“18–24 Oketopa. Mataupu Faavae ma Feagaiga 121–123: ‘Le Atua e, O Fea o I Ai Oe?’” Sau, Mulimuli Mai ia te A’u—Mo Tagata Taitoatasi ma Aiga: Mataupu Faavae ma Feagaiga 2021 (2020)
“18–24 Oketopa. Mataupu Faavae ma Feagaiga 121–123,” Sau, Mulimuli Mai ia te A’u—Mo Tagata Taitoatasi ma Aiga: 2021
Liberty Jail Spring [Falepuipui o Liperate i le Tautotogo], saunia e Al Rounds
18–24 Oketopa
Mataupu Faavae ma Feagaiga 121–123
“Le Atua e, O Fea o I Ai Oe?”
O lou aafiaga i le suesueina o tusitusiga paia o le a oa atili pe afai o lau sini o le faailoaina o le mea moni. Amata i se tatalo, faalogo i le Agaga, ma tusifaamaumau ou lagona uunai.
Tusifaamaumau Ou Lagona Uunai
O le fogafale pito i lalo o le falepuipui o le itumalo i Liperate, Misuri, sa ta’ua o le āna o le falepuipui. O puipui sa mafiafia, o le fola maa sa malulu ma palapalā, o meaai—o mea sa i ai—sa pala, ma na pau le mea na sau ai le malamalama o ni faamalama vaiti, pa uamea se lua, na latalata i le taualuga. O le ana lenei sa tele ina faaalu ai e Iosefa Samita ma ona auuso toaitiiti le tele o o latou taimi na faafalepuipuiina ai—e fa masina o le maatiati o le malulu i le taumalulu o le 1838–39—e faatalitali ai le faamasinoga mo tuuaiga o le fouvale e faasaga i le setete o Misuri. I le taimi lea, sa maua e Iosefa i taimi uma ni tala fou e uiga i mafatiaga sa pagatia ai le Au Paia. O le filemu o Sisifo Mamao ma le talitonu o le a lelei mea uma, sa na’o ni nai masina lava na i ai, ae o lenei ua toe leai foi ni mea e nonofo ai le Au Paia, tutuli i le togavao e su’e se isi nofoaga e toe amata atoa ai—o le taimi lenei o le latou Perofeta o loo i le falepuipui.
E leitioa a alaga atu Iosefa Samita, “Le Atua e, o fea o i ai oe?” O tali na ia maua, o le “malamalama mai le lagi” lea na “sasaa mai i lalo” i lena falepuipui faanoanoa, ua faaalia ai, e ui ina le foliga mai o taimi uma e lagonaina ai, ae e le mafai ona mamao ese le Atua. Sa iloa ai e le Perofeta, e leai se mana e mafai ona “taofia ai le lagi.” “O le a faatasi le Atua ma [Lana Au Paia faamaoni] e faavavau ma faavavau lava.“ (Mataupu Faavae ma Feagaiga 121:1, 33; 122:9.)
Tagai Saints, 1:323-96; “I Totonu o Puipui o le Falepuipui i Liperate,” Revelations in Context, 256-63.
Manatu mo Suesuega Faaletagata Lava Ia o Tusitusiga Paia
Mataupu Faavae ma Feagaiga 121:1–10, 23–33;122
O puapuaga e mafai ona “avea mo [o’u] lelei.”
Pe a tatou oo pe oo i latou tatou te alolofa i ai i le totonugalemu o le puapuagatia, o se mea masani le mafaufau pe o silafia i tatou e le Atua. A e faitau i le Mataupu Faavae ma Feagaiga 121:1–6, mafaufau i taimi sa i ai ni au fesili po o ni faalogona tai pei o Iosefa Samita. O le a se mea e te maua i le tali mai a le Alii, e ono fesoasoani ia te oe pe a i ai ia te oe na fesili po o faalogona? Mo se faataitaiga, i fuaiupu 7–10, 26–33, maitau faamanuiaga sa Ia tautino atu ia i latou o e “talitalia lelei [mafatiaga].” A o e faitau i le vaega 122, mafaufau po o le a le auala e finagalo le Alii e te vaai ai i ou puapuaga.
Tagai foi Henry B. Eyring, “O Fea le Faapaologa?” Ensign po o le Liahona, Nov. 2012, 72-75.
Mataupu Faavae ma Feagaiga 121:34-46
E mafai ona tatou maua “mana o le lagi.”
I le mea na foliga mai o se tulaga sa leai se mana na i ai i le Falepuipui i Liperate, sa tuuina mai ai ia Iosefa le faaaliga lenei e uiga i le mana—e le o le mana faaupufai pe faamiliteli, lea sa faaaoga i luga o le Au Paia, ae “o mana o le lagi.” A o e faitaua le Mataupu Faavae ma Feagaiga 121:34–46, o le a se mea ua e aoaoina e uiga i le mana o le Atua? E ese faapefea mai le mana faalelalolagi? Mo se faataitaiga, vaai i upu na faaaoga e le Alii i fuaiupu 41–43 e faamatala ai le “mana po o le aafiaga.” O le a se mea o latou aoao mai e uiga i le ala e taulima ai e le Atua Lona “mana po o aafiaga”? Atonu e mafai e nei fuaiupu ona musuia oe e mafaufau loloto i lou olaga ma mea e mafai ona e faia e avea ai o se faatosinaga mo le lelei i ou sootaga ma isi.
Mataupu Faavae ma Feagaiga 122
Na afio ifo Iesu Keriso i lalo o mea uma.
Sa faafalepuipuiina ma le le tonu Iosefa Samita mo le silia ma le fa masina ao tutuli ese ana uo ma lona aiga mai o latou fale. O le galuega sa tuutoina i ai lona ola na foliga mai ua toilalo. O le a se mea ua e aoaoina e uiga ia Iesu Keriso mai i Ana fetalaiga ia Iosefa i le vaega 122? O le a se mea ua e aoaoina e uiga ia Iosefa? O le a se mea ua e aoaoina e uiga ia te oe lava?
Tagai foi i le Alema 7:11–13; 36:3; Mataupu Faavae ma Feagaiga 88:6.
Aua Le Faia Lo’u Loto, a o Lou Finagalo, saunia e Walter Rane
Mataupu Faavae ma Feagaiga 123
“Se’i tatou faia ma le fiafia mea uma o loo i ai lo tatou mana.”
Ia Mati 1839, atonu sa foliga mai na tau leai se mea na mafai e le Au Paia ona fai ia suia ai o latou tulaga faigata tele. Peitai i ana tusi sa tusia mai le Falepuipui i Liperate, sa ta’u atu ai e Iosefa ia i latou le mea e mafai ona latou faia: “[faaputuputu] se malamalama e uiga i mea moni uma” ma “tutu ma le mautinoa atoatoa, e vaai i le faaolataga a le Atua” (Mataupu Faavae ma Feagaiga 123:1, 17). Pe a e mafaufau i le taufaaoleole ma le “taufaasese poto a tagata” i le lalolagi i aso nei, mafaufau po o a ni mea “ua i ai i lo [outou] mana” e fai (fuaiupu 12, 17). Aisea e taua ai le faia o nei mea ma le “fiafia”? (fuaiupu 17). O ai e te iloa o loo “taofia mai le upumoni” (fuaiupu 12), ma e faapefea ona e fesoasoani i lenei tagata ia ona mauaina?
O le tele o tala na talosagaina e Iosefa i totonu o le tusi lenei sa auina atu i le malo ma lolomiina o se faasologa e 11-vaega i se nusipepa a Navu, o le Times and Seasons (tagai “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).
Manatu mo Suesuega Faaleaiga o Tusitusiga Paia ma Afiafi Faaleaiga
-
Mataupu Faavae ma Feagaiga 121:1–10.O le “ana” i le Falepuipui i Liperate sa na’o le 14 i le 14.5 futu (4.2 i le 4.4 mita). E mafai faapefea ona e fesoasoani i lou aiga e vaai faalemafaufau pe faapeī le faapumoomoo ai i se avanoa e faapena le telē mo ni masina malulu se fa.? E mafai ona e maua isi faamatalaga auiliili e uiga i tulaga o le Falepuipui i Liperate i le “Mataupu 46: Iosefa Samita i le Falepuipui i Liperate” (Doctrine and Covenants Stories, 172–74). E mafai foi ona e faitau i le “O Leo o le Toefuataiga: Falepuipui i Liperate” i le faaiuga o le otootoga lenei pe matamata se vitio o loo faaalia ai le taimi sa i ai Iosefa i le Falepuipui i Liperate i le vitio Joseph Smith: Prophet of the Restoration (ChurchofJesusChrist.org, amata i le 43:00). O a ni auala ua faaaafia ai e lenei faamatalaga o tatou lagona e uiga i mataupu faavae o loo i le Mataupu Faavae ma Feagaiga 121:1–10?
-
Mataupu Faavae ma Feagaiga 121:34–36, 41–45.Atonu o le a fesoasoani se tala faatusa i lou aiga e malamalama ai “i mana o le lagi.” Mo se faataitaiga, e mafai ona e faatusaina le mana o le Atua i le paoa faaeletise; o le a se mea e ono taofia se masini eletise mai le mauaina o le paoa? O le a se mea o aoao mai i lenei tala faatusa, faapea ma fuaiupu 34–36, 41–45, ia i tatou e uiga i le ala e faateleina ai lo tatou malosi faaleagaga? Atonu e mafai e tagata o le aiga ona faasoa mai i tala mai le soifuaga o le Faaola o loo faataitaia ai nei uiga auaumama.
-
Mataupu Faavae ma Feagaiga 122:7–9.Atonu foi o le a fiafia tagata o le aiga e fai ni faailo laiti e faaalia ai fasifuaitau mai nei fuaiupu ua musuia ai i latou. E mafai ona faaalia nei faailo i totonu o lou fale. Aisea e taua ai le iloa “na afio ifo le Atalii o le Tagata i lalo” o mea uma?
-
Mataupu Faavae ma Feagaiga 123:12.E mafai faapefea ona tatou fesoasoani i tagata ia “iloa le mea e maua ai” le upumoni?
Mo nisi manatu mo le aoaoina o le fanau, tagai i le otootoga o lenei vaiaso i le Sau, Mulimuli Mai ia te A’u—Mo le Peraimeri.
Pese fautuaina: “O Fea Lo’u Filemu?” Viiga, nu. 68.
O Leo o le Toefuataiga
Falepuipui o Liperate
A o faafalepuipuiina i Liperate, Misuri, na maua ai e Iosefa Samita ni tusi na logoina ai o ia e uiga i tulaga faigata o le Au Paia o Aso e Gata Ai na tutuli ese mai le malo e ala i le poloai a le kovana. Sa oo mai se tusi faamomoiloto mai i lona faletua o Ema. O ana upu, faapea ma tusi a Iosefa na tali atu ai, na faaalia uma ai o la mafatiaga ma o laua faatuatua i le aluga o lenei taimi faigata i le talafaasolopito o le Ekalesia.
Tusi mai ia Ema Samita ia Iosefa Samita, 7 Mati, 1839
“Le Tane Pele
“O le maua ai o se avanoa e auina atu ai e ala i se uo, ua ou faia ai se taumafaiga e tusi atu, ae o le a ou le taumafai e tusi uma atu o’u lagona ona o le tulaga o loo e i ai o puipui, uamea, ma fao, o vaitafe tatafe, o auvai tatafe, o mauga maualuluga o vanu maualalalo, ma folasi o laufanua, ua faapea ona ta va a’i, ma le piopio faalealofa lea na lafo muamua ai oe i le falepuipui ma ua taofia ai pea oe iina faapea ma le tele o isi faafitauli, ua matuai le mafai ai ona faamatala o’u lagona.
“Pe ana leai le faasalavei tuusao o le alofa mutimutivale mai le lagi, ou te matuai mautinoa lava e le mafai ona ou onosaia vaaiga o puapuaga na ou ui mai ai … ; ae o loo o’u ola pea ma o le a ou malie e mafatia atili pe afai o le finagalo lea o le Lagi agaalofa, e tatau ona ou puapuagatia mo oe.
“O loo matou manuia uma i le taimi nei, vagana ai Feterika o loo fai si ma’i tele.
“O Alesana laitiiti o loo o’u siia i le taimi nei o se tasi o mosi sili ona lelei ua e vaai i ai i lou olaga. E ese le aumalosi faatasi ai ma le fesoasoani a se nofoa [e pipii i ai], o le a tamoe solo ai o ia faataamilo i le potu. …
“E leai se tasi ae ua na’o le Atua, e silafia ia ‘ata’ata o lo’u mafaufau ma lagona o lo’u loto ina ua ou tuua lo tatou fale ma le aiga, ma e toetoe lava o mea uma sa tatou anaina, sei vagana ai si a taua Fanau laiti, ma faia ai la’u malaga e o ese ai mai le Setete o Misuri, ae tuua ai oe e loka i totonu o lena falepuipui mamao. Peitai o le mafaufau i [le tuua o oe ma lo tatou aiga] ua sili atu le faigata nai lo o le mea e tatau ona oo i ai se tagata. …
“… Ou te faamoemoe o loo i ai ni aso lelei atu o le a oo mai ia i ta’ua. … Ou te alofa faapelepele ia te oe.
“Ema Samita”1
Tusi mai ia Iosefa Samita ia Ema Samita, 4 Aperila, 1839
“Le Avā—pele—ma le alofa.
“O le afiafi o le Aso Tofi na ou saofai ai i lalo a’o faasolo goto ifo le la, a’o matou tau autilo atu e ala i pa o lenei falepuipui mamao, e tusi atu ia te oe, ina ia mafai ona ou faailoa atu ia te oe lo’u tulaga. Ou te talitonu ua tusa nei ma le lima masina ma aso e ono2 talu ona ou i ai i lalo o le leoleoga i le po ma le ao a se leoleo matamata ita, ma i totonu o puipui, pa, ma faitotoa uamea ōī o se falepuipui mamao, pogisa ma palapala. Faatasi ai ma lagona lea e na’o le Atua e silafia, ou te tusia ai lenei tusi. O manatunatuga loloto o le mafaufau i lalo o nei tulaga ua feteenai ma le peni, po o le laulaufaiva, po o Agelu, e faamatala, pe valivali, i le tagata ola e le’i oo lava i mea ua ta oo i ai. … Ta te faalagolago i le aao o Ieova, ae le o se isi lava, mo lo tatou laveaiga, ma afai na te le faia, o le a le faia lava, ia e mautinoa aua ua toatele tagata o lenei setete ua fiainu i o matou toto; e le faapea ona ua matou sala i se mea. … La’u Pele Ema e faaauau pea ona ou mafaufau atu ia te oe ma tamaiti. … Ou te fia vaai ia Feterika laitiiti, Iosefa, Iulia, Alesana, Ioana, ma moa’isao [sifi]–toeaina [le taifau a le aiga]. … O le a savali fiafia atu mai iinei ia te oe ma le leai o ni seevae, ma le leai o se mea e ufiufi ai [lo’u] ulu, ma afa faasausau, e vaai oe ma o le a le foliga faigata, o le a foliga mai o se mea matagofie. … Ou te tauave ma le lototele o’u sauaga uma, e faapena foi ia i latou o loo matou faatasi; e leai se tasi o i matou ua fati. Ou te manao e aua ne’i e faatagaina le [ta fanau] ia galo a’u. Ta’u atu ia i latou e alofa Tama ia i latou ma se alofa atoatoa, ma o loo ia faia mea uma na te mafaia e aluese ai mai tagata leaga ina ia alu atu ia i latou. … Ta’u atu ia i latou ua fai atu Tama e ao ina avea i latou ma tamaiti lelei, ma vaai le latou tina. …
“O lau,
“Iosefa Samita le Itiiti.”3
Ao puapuagatia Iosefa Samita i le Falepuipui i Liperate, sa faamafanafanaina o ia e le Alii ma faaali mai ia te ia ni upumoni maoae.