« ថ្ងៃទី ២១-២៧ ខែ មករា ។ យ៉ូហាន ១ ៖ យើងបានរកឃើញព្រះមែស៊ី »ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០១៩( ឆ្នាំ ២០១៩ )
« ថ្ងៃទី ២១–២៧ ខែ មករា ។ យ៉ូហាន ១ »ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០១៩
ថ្ងៃទី ២១–២៧ ខែ មករា
យ៉ូហាន ១
យើងបានរកឃើញព្រះមែស៊ី
នៅពេលអ្នកអាន ហើយពិចារណា យ៉ូហាន ១ សូមកត់ត្រាចំណាប់អារម្មណ៍ខាងវិញ្ញាណ ដែលអ្នកបានទទួល ។ តើសារលិខិតអ្វីខ្លះដែលអ្នករកឃើញថាមានតម្លៃបំផុតចំពោះអ្នក និងគ្រួសារអ្នក ? តើអ្នកអាចចែកចាយអ្វីខ្លះនៅក្នុងថ្នាក់រៀននៅឯព្រះវិហាររបស់អ្នក ?
កត់ត្រាចំណាប់អារម្មណ៍របស់បងប្អូន
តើអ្នកធ្លាប់ងឿងឆ្ងល់ថាតើអ្នកនឹងទទួលស្គាល់ព្រះយេស៊ូវនៃស្រុកណាសារ៉ែតជាព្រះរាជបុត្រានៃព្រះឬទេ ប្រសិនបើអ្នកបានរស់នៅក្នុងជំនាន់នៃការបម្រើក្នុងជីវិតរមែងស្លាប់របស់ទ្រង់នោះ ? អស់រយៈពេលជាច្រើនឆ្នាំ ពួកអ៊ីស្រាអែលស្មោះត្រង់ រួមមានទាំង អនទ្រេ ពេត្រុស ភីលីព និង ណាថាណែល បានរង់ចាំ ហើយអធិស្ឋានសម្រាប់ការយាងមករបស់ព្រះមែស៊ី ដែលបានសន្យានោះ ។ តើពួកគេបានជួបទ្រង់នៅពេលណា តើពួកគេស្គាល់ថាទ្រង់គឺជាព្រះដែលពួកគេកំពុងស្វែងរកដោយរបៀបណា ? យើងទាំងអស់គ្នាមកស្គាល់ព្រះអង្គសង្គ្រោះតាមរបៀបដូចគ្នា—ដោយការទទួលយកការអញ្ជើញឲ្យ « មកតាម ហើយទៅ មើល » ដោយខ្លួនយើង ( យ៉ូហាន ១:៣៩ ) ។ យើងអានអំពីទ្រង់នៅ ក្នុងបទគម្ពីរ ។ យើងស្ដាប់ឮគោលលទ្ធិរបស់ទ្រង់ ។ យើងសង្កេតមើលរបៀបដែលទ្រង់រស់នៅ ។ យើងទទួលអារម្មណ៍ពីព្រះវិញ្ញាណរបស់ទ្រង់ ។ នៅតាមផ្លូវ យើងបានរកឃើញ ដូចជាណាថាណែលបានរកឃើញថា ព្រះអង្គសង្គ្រោះស្គាល់យើង ហើយស្រឡាញ់យើង ព្រមទាំងចង់រៀបចំយើងឲ្យទទួល « ការណ៍ដ៏ធំវិសេស » ( យ៉ូហាន ១:៥០ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
ដំណឹងល្អរបស់ យ៉ូហាន
តើ យ៉ូហាន ជានរណា ?
យ៉ូហាន គឺជាសិស្សមួយរូបរបស់យ៉ូហាន-បាទីស្ទ ហើយក្រោយមកក្លាយជាអ្នកដើរតាមម្នាក់នៃអ្នកដើរតាមដំបូងគេរបស់ព្រះយេស៊ូវគ្រីស្ទ និងជាសាវកម្នាក់ក្នុងចំណោមសាវកដប់ពីរនាក់របស់ទ្រង់ ។ លោកបានសរសេរដំណឹងល្អរបស់យ៉ូហាន បានសរសេរសំបុត្រជាច្រើនច្បាប់ និងបានសរសេរគម្ពីរនៃវិវរណៈ ។ នៅក្នុងដំណឹងល្អរបស់លោក លោកសំដៅខ្លួនលោកថាជាសិស្ស « ម្នាក់ដែលព្រះយេស៊ូវស្រឡាញ់ » និង « សិស្សមួយនោះ » (យ៉ូហាន ១៣:២៣,២០:៣) ។ ចំណង់របស់យ៉ូហានក្នុងការផ្សាយដំណឹងល្អ គឺមានយ៉ាងខ្លាំងក្លា ដែលលោកបានសូមដើម្បីស្ថិតនៅលើផែនដី រហូតដល់ការយាងមកជាលើកទីពីររបស់ព្រះអង្គសង្គ្រោះ ដូច្នេះលោកអាចនាំព្រលឹងជាច្រើនមករកព្រះគ្រីស្ទ ( សូមមើលគ. និង ស. ៧:១–៦) ។
សូមមើលផងដែរ Bible Dictionary, « John » និង « John, Gospel of »។
ព្រះយេស៊ូវគ្រីស្ទ « គង់នៅជាមួយនឹងព្រះតាំង អំពីដើមមក » ។
យ៉ូហានបានចាប់ផ្ដើមដំណឹងល្អរបស់លោកដោយការពិពណ៌នាអំពីកិច្ចការដែលព្រះគ្រីស្ទ បានធ្វើពីមុនទ្រង់ប្រសូត្រ ៖ « កាលដើមដំបូង…មានព្រះបន្ទូល [ ព្រះយេស៊ូវគ្រីស្ទ ] គង់នៅជាមួយនឹងព្រះ » ។ តើអ្នករៀនអ្វីខ្លះមកពី ខ ១–៥ អំពីព្រះអង្គសង្គ្រោះ និងកិច្ចការរបស់ទ្រង់ ? អ្នកអាចរកបានការស្រាយបញ្ជាក់ដែលជាជំនួយនៅក្នុងការបកប្រែដោយយ៉ូសែប ស្ម៊ីធ យ៉ូហាន ១:១-៥ ( នៅក្នុងBible appendix ) ។ នៅពេលអ្នកចាប់ផ្ដើមការសិក្សារបស់អ្នកអំពីជីវិតរបស់ព្រះអង្គសង្គ្រោះ ហេតុអ្វីក៏វាសំខាន់ដើម្បីដឹងអំពីកិច្ចការនៃជីវិតមុនផែនដីរបស់ទ្រង់ ?
សូមមើលផងដែរ « Jesus Christ Chosen as Savior, » Gospel Topics, topics.lds.org ។
ពួកសិស្សរបស់ព្រះយេស៊ូវគ្រីស្ទធ្វើជាសាក្សីអំពីទ្រង់ ។
យ៉ូហានត្រូវបានបំផុសគំនិតឲ្យស្វែងរកព្រះអង្គសង្គ្រោះ ដោយសារតែទីបន្ទាល់របស់យ៉ូហាន បាទីស្ទ ដែលបានប្រកាសថា លោក « គឺមកគ្រាន់តែនឹងធ្វើបន្ទាល់ពីពន្លឺពិតតែប៉ុណ្ណោះ… »(យ៉ូហាន ១:៨–៩, ១៥–១៨) ។ យ៉ូហានផ្ទាល់ក៏បានថ្លែងទីបន្ទាល់ដ៏មានអានុភាពអំពីជីវិត និងបេសកកម្មរបស់ព្រះអង្គសង្គ្រោះ ។
វាអាចនឹងគួរឲ្យចាប់អារម្មណ៍ដើម្បីធ្វើបញ្ជីអំពីសេចក្ដីពិតដែលយ៉ូហានបានដាក់បញ្ចូលនៅក្នុងទីបន្ទាល់ដំបូងរបស់លោកអំពីព្រះគ្រីស្ទ (ខ ១–១៨; សូមមើលផងដែរ ការបកប្រែរបស់យ៉ូសែប ស្ម៊ីធ, យ៉ូហាន ១:១–១៩ [in the Bible appendix]) ។ ហេតុអ្វីក៏អ្នកគិតថា យ៉ូហានបានចាប់ផ្ដើមដំណឹងល្អរបស់លោកជាមួយនឹងសេចក្ដីពិតទាំងនេះដូច្នេះ ? សូមពិចារណាធ្វើការសរសេរអំពីទីបន្ទាល់របស់អ្នកអំពីព្រះយេស៊ូវគ្រីស្ទ—តើអ្នកនឹងចង់ចែកចាយអំពីអ្វីខ្លះ ? តើបទពិសោធន៍អ្វីខ្លះដែលបានជួយអ្នកឲ្យមកស្គាល់ ហើយដើរតាមព្រះអង្គសង្គ្រោះ ? តើនរណាខ្លះអាចនឹងត្រូវបានប្រទានពរ តាមរយៈការស្ដាប់ឭទីបន្ទាល់របស់អ្នក ?
តើ« ឲ្យបានត្រឡប់ជាកូនព្រះ » មានន័យយ៉ាងណា ?
យើងទាំងអស់គ្នាគឺជាបុត្រា និងបុត្រីខាងវិញ្ញាណរបស់ព្រះ នៅពេលយើងមានអំពើបាប នោះយើងបានឃ្លាតឆ្ងាយ ឬបំបែកចេញពីទ្រង់ ។ ព្រះយេស៊ូវគ្រីស្ទប្រទានផ្លូវមួយឲ្យយើងត្រឡប់ទៅវិញ ។ តាមរយៈពលិកម្មដ៏ធួនរបស់ទ្រង់ និងការគោរពប្រតិបត្តិរបស់យើងចំពោះសេចក្ដីសញ្ញានៃដំណឹងល្អ នោះទ្រង់ « [ ប្រទានដល់យើង ] នូវព្រះចេស្ដាដើម្បីប្រែក្លាយជាបុត្រា [ និង បុត្រី ] របស់ព្រះ » ជាថ្មីម្ដងទៀត ។ យើងត្រូវកើតសារជាថ្មី ហើយបានស្រុះស្រួលនឹងព្រះបិតារបស់យើង មានភាពសក្ដិសមដើម្បីទទួលគ្រងមរតកដ៏អស់កល្បជានិច្ចរបស់ទ្រង់ ហើយក្លាយជាអ្នកគ្រងមរតកនៃអ្វីៗទាំងអស់ដែលទ្រង់មាន ( សូមមើល រ៉ូម ៨:១៤–១៨; យ៉ាកុប ៤:១១) ។
តើមាននរណាម្នាក់បានឃើញព្រះឬទេ ?
ព្រះគម្ពីរសញ្ញាចាស់បានកត់ត្រាគំរូរបស់មនុស្សដែលបានមើលឃើញព្រះ ( សូមមើល លោកុប្បត្តិ ៣២:៣០; និក្ខមនំ ៣៣:១១; អេសាយ ៦:៥) ។ ដូច្នេះហេតុអ្វីក៏យ៉ូហានបាទីស្ទនិយាយថា « គ្មានអ្នកណាដែលឃើញព្រះឡើយ » ដូច្នេះ ? ការបកប្រែរបស់យ៉ូសែប ស្ម៊ីធក្នុងខនេះ ( សូមមើល យ៉ូហាន ១:១៨, លេខយោង គ) បញ្ជាក់ថា ព្រះជាព្រះវរបិតា បានបង្ហាញព្រះកាយដល់មនុស្ស ហើយនៅពេលទ្រង់ធ្វើដូច្នោះ ទ្រង់ថ្លែងទីបន្ទាល់អំពីព្រះរាជបុត្រារបស់ទ្រង់ ។ ឧទាហរណ៍ នៅពេលទ្រង់បង្ហាញព្រះកាយដល់យ៉ូសែបស៊្មីធនៅ ក្នុងព្រៃពិសិដ្ឋ នោះទ្រង់បានមានបន្ទូលទៅយ៉ូសែបថា « នេះជាព្រះរាជបុត្រាដ៏ស្ងួនភ្ងារបស់យើង។ ចូរស្ដាប់តាមទ្រង់ចុះ ! » (យ៉ូសែប ស្ម៊ីធ—ប្រវត្តិ ១:១៧; សូមមើលផងដែរ គ. និង ស. ៧៦:២៣) ។ មានព្រឹត្តការណ៍ដទៃទៀតជាច្រើនដែលបានកត់ត្រាពីទីកន្លែងដែលមនុស្សបានឃើញព្រះជាព្រះវរបិតានៅក្នុងការនិមិត្ត ( សូមមើល កិច្ចការ ៧:៥៥–៥៦; វិវរណៈ ៤:២; នីហ្វៃទី ១ ១:៨; គ. និង ស. ១៣៧:១–៣) ឬបានស្ដាប់ឮព្រះសូរសៀងរបស់ទ្រង់ថ្លែងទីបន្ទាល់អំពីព្រះរាជបុត្រា ( សូមមើល ម៉ាថាយ ៣:១៧; ១៧:៥; នីហ្វៃទី៣ ១១:៦–៧) ។
តើអេលីយ៉ាសជានរណា ហើយនរណាគឺជា « ហោរានោះ » ?
ពួកអ្នកដឹកនាំសាសន៍យូដា បានងឿងឆ្ងល់ប្រសិនបើយ៉ូហានបាទីស្ទ កំពុងបំពេញតាមការព្យាករណ៍ពីបុរាណអំពីពួកព្យាការីដែលនឹងមកនៅ ក្នុងចំណោមមនុស្សនៅថ្ងៃ ណាមួយនោះ ។ ពួកគេបានសួរលោក ថាតើលោកគឺជាអេលីយ៉ាស ដែលជាទម្រង់អក្សរក្រិកថាអេលីយ៉ាជាឈ្មោះរបស់ព្យាការីដែលត្រូវបានព្យាករថាមកស្ដារឡើងវិញនូវរឿងគ្រប់យ៉ាងនោះមែនឬទេ ( សូមមើលម៉ាឡាគី ៤:៥–៦) ។ ពួកគេក៏បានសួរផងដែរ ថាតើលោកគឺជា « ហោរានោះ » ដែលអាចសំដៅទៅលើ « ព្យាការី » ដែលបានថ្លែងនៅក្នុងចោទិយកថា ១៨:១៥ មែនឬទេ ។ យ៉ូហាន បានពន្យល់ថា លោកពុំមែនទាំងពីរហ្នឹង ប៉ុន្តែលោកគឺ ជាព្យាការីដែលលោកអេសាយបានថ្លែងថានឹងមករៀបចំផ្លូវសម្រាប់ការយាងមករបស់ព្រះអម្ចាស់ ( សូមមើលអេសាយ ៤០:៣ ) ។
សូមមើលផងដែរ Bible Dictionary « Elias » ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលអ្នកអានគម្ពីរជាមួយនឹងគ្រួសាររបស់អ្នក នោះព្រះវិញ្ញាណអាចជួយអ្នកស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារអ្នក ។ នេះគឺជាការផ្ដល់យោបល់មួយចំនួន ៖
នៅពេលយើងសិក្សាព្រះគម្ពីរ នោះយើងនឹងទទួលបានការបំផុសគំនិតសម្រាប់ជីវិតរស់នៅរបស់យើង ។
តើអ្នកអាចជួយគ្រួសាររបស់អ្នកឲ្យមើលឃើញអ្វីដែលពួកគេអានអំពីពន្លឺនៅក្នុងខគម្ពីរទាំងនេះបានយ៉ាងដូចម្ដេច ? អ្នកអាចឲ្យសមាជិកគ្រួសារអ្នកបើកពន្លឺភ្លើងបំភ្លឺនៅក្នុងបន្ទប់ងងឹតមួយ ហើយចែកចាយអំពីរបៀបដែលព្រះអង្គសង្គ្រោះ គឺជាពន្លឺនៅក្នុងជីវិតរស់នៅរបស់ពួកគេ ។ បន្ទាប់មក នៅពេលអ្នកអាន យ៉ូហាន ១:៤–១០, សមាជិកគ្រួសារអាចមានគំនិតបន្ថែមចំពោះទីន្ទាល់របស់យ៉ូហានអំពីព្រះយេស៊ូវគ្រីស្ទ ថាជាពន្លឺនៃលោកិយ ។
កត់សម្គាល់អំពីទីបន្ទាល់របស់យ៉ូហានបាទីស្ទនៅក្នុង ខ ៣៦ ។ តើលទ្ធផលនៃទីបន្ទាល់របស់លោកទៅជាយ៉ាងណា ? ( សូមមើល ខ ៣៥–៤៦) ។ តើគ្រួសាររបស់អ្នករៀនបានអ្វីខ្លះមកពីមនុស្សដែលបានពិពណ៌នានៅ ក្នុងខគម្ពីរទាំងនេះ អំពីរបៀបចែកចាយដំណឹងល្អ ?
តើណាថាណែលបានធ្វើអ្វីខ្លះ ដើម្បីជួយគាត់ទទួលបានទីបន្ទាល់មួយអំពីព្រះអង្គសង្គ្រោះ ? តើយើងបានទទួលទីបន្ទាល់របស់យើងយ៉ាងដូចម្ដេច ?
សម្រាប់គំនិតបន្ថែមដើម្បីបង្រៀនកុមារ សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់ថ្នាក់អង្គការបឋមសិក្សា ។
ការកែលម្អការបង្រៀនរបស់យើង
ចែកចាយ កម្មវត្ថុមេរៀន ។ សូមអញ្ជើញសមាជិកគ្រួសារឲ្យស្វែងរកកម្មវត្ថុទាំងឡាយដែលពួកគេអាចប្រើដើម្បីជួយពួកគេឲ្យយល់គោលការណ៍ទាំងឡាយដែលបានរកឃើញនៅ ក្នុងព្រះគម្ពីរដែលពួកគេកំពុងអានជាមួយនឹងគ្រួសារមួយ ។ ជាឧទាហរណ៍ ពួកគេអាចប្រើទៀនមួយដើម្បីតំណាងឲ្យពន្លឺនៃព្រះគ្រីស្ទ ( សូមមើលយ៉ូហាន ១:៤) ។
ព្រះយេហូវ៉ាបង្កើតផែនដីដោយ វលធើរ រេន