“Oktubre 18–24. Doktrina ug mga Pakigsaad 121–123: “O Dios, Hain Ba Ikaw?’” Dali, Sunod Kanako—Alang sa mga Indibidwal ug mga Pamilya: Doktrina ug mga Pakigsaad 2021 (2020)
“Oktubre 18–24. Doktrina ug mga Pakigsaad 121–123,” Dali, Sunod Kanako—Alang sa mga Indibidwal ug mga Pamilya: 2021
Liberty Jail Spring, ni Al Rounds
Oktubre 18–24
Doktrina ug mga Pakigsaad 121–123
“O Dios, Hain Ba Ikaw?”
Ang imong kasinatian sa pagtuon sa mga kasulatan mas mamaayo kon ang imong tumong mao ang pagpangita sa kamatuoran. Pagsugod pinaagi sa pag-ampo, pamati sa Espiritu, ug i-rekord ang imong mga pagbati.
I-rekord ang Imong mga Pagbati
Ang ubos nga ang-ang sa distrito nga bilanggoan sa Liberty Missouri, nabantug nga lawak nga ngitngit ilawom sa yuta [dungeon]. Ang mga pader baga, ang semento nga salog bugnaw ug hugaw, ang pagkaon––diyutay kaayo––pan-os, ug ang kahayag nagagikan lamang sa duha ka gamay, gibarandilyahan nga mga bintanang sikit duol sa kisame. Kining bilanggoan nga ilawom sa yuta diin si Joseph Smith ug pipila sa iyang mga kaigsoonan migahin sa kadaghanan sa ilang pagka-binilanggo––upat ka bulan nga makapatikig nga katugnaw sa panahon sa tingtugnaw sa 1838–39––naghulat sa husay alang sa pasangil sa pagbudhi batok sa estado sa Missouri. Sulod niini nga panahon, si Joseph kanunay nga nagdawat og mga balita mahitungod sa pag-antus sa mga Santos. Ang kalinaw ug kamalaumon sa Far West milungtad lamang og pila ka mga bulan, ug karon ang mga Santos usab wala nay mga panimalay, giabug ngadto sa kamingawan nagpangita gihapon og laing dapit aron magsugod na usab––niini nga panahon nga ang ilang Propeta anaa sa bilanggoan.
Dili katingad-an nga misinggit si Joseph Smith, “O Dios, hain ba ikaw?” Ang mga tubag nga iyang nadawat, ang “kahibalo gikan sa langit” nga “gibu-bu” diha nianang alaut nga bilangoan, nagpakita nga bisan kini dili kanunay mobati sama niini, ang Dios dili gayud layo kaayo. Walay gahum nga “makapugong sa mga langit,” nakat-unan sa Propeta. “Ang Dios mouban sa [Iyang matinud-anong mga Santos] hangtud sa kahangturan.” (Doktrina ug mga Pakigsaad 121:1, 33; 122:9.)
Tan-awa sa Mga Santos, 1:365-451.
Mga Ideya alang sa Personal nga Pagtuon sa Kasulatan
Doktrina ug mga Pakigsaad 121:1–10, 23–33; 122
Ang kalisdanan “alang sa [akong] kaayohan.”
Kon kita o kadtong atong gihigugma anaa nagsinati og pag-antus, kini sagad ang paghunahuna kon ang Dios nagpakabana ba kanato. Samtang ikaw nagbasa diha sa Doktrina ug mga Pakigsaad 121:1–6, paghunahuna og mga higayon nga ikaw dihay mga pangutana o mga pagbati nga susama sa kang Joseph Smith. Unsa ang imong nakita sa tubag sa Ginoo nga mahimong motabang kanimo kon ikaw aduna niadto nga mga pangutana o mga pagbati? Sama pananglit, diha sa mga bersikulo 7–10, 26–33, tan-awa ang mga panalangin nga Iyang gisaad ngadto niadtong kinsa “molahutay [sa kasakit] pag-ayo.” Samtang ikaw nagbasa diha sa seksyon 122, hunahunaa kon sa unsa nga paagi ang Ginoo gusto kanimo nga motan-aw sa imong mga kalisdanan.
Tan-awa usab sa Henry B. Eyring, “Hain ang Imong Gambalay [Pavilion]” Liahona, Nob. 2012, 72–75.
Doktrina ug mga Pakigsaad 121:34–46
Kita makagamit sa mga “gahum sa langit.”
Sa unsay ingon og walay gahum nga kahimtang diha sa Bilanggoan sa Liberty, si Joseph gihatagan og pagpadayag mahitungod sa gahum––dili sa politikal o militar nga gahum nga gibutang diha sa mga Santos apan “sa mga gahum sa langit.” Samtang ikaw nagbasa diha sa Doktrina ug mga Pakigsaad 121:34–46, unsa ang imong nakat-unan mahitungod sa gahum sa Dios? Sa unsa nga paagi kini lahi gikan sa kalibutanong gahum? Sama pananglit, pangitaa ang mga pulong nga gigamit sa Ginoo diha sa mga bersikulo 41–43 sa paghulagway sa “gahum o impluwensya.” Unsa ang gitudlo niini mahitungod kon giunsa sa Dios sa pagpalungtad ang Iyang “gahum o impluwensya”? Tingali kini nga mga bersikulo makapadasig kanimo sa pagpamalandong sa imong kinabuhi ug sa unsay imong mabuhat nga mahimong usa ka impluwensya alang sa kaayohan sa imong mga pakigdait ngadto sa uban.
Si Jesukristo mikunsad ubos sa tanang mga butang.
Si Joseph Smith walay kaangayang nabilanggo sulod sa labaw sa upat ka mga bulan samtang ang iyang mga higala ug pamilya gipugos sa pagbiya sa ilang mga panimalay. Ang buhat nga gihalad niya ang iyang kinabuhi maingon og napakyas. Unsay inyong nakat-unan mahitungod ni Jesukristo gikan sa Iyang mga pulong ngadto ni Joseph diha sa seksyon 122? Unsay imong nakat-unan mahitungod ni Joseph? Unsay imong nakat-unan mahitungod sa imong kaugalingon?
Tan-awa usab diha sa Alma 7:11–13; 36:3; Doktrina ug mga Pakigsaad 88:6.
Dili ang Akong Pagbuot Maoy Matuman, Kondili ang Imo, ni Walter Rane.
“Kita magmalipayon sa pagbuhat sa tanan nga mga butang nga ubos sa atong gahum.”
Sa Marso 1839, maingon og wala kaayoy daghang mabuhat ang mga Santos sa pag-usab sa ilang dili katuohang kalisud nga sitwasyon. Apan diha sa iyang mga sulat gikan sa Bilanggoan sa Liberty, gisultihan sila ni Joseph kon unsa ang ilang mabuhat: “[pagtigum] sa kasayuran sa tanan nga mga hitabo” ug “magmalinawon, uban ang labing dako nga kasiguroan, nga makasaksi, sa kaluwasan sa Dios” (Doktrina ug mga Pakigsaad 123:1, 17). Samtang imong hunahunaon ang paglipot ug “paglingla sa mga tawo” sa kalibutan karon, paghunahuna mahitungod sa unsa nga mga butang nga “ubos sa [imong] gahum ” sa pagbuhat (mga bersikulo 12, 17). Nganong importante ang pagbuhat niining mga butanga nga “magmalipayon”? (bersikulo 17). Kinsa ang imong nailhan kinsa “natago gikan sa kamatuoran” (bersikulo 12), ug unsaon nimo pagtabang niini nga tawo nga makakaplag niini?
Daghan sa mga asoy nga gipangayo ni Joseph niini nga sulat gihatag ngadto sa gobyerno ug gimantala isip usa ka 11 ka bahin nga serye diha sa pamantalaan sa Nauvoo, ang Times and Seasons (tan-awa sa “A History, of the Persecution, of the Church of Jesus Christ, of Latter Day Saints in Missouri, December 1839–October 1840.” [josephsmithpapers.org]).
Mga Ideya alang sa Pamilya nga Pagtuon sa Kasulatan ug Family Home Evening
-
Doktrina ug mga Pakigsaad 121:1–10.Ang “bilanggoan nga ilawom sa yuta” sa Bilanggoan sa Liberty 14 x 14.5 pye lamang(4.2 x 4.4 ka metros). Unsaon nimo pagtabang ang imong pamilya sa paghanduraw kon sama kini sa unsa ang mabilanggo sa usa ka luna nga ingon niana ang gidak-on sulod sa upat ka tugnaw nga mga bulan? Makakaplag ka og ubang mga detalye mahitungod sa mga kahimtang sa Bilanggoan sa Liberty diha sa “Chapter 46: Joseph Smith in Liberty Jail” (Doctrine and Covenant Stories, 172–74). Mahimo ka usab nga mobasa sa “Voices of the Restoration: Liberty Jail” sa katapusan niini nga latid o motan-aw sa video nga nagpakita sa panahon ni Joseph didto sa Bilanggoan sa Liberty Joseph Smith: Ang Propeta sa Pagpahiuli (ChurchofJesusChrist.org, sugod diha sa 43:00). Giunsa niini nga impormasyon pag-apekto kon sa unsa nga paagi kita mibati mahitungod sa mga baruganan diha sa Doktrina ug mga Pakigsaad 121:1–10?
-
Doktrina ug mga Pakigsaad 121:34–36, 41–45.Tingali ang pag-agid-agid [analogy] motabang sa imong pamilya sa pagsabut “sa mga gahum sa langit.” Sama pananglit, mahimo nimong itandi ang gahum sa Dios ngadto sa koryente sa elektrisidad; unsa kaha ang magpugong sa usa ka galamiton nga elektrikal gikan sa pagdawat og koryente? Unsa ang gitudlo kanato niini nga pag-agid-agid, uban sa mga bersikulo 34–36, 41–45, mahitungod kon unsaon sa pagpatubo sa atong espiritwal nga gahum? Tingali ang mga sakop sa pamilya mahimong makigbahin og mga istorya gikan sa kinabuhi sa Manluluwas nga nagpakita niini nga mga hiyas.
-
Doktrina ug mga Pakigsaad 122:7–9.Tingali ang mga sakop sa pamilya mahimuot sa paghimo og gagmay nga mga timaan nga nagpakita og hugpong sa mga pulong gikan niini nga mga bersikulo nga nagdasig kanila. Kini nga mga timaan mahimong ipakita diha sa inyong panimalay. Nganong importanting mahibaloan nga “ang Anak sa Tawo mikunsad ubos” sa tanang mga butang?
-
Doktrina ug mga Pakigsaad 123:12.Unsaon nato pagtabang ang mga tawo nga “masayud … asa pangitaa” ang kamatuoran?
Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.
Gisugyot nga awit: “Ang Kalinaw Asa Ko Pangitaa?” Mga Himno, nu. 75.
Mga Tingog sa Pagpahiuli
Bilanggoan sa Liberty
Samtang nabilanggo didto sa Liberty, Missouri, nadawat ni Joseph Smith ang mga sulat nga nagpahibalo kaniya mahitungod sa makuyaw nga sitwasyon sa mga Santos sa Ulahing mga Adlaw kinsa gipang-abug gikan sa estado pinaagi sa mando sa gobernador. Usa ka mahinuklugong sulat miabut gikan sa iyang asawa nga si Emma. Ang iyang mga pulong, ug ang mga sulat ni Joseph, nagpahayag sa ilang mga pag-antus ug sa ilang hugot nga pagtuo niining malisud nga panahon sa kasaysayan sa Simbahan.
Sulat gikan ni Emma Smith ngadto ni Joseph Smith, Marso 7, 1839
“Mahal nga Bana
“Nakabaton og oportunidad sa pagpadala pinaagi sa usa ka higala, misulay ako sa pagsulat, apan dili ako mosulay sa pagsulat sa tanan kong mga pagbati, tungod sa imong sitwasyon, sa mga pader, sa mga barandilya, ug mga trangka, sa nagdahunog nga mga suba, nagdagan nga mga sapa, tag-as nga mga bungtod, nagkalawom nga mga walog ug lapad nga mga kakahoyan nga nagbulag kanato, ug ang walay kaangayan nga unang mibalhog kanimo diha, uban sa daghan pang mga hunahunaon, nagbutang sa akong mga pagbati nga dili gayud mahulagway.
“Kon dili pa tungod sa akong nahibaloan nga kita walay sala ug ang balaang kalooy wala mopataliwala, sa labing tinuod dili gayud ako makahimo sa paglahutay sa mga nakaingon sa pag-antus nga akong naagian … ; apan sa gihapon magpadayon ug gani andam sa pag-antus pa kon kini kabubut-on sa maloloy-ong Dios nga ako kinahanglan alang sa imong kaayohan.
“Maayo kaming tanan sa pagkakaron, gawas ni Fredrick kinsa may sakit.
“Ang gamay nga bata nga si Alexander nga karon akong gikugos maoy usa sa labing nindot nga gamay nga tawo nga sukad imong nakita sa imong kinabuhi. Kusgan kaayo siya nga sa tabang sa usa ka lingkuranan modagan siya libut sa kwarto. …
“Walay lain gawas sa Dios ang nasayud sa mga pamalandong sa akong hunahuna ug sa mga pagbati sa akong kasingkasing sa dihang mibiya ako sa atong balay ug panimalay, ug sa hapit tanan nga atong gipanag-iya gawas sa atong gagmay nga mga Anak, ug mibiyahe pagawas sa Estado sa Missouri, nagbiya kanimo nga nabalhug diha nianang mingaw nga bilanggoan. Apan ang paghinumdom labaw pa sa kalisud kay sa masinati sa usa ka tawo. …
“… Nanghinaut ako nga aduna pay mas maayong mga adlaw nga moabut kanato. … [Ako] mabination kanimo sukad.
“Emma Smith”1
Sulat gikan ni Joseph Smith ngadto ni Emma Smith, Abril 4, 1839
“Mahal––ug mabination––nga Asawa.
“Huwebes sa gabii milingkod ako sa pagsalop gyud sa adlaw, samtang milili kami pinaagi sa mga rehas niining mamingaw nga bilanggoan, sa pagsulat kanimo aron ako makapahibalo kanimo sa akong sitwasyon. Kini karon sa akong pagtuo mga lima na ka mga bulan ug unom ka mga adlaw2 sukad ako gibutang nga gigwardyahan adlaw ug gabii, ug sulod sa mga pader, mga rehas, ug nagtig-ik nga pultahang puthaw sa usa ka mingaw, ngitngit, hugaw nga bilanggoan. Uban sa mga pagbati nga Dios lamang ang nasayud gihimo ko kini nga sulat. Ang mga paghinuktok ubos niini nga mga sitwasyon mosalikway sa pluma [pen], o sa pulong, o sa mga Anghel, sa paghulagway, o sa pagpintura, ngadto sa tawo kinsa wala gayud makasinati unsa ang atong nasinati. … Misalig kita sa kalig-on ni Jehova, ug wala nay lain, alang sa atong kaluwasan, ug kon siya dili mobuhat niini, dili kini mabuhat, kamo makasiguro, tungod kay adunay gustong mopatay kanato dinhi niini nga estado; dili tungod kay kita adunay sala. … Minahal kong Emma kanunay akong naghunahuna kanimo ug sa mga bata. … Gusto kong makakita sa gamay nga Frederick, Joseph, Julia, Alexander, Joana, ug sa tigulang nga medyor [ang iro sa pamilya]. … Malipayon akong molakaw gikan diri nganha kanimo nga magtiniil, ug walay sampong sa ulo, ug kulang sa saput ang lawas, aron sa pagtan-aw kanimo ug maghunahuna niini nga dako kaayong kalipay, ug dili maghunahuna niini nga malisud. … Gipas-an ko uban sa kaisug ang tanang padaugdaog kanako, ingon man niadtong kinsa uban kanako; walay pay usa kanamo nga misibug. Gusto ko nga ikaw dili motugot sa [atong mga anak] nga makalimot kanako. Sultihi sila nga si Papa naghigugma kanila uban sa hingpit nga paghigugma, ug naghimo siya sa tanan nga iyang mahimo nga makabuhi gikan sa manggugubot aron sa pag-anha kanila. … Sultihi sila nga si Papa nag-ingon nga sila kinahanglan gayud nga buotan nga mga bata, ug maminaw sa ilang inahan. …
“Imong,
“Joseph Smith Jr.”3
Samtang nag-antus diha sa Bilanggoan sa Libery, mihupay ang Ginoo kaniya ug mipadayag og mahinungdanong mga kamatuoran.