eb’ li tenamit sa’ li ruchich’och’ reheb’ li musiq’ej

Laj Jose naril lix yuwa’, lix na’, ut li ras sa’ li choxahil awa’b’ejihom (Lix k’utb’esinkil matk’ laj Jose Smith chirix li choxahil awa’b’ejihom, Robert Barrett).

29 noviembre–5 diciembre

Tzolʼlebʼ ut Sumwank 137–138

“Li k’utb’esinb’il matk’ chirix lix tojb’aleb’ rix li kamenaq”

Li Awa’b’ej M. Russell Ballard kixye: “Nekexinb’oq chixtzolb’al chi us [Tzol’leb’ ut Sumwank 138]. Naq teeb’aanu, li Qaawa’ chi’osob’tesinq eere chixtawb’al ru lix rahom li Dios ut lix k’uub’anb’il na’leb’ choq’ re lix sahil xch’ooleb’ li ralal xk’ajol” (“Li k’utb’esinb’il matk’ chirix lix tojb’aleb’ rix li kamenaq,” Jolomil ch’utub’aj-ib’ re octubre 2018).

Tz’iib’a li nakak’oxla

Li k’utb’esinb’il na’leb’ li wan sa’ Tzol’leb’ ut Sumwank 137 ut sa’ 138 wankeb’ 80 chihab’ ut 2,400 kiloom xyanqeb’. Li tasal 137 kik’ule’ xb’aan li profeet aj Jose Smith sa’ 1836 sa’ li santil ochoch re Kirtland, ut li tasal 138 kik’ule’ xb’aan laj Joseph F. Smith, xwaq li Awa’b’ej re li Iglees, sa’ 1918 sa’ Lago Salado. A’b’an, tz’aqal neke’xk’am rib’ li tzol’leb’ k’utb’il sa’ li junjunq. Xkab’ichaleb’ neke’xsume li patz’om chirix k’a’ru te’xk’ul li ralal xk’ajol li Dios sa’ li ruchich’och’ chalel. Ut xkab’ichaleb’ naniman xyaalalileb’ naq naqanaw k’a’ru yookeb’ chixk’ulb’al li ani ke’k’uluk reheb’.

Lix k’utb’esinb’il matk’ laj Jose Smith kixtenq’a chixtawb’al ru li k’a’ru tixk’ul laj Alvin, li ras, li kikam waqib’ chihab’ ma k’ojob’anb’il wi’chik li wankilal re kub’sink ha’. Chalen chaq xkamik laj Alvin, yoo chaq xk’a’uxl laj Jose chirix lix kolb’al. Kik’utb’esiman chiru laj Joseph F. Smith xninqal ru na’leb’ chirix li ruchich’och’ reheb’ li musiq’ej—ut kiwan a’in chixk’ojob’ankil xch’ool chirix xkamikeb’ naab’al reheb’ lix komon. Kikam laj Hyrum Smith, lix yuwa’ laj Joseph F. Smith, naq oob’ chihab’ xyu’am, ut lix na’, li xMary Fielding Smith, kikam naq oxlaju chihab’ xyu’am. Naq kixk’ul lix k’utb’esinb’il matk’ sa’ 1918, ak kamenaqeb’ oxlaju reheb’ lix kok’al.

Naab’al lix patz’omeb’ li kristiaan chirix k’a’ru nak’ulman chirix li kamk sumenb’ileb’ sa’eb’ li k’utb’esinb’il na’leb’ a’in. Sa’ li tasal 137 wan xsumenkil junjunq reheb’ li patz’om a’in, ut sa’ li tasal 138 wan chik xkomon li nim wi’chik ru. Xkab’ichaleb’, neke’xch’olob’ xyaalal “li xnimal ru ut sachb’a-ch’oolejil rahok k’eeb’il chaq chi k’utb’esimank xb’aan li Yuwa’b’ej ut li K’ajolb’ej” (Tzol’leb’ ut Sumwank 138:3).

reetalil li tzolok aajunes

Li na’leb’ re xtzolb’aleb’ li loq’laj hu aajunes

Tzolʼlebʼ ut Sumwank 137

Li junjunq aamej taaruuq tixsik’ ru li choxahil loq’al.

Li k’oxlanb’il sa’ xyanqeb’ laj Kristiano sa’ 1836, a’an naq wi junaq nakam chi ink’a’ kub’enaq xha’—jo’ laj Alvin, li ras laj Jose Smith—ink’a’ naru taaxik sa’ choxa. A’b’an sa’ lix k’utb’esinb’il matk’, laj Jose kiril laj Alvin sa’ li choxahil awa’b’ejihom. Naq nakawil li tasal 137, k’oxla li nakatzol chirix li qaChoxahil Yuwa’, lix k’uub’anb’il na’leb’ re li kolb’a-ib’, ut li choxahil awa’b’ejihom.

Chi’ilmanq ajwi’ Santos, 1:236–239.

Tzol’leb’ ut Sumwank 138:1–11, 25–30

Rilb’aleb’ ru ut xk’oxlankileb’ li loq’laj hu nikinixkawresi chixk’ulb’al li k’utb’esinb’il na’leb’.

Wan naq nachal li k’utb’esinb’il na’leb’ us ta ink’a’ yooko chixsik’b’al. A’b’an, chi kok’ aj xsa’ nachal xb’aan naq xqayal qaq’e chixsik’b’al ut chixkawresinkil qib’ choq’ re. Naq nakawil Tzol’leb’ ut Sumwank 138:1–11, 25–30, k’e reetal li k’a’ru yoo chixb’aanunkil li Awa’b’ej Joseph F. Smith naq “kiteeli li rilob’aal lix nawom” re xtawb’al ru chi us lix k’anjel li Kolonel re xtojb’al qix. K’oxla k’a’ru naru taab’aanu re xb’aanunkil jo’ kixb’aanu li Awa’b’ej Smith. Qayehaq, k’a’ru naru taajal re naq sa’ xtzolb’aleb’ li loq’laj hu mas wi’chik tatwanq “chixtz’ilb’al rix sa’ aach’ool eb’ li loq’laj hu” ut “chixk’oxlankil rix li xnimal ru mayej [li Kolonel] re xtojb’al rix li maak”? (eb’ li raqal 1–2).

Sa’ “Li k’utb’esinb’il matk’ chirix lix tojb’aleb’ rix li kamenaq” (Jolomil ch’utub’aj-ib’ re octubre 2018), li Awa’b’ej M. Russell Ballard kixye chan chik ru naq kawresinb’il rib’ li Awa’b’ej Smith re xk’ulb’al li k’utb’esinb’il na’leb’ a’an. K’oxla chan ru naq xatkawresiik choq’ re li k’a’ru ak xak’ul ut li toj taak’ul sa’ laa yu’am.

Chi’ilmanq ajwi’ “El ministerio de Joseph F. Smith: Una visión de la redención de los muertos,” video, ChurchofJesusChrist.org.

xjalam-uuch laj Joseph F. Smith

Joseph F. Smith, xb’aan laj Albert E. Salzbrenner

Tzol’leb’ ut Sumwank 138:25–60

Li k’anjel re li kolb’a-ib’ yoo chi b’aanumank sa’ xyanqeb’ li yo’yookeb’ jo’ ajwi’ li kamenaqeb’.

Li Awa’b’ej Russell M. Nelson kixye, “Li esilal naqak’ut chiru li ruchich’och’ saqen ru ut maak’a’ xb’alaq’; naqab’oq chixjunileb’ li ralal xk’ajol li Dios sa’ xka’pak’alil li tz’apleb’ t’ikr naq che’chalq rik’in li Kolonel, naq che’xk’uleb’ li osob’tesink re li santil ochoch, naq che’saho’q chi junelik, ut naq che’wanq chi k’ulub’ejaqeb’ re xk’ulb’al li junelik yu’am” (“Sa’ xk’anjel li Dios chiqayal tz’aqal qaq’e,” Jolomil ch’utub’aj-ib’ re abril 2018). K’oxla li aatin a’in naq nakawil Tzol’leb’ ut Sumwank 138:25–60. Naru ajwi’ taak’oxlaheb’ li patz’om a’in:

• K’a’ru nakatzol sa’eb’ li raqal a’in chirix chan ru naq yoo chi b’aanumank li k’anjel re li kolb’a-ib’ sa’ li ruchich’och’ reheb’ li musiq’ej? K’a’ut naq aajel ru choq’ aawe xnawb’al naq yoo chi b’aanumank li k’anjel a’an? Chan ru naq eb’ li raqal a’in neke’xkawob’resi laa paab’aal chirix lix tojb’al rix li maak xb’aan li Kolonel?

• K’a’ru neke’xk’ut li raqal a’in chirixeb’ li yookeb’ chi tz’aqonk sa’ li k’anjel re li kolb’a-ib’ sa’ li ruchich’och’ reheb’ li musiq’ej? K’a’ut naq aajel ru xnawb’al naq yoo chi b’aanumank li k’anjel re li kolb’a-ib’ sa’ xyanqeb’ li yo’yookeb’ jo’ ajwi’ li kamenaqeb’?

Chi’ilmanq ajwi’ Dallin H. Oaks, “Xkanab’ankil qib’ sa’ ruq’ li Qaawa’,” Jolomil ch’utub’aj-ib’ re octubre 2019; “Susa Young Gates y la visión de la redención de los muertos,” Revelaciones en Contexto, 338–345.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Tzol’leb’ ut Sumwank 137:1–5.Patz’ re laa junkab’al naq te’xyiib’ xjalam-uuch li choxahil awa’b’ejihom, a’ yaal chan ru ch’olob’anb’il sa’eb’ li raqal a’in. K’a’ru neketaw sa’eb’ li raqal a’in li neke’xk’e chayo’oni li wank aran? K’a’ru yooko chixb’aanunkil anajwan re xkawresinkil qib’ chi wank sa’ li choxahil awa’b’ejihom rik’in li qaChoxahil Yuwa’ ut li Jesukristo?

Tzol’leb’ ut Sumwank 137:5–10.Re xtzolb’al k’a’ru kireek’a tana’ laj Jose Smith naq kirileb’ li komon sa’ lix junkab’al sa’ li choxahil awa’b’ejihom, naru teeril li video “El ministerio de José Smith: Los templos” (ChurchofJesusChrist.org). Maare naru tex’aatinaq chirix anihaq nekenaw ru li xkam chi ink’a’ kiru chi kub’siik xha’. K’a’ru naxk’ut Tzol’leb’ ut Sumwank 137:5–10 chiqu chirix li kristiaan a’an?

Tzol’leb’ ut Sumwank 138:12–24.K’a’ru naxk’ut Tzol’leb’ ut Sumwank 138:12–24 chirixeb’ li ke’ula’aniik xb’aan li Kolonel sa’ li ruchich’och’ reheb’ li musiq’ej? K’a’ruheb’ li osob’tesink ke’xk’ul? K’a’ru naqatzol rik’in li ke’xb’aanu?

Tzol’leb’ ut Sumwank 138:38–55.Eb’ li raqal a’in neke’xye resileb’ li ani kiril li Awa’b’ej Joseph F. Smith sa’ li ruchich’och’ reheb’ li musiq’ej, jo’ ajwi’ junjunq li na’leb’ chirix lix yu’ameb’. Maare jo’ junkab’al naru teetz’iib’a xk’ab’a’eb’ lee xe’toonil li ak wankeb’ sa’ li ruchich’och’ reheb’ li musiq’ej, ut junjunq li na’leb’ chirix lix yu’ameb’.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Tintzol, tink’oxla, tintijoq,” B’ichleb’aal choq’ reheb’ li Kok’al, 66.

Xchaab’ilob’resinkil li naqatzol

Xtz’ilb’al rix sa’ li qach’ool eb’ li loq’laj hu. Li Awa’b’ej David O. McKay kixye naq li tz’ilok-ix sa’ li qach’ool “a’an jun reheb’ … li okeb’aal q’axal sant noko’ok wi’ re wank chiru li rilob’aal li Qaawa’ ” (Enseñanzas de los Presidentes de la Iglesia: David O. McKay [2003], 35).

ruchich’och’ reheb’ li musiq’ej

Li taqlanb’ileb’, xb’aan laj Harold I. Hopkinson. Li Jesukristo kixtaqlaheb’ li musiq’ej tiikeb’ xch’ool chixjultikankil li evangelio sa’ li ruchich’och’ reheb’ li musiq’ej.