa yuta? Ang saad nga ang mga Santos “pagatugahan og gahum gikan sa kahitas-an” mao ang usa ka rason una sa tanan nga sila mihugop ngadto sa Ohio.(Doktrina ug mga Pakigsaad 38:32). Ug mas dagko pa nga mga butang ang gisaad alang sa umaabut. “Kini,” mipahayag ang Ginoo, “mao ang sinugdanan sa panalangin nga ibu-bu diha sa mga ulo sa akong mga katawhan” (Doktrina ug mga Pakigsaad 110:10). Ang panahon nga kita karon nagpuyo––nga gipakusog ang buhat ug mga ordinansa sa templo nga maanaa ngadto sa minilyon nga buhi ug patay––nagsugod kini sa Kirtland, sa dihang “ang tabil sa yuta hapit na ablihan” (“Ang Espiritu sa Dios”).
Tan-awa usab sa Mga Santos, 1:232-41.
Mga Ideya alang sa Personal nga Pagtuon sa Kasulatan
Ang Ginoo gusto nga mopanalangin kanako diha sa Iyang balaang balay.
Sa pipila ka mga paagi, ang Templo sa Kirtland lahi gikan sa mga templo nga atong nahibaloan karon. Didto walay mga altar ug walay bunyaganan, ug mga ordinansa sama sa bunyag alang sa patay ug pagbugkos wala pa ipahiuli. Apan ang mga panalangin nga gihulagway diha sa seksyon 109, ang pahinungod nga pag-ampo alang sa Templo sa Kirtland, mao ang mga panalangin nga atong nadawat diha sa balay sa Ginoo karon. Ribyuha ang mosunod nga mga bersikulo sa pagpangita niini nga mga panalangin. Samtang nagbasa mahitungod niini, pamalandunga kon nganong kini mga importante kanimo ug sa imong pamilya.
Mga bersikulo 5, 12–13 (tan-awa usab sa Doktrina ug mga Pakigsaad 110:6–8): Diha sa templo ang Ginoo makapakita sa Iyang Kaugalingon ngari kanato ug kita mobati sa Iyang gahum.
Mga bersikulo 9, 17–19, 26, 78–79: Diha sa templo atong gidala sa atong mga kaugalingon ang ngalan sa Ginoo.
Mga bersikulo 22–23: Samtang kita naghimo ug nagtahud sa mga pakigsaad, ang Ginoo naghatag kanato og gahum sa paghimo sa Iyang buhat.
Mga bersikulo 24–33: Sa atong pagtambong sa templo sa takus nga paagi, makadawat kita sa panalipod sa Ginoo.
Ubang mga Panalangin:
Unsa ang gidasig sa Espiritu kanimo nga buhaton aron makadawat niini nga mga panalangin?
Ang pahinungod nga pag-ampo sa Templo sa Kirtland makatudlo kanako mahitungod sa pag-ampo.
Seksyon 109 maoy usa ka pahinungod nga pag-ampo nga gihatag ngadto ni Joseph Smith pinaagi sa pagpadayag (tan-awa sa ulohan sa seksyon). Unsa ang imong makat-unan mahitungod sa pag-ampo gikan niini nga seksyon? Samtang ikaw nagbasa niini, mahimo nimong hunahunaon ang mahitungod sa imong kaugalingong mga pag-ampo. Unsa nga mga pagbati ang imong nadawat nga makatabang kanimo sa pagpalambo sa imong pakigsulti sa Langitnong Amahan? Sama pananglit, mahitungod sa unsa ang giampo sa Propeta niini nga pag-ampo?
Doktrina ug mga Pakigsaad 110:1–10
Ang Ginoo makapakita sa Iyang Kaugalingon ngari kanako diha sa templo.
Unsay imong gibati mahitungod sa Manluluwas human mabasa ang Doktrina ug mga Pakigsaad 110:1–10? Sa unsang paagi Siya mipakita sa Iyang Kaugalingon nganha kanimo diha sa templo? Sa unsa nga mga paagi Siya nagtabang kanimo nga makahibalo nga Siya nagdawat sa imong mga paningkamot ug mga sakripisyo?
Ang matag tumoy sa Templo sa Kirtland adunay mga pulpito alang sa mga lider sa pagkapari.
Doktrina ug mga Pakigsaad 110:11–16
Ang mga yawe sa pagkapari nga gikinahanglan sa paghuman sa buhat sa Dios anaa sa Simbahan karon.
Aron masabtan ang mga yawe sa pagkapari nga gitugyan ni Moises, Elias, ug Elijah ngadto ni Joseph Smith ug Oliver Cowdery didto sa Templo sa Kirtland, mahimong imong basahon ang mensahe ni Elder Quentin L. Cook “Pangandam sa Pagsugat sa Dios” ( Liahona, Mayo 2018, 114–17). Gihulagway ni Elder Cook kon sa unsa nga paagi kini nga mga yawe mitukma sa mga buluhaton sa Simbahan karon. Mahimo usab nimong hunahunaon ang pagkat-on mahitungod niining karaan nga mga propeta pinaagi sa pagtuon ni “Moises,” “Elias,” ug “Elijah” sa Giya ngadto sa mga Kasulatan (scriptures.ChurchofJesusChrist.org). Pamalandunga unsay imong mabuhat aron sa pagtabang sa buluhaton kalabut ngadto niini nga mga yawe.
Tan-awa usab ang “Mga Yawe sa Priesthood,” Matinud-anon sa Tinuhoan, 238.
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 109.Isip usa ka pamilya, pangita og pipila ka mga bersikulo diha sa seksyon 109 nga nagdasig kanimo sa paggahin og dugang pa nga panahon diha sa templo (sama pananglit, tan-awa ang mga bersikulo nga gilista ubos sa “Mga Ideya alang sa Personal nga Pagtuon sa Kasulatan”). Pag-istorya mahitungod sa unsay gisugyot ni Presidente Russell M. Nelson: “Pangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon” (“Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 114). Kon ikaw o imong pamilya wala pa makaadto sa templo, makatan-aw ka sa temples.ChurchofJesusChrist.org aron sa pagtabang og andam sa imong kaugalingon sa pag-adto.
-
Doktrina ug mga Pakigsaad 109:78–80.Ang himno nga “Ang Espiritu sa Dios” (Mga Himno, nu. 2) gisulat alang sa pagpahinungod sa Templo sa Kirtland—ug kini giawit sa matag pagpahinungod og templo sukad. Mahimo ninyong kantahon og dungan kini nga himno ug mangita og hugpong sa mga pulong nga nagdugang sa imong pasalamat alang sa mga templo sa ulahing mga adlaw. Sa unsang paagi kini nga himno kalabut ngadto sa mensahe sa Doktrina ug mga Pakigsaad 109:78–80?
Makit-an nimo ang pahinungod nga pag-ampo alang sa mga templo nga labing duol kanimo diha sa temples.ChurchofJesusChrist.org.
-
Doktrina ug mga Pakigsaad 110.Samtang ang mga sakop sa imong pamilya nagbasa sa seksyon 110 ug nagtan-aw sa hulagway diha sa katapusan niini nga latid, dapita sila sa paghanduraw kon unsay ilang bation kon sila didto pa uban ni Joseph Smith ug Oliver Cowdery sa Templo sa Kirtland. Hatagi ang imong pamilya og oportunidad sa pagpakigbahin kon unsay ilang pagbati mahitungod sa Manluluwas.
-
Doktrina ug mga Pakigsaad 110:15.Unsaon kaha nga makatabang sa “pagpabalik sa mga kasingkasing” sa inyong mga anak ngadto sa ilang mga katigulangan? Makakaplag ka og pipila ka makalingaw nga mga ideya diha sa FamilySearch.org/discovery. Makatrabaho kamo og dungan sa pag-ila og mga katigulangan kinsa nagkinahanglan og mga ordinansa sa templo ug pagplano sa pagpahigayon niadto nga mga ordinansa didto sa templo. Mahimo ka usab nga mosulti mahitungod sa giunsa sa buhat nga gipahiuli ni Elijah didto sa Templo sa Kirtland nagdugang sa imong gugma alang sa imong mga katigulangan.
Alang sa dugang nga mga ideya sa pagtudlo sa mga bata, tan-awa sa latid [outline] karon nga semana diha sa Dali, Sunod Kanako—Alang sa Primary.
Gisugyot nga Awit: “Ang Espiritu sa Dios,” Mga Himno, nu. 2.
Mga Tingog sa Pagpahiuli
Espiritwal nga mga Pagpakita ug ang Templo sa Kirtland
Sama sa Kalayo nga Nagdilaab, ni Glen S. Hopkinson
Sa ubos mao ang mga pulong sa mga Santos sa Ulahing mga Adlaw kinsa didto sa Templo sa Kirtland atol sa pagpahinungod niini ug sa ubang mga miting nga misunod. Daghan ang mitandi sa ilang mga kasinatian ngadto sa unsay nasinati sa karaang mga Santos sa dihang sila “nasul-oban na og gahum gikan sa kahitas-an” sa adlaw sa Pagkunsad sa Espiritu Santo (Lucas 24:49; tan-awa usab sa Mga Buhat 2:1–4; Doktrina ug mga Pakigsaad 109:36–37).
Eliza R. Snow
“Ang mga seremonyas niana nga pagpahinungod mahimo nga ensayohon, apan walay mortal nga pinulongan nga makahulagway sa langitnong mga pagpakita nianang halandumon nga adlaw. Ang mga anghel mipakita ngadto sa uban, samtang usa ka matang sa balaang pagtambong namatngonan sa tanan nga mitambong, ug ang matag kasingkasing napuno sa ‘dili matukib nga kalipay ug napuno sa himaya.’”1
Sylvia Cutler Webb
“Usa sa akong labing unang mga panumduman mao ang pagpahinungod sa Templo. Gisabak kami sa among amahan ug gisultihan kami nganong kami nanganha ug unsa ang kahulugan niining pagpahinungod og usa ka balay sa Dios. Ug bisan tuod bata pa kaayo niana nga panahon, tataw ko nga nahinumduman ang okasyon. Ako makahinumdom bisan sa nanglabay nga mga katuigan ug makita ingon nga akong nakita kaniadto si Joseph ang Propeta, nagbarug nga ang iyang mga kamot gipataas padulong sa langit, ang iyang nawong abuhon kaluspad, mga luha nangagas sa iyang mga aping samtang siya namulong nianang halandumong adlaw. Hapit ang tanan ingon og naghilak. Ang templo naghuot sa kadaghan sa mga tawo nga ang mga bata sa kadaghanan gisabak sa gulang nga mga tawo; ang akong igsoong babaye diha gisabak sa akong amahan, ako gisabak sa akong inahan. Gani ako makahinumdom sa mga sinina nga among gisul-ob. Linghod pa ang akong hunahuna niana nga panahon sa pagsabut sa hingpit nga kahulugan niadtong tanan, apan sa paglabay sa panahon nag-anam-anam katin-aw diha kanako ang pagsabut, ug ako mapasalamaton kaayo nga nahatagan ako og pribilehiyo nga nakangadto didto.”2
Oliver Cowdery
“Sa gabii nakigkita ako sa mga opisyales sa simbahan didto sa balay sa Ginoo. Gibu-bu ang Espiritu—akong nakita ang himaya sa Dios, sama sa dakong panganod, nanaog ug mitugdon diha sa templo, ug mipuno sa mao sama sa usa ka naghaguros nga kusog kaayo nga hangin. Nakita ko usab ang mga dila sa kalayo, sama sa kalayo nga nagtugdon dinha sa daghan, … samtang sila nagsulti og laing mga pinulongan ug nanagna.”3
Benjamin Brown
“Daghan nga mga panan-awon [ang] nakita. Ang usa nakakita og unlan o panganod nga nagtugdon diha sa templo, hayag sama kon ang adlaw nagsidlak diha sa panganod ingon sa bulawan. Laing duha nakakita sa tulo ka mga personahe naglakawlakaw diha sa kwarto nga may hayag nga mga yawe diha sa ilang mga kamot, ug usab usa ka hayag nga kadena diha sa ilang mga kamot.”4
Orson Pratt
“Ang Dios diha, ang iyang mga anghel diha, ang Espiritu Santo uban sa mga tawo … ug sila puno gikan sa tumoy sa ilang mga ulo ngadto sa lapalapa sa ilang mga tiil sa gahum ug pagdasig sa Espiritu Santo.”5
Nancy Naomi Alexander Tracy
“[Sa dihang] ang Templo nahuman ug napahinungod … kini ang duha sa labing malipayon nga mga adlaw sa akong kinabuhi. Ang haum nga himnong gisulat alang sa okasyon mao ‘Ang Espiritu sa Dios Sama sa Kalayo nga Nagdilaab.’ Kini hingpit sa katinuod nga ang Langitnong Impluwensya anaa diha niana nga balay. … Gibati nako nga kini langit dinhi sa yuta.”6
Moses, Elias, and Elijah Appear in the Kirtland Temple [Moises, Elias, ug Elijah nagpakita didto sa Templo sa Kirtland], ni Gary E. Smith