Siga ni Sucu e Copper kei Umber, mai vei J. Kirk Richards

20–26 ni Tiseba

Siganisucu

Na iSolisoli Sega ni Vakatauvatani Rawa ni Luvena Tabu na Kalou

Dua na sala me vakanamata kina na nomu vakasama vua na iVakabula ena Siganisucu oqo o ya mo vulicica na “Se Bula na Karisito: Nodra iVakadinadina na iApositolo.” E vakaturi ena ituvatuva oqo na sala e rawa ni o cakava kina na ivakadinadina vakaparofita oqo me tiki ni nomu vulica yadua se vakamatavuvale na kosipeli.

Vola na Veika o Uqeti Kina

Ena 1838 a cauraka na Parofita o Josefa Simici: “Na yavu bibi ni ivakavuvuli ni noda Lotu o ya na nodra ivakadinadina na iApositolo kei na Parofita me baleti Jisu Karisito, ni a mate, bulu, ka tucake tale ena ikatolu ni siga ka lako cake ki lomalagi; kei na veika kece tale e so e salavata kei na noda Lotu era sa tokona talega” (Nodra iVakavuvuli na Peresitedi ni Lotu: Josefa Simici, 54). Ena vica na yabaki emuri, a vakaraitaka o Peresitedi Russell M. Nelson ni “sai koya sara ga na itukutuku oqo ni Parofita a vakauqeta na nodratou vola ka sainitaka na 15 na parofita, daurairai, ka dauvakatakila na nodratou ivakadinadina me ivakananumi ni ka 2000 ni yabaki ni nona sucu na Turaga. Na ivakadinadina vakairogorogo oqori sa vakatokai ‘Se Bula na Karisito.’ E vuqa na lewenilotu sa cavuqaqataka na kena dina. Eso tale e se bera ni kila ni tiko. Ni ko vakasaqara mo vulica vakalevu na veika baleti Jisu Karisito, au sureti iko mo vulica na ‘Se Bula na Karisito’” (“Vagoleya Mai na Mana i Jisu Karisito ki na Noda Bula,” Ensign se Liaona, Me 2017, 40).

Me vaka na Yalododonu Edaidai, eda rekitaka na veivakalougatataki ni tomani tiko na ivakatakila mai vua na parofita ni gauna oqo kei ira na iapositolo. Eda sa vakavinavinaka ki na nodra vosa veivakauqeti vakayalo ni vakasala, vakaro, kei na veivakayaloqaqataki. Ia na kena bibi duadua, eda sa vakalougatataki ena nodra ivakadinadina kaukauwa sara baleti Jisu Karisito—ena gauna ni Siganisucu kei na loma taucoko ni yabaki. Oqo sa uasivi cake mai na nodra vosa veivakauqeti walega na kenadau ni volavola se dauvosa raraba se nodra raiyawa na kenadau ni ivolanikalou. Oqo na nodra vosa sa digitaka, kaciva ka vakadonuya na Kalou me “ivakadinadina digitaki ni yacai Karisito ki vuravura raraba” (Vunau kei na Veiyalayalati 107: 23).

Vakasama ni Vuli iVolanikalou ni Tamata Yadua

“Sega ni dua tale e a bau veivakauqeti vakabibi me vakaoqo.”

Na vakanananu cava e yaco mai vei iko ena nomu wilika na Luke 2:10–11 vata kei na imatai ni parakaravu ni “Se Bula na Karisito”? Na cava o na kaya me veitokoni ki na itukutuku ni “sega ni dua tale e a bau veivakauqeti vakabibi [me vakataki Jisu Karisito] vei ira kece e bula tiko ka me na mai bula e vuravura”? Vakasaqara na dina e tiko ena “Se Bula na Karisito” e vakamacalataka na veivakauqeti bibi sara ni iVakabula. E sa vakauqeti iko vakacava o Koya ka kauta mai vei iko na “reki uasivi”? (Luke 2:10).

“Sa tucake o Koya mai na ibulubulu.”

Ena “Se Bula na Karisito,” era a vakadinadinataka na iApositolo na Tucaketale mai na Mate ni iVakabula, ka vakamacalataka na nona rairai vakatolu na Turaga (raica na parakaravu lima). Sa rawa mo wilika na veisiko oqo ena Joni 20–21; 3 Nifai 11–26; kei na Josefa Simici—Ai Tukutuku 1:14–20. Na cava o sa vulica baleta na iVakabula mai na Nona vosa kei na veika a cakava ena gauna ni rairai oqo?

“Na Nona matabete kei na Nona Lotu sa vakalesui mai.”

Ni ko vulica tiko na Vunau kei na Veiyalayalati ena yabaki oqo, sa nomu na madigi mo vulica vakalevu tale ena kena sa “vakalesui mai na matabete kei na Nona Lotu” na iVakabula. Na dina vakalesuimai se ivakavuvuli cava e vakaibalebale vakalevu vei iko? Sa rawa mo railesuva eso na ivolanikalou oqo e vakavulica na Veivakalesuimai: Vunau kei na Veiyalayalati 1:17–23; 13; 20:1–12; 65; 110; 112: 30–32; 124: 39–42; 128:19–21. Vakasamataka vakatitobu na kena sa vukei iko na dina ni kosipeli vakalesui mai mo kila ka qaravi Jisu Karisito kina (raica na Vunau kei na Veiyalayalati 93: 19).

“Dua na siga ena lesu mai o Koya ki vuravura.”

Na Siganisucu sa gauna ruarua me raici lesu na siga a sucu kina o Jisu Karisito ka da vakanamata ki na siga ena lesu tale mai kina o Koya. Na cava o sa vulica me baleta na Nona lesu mai ena ikarua ki na iotioti ni parakaravu ni “Se Bula na Karisito”? E rawa talega ni ka talei na wiliki, lagati, se rogoci ni sere ni Siganisucu e vakavulica na veika e baleta na iKarua ni Lako Mai, me vaka na “Meda Marau” se “Bogi Buto Rorogo Mai” (Sere ni Lotu, naba 116, 122).

“O Koya na rarama, na bula, kei na inuinui kei vuravura.”

Ena iotioti ni parakaravu ni “Se Bula na Karisito”, raica matua na ivakarau ni bula kei na itutu e soli vua na iVakabula. Na veitiki ni ivolanikalou oqo e rawa ni vukei iko mo vakananumi Jisu Karisito kina vakatitobu ni o koya “na rarama, na bula, kei na inuinui kei vuravura”: Luke 2:25–32; 1 Korinica 15:19–23; Moronai 7:41; Vunau kei na Veiyalayalati 50:24; 84: 44–46; 93:7–10. E yaco vakacava o Koya me nomu rarama, bula, kei na inuinui? Na cava eso tale na ivakarau se na itutu ni iVakabula e vakaibalebale vakalevu vei iko?

E sa mana vakacava na vulici ni “Se Bula na Karisito” ki na nomu vakabauta ka lomana na iVakabula?

Na Rarama kei Vuravura, mai vei Howard Lyon

Vakasama baleta na Vuli iVolanikalou Vakamatavuvale kei na Lotu Vakamatavuvale

“Se Bula na Karisito.”Me vukea na nomu matavuvale me kila vakavinaka na dina e vakavulica na veika e baleta na iVakabula ena “Se Bula na Karisito.”,” sa rawa mo digitaka eso na malanivosa bibi ka dou cakacaka vata me kunei se droinitaki eso na ivakaraitaki ni malanivosa oqori. Mo dou qai biuta vata na iyaloyalo kei na malanivosa me dua na ivola.

“Eda solia na noda ivakadinadina.”Na cava eda vulica mai na “Se Bula na Karisito” me baleta na kena ibalebale me wasei ni ivakadinadina? Sa rawa mo vola na nomu ivakadinadina me baleti Karisito me vakananumi kina na sucu ni iVakabula.

“Ko koya ka lako voli ka daucaka vinaka.”Ena rawa vakacava ki na nomu matavuvale me vakamuria na ivakaraitaki ni veiqaravi ni iVakabula ena Siganisucu oqo? O na vakatetea vakacava na “sautu kei na tiko vinaka” ena nomu vuvale kei na itikotiko raraba? O na veivuke vakacava mo kauta mai na “veivakabulai [vei] ira na tauvimate,”? Sa rawa mo kune vakasama ena so na Vidio ni Siganisucu ena app ni Gospel Media se valenivola ni Gospel Media (medialibrary. ChurchofJesusChrist.org).

“Me vakavinavinakataki na Kalou me baleta na isolisoli sega ni vakatauvatani rawa ni Luvena tabu.”Na isolisoli cava soti eda sa ciqoma ena vukui Jisu Karisito? Sa rawa ki na vuvale me raica na isaunitaro eso ena “Se Bula na Karisito” ka qai ologa na iloloma eso e matataka na isolisoli oqori mai vua na iVakabula. Sa rawa ki na nomu vuvale me dolava na iloloma ena Siganisucu se loma ni macawa ka wilika na ivolanikalou e semati yadua tiko kina. Oqo e so na ivolanikalou, e dina ga ni rairai na raica e vuqa na nomu matavuvale: Luke 2:10–14; 1 Pita 2:21; Mosaia 3:8; Alama 11:42–43; Vunau kei na Veiyalayalati 18:10–12. E rawa talega ni ra lagata e dua na sere me baleta na iVakabula, me vaka na “Tala Mai na Luvena” (Nodra iVolanisere na Lalai, 20) me raici eso tale na isolisoli e lako mai Vua.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere vakaturi: “Agilosi! Era Sere,” Sere ni Lotu, naba 126.

Vakatorocaketaki na Vuli ni Tamata Yadua

Vakanamata kivua na iVakabula. “Na wiliki ena masumasu ni ‘Se Bula na Karisito’ sa vaka na wiliki ni ivakadinadina i Maciu, Marika, Luke, Joni, kei ira na parofita ena iVola i Momani. Ena vakalevutaka na nomu vakabauta na iVakabula ka vukei iko ni vakanamata tikoga Vua” (M. Russell Ballard,“Lesu ka Ciqoma,” Ensign se Liaona, Me 2017, 65).