Far West

Far West, xb’aan laj Al Rounds

11–17 octubre

Tzolʼlebʼ ut Sumwank 115–120

“Lix mayej q’axal loq’aq wi’chik choq’ we chiru lix k’iijik”

Li Qaawa’ naraj aatinak aawik’in. Naq nakatzoleb’ li loq’laj hu, patz’ re a’an sa’ tij naq tatxtenq’a chixtawb’al li raatin a’an choq’ aawe.

Tz’iib’a li nakak’oxla

Anchal naq te’usaaq laj santil paab’anel sa’ li ak’ na’ajej aran Far West, Missouri sa’ julio re 1838. Yoo chi k’ihank li tenamit, chaab’il li ch’och’, ut kik’utb’esiman naq nach’ rik’ineb’ sa’ xnim li saq’e wan Adan-ondi-Ahman, jun na’ajej q’axal aajel ru sa’ musiq’ej (chi’ilmanq Tzol’leb’ ut Sumwank 107:53–56; 116). A’ut, toj ch’a’aj tana’ choq’ reheb’ laj santil paab’anel naq ink’a’ te’xk’oxla li k’a’ru kisach chaq chiruheb’. Ke’isiik chaq aran Independence, li na’ajej xaqab’anb’il choq’ Sion, ut chanchan naq ink’a’ te’ruuq chi sutq’iik aran. Jo’kan ajwi’, ke’mine’ ru laj santil paab’anel chi elk chaq Kirtland, Ohio, ut ke’xkanab’ lix santil ochoch chirix yal wiib’ chihab’. Ut anajwan, maawa’eb’ ajwi’ laj xik’ ilonel li moko wankeb’ ta sa’ Iglees li ke’xyoob’ li ch’a’ajkilal—ke’wan ajwi’ li komon li ke’xpo’resi xch’ool chirix laj Jose Smith, jo’eb’ li oxib’ chi aj yehol nawom chirix lix Hu laj Mormon ut kaahib’ reheb’ li Kab’laju. Wankeb’ tana’ li ke’xpatz’, ma yoo chi kawob’resiik malaj chi q’unob’resiik li rawa’b’ejihom li Dios?

A’b’an li tiikeb’ chi paab’ank ink’a’ ke’wan chi ramb’il xb’aaneb’ li patz’om a’an. Ke’ok b’an chixkab’lankil jun chik li santil na’ajej, anajwan sa’ Far West. Ke’xk’uub’ xkab’lankil jun ak’ santil ochoch. Ke’b’oqe’ kaahib’ chik li apostol, ut wiib’ reheb’—laj John Taylor ut laj Wilford Woodruff—moqon ke’wan jo’ Awa’b’ej re li Iglees (chi’ilmanq Tzol’leb’ ut Sumwank 118:6). Eb’ laj santil paab’anel ke’xtzol naq xb’aanunkil lix k’anjel li Dios ink’a’ naraj naxye naq maajo’q’e tatt’ane’q, a’b’an naq “tatwakliiq wi’chik.” Ut us ta tento tatmayejaq, loq’aq li mayejak a’an sa’ rilob’aal li Dios, “q’axal loq’aq wi’chik … chiru laa k’iijik” (Tzol’leb’ ut Sumwank 117:13).

Chi’ilmanq Santos, 1:300–303; “Far West y Adán-ondi-Ahmán,” Revelaciones en Contexto, 251–257.

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzol’leb’ ut Sumwank 115:4–6

Lix k’ab’a’ li Iglees kik’ehe’ xb’aan li Qaawa’.

Li Awa’b’ej Russell M. Nelson kixye naq lix k’ab’a’ li Iglees a’an “jun na’leb’ aajel ru” (“Tz’aqal xk’ab’a’ li Iglees,” Jolomil ch’utub’aj-ib’ re octubre 2018). K’oxla k’a’ut naq yaal a’an naq yookat chirilb’al ru Tzol’leb’ ut Sumwank 115:4–6. Chan ru naq lix k’ab’a’ li Iglees naxk’am rib’ rik’in lix k’anjel?

Chi’ilmanq ajwi’ 3 Nefi 27:1–11.

Tzol’leb’ ut Sumwank 115:5–6

Sion ut eb’ li roqechal wankeb’ choq’ “muheb’aal chiru li kaq-sut-iq’.”

Us ta eb’ laj santil paab’anel yookeb’ chixnumsinkil ch’a’ajkilal sa’ 1838, li Qaawa’ toj maak’a’jo’ li kiraj naq te’xb’aanu. Sik’eb’ li aatin sa’ Tzol’leb’ ut Sumwank 115:5–6 li neke’xka’jultika li k’anjel naraj li Qaawa’ naq lix Iglees ut eb’ lix komon te’xb’aanu sa’ ruchich’och’. Qayehaq, k’a’ru nakaweek’a naq tento taab’aanu re “tatwakliiq ut tatlemtz’unq chaq”? (raqal 5). K’a’ruheb’ li musiq’ejil kaq-sut-iq’ nakawil chasutam, ut chan ru taqataw “muheb’aal” sa’ xch’utub’ankil qib’? (raqal 6).

Chi’ilmanq ajwi’ 3 Nefi 18:24.

Tzolʼlebʼ ut Sumwank 117

Loq’eb’ lin mayej sa’ rilob’aal li Qaawa’.

Li elk chaq aran Kirtland maare ch’a’aj chaq chiruheb’ li kristiaan jo’ laj Newel K. Whitney, li chaab’il chaq xyu’am a’an ut lix junkab’al aran. K’a’ru nakataw sa’ Tzol’leb’ ut Sumwank 117:1–11 li maare kixtenq’aheb’ chixb’aanunkil li mayej a’an? Chan ru neke’xjal li raqal a’in laa na’leb’ chirix k’a’ru li q’axal aajel ru?

Jalan li kipatz’man re laj Oliver Granger: li Qaawa’ kixk’e xk’anjel chi kanaak sa’ Kirtland ut chirilb’al xtuminal li Iglees. Nim chaq li k’anjel a’an, ut us ta chaab’il kik’anjelak choq’ re li Iglees, ink’a’ kiru chixk’uulankil naab’al li tumin. K’oxla chan ru naq li raatin li Qaawa’ sa’eb’ li raqal 12–15 wan rilom rik’in li naxpatz’ naq taab’aanu laa’at.

Chi’ilmanq ajwi’ Mateo 6:25–33; Boyd K. Packer, “Mis hermanos más pequeños,” Liahona, noviembre 2004, 86–88; “Far West y Adán-ondi-Ahmán,” Revelaciones en Contexto, 255–256.

Adan-ondi-Ahman sa’ li Condado Daviess, Missouri

Laj Newel K. Whitney kitaqlaak chi q’axonk toj sa’ Adan-ondi-Ahman, li k’utb’il arin.

Tzolʼlebʼ ut Sumwank 119–20

Naq nintoj li lajetqil, nintenq’an chixkab’lankil ut “chixsantob’resinkil li ch’och’ Sion.”

Li na’leb’ k’eeb’il sa’eb’ li tasal 119 ut 120 chanchan li na’leb’ naxk’e li Qaawa’ anajwan re taawanq tumin choq’ re lix k’anjel. Sa’ li kutan a’in, eb’ laj santil paab’anel neke’xq’axtesi “lix lajetq raqal chixjunil lix k’iijikeb’ [a’an li tumin neke’xk’ul] rajlal chihab’ ” (Tzol’leb’ ut Sumwank 119:4), ut li tumin a’in k’uulanb’il xb’aan jun li ch’utam re li Xb’eenil Awa’b’ejil, lix Molameb’ li Kab’laju, ut li Obispil aj Jolominel. K’oxlaheb’ li patz’om a’in naq yookat chirilb’aleb’ li tasal a’in:

• Chan ru naq xpaab’ankil li chaq’rab’ re li lajetqil “naxsantob’resi li ch’och’ Sion”? Chan ru naq li chaq’rab’ a’in tixk’e li na’ajej wankat wi’ chi wank jo’ “jun ch’och’ Sion choq’ aawe”? (Tzolʼlebʼ ut Sumwank 119:6).

• K’a’ru xyaalalil choq’ aawe li aatin “xb’aan lix yaab’ inkux laa’in reheb’ ” Tzol’leb’ ut Sumwank 120?

Chi’ilmanq ajwi’ Malakias 3:8–12; David A. Bednar, “Las ventanas de los cielos,” Liahona, noviembre 2013, 17–20; “El diezmo de mi pueblo,” Revelaciones en Contexto, 266–272.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 115:4–6.Ma us raj rilb’aleb’ ru li raqal a’in jo’ junkab’al naq yoo chi saqewk li kutan? Maare us aatinak chirix k’a’ru naraj naxye li aatin “Waklinqex ut lemtz’unqex chaq” (raqal 5). Malaj naru tex’aatinaq chirix li teenumsi raj sa’ xsik’b’al jun li muheb’aal naq yoo jun li kaq-sut-iq’. Chan ru naq a’an chanchan xsik’b’al “muheb’aal” sa’ li Iglees? (raqal 6). Toja’ naq texruuq chi aatinak chirix chan ru teetenq’aheb’ lee ras eeriitz’in chixtawb’al xmuheb’aaleb’ sa’ li Iglees.

Tzol’leb’ ut Sumwank 117:1–11.Naru teek’ut chan ru xjalanil jun li “tz’uqul” rik’in k’a’ruhaq li “q’axal nim” chiru (raqal 8), jo’ jun sek’ chi ha’. A’in texxtenq’a chi aatinak chirix k’a’ru li ink’a’ aajel ru sa’ li qayu’am li naru tooxram chixk’ulb’aleb’ li k’iila osob’tesink naxk’e li Dios.

Tzolʼlebʼ ut Sumwank 119.Naru teeb’icha jun li b’ich chirix li lajetqil, jo’ “Nawaj xk’eeb’al lin lajetqil” (B’ichleb’aal choq’ reheb’ li Kok’al, 143). K’a’ru naxk’ut li b’ich ut li tasal 119 chirix k’a’ut naq naqatoj li lajetqil? Eb’ li kok’al naru te’xtaw xna’leb’ rik’in jun li k’utb’esink: naru taak’e kok’ k’a’aq re ru reheb’, taatenq’aheb’ chixtawb’al lix lajetq raqal, ut taaye reheb’ k’a’ut naq naqatoj li lajetqil. (Chi’ilmanq ajwi’ Leales a la Fe, 60–61.)

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Nawaj xk’eeb’al lin lajetqil,” B’ichleb’aal choq’ reheb’ li Kok’al, 143.

Xchaab’ilob’resinkil li qak’utum

Waklesi xch’ooleb’ chixtenq’ankileb’ rib’ xjunes. “Naq wankeb’ xpatz’om [laa junkab’al], wan naq q’axal us wi’chik xk’utb’al chiruheb’ chan ru xtawb’al xsumenkil xpatz’omeb’ xjuneseb’ ” (Li k’utuk jo’ li Kolonel, 28).

chan ru na’oksiman li lajetqil

Xk’eeb’al lix lajetq raqal li qatumin re li Qaawa’ jo’ lajetqil naxtenq’a chixtiikisinkil lix k’anjel chi uub’ej.