Kivei Ira Kece na Tagane Lewenilotu Bula Kilikili, mai vei Emma Allebes

6–12 ni Tiseba

Na Yavu ni Vakabauta kei na Ai Vakaro Raraba 1 kei na 2

“Keimami Vakabauta”

Ni o vulica na Yavu ni Vakabauta kei na Ai Vakaro Raraba 1 kei na 2, vakasamataka na kena vakayaco-qaqa ena Lotu. Na cava o sa uqeti kina me baleta na dina era vakavulica tiko?

Vola na Veika o Uqeti Kina

Ena loma ni 200 na yabaki vakatekivu mai na iMatai ni Raivotu i Josefa Simici, sa solia tikoga mai na Kalou “na ivakatakila ena ivakatakila, na kilaka ena kilaka” kivei ira na iliuliu ni Nona Lotu (Vunau kei na Veiyalayalati 42:61). Ena so na gauna, na ivakatakila e vagolei vei ira na veiliutaki ni Lotu me veisautaka na lawatu kei na ivakarau ni Lotu, “me vaka sa donu vua na Turaga, me veiganiti kei na nona loloma uasivi me vaka na kedra ituvaki na luve ni tamata” (Vunau kei na Veiyalayalati 46:15). Ai Vakaro Raraba 1 kei na 2 e matataka tiko na mataqali ivakatakila vakaoqo—e dua e veimuataki ki na kena bokoci na lawa ni vakamau vakalewelevu, kei na kena ikarua sa yaco kina na veivakalougatataki ni matabete, oka kina na veivakalougatataki ni valetabu, me sa soli vei ira na duikaikai taucoko. Na veisau vakaoqo sa tiki tiko ni inaki me dua kina na “lotu dina ka bula duadua ga” (Vunau kei na Veiyalayalati 1:30), vata kei na kena parofita dina ka bula tiko.

Ia sa tu talega na veika e sega ni veisau—na dina yavutaki, e tawamudu. Ka ena so na gauna na inaki ni ivakatakila o ya me biuta na ikuri ni rarama ena dina eso oqo, me vukei keda ni raici ira vakavinaka cake. Na Yavu ni Vakabauta—na 13 na itukutuku matata i Josefa Simici ni ka era vakabauta na Yalododonu Edaidai—e vaka me vakamatatataka sara na inaki oqo. Na rua na mataqali ivakatakila oqo e dusimaka ka vakalougatataka na Lotu, na Lotu sa tauyavutaki kaukauwa tu ena dina tawamudu ia sa rawa ni tubu ka veisau ni sa vakatubura na Turaga na noda kila ka vukei keda meda sotava na veibolebole edaidai. Ena dua tale na kena ivosavosa, “Keimami vakabauta na veika sa vakatakila oti na Kalou, na veika sa vakatakilai mai ena gauna oqo, ka keimami vakabauta ni na levu tale na veika cecere ka bibi ena qai vakatakilai mai me baleta tiko ga na Matanitu ni Kalou” (Yavu ni Vakabauta 1:9).

Vakasama ni Vuli iVolanikalou ni Tamata Yadua

Na Yavu ni Vakabauta

Na Yavu ni Vakabauta e tiko kina na dina yavutaki ni kosipeli vakalesui mai.

E dua na sala o rawa ni vulica kina na Yavu ni Vakabauta o ya me volai na dina era tiko yadua kina ka qai raici na ivolanikalou e semati tiko ki na veidina oqo. Era sa vakabulabulataka vakacava na nomu kila na dina ena Yavu ni Vakabautana ivolanikalou eso oqo?

Raica talega na iDusidusi ki na iVolanikalou, “Yavu ni Vakabauta,” scriptures.ChurchofJesusChrist.org; L. Tom Perry, “Na iVunau kei na iVakavuvuli Era Tu ena Yavu ni Vakabauta,” Ensign se Liaona, Nove. 2013, 46–48; “Wase 38: Na iVola ni Wentworth,” ena Nodra iVakavuvuli na Peresitedi ni Lotu: Josefa Simici, 435–47.

Yavu ni Vakabauta 1:9; Ai Vakaro Raraba 1 kei na 2

Na Lotu i Jisu Karisito esa dusimaki ena ivakatakila.

“Keimami vakabauta ni na levu tale na veika cecere ka bibi ena qai vakatakila mai [na Kalou] me baleta tikoga na Matanitu ni Kalou” (Yavu ni Vakabauta 1:9), ena gauna sara mada ga sa nanumi kina me na veisautaki na lawatu kei na ivakarau eso ni Lotu ena veika oya. Ni vakasamataki tiko na ivakavuvuli oqo, raicalesu na Ai Vakaro Raraba 1 kei na 2, ka vakasaqara na vosa kei na malanivosa e vaqaqacotaka na nomu vakabauta ena tomani tiko ni vakatakila. Na cava eso tale na ka o rawa ni vakasamataka ena ivakaraitaki ni kena tomani tiko na vakatakila vua na parofita ni Turaga? Era sa vakayaco-ka vakacava ki na nomu bula na ivakatakila oqo? Era sa tosoya vakacava ki liu na cakacaka ni matanitu ni Tamada Vakalomalagi?

Raica talega na Emosi 3:7; 2 Nifai 28:30.

Ai Vakaro Raraba 1

Na cakacaka ni Kalou me na toso tikoga ki liu.

Ena “Veitikina Digitaki mai na Tolu na Vosa i Peresitedi Wilford Woodruff me baleta na iBole” (ena icavacava ni Ai Vakaro Raraba 1), na cava eso na vuna e solia na parofita me muduka kina na Turaga na vakayacori ni vakamau vakalewelevu? Na cava e vakavulica vei iko oqo me baleta na cakacaka ni Kalou?

Me baleta na ikuri ni vakamacala ena itukutuku makawa ni Ai Vakaro Raraba 1, raica na “The Messenger and the Manifesto” (Revelations in Context, 323–31) kei na “Plural Marriage and Families in Early Utah” (Gospel Topics, topics.ChurchofJesusChrist.org).

Wilford Woodruff, mai vei H. E. Peterson

Ai Vakaro Raraba 2

Sa rawa ni da vakararavi vua na Turaga, ena gauna mada ga eda sega ni kila deivaki vinaka tu kina.

Sa vakatavulica na ivolanikalou meda vakararavi vua na Turaga (raica na Vosa Vakaibalebale 3:5), ka sa ikoya oqori na ka era a cakava e vuqa na lewe ni Lotu kawa vaka-Aferika ena gauna a tarova tu kina na Lotu vei ira na veitabaki ni matabete kei na cakacaka vakalotu ni valetabu. E dina ga ni ra sega ni kila dei tu na vuna e tiko kina na lawatu oqo—ka vakavuqa era a yalorarawa tu ena ivakamacala a vakavulici ena gauna o ya, ka sa sega ni tokona na Lotu nikua—e vuqa na lewenilotu yalodina kawa vaka-Aferika a vakararavi tu ga vua na Turaga ka yalodina tikoga ena nodra bula taucoko. Ni o wilika na iVakaro Raraba 2, vakasamataka vakatitobu na sala o sa vulica mo nuitaka kina na Turaga ena gauna mada ga o sega tu kina ni kila dei tu vakavinaka.

Sa rawa ni vakauqeti iko na vulici ni nodra vakabauta na lewe yago loaloa ni Lotu. Oqo e so na kedra itukutuku, e tiko ena ChurchofJesusChrist.org:

• “Jane Elizabeth Manning James” (Church History Topics)

• “In My Father’s House Are Many Mansions” (italanoa kei Green Flake)

• “You Have Come at Last” (italanoa kei Anthony Obinna)

• “Break the Soil of Bitterness” (italanoa kei Julia Mavimbela)

• “I Will Take It in Faith” (italanoa kei George Rickford)

Raica talega na “Witnessing the Faithfulness,” Revelations in Context, 332–41; Gospel Topics, “Race and the Priesthood,” topics.ChurchofJesusChrist.org; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.

Vakasama baleta na Vuli iVolanikalou Vakamatavuvale kei na Lotu Vakamatavuvale

Na Yavu ni Vakabauta.Navuca na sala e rawa ni vakayaco “veituberi lalai” kina na nomu matavuvale ena Yavu ni Vakabauta. Me vakataka, ena loma ni macawa, me digitaka yadua na lewe ni matavuvale e dua na yavu ka raica e dua na kena isema ni volanikalou, yaloyalo, serenilotu, se nodra sere na lalai se wasea e dua na ka sotavi yadua.

Se mera veivukevuke na lewe ni matavuvale ena tarogi ni taro vakai ira me baleta na Lotu kei na noda vakabauta ka qai sauma na veitaro oya ena dua na yavu ni vakabauta.

Ai Vakaro Raraba 1 kei na 2.Sa vukei keda naAi Vakaro Raraba 1 kei na 2 ni kila deivaki na itavi ni vakatakila ni gauna oqo ena Lotu. Ni dou wilika vata vakavuvale, sa rawa mo dou veivosakitaki na sala e liutaki keda tiko kina na parofita “ena veivakauqeti ni Kalou sa Cecere Sara” (Ai Vakaro Raraba 1). E rawa vakacava ki na rua na ivakaro raraba oqo me vaqaqacotaka na noda vakabauta na Kalou ka dusimaka tiko vakai Koya na Nona Lotu? Eda sa raica vakacava na Ligana ena cakacaka ni Lotu nikua? O na rairai navuca beka mo dou dikeva vata eso na ivurevure ena “Vakasama ni Vuli iVolanikalou ni Tamata Yadua” e cake.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere vakaturi: “Talairawarawa ki na iVunau” Nodra iVolanisere na Lalai, 68.

Vakatorocaketaki Noda Veivakavulici

Vakamuria na veisureti me caka. “Ni ko sa vakamuria e dua na veisureti me caka, o sa vakaraitaka vei ira na [lewe ni nomu vuvale] ni ko kauwaitaki ira kei na sala sa vakalougatataki ira tiko kina na kosipeli. O sa solia talega vei ira na madigi me ra wasea na veika era sa sotava” (Veivakavulici ena iVakarau ni iVakabula, 35).