“Novemba 1–7. IMfundiso neziVumelwano 125–128: “IZwi leNjabulo kwabaPhilayo nabaFileyo,’” Wozani, Ngilandeleni—Okomuntu Ngamunye Nemindeni 2021 (2020)
“Novemba 1–7. IMfundiso neziVumelwano 125–128,” Wozani, Ngilandeleni—Okomuntu Ngamunye Nemindeni: 2021
Thina Sinabo futhi Nabo Banathi, nguCaitlin Connoly
Novemba 1–7
IMfundiso neziVumelwano 125–128
“IZwi leNjabulo kwabaPhilayo nabaFileyo”
Khumbula ukuyibhala phansi imizwa yakho ngesikhathi usafunda IMfundiso neziVumelwano 125–28 ukuze ucabange ngayo bese uxoxele nabanye.
Bhala Okufika Emqondweni Wakho
Ngo-Agasti 1840, uJane Neyman owayesosizini walalela uMphrofethi uJoseph ekhuluma emgcwabeni womngani wakhe uSeymour Brunson. Indodana kaJane uCyrus eyayiseyintsha nayo yayisanda kushona. Okwakongeza osizini lwakhe wukuthi uCyrus wayengakaze abhabhadiswe, futhi uJane wayekhathazwa wukuthi kazi kwakuyokwenzekani ngomphefumulo wakhe waphakade. UJoseph wayazi ukuthi uzizwa kanjani;naye wayezibuza umbuzo ofanayo ngomfowabo u-Alvin, naye owayefe ngaphambi kokuba abhabhadiswe. Ngakho ke uMphrofethi wabona kukuhle ukuba axoxele uJane, nabo bonke ababekhona kulowomngcwabo, ngalokho iNkosi eyayimembulele kona ngalabo ababefe bengazange bathole izimiso zevangeli––nokuthi yikuphi esingakwenza ukubasiza.
Imfundiso yokubhabhadiswa kwabafileyo yayibavusela amadlingozi abaNgcwele; imicabango yabo masinyane yaphendukela kubazali abangasekho, ogogo nomkhulu, namanye amalungu emindeni yabo. Manje kwase kukhona ithemba ngabo! UJoseph wayejabula nabo, futhi wayesebenzisa ulimi lwenjabulo nomdlandla ukubachazela ngalokho iNkosi eyamfundisa kona ngokusindiswa kwabafileyo: “Izintaba mazimemeze ngenxa yenjabulo, futhi nonke nina zigodi khalani kakhulu, futhi nonke nina zilwandle nemihlaba eyomileyo yishoni izimanga zeNkosi yenu yaPhakade!” (IMfundiso neziVumelwano 128:23).
Bheka ku Saints, 1:415–27; “Letters on Baptism for the Dead,” Revelations in Context, 272–76.
Amasu Okuzifundela Imibhalo Engcwele
INkosi ifuna ngiwunakekele umndeni wami.
Emva kokubuya komunye umsebenzi wokuthunywa eNgilandi, uBrigham Young waphinde wathola olunye ubizo olubalulekile eNkosini––ukuba “anakekele kakhulu umndeni [wakhe]” (uvesi 3), owawuzwe ubuhlungu ngesikhathi engekho. Ngesikhathi usadlinza ngokuthi ngabe lesiseluleko kwi sigaba 126 nezinye zikuthinta kanjani wena, ake ucabange ngalamazwi avela kuMongameli uBonnie L. Oscarson, owayenguMongameli kaZwelonke Wamantombazane:
“Khumbulani ukuthi ezinye zezidingo ezinkulu kungenzeka kube yilezo eziphambi kwenu. Qalani ngokuletha usizo ngaphakathi kwamakhaya enu nasemindenini yenu. Lobu wubudlelwano okungenzeka bube ngobungunaphakade. Ngisho––mhlawumbe futhi ikakhulu uma––isimo somndeni wakho singesihle, usengazithola izindlela zokuletha usizo, zokukhuthaza, nokuqinisa. Qala lapho ukhona, bathande njengoba benjalo, ulungiselele umndeni othanda ukuba nawo kusasa” (“The Needs before Us,”kwi Ensign noma iLiyahona, ngoNovemba 2017, 27).
IMfundiso neziVumelwano 127:2–4
INkosi iyakwazi ukujabula nosizi lwami.
Ukuhletshwa nokwesatshiswa ngokuboshwa kwaphinde kwamphoqa uJoseph Smith ukuba ayocasha ngo-Agasti 1842. Kodwa amagama awabhalela abaNgcwele ngalesisikhathi (manje aziwa nge Mfundiso neziVumelwano 127) agcwele ithemba lokuhle nenjabulo. Ngabe amavesi 2–4 akufundisani ngoNkulunkulu na? mayelana nokuthi wena ungabhekana kanjani nobakho ubunzima na?
Cabanga ngokubhala phansi ukuthi ngabe iNkosi ikugcina kanjani “emanzini ajulile” empilo yakho na?
IMfundiso neziVumelwano 127:5–8; 128:1–8
“Enikubhalayo emhlabeni kuyobhalwa nasezulwini.”
Ngesikhathi uyifunda IMfundiso neziVumelwano 127:5–8; 128:1–8, bheka ukuthi yiziphi izizathu ezikhona ezenza iNkosi inike uJoseph Smith imiyalelo ethize ngokuphathelene nokubhabhadiselwa kwabafileyo. Ngabe lokhu kukufundisani wena ngeNkosi nangomsebenzi Wayo na?
Ukusiza obabamkhulu bethu ethempelini kubophela izinhliziyo zethu kubo.
IMfundiso neziVumelwano 128:5–25
Insindiso yobabamkhulu bami ibaluleke kakhulu kweyami insindiso.
Kuyacaca kulokho uNkulunkulu akwembulela uJoseph Smith ukuthi kungani obabamkhulu bethu abangazange babhabhadiswe kulempilo beludinga usizo lwethu ukuze basindiswe. Kodwa ke uma ucabanga ngabe kungani insindiso yobabamkhulu “idingekile futhi ibalulekile ensindisweni yethu na”? (bheka IMfundiso neziVumelwano 128:15–18; kwengezwe amagama atshekileyo).
Uvesi 5 usifundisa ukuthi isimiso sokubhabhadisela abafileyo “salungiswa ngaphambi kokusekelwa komhlaba.” Ngabe leliqiniso likufundisani wena ngoNkulunkulu nangohlelo Lwakhe na? Ngabe inkulumo kaMongameli uHenry B. Eyring enesihloko esithi “Gathering the Family of God” yengeza luphi ulwazi ukuze uzuze okunye ukuqonda na? (kwi-Ensign noma iLiyahona, yangoMeyi. 2017, 19–22).
UJoseph Smith usebenzisa imishwana enjenga- “mandla okubopha,” “ubudlelwano obuhlanganisayo,” kanye “nokuhlangana okupheleleyo” uma efundisa ngezimiso zobuphristi nokubhabhadisela abafileyo. Yibheke lemishwana neminye efana nayo ngesikhathi ufunda IMfundiso neziVumelwano 128:5–25. Ngabe yiziphi izinto ezingaboshwa ndawonye, ngoJesu Kristu, ngenxa yezimiso zobuphristi ezenzelwa abafileyo na? Kungani igama elithi “isibindi” kuligama elihle lokuchaza ngemfundiso yensindiso yabafileyo na? (bheka amavesi 9–11).
Ngabe yikuphi okukuhlaba umxhwele ngamagama kaJoseph Smith emavesini 19–25 na? Ngabe lamagama ayithinta kanjani imizwa yakho mayelana nokuletha usizo ethempelini ukuze kuzuze obabamkhulu bakho na? ngoJesu Kristu? Ngabe yikuphi ozwa unentshisekelo yokukwenza na?( ).
Bheka 1 KwabaseKorinte 15:29; nenkulumo kaDale G. Renlund, ethi “Family History and Temple Work: Sealing and Healing,” kwi-Ensign noma iLiyahona, ngoMeyi 2018, 46–49; naku ChurchofJesusChrist.org.
Amasu Okufunda Imibhalo Engcwele Ningumndeni Nangobusuku Bomndeni
-
IMfundiso neziVumelwano 126.Ukufunda ngalesiseluleko esibhekiswe kuBrigham Young kungenza umndeni wakho ube nentshisekelo yokuba uke uxoxe ngokuthi ningasichitha kanjani isikhathi ngokuthi “ninakekelane kakhulu” (uvesi 3).
-
IMfundiso neziVumelwano 128:15–18.Ngabe yiziphi ezinye izibusiso ezisindisayo neziphelelisayo zomsebenzi omayelana nomlando womndeni na? Kungenzeka uthole eminye imiqondo mayelana nalokhu ku (ChurchofJesusChrist.org). ().
-
IMfundiso neziVumelwano 128:18.Cabanga ngokwenza iketango lephepha elinamagama amalungu omndeni nawobabamkhulu eketangweni ngalinye ngenhloso yokukhombisa ukuthi umlando womndeni nomsebenzi wasethempelini kubenza kanjani “ubudlelwano obuhlanganisayo “ obusihlanganisa nobabamkhulu. Mhlawumbe ningenza ucwaningo ku FamilySearch.org ukuze nithole amanye amalungu omndeni wenu ukuze futhi nibone ukuthi iketango lenu lide kangakanani.
-
IMfundiso neziVumelwano 128:19–23.Mhlawumbe amalungu omndeni wakho angawacwaninga lamavesi ukuze athole amagama akhombisa injabulo kaJoseph Smith ngevangeli likaJesu Kristu nangensindiso yabafileyo. Amalungu omndeni wakho angabelana ngalokho akubonile nakuzwile okuwenza nawo ajabule ngalomsebenzi—noma ningabheka izehlakalo ndawonye ku FamilySearch.org/discovery.
Ukuthola amanye amasu okufundisa abantwana, bheka uhlelo lalelisonto ku Come, Follow Me—For Primary.
Iculo elingaculwa: “Family History—I Am Doing It,” Children’s Songbook, 94.
Amazwi Ngokubuyiselwa
Ukubhabhadiselwa Abafileyo, “Udaba Olusha Noluhle Kakhulu”
Lomfanekiso ukhombisa isitsha sokubhabhadisela eThempelini laseNauvoo sihleliphezu kwezinkunzi eziyishumi-nambili.
UPhebe noWilford Woodruff
UPhebe Woodruff wayehlala maduzane nendawo yaseNauvoo ngesikhathi uJoseph Smith eqala ukufundisa ngokubhabhadiselwa abafileyo. Wabhalela umyeni wakhe, uWilford, lokhu ngesikhathi esemsebenzini wokuthunywa eNgilandi:
“Umfowethu uJoseph … usefunde ngesambulo ukuthi labo abangamalungu alelibandla bangabhabhadiselwa izihlobo zabo esezafa futhi ezingabanga nenhlanhla yokuzwa ngalelivangeli, ngisho nabantwana, abazali, abafowabo, odade, ogogo nomkhulu, omalume, ngokunjalo no-anti babo. … Masinya nje emva kokubhabhaselwa abangani babo bayakhululwa etilongweni futhi bangayoba landa ngovuko babalethe embusweni wesilestiyali––amalungu ebandla ayemukele ngezinhliziyo ezijabulayo lemfundiso futhi sebeyaphambili ngobuningi babo, abanye bazobhabhadiswa izikhathi eziyishumi-nesithupha ngosuku olulodwa.”1
Kamuva uWilford Woodruff washo lokhu ngalemfundiso: “Kwathi uma ngizwa ngayo umphefumulo wami waba nenjabulo. … Ngabe sengihamba ngiyobhabhadiselwa zonke izihlobo zami esezafa engizikhumbulayo. … Kwathi mangisho uhaleluya ngesikhathi lemfundiso ibekwa obala isembulela ukubhabhadiselwa abafileyo. Ngaba nomuzwa wokuthi sasinelungelo lokuzijabulela lezizibusiso zaseZulwini.”2
uVilate Kimball
Njengo Dade uWoodruff, uVilate Kimball naye wezwa ngokubhabhadiselwa abafileyo ngesikhathi umyeni wakhe, uHeber, ekude eyoshumayela ivangeli. Wambhalela lokhu:
“UMongameli uSmith useqale imfundiso entsha nenhle kakhulu … esidale imvuselelo impela kulelibandla. Okungukubhabhadiselwa abafileyo. UPawulu uyakhuluma ngakho KwabaseKorinte Bokuqala isahluko 15 ivesi 29. UJoseph usethole incazelo ebanzi ngakho ngesambulo. … Kuyinhlanhla yalelibandla ukuba babhabhadiselwe zonke izihlobo zabo esezafa ngaphambi kokuba lelivangeli livele obala, ngisho kuhlehla kuya emuva kokhokho babo uMkhulu noGogo. … Ngokwenzenjalo, siyabamela, futhi sibanika inhlanhla yokuvuka ngovuko lokuqala. Uthi ivangeli lizoshunyayelwa kubo … kodwa akukho ukubhabhadiswa kwemimoya. … Selokhu kwashunyayelwa ngaloluhlelo lapha, amanzi asehlezi ephethuzela. Ngesikhathi somhlangano kwesinye isikhathi kwakuba khona amaGosa ayisishiyagalombili kuya kwayishumi esemanzini ngesikhathi esisodwa ebhabhadisa. … Nami ngifuna ukubhabhadiselwa uMama. Bengicabanga ukulinda uze ubuye ekhaya, kodwa ukugcina kwami ukuzwa uJoseph ekhuluma ngaloludaba, wathi wonke umuntu makasukume, sikhulule abahlobo bethu masinya. Ngakho ke ngizohamba kulelisonto, njengoba bebaningana omakhelwane nabo abahambayo. Abanye sebeke babhabhadiswa bephindelela izikhathi eziningana. … Ngalokho ke uyabona nawe ukuthi bonke banethuba. Kodwa uthi akuyona imfundiso enhle lena?”3
uPhebe Chase
Kwathi kuphela ukwakhiwa kwesitsha sokubhabhadisela eThempelini laseNauvoo, kwaqala ukubhabhadisela abafileyo lapho esikhundleni sokuba kwenziwe emfuleni njengaphambilini. UPhebe Chase, owayehlala endaweni yaseNauvoo, wabhalela unina ngalelithempeli, echaza isitsha sokubhabhadisela njengendawo lapho “singabhabhadiselwa khona abafileyo bethu futhi sibengabasindisi eNtabeni yaseSiyoni.” Waqhubeka nokuchaza ethi kulesisitsha, “sengikengabhadiselwa ubaba nabo bonke abangani bami asebafa. … Manje sengifuna ukwazi amagama abazali bakho ukuze ngibakhulule, ngokuba ngifisa ukukhulula abaFileyo. … INkosi isikhulumile futhi yabuyisela uhlelo lwasemandulo.”4
uSally Randall
Ngesikhathi ebhalela abangani bakhe nomndeni wakhe ngokubhabhadisela abafileyo, uSally Randall wayekhumbula ngokushona kwendodana yakhe uGeorge ethi:
“Oh indlela okwakuyisikhathi esasinzima ngaso leso kimi futhi namanje angikakokholwa, kodwa ke…uyise wakhe useke wambhabhadisela futhi yinhle impela lento yokukholwa nokwemukela ukuphelela kwevangeli njengoba lishunyayelwa manje futhi nokuthi singakwazi ukubhabhadisela bonke abangani bethu abafileyo futhi sibasindise kuhlehla kuya emuva kangangoba singakwazi ukuthola ulwazi ngabo.
Ngifisa ningibhalele amagama abo bonke esibaziyo asebafa kuhlehla kuya emuva komkhulu nogogo. Ngifuna ukwenza konke engingakwenza ukusindisa abangani bami futhi ngingajabula uma abanye benu bengeza bezongisiza ngokuba kungumsebenzi omkhulu ukuba wenziwe ngumuntu oyedwa lona. … Ngilindele ukuthi nizocabanga ukuthi yimfundiso engajwayelekile lena kodwa ke nizothola ukuthi iliqiniso.”5
Isitsha sokubhabhadisela saseThempelini lase-Ogden, e-Utah sihleliphezu kwezinkunzi eziyishumi-nambili.