Fale Fakapōpula Kātesí

22–28 Nōvema

Tokāteline mo e Ngaahi Fuakava 135–136

Kuó ne “Fakamaʻu Hono Tufakangá mo ʻEne Ngaahi Ngāué ʻaki Hono Toto ʻOʻoná”

ʻI hoʻo ako e Tokāteline mo e Ngaahi Fuakava 135–36, ʻe lava ke ueʻi koe ʻe he ʻEikí ʻaki ha ngaahi fakakaukau ke tokoni ke ke moʻui ʻaki e meʻa ʻokú ke laú. ‘I he taimi ʻoku hoko ai iá, hiki hifo e meʻa ʻokú Ne akoʻi atu kiate koé.

Lekooti e Ngaahi Ongo ʻOkú ke Maʻú

ʻI he hoʻatā ʻo e ʻaho 27 ʻo Sune 1844, naʻe toe tuku pōpula ʻa Siosefa mo Hailame Sāmita fakataha mo Sione Teila mo Uiliate Lisiate. Naʻa nau tui ne ʻikai ke nau halaia ʻi ha faʻahinga hia, ka naʻa nau tali lelei hono puke pōpula kinautolú, ʻi heʻenau fakaʻamu ke taʻofi e angakovi ki he Kāingalotu ʻi Nāvuú. Naʻe ʻikai ko e fuofua taimi ʻeni naʻe tuku pōpula ai ʻe he ngaahi fili ʻo e Siasí ʻa e Palōfita ko Siosefá, ka ko e taimi ko ʻení ne hangē naʻá ne ʻiloʻi he ʻikai ke ne foki moʻui mai. Naʻá ne feinga mo hono ngaahi kaungāmeʻá ke nau fefakanongaʻaki ʻaki hono lau e Tohi ʻa Molomoná mo hiva ha ngaahi himi. Naʻe ongona leva ha ngaahi fana, pea ʻi ha ngaahi miniti siʻi pē naʻe ngata e moʻui fakamatelie ʻa Siosefa Sāmita mo hono taʻokete ko Hailamé.

Ka naʻe ʻikai ko e ngataʻanga ia ʻo e taumuʻa fakalangi ne nau talí. Pea naʻe ʻikai ko e ngataʻanga ia hono Fakafoki Mai ʻo e ongoongolelei ʻo Sīsū Kalaisí. Naʻe ʻi ai ha ngāue lahi ange ke fai mo ha fakahā lahi ange te ne tataki e Siasí ki muʻa. He ʻikai lava ʻo tamateʻi e ngāue ʻa e ʻOtuá ʻi hono tamateʻi e Palōfitá.

Vakai, Kau Māʻoniʻoní,1:521–52.

Ngaahi Fakakaukau ki Hono Ako Fakataautaha ʻo e Folofolá

Tokāteline mo e Ngaahi Fuakava 135; 136:37–39

Naʻe fakamaʻu ʻe Siosefa mo Hailame Sāmita ʻena fakamoʻoní ʻaki hona totó.

Fakakaukauloto pe naʻe mei fēfē haʻo ongoʻi kapau naʻá ke moʻui ʻi Nāvū ʻi he taimi naʻe tāmateʻi ai ʻa Siosefa mo Hailame Sāmitá (vakai, Kau Māʻoniʻoní, 1:554–55). Naʻá ke mei feinga fēfē ke mahino e meʻa fakamamahi ko ʻeni naʻe hokó? Naʻe mei tokoni e Tokāteline mo e Ngaahi Fuakava 135, ʻa ia naʻe pulusi siʻi hifo he māhina ʻe tolu hili e fakapoó. Te ke lava ʻo fakaʻilongaʻi ha ngaahi lea mo e kupuʻi lea naʻá ne mei ʻomi ha mahino mo e loto-fakapapau kiate koe. Ko e hā te ke lea ʻaki ki ha taha ʻokú ne fehuʻi, “Ko e hā ʻe tuku ai ʻe he ʻOtuá ke tāmateʻi ʻa ʻEne Palōfitá?”

Vakai foki, Tokāteline mo e Ngaahi Fuakava 5:21–22; 6:29–30.Ngaahi Akonaki ʻa e Kau Palesiteni ʻo e Siasí: Siosefa Sāmita, 603–4, 611–24.

Tokāteline mo e Ngaahi Fuakavá 135:3

Kuo fakahoko ʻe Siosefa Sāmita ha meʻa lahi ange ki hotau fakamoʻuí ʻo laka hake ʻi ha toe taha tukukehe ʻa Sīsū Kalaisi.

Fakakaukau ki he ngaahi tāpuaki kuó ke maʻu ʻi hoʻo hoko ko ha mēmipa ʻo e Siasi ʻo Sīsū Kalaisí. Ko e toko fiha ʻo kinautolu ko ha ola ʻo e ngāue fakafaifekau naʻe fakahoko ʻe he Palōfita ko Siosefa Sāmitá? ʻOku ʻomi ʻe he Tokāteline mo e Ngaahi Fuakava 135:3 ha niʻihi ʻo e ngaahi meʻa maʻongoʻonga naʻe fakahoko ʻe Siosefa Sāmita ʻi he taʻu ʻe 24 hili e ʻUluaki Mata Meʻa-hā-maí. Kuo kaunga fēfē ʻa e ngaahi meʻá ni kiate koe mo hoʻo vā mo e Tamai Hēvaní mo Sīsū Kalaisí? Fakakaukau ke hiki hoʻo fakamoʻoni ki he Palōfita ko Siosefa Sāmitá. Ko hai nai ʻe fie maʻu ke fanongo ki hoʻo fakamoʻoní?

Tokāteline mo e Ngaahi Fuakava 136

ʻOku ʻomi ʻe he ʻEikí ha faleʻi ki heʻeku “ngaahi fononga” ʻi he moʻuí.

Hili hono tuli e Kāingalotú mei Nāvuú, naʻa nau fai ha fononga lōloa ki he Teleʻa Sōlekí, pea naʻe tuai mo fakamamahi ʻa e ngaahi fuofua maile ʻe laungeaú. Naʻe hohaʻa ʻa Pilikihami ʻIongi, ʻa ia naʻá ne taki e Siasí he taimi ko ʻení ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, ki he founga ʻe lavaʻi ai ʻe he Kāingalotú e toenga ʻo e fonongá. Naʻá ne fokotuʻu ha nofoʻanga fakataimi naʻe ui ko e Nofoʻanga Fakafaʻahitaʻu Momokó pea tautapa ki ha fakahinohino. Ko e tali ki aí, naʻe ʻoange ʻe he ʻEikí ha fakahā, ko e vahe 136 ia he taimi ní. Naʻe fakamanatu ʻe he fakahā ko ʻení mo ha ngaahi meʻa kehe ki he Kāingalotú “naʻe mahuʻinga tatau pē honau ʻulungaanga ʻi he fonongá pea mo honau ikuʻangá” pea “tokoni ke liliu e hiki fakahihifó mei ha fie maʻu fakamamahi ki ha aʻusia fakalaumālie mahuʻinga.”

Fakakaukau ki heni ʻi hoʻo ako e vahe 136. Ko e hā e faleʻi ʻokú ke maʻu ʻe lava ʻo tokoni ke liliu ha ʻahiʻahi faingataʻa ʻi hoʻo moʻuí “ki ha aʻusia fakalaumālie mahuʻinga”? Te ke lava foki ʻo fakalaulauloto ki he founga ʻe lava ʻa e faleʻí ʻo tokoni ke ke fakahoko e finangalo ʻo e ʻEikí ʻi hoʻo moʻuí, ʻo hangē ko ʻene tokoniʻi e fuofua Kāingalotú ke nau fai e fononga faingataʻa ki he Hihifó.

Vakai foki, Ngaahi Tefito ʻi he Hisitōlia ʻo e Siasí, “Fetongi ʻo e Kau Taki ʻo e Siasí,” ChurchofJesusChrist.org/study/history/topics.

Nofoʻanga Fakafaʻahitaʻu Momokó, tā ʻe Greg Olsen

Ngaahi Fakakaukau ki Hono Ako Fakafāmili ʻo e Folofolá mo e Efiafi ʻi ʻApí

Tokāteline mo e Ngaahi Fuakava 135:1, 3.Ke tokoni ke mahino ki he kau mēmipa ʻo e fāmilí ʻa hono ʻuhinga ko ia e hanga ʻe Siosefa Sāmita ʻo “fakamaʻu hono tufakangá mo ʻene ngaahi ngāué ʻaki hono toto ʻoʻoná,” ʻe lava homou fāmilí ʻo mamata ʻi he vitiō “Testimony of the Book of Mormon” (ChurchofJesusChrist.org; vakai foki, Jeffrey R. Holland, “Malu Maʻá e Laumālié,” Ensign pe Liahona, Nōvema 2009, 88–90). Ko e hā e meʻa ʻoku tau mahuʻinga ai ʻi he ngaahi vēsí ni? Te tau lava fēfē ʻo faivelenga ange ki heʻetau ngaahi fakamoʻoní, neongo kapau ʻoku ʻikai kole mai ke tau foaki ʻetau moʻuí ki ai?

Tokāteline mo e Ngaahi Fuakava 135:3.Ke aleaʻi e ʻuhinga ʻo e fakamatala ko ia naʻe hanga ʻe Siosefa Sāmita ʻo “fai … ha meʻa lahi ange ki hono fakamoʻui ʻo e faʻahinga ʻo e tangatá ʻi he māmaní, tuku kehe ʻa Sīsū pē, ʻi ha toe tangata,” fakakaukau ke toe vakaiʻi e meʻa kuo ako ʻe homou fāmilí he taʻú ni fekauʻaki mo Siosefa Sāmitá. Te mou lava ʻo fakaʻaongaʻi ha ʻū tā mei he maʻuʻanga tokoni ko ʻení ke tokoni ke nau manatuʻi e meʻa kuo nau akó mo fakaafeʻi kinautolu ke vahevahe ha ngaahi talanoa pe akonaki ʻoku nau saiʻia taha ai. Ko e hā ʻoku tau houngaʻia ai ʻi he Palōfita ko Siosefa Sāmitá mo e meʻa kuo fakahoko ʻe he ʻEikí ʻo fakafou ʻiate iá?  

Tokāteline mo e Ngaahi Fuakava 136.ʻI he taimi naʻe fakahā mai ai ʻe he ʻEikí ʻa e vahe 136, naʻe hanganaki mai ha fononga lōloa faingataʻa ʻa e Kāingalotú ʻi he malumalu ʻo e tataki ʻa Pilikihami ʻIongi. ʻI hoʻomou lau fakataha e vahe 136, fakakaukau ki he ngaahi meʻa faingataʻa naʻe pau ke foua ʻe homou fāmilí. Ko e hā ha faleʻi ʻoku tau maʻu ʻi he fakahā ko ʻení ʻe lava ʻo tokoni ke tau maʻu e tokoni mo e mālohi ʻo e ʻEikí?

Tokāteline mo e Ngaahi Fuakava 136:4.ʻOku ʻuhinga ki he hā ke “”ʻaʻeva ʻi he ngaahi tuʻutuʻuni kotoa pē ʻa e ʻEikí”? ‘Oku kaunga fēfē ʻa e ngaahi ouau kuo tau maʻú ki heʻetau moʻui fakaʻahó?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu fakalēsoni ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Hiva ʻoku fokotuʻu atú: “ ʻOku Mau Fakamālō,” Ngaahi Himí, fika 16.

Fakatupulaki e Ako Fakatāutahá

Fekumi ki he ʻofa ʻa e ʻOtuá. Naʻe akoʻi ʻe ʻEletā M.Lāsolo Pālati ʻo pehē, “[Ko e] ongoongoleleí ko ha ongoongolelei ʻo e ʻofa—ʻofa ki he ʻOtuá mo e feʻofaʻakí” (“God’s Love for His Children,” Ensign, May 1988, 59). ʻI hoʻo lau e folofolá, fakakaukau ke hiki fakamatala pe fakaʻilongaʻi ʻa e ngaahi fakamoʻoni ki he ʻofa ʻa e ʻOtuá.

ʻIkai Ha Tangata ʻE Toe ʻOfa Lahi Ange fai ʻe Casey Childs