O Josefa a raici tamana, tinana, kei tuakana ena matanitu vaka-silesitieli (Na Raivotu nei Josefa Simici ena Matanitu Vaka-Silesitieli, Robert Barrett).

29 ni Noveba–5 ni Tiseba

Vunau kei na Veiyalayalati 137–138

“Na Raivotu Me Baleta na Nodra Vueti na Mate”

A vakatavulica o Peresitedi M. Russell Ballard: “Au sureti kemuni mo ni wilika vakavinaka ka vakasamataka vakatitobu na [Vunau kei na Veiyalayalati 138]. Ni o vakayacora vakakina, me vakalougatataki iko na Turaga mo na kila vinaka vakataucoko ka vakavinavinakataka na loloma ni Kalou kei na Nona ituvatuva ni veivakabulai kei na marau vei ira na Luvena” (“Na Raivotu Me Baleta na Nodra Vueti na Mate,” Ensign se Liaona, Nove. 2018, 73).

Vola na Veika o Uqeti Kina

Na ivakatakila era volai tu ena Vunau kei na Veiyalayalati 137 kei na 138 erau veiyawaki ena 80 vakacaca na yabaki kei na 1,500 na maile. A ciqomi naWase 137 maivei Parofita Josefa Simici ena 1836 ena loma ni Valetabu e Kirtland ni se tara tiko, kei na wase 138 mai vei Joseph F. Smith, na ikaono ni Peresitedi ni Lotu, ena 1918 e Salt Lake City. Ia vakaivunau, oi rau na raivotu oqo e rau lako vata tikoga. Erau sauma ruarua na taro me baleta na nodra icavacava na luve ni Kalou ena bula e tarava. Ka rau sa dui vakuria na ibalebale ni veika titobu ni da raica na veika era sotava na parofita era a ciqoma.

Na raivotu nei Josefa Simici a vukei koya me kila vinaka na icavacava tawamudu nei tuakana lomani o Alvin, a mate ena ono na yabaki sa oti ni bera ni vakalesui mai na lewa ni veipapitaisotaki. Na taro me baleta na vakabulai tawamudu nei Alvin sa dau tu ga vei Josefa mai na gauna o ya. Na raivotu nei Joseph F. Smith e vakatakila mai na dina lagilagi me baleta na vuravura ni yalo—sa dina sara ni oqo sa ivakatakila veivakacegui vua e dua a lolositaka tu na nodra mate e vuqa na nodra vuvale voleka. Ni se qai yabaki 5 o Joseph F. Smith a mate o tamana o Hyrum Smith, kei tinana, o Mary Fielding Smith, ni se qai yabaki 13. Ena gauna ni nona raivotu ena 1918, a sa lolositaka o koya na nodra mate e 13 na gone.

E vuqa na nodra taro eso na tamata me baleta na bula ni oti na mate sa saumi tu ena ivakatakila eso oqo. NaWase 137 a vakatakila mai e dua na rarama vou baleta na vakatataro oqori, kei na wase 138 e tadolava vakararaba sara na ilati. E rau sa vakadinadinataka vata na “loloma cecere ka vakasakiti e rau sa vakaraitaka na Tamada kei na Luvena” (Vunau kei na Veiyalayalati 138:3).

Vakasama ni Vuli iVolanikalou ni Tamata Yadua

Vunau kei na Veiyalayalati 137

Na tamata yadua ena soli vua na madigi me digitaka na lagilagi vakasilesitieli.

Na kila ka sa dau tu vei ira na Lotu va-Karisito ena 1836 o ya ni gauna sa mate kina e dua ka a sega tu ni papitaisotaki—me vaka vei Alvin na taci Josefa Simici—na tamata o ya ena sega ni gole ki lomalagi. Ia o Josefa a raici Alvin ena dua na raivotu ni matanitu vaka-silesitieli. Ni ko wilika na wase 137, vakasamataka vakatitobu na veika o sa vulica baleta na Tamada Vakalomalagi, na Nona yavu ni veivakabulai, kei na matanitu vakasilesitieli.

Raica talega na Yalododonu, 1:232–35.

Vunau kei na Veiyalayalati 138:1–11, 25–30

Niu wilika ka vakasamataka vakatitobu na ivolanikalou ena vakarautaki au meu ciqoma na ivakatakila.

Ena so na gauna e yaco mai na ivakatakila ena gauna mada ga eda sega ni vakasaqara kina. Ia e vakalevu ga, e dau yaco mai baleta ni da vakasaqara vagumatua yani ka vakavakarau tiko kina. Ni o wilika na Vunau kei na Veiyalayalati 138:1–11, 25–30, raica na ka a cakava tiko o Peresitedi Joseph F. Smith ena gauna “sa dolavi [kina] na mata ni [yalona]” me kila vakavinaka cake kina na ilesilesi veivueti ni iVakabula. Mo qai raica na sala mo muria kina na ivakaraitaki nei Peresitedi Smith. Me vakataka, na veisau cava o rawa ni cakava ena nomu wilika na ivolanikalou me rawa ni vakalevutaki nomu “vakasamataka tiko na ivolanikalou” ka levu cake nomu “vakananuma na isoro cecere ni [iVakabula]”? (tikina e 1–2).

Ena nona itukutuku “Na Raivotu me Baleta na Nodra Vueti na Mate” (Ensign se Liaona, Nove. 2018, 71–74), a vakatura kina o Peresitedi M. Russell Ballard eso tale na sala a vakarau tu kina o Peresitedi Smith me ciqoma kina na ivakatakila oqo. Vakasamataka na sala o sa vakarautaki tu kina ena veika o sa sotava tiko se na yaco mai ena veisiga ni mataka.

Raica talega na vidio “Ministry of Joseph F. Smith: A Vision of the Redemption of the Dead,” ChurchofJesusChrist.org.

Joseph F. Smith, mai vei Albert E. Salzbrenner

Vunau kei na Veiyalayalati 138:25–60

Na cakacaka ni veivakabulai sa yaco tiko ena yasa ruarua ni ilati.

A vakavulica o Peresitedi Russell M. Nelson, “Na noda itukutuku ki vuravura e rawarawa ka dina: eda sureti ira na luveni Kalou taucoko ena yasa ni ilati ruarua me ra lako mai vua na iVakabula, ciqoma na kalougata ni valetabu savasava, reki bulatiko, ka bula tawamudu.” (“Me Da Sa Gu Tiko,” Ensign se Liaona, Me 2018, 118–19). Vakasamataka na itukutuku oqo ni ko wilika na Vunau kei na Veiyalayalati 138:25–60. Sa rawa talega mo raica na veitaro oqo:

• Na cava o sa vulica mai na veitikina oqo me baleta na cakacaka ni veivakabulai e sa qaravi rawa tiko ena vuravura ni yalo? Na cava na vuna e bibi kina vei iko mo kila ni sa vakayacori tiko na cakacaka oqo? E veivaqaqacotaki vakacava na veitikina oqo ena nomu vakabauta na Veisorovaki ni iVakabula?

• Na cava era vakavulica na veitikina oqo me baleti ira era sa vakaitavi tiko ena cakacaka ni veivakabulai ena vuravura ni yalo? Na cava na vuna e bibi kina me da kila ni cakacaka ni veivakabulai sa caka tiko ena yasa ruarua ni ilati?

Raica talega na Dallin H. Oaks, “Nuitaka na Turaga,” Ensign se Liaona, Nove. 2019, 26–29; “Susa Young Gates and the Vision of the Redemption of the Dead,” Revelations in Context, 315–22.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 137:1–5.Sureta nomu matavuvale me ratou droinitaka na nodratou nanuma me baleta na ituvaki ni matanitu vakasilesitieli me vaka e tukuni tiko ena veitikina oqo. Na cava o sa raica ena veitikina oqo e vukei iko mo kakavaki mo laki vakaitikotiko kina? Na cava eda sa cakava tiko oqo meda vakavakarau meda laki vakaitikotiko ena matanitu vakasilesitieli kei na Tamada Vakalomalagi kei Jisu Karisito?

Vunau kei na Veiyalayalati 137:5–10.Me vulici na cava beka a nanuma nei Josefa Simici me raica e vica na lewe ni nona matavuvale ena matanitu vakasilesitieli, sa rawa me sarava na nomu matavuvale na vidio “Ministry of Joseph Smith: Temples” (ChurchofJesusChrist.org). Sa rawa talega me veivosakitaki e dua o kila sa mate ka a sega na madigi vua me papitaisotaki. Na cava e vakavulica vei keda na Vunau kei na Veiyalayalati 137:5-10 me baleta na tamata o ya?

Vunau kei na Veiyalayalati 138:12–24.Na cava e vakavulica na Vunau kei na Veiyalayalati 138:12–24 me baleti ira na tamata a sikovi ira na iVakabula ena vuravura ni yalo? Na veivakalougatataki cava era a ciqoma? Na cava eda sa vulica mai na nodra ivakaraitaki?

Vunau kei na Veiyalayalati 138:38-55.Na veitikina oqo e vakamacalataki ira a raica o Peresitedi Joseph F. Smith ena vuravura ni yalo kei na itukutuku lekaleka me baleti ira. Sa rawa ki na nomu matavuvale me ratou vola na yacadra na nomudou qase e liu era tiko ena vuravura ni yalo, vata kei na kedra ivolatukutuku ni bula.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere vakaturi: “Vaqaqara ka Masu,” Nodra iVolanisere na Lalai, 66.

Vakatorocaketaki Noda Veivakavulici

Vakasamataka vakatitobu na ivolanikalou. E vakatoka o Peresitedi David O. McKay na vakanananu titobu me “dua na … katuba tabu duadua meda yaco rawa kina ki na iserau ni Turaga” (Nodra iVakavuvuli na Peresitedi ni Lotu: David O. McKay [2003], 32).

Ira Na Lesi, mai vei Harold Hopkinson. A veilesi o Jisu Karisito vei ira na yalo dodonu mera laki vunautaka na kosipeli ena vuravura ni yalo.