4–10 Oketopa

Mataupu Faavae ma Feagaiga 111–114

“O Le A Ou Faatulagaina Mea Uma mo lo Outou Lelei”

Ia ole atu ma le agaga tatalo mo le taitaiga a le Agaga a o e faitaua le Mataupu Faavae ma Feagaiga 111–14, ma tusifaamaumau ou lagona uunai. Ona mafaufau lea i ni auala e mafai ona e faatinoina ai na lagona uunai.

Tusifaamaumau Ou Lagona Uunai

Pe na i ai sou aafiaga faaleagaga na faapea ona e lagona ai le lototele ma le mausali i lou faatuatua—ae peitai na tofotofoina e faafitauli o le olaga lou faatuatua, ma oo ai ina faigata ona e tau toe maua mai le toafilemu lea sa e lagonaina muamua? Sa i ai se mea faapena na tupu i le Au Paia i Katelani. Sa le’i atoa se tausaga talu ona mavae le liligiina tele ifo faaleagaga lea sa fesootai ma le faapaiaga o le Malumalu o Katelani, ae aliae ane ni faafitauli. O se faaletonu tautupe, o le fetoa’i i le Korama a le Toasefululua, ma isi tofotofoga na mafua ai ona maluelue faatuatua o isi.

E le mafai ona tatou aloese ma tofotofoga, e faapefea la ona tatou taofia i latou mai le faamata’uina o o tatou faatuatua ma molimau? Atonu o se vaega o le tali e mafai ona maua i le fautuaga a le Alii o loo i le Mataupu Faavae ma Feagaiga 112, na tuuina mai a o faateteleina faigata i Katelani. Na fetalai mai le Alii, “Ia faamamā o outou loto i oʼu luma;” (fuaiupu 28), “Aua le fouvale” (fuaiupu 15), “Ia fusi i ou sulugatiti mo le galuega” (fuaiupu 7), ma “Ia e lotomaualalo” (fuaiupu 10). A tatou mulimuli i lenei fautuaga, o le a “taitai ai [tatou e le Alii] i le lima” i faigata ma i le faamalologa ma le toafilemu (tagai fuaiupu 10, 13).

Manatu mo Suesuega Faaletagata Lava Ia o Tusitusiga Paia

Mataupu Faavae ma Feagaiga 111

E mafai e le Alii ona “faatulagaina mea uma mo [lo’u] lelei.”

E oo ane i le 1836, ua faaopoopoina e le Ekalesia ni aitalafu tetele i le faiga o le galuega a le Alii. A o popole Iosefa Samita ma isi e uiga i nei aitalafu ma mafaufau i ni auala e totogi ai, sa latou malaga atu i Salema, Massachusetts, atonu ona sa feaveai tala e faapea, sa i ai ni tupe sa tiai ai i totonu o se fale iina (tagai i le ulutala o le vaega o le Mataupu Faavae ma Feagaiga 111). Ina ua latou taunuu i Salema, sa folafola atu e le Alii, “Ua i ai ʼoa e tele atu nai le tasi mo outou i lenei aai.” (fuaiupu 10)—o oa na faapea ona aofia ai tagata o e o le a Ia “faapotopoto mai i le taimi e tatau ai mo le manuia o Siona” (fuaiupu 2; tagai foi Esoto 19:5). E ui ina sa leai se tupe na maua i Salema, ae o tagata liliu mai na maua mai i taumafaiga mulimuli ane a faifeautalai iina, sa o se vaega o le faataunuuga o le folafolaga a le Alii.

A o e faitau i le vaega 111, mafaufau i ni mea o loo e popole ai. Mafaufau pe faapefea ona faatatau ia te oe ia fetalaiga a le Alii ia Iosefa. Na faapefea ona fesoasoani le Alii ia te oe ia maua “oa” e le’i mafaufauina? (fuaiupu 10). Mafaufau i mea ua Ia faia e “faatulagaina ai mea uma mo lo outou lelei” (fuaiupu 11). O le a se mea ua aoao ai oe e le fuaitau “i le vave e mafai ona outou talia ai i latou” e uiga i le Tama Faalelagi?

Tagai foi Mataio 6:19–21, 33; “More Treasures Than One,” Revelations in Context, 229–34.

Mataupu Faavae ma Feagaiga 112:3–15

O le a taitai e le Alii i latou o e sailia ma le lotomaualalo Lona finagalo.

Sa faasolo vaivai le lotogatasi i le Korama a le Toasefululua i le taumafanafana o le 1837. Sa i ai feeseeseaiga e uiga i tiutetauave, ma sa faia e nisi o sui ni faamatalaga tetee i le Perofeta o Iosefa Samita. Sa atugalu Thomas B. Marsh, o lē sa avea i lena taimi ma Peresitene o le Korama a le Toasefululua, ma sa sau ai o ia mai Misuri i Ohaio, e saili se fautuaga mai le Perofeta. Sa faapea ona maua e Uso Marsh e ala i le faaaliga i le vaega 112. Mata na fesoasoani faapefea le fautuaga a le Alii ia te ia ma lana korama? O a ni lesona o i ai mo oe a o e saili e faatoilalo finauga ma lagona le lelei?

Atonu e te mafaufau loloto faapitoa i le fuaiupu 10. O le a le uiga o le taitai o oe e le Alii “i le lima”? Aisea e manaomia ai le lotomaualalo mo lenei ituaiga o taitaiga?

Tagai foi Ulisses Soares, “Ia Agamalu ma Maualalo le Loto,” Ensign po o le Liahona, Nov. 2013, 9–11; “O Le Faatuatua ma le Toilalo o Thomas Marsh,” Revelations in Context, 54–60.

A tatou lotomaualalo, o le a taitai i tatou e le Alii ma tali mai i a tatou talosaga.

Mataupu Faavae ma Feagaiga 113

O Iosefa Samita sa o “se auauna i aao o Keriso.”

Sa faatatau Isaia e uiga i se tasi e suli mai ia Iese o se “la laau” ma se “pogai” (Isaia 11:1, 10). I le vaega 113, o loo faamalamalama mai ai e le Alii e faapea, o lenei suli, o se auauna a Keriso, o le a fesoasoani i le faapotopotoina o le nuu o le Alii i aso e gata ai (tagai Mataupu Faavae ma Feagaiga 113:4, 6)—o se valoaga ua faapea ona faamatalaina lelei ai le Perofeta o Iosefa Samita. Na mafai faapefea e lenei upumoni ma isi upumoni i le vaega 113 ona faamalosiauina ai le Au Paia i le taimi o faigata sa latou oo i ai i Katelani? O a ni mea ua e maua i lenei faaaliga ua musuia ai oe e auai i le galuega a le Alii i le asō?

Tagai foi i le Taiala i Tusitusiga Paia, “Iese,” scriptures.ChurchofJesusChrist.org; 2 Nifae 21:10–12; Iosefa Samita—Talafaasolopito 1:40.

Manatu mo Suesuega Faaleaiga o Tusitusiga Paia ma Afiafi Faaleaiga

Mataupu Faavae ma Feagaiga 111:2, 9–11.E mafai ona faaosofia e nei fuaiupu se talanoaga e uiga i mea e faatauaina e lou aiga o ni “oa” e faavavau. E mafai ona tou fatufatua se sailiga oa i le nanaina o mea faataamilo i le fale e faatusa i mea e pele pe taua i le Alii. A maua e lou aiga ia aitema taitasi, ia talanoa i mea e mafai ona tou faia e faaalia ai e taua ia te outou.

Mataupu Faavae ma Feagaiga 112:10.Sa faamatalaina e Elder Ulisses Soares ia tagata lotomaualalo i le ala lenei: “O e lotomaualalo e mafai ona aoaoina, iloa le ala o latou faalagolago atu ai i le Atua ma mananao ai ina ia mulimuli i Lona finagalo. O i latou o e lotomaualalo e agamalu ma maua le tomai e uunaia ai isi ia faapena o latou uiga” (“Ia Agamalu ma Maualalo le Loto,” Ensign po o le Liahona, Nov. 2013, 10). Mafaufau i ni auala e fesoasoani ai i lou aiga ia malamalama i le uiga o le ia lotomaualalo. E mafai ona tou usuina se pese e faatatau i le lotomaualalo, e pei o le “Ia E Lotomaualalo” (Viiga, nu. 69), a o uu e se tagata e toatasi o le aiga “le lima” o isi ma taitai i latou faataamilo i le tou fale. Pe faasoa ni aafiaga o se taimi na taitaiina ai e le Alii tagata o lou aiga “i le lima” ma tuu mai “tali i [a latou] tatalo.”

Mataupu Faavae ma Feagaiga 112:11–14, 26.O le a le eseesega i le va o le iloa o le igoa o se tagata ma le iloaina o i latou? O a ni mea tatou te aoaoina mai fuaiupu 11–14 e faatatau i le uiga o le iloa o le Alii?

Mataupu Faavae ma Feagaiga 112:15.O le a le uiga o le “fouvale” e faasaga i le perofeta? O a ni mea ua tatou maua i lenei fuaiupu e fesoasoani ia tatou mananao ai e lagolago le perofeta?

Mataupu Faavae ma Feagaiga 113:7–8.O a ni mea ua tatou aoao mai i le fuaiupu 8 o le a fesoasoani e “toe aumai ai Siona” ma laveai ai Isaraelu?

Mo nisi manatu mo le aoaoina atu o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.

Pese fautuaina: “Ia E Lotomaualalo,” Viiga, nu. 69.

Faaleleia o Lo Tatou Aoao Atu

Ola i lau molimau. “‘E te aoao atu mea o loo avea ai oe,” na aoao mai ai Elder Neal A. Maxwell. ‘O le a sili atu le manatuaina o ou uiga tulaga ese … nai lo o se upumoni faapitoa i se lesona faapitoa’” (Aoao Atu i le Ala a le Alii,13).

Ua tusifaamaumauina e Thomas B. Marsh le faaaliga na tuuina mai ia te ia e ala mai ia Iosefa Samita. Ia E Lotomaualalo, saunia e Julie Rogers.