« ថ្ងៃទី ២១–២៧ ខែ មករា ។ យ៉ូហាន ១ ៖ យើងបានឃើញព្រះមែស៊ីហើយ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ២១–២៧ ខែ មករា ។ យ៉ូហាន ១ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ថ្ងៃទី ២១–២៧ ខែ មករា ។
យ៉ូហាន ១
យើងបានឃើញព្រះមែស៊ីហើយ
កាលអ្នកអាន យ៉ូហាន ១ សូមកត់ត្រាចំណាប់អារម្មណ៍ខាងវិញ្ញាណនានាដែលអ្នកទទួលបាន ។ គម្រោងមេរៀននាសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ អាចជួយអ្នកឲ្យយល់ពីជំពូកទាំងនេះបាន ។ សកម្មភាពណែនាំខាងក្រោមនេះអាចផ្ដល់ជាគំនិតក្នុងការជួយដល់កុមារឲ្យរៀនសូត្រគោលការណ៍នានា ដែលមាននៅក្នុង យ៉ូហាន ១ ។ សកម្មភាពសម្រាប់កុមារធំៗទាំងនេះក៏អាចកែសម្រួលសម្រាប់កុមារតូចៗបានផងដែរ ប្រសិនបើចាំបាច់ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
ដើម្បីជួយកុមារឲ្យចែកចាយអ្វីដែលពួកគេដឹងអំពីព្រះយេស៊ូវ អ្នកអាចបង្ហាញរូបភាពទ្រង់កំពុងបំពេញតួនាទីរបស់ទ្រង់ដែលមានរ៉ាយរ៉ាប់នៅក្នុង យ៉ូហាន ១ ។ រួចសូមឲ្យពួកគេរៀបរាប់ពីអ្វីដែលកើតមានឡើង ( ដូចជាការបង្កើតផែនដី ឬការបង្រៀនដំណឹងល្អ ) ។
បង្រៀនគោលលទ្ធិ
កុមារតូចៗ
ព្រះយេស៊ូវបានគង់នៅជាមួយនឹងព្រះវរបិតាសួគ៌ពីមុនទ្រង់បានប្រសូតមក ។
យ៉ូហានបានបង្រៀនថា ព្រះយេស៊ូវគ្រីស្ទបានគង់នៅជាមួយនឹងព្រះមុនពេលទ្រង់ទទួលបទពិសោធន៍ខាងសាច់ឈាមរបស់ទ្រង់ ។ យើងក៏បានរស់នៅជាមួយនឹងព្រះ ពីមុនយើងបានកើតមកលើផែនដីនេះផងដែរ ( សូមមើល « គ្រួសារ ៖ ការប្រកាសដល់ពិភពលោក » Ensign ឬលីអាហូណា ខែ វិច្ឆិកា ឆ្នាំ ២០១០ ទំព័រ ១២៩ ) ។ តើអ្នកនឹងបង្រៀនកុមារពីសេចក្ដីពិតនេះតាមរបៀបណា ?
សកម្មភាពដែលអាចជ្រើសរើស
-
សូមពន្យល់ថា « ព្រះបន្ទូល » នៅក្នុង យ៉ូហាន ១:១ សំដៅទៅលើព្រះយេស៊ូវ ។ សូមអានខគម្ពីរនេះឮៗ ហើយសូមឲ្យកុមារថា « ព្រះយេស៊ូវ » រាល់ពេលដែលអ្នកអានពាក្យ « ព្រះបន្ទូល » ។ សូមបង្ហាញគំនូរខ្សែអំពី ជីវិតមុនជីវិតនៅលើផែនដី (LDS.org ) ។ សូមពន្យល់ថា ព្រះយេស៊ូវគ្រីស្ទបានគង់នៅជាមួយនឹងព្រះវរបិតាសួគ៌ពីមុនទ្រង់បានយាងមកកាន់ផែនដី ។
-
សូមបង្រៀនកុមារថា យើងក៏បានរស់នៅជាមួយនឹងព្រះ ពីមុនយើងចុះមកកាន់ផែនដីនេះផងដែរ ។ អ្នកអាចប្រើ « សេចក្ដីផ្ដើម ៖ ផែនការរបស់ព្រះវរបិតាសួគ៌យើង »រឿងព្រះគម្ពីរសញ្ញាថ្មី ទំព័រ ១–៥, វីដេអូដែលដូចគ្នា (LDS.org ) ឬ សេចក្ដីណែនាំដល់ព្រះគម្ពីរទាំងឡាយ « Premortal Life » scriptures.lds.org ។
-
សូមឲ្យឪពុក ឬម្ដាយនាំទារកម្នាក់មកកាន់ថ្នាក់ ហើយសូមប្រើឱកាសនេះដើម្បីបង្រៀនថា យើងបានរស់នៅឯស្ថានសួគ៌ជាមួយនឹងព្រះវរបិតាសួគ៌ជាកូនវិញ្ញាណ ពីមុនយើងបានកើតមក ។
ព្រះយេស៊ូវបានបង្កើតគ្រប់របស់ទាំងអស់ ។
កូនចៅជាច្រើនពេញចិត្តនៅក្នុងវត្តមាននៃការបង្កើតរបស់ព្រះអម្ចាស់ ។ ការស្គាល់ពីតួនាទីរបស់ព្រះគ្រីស្ទជាអង្គបង្កបង្កើតអាចជួយបង្កើនគារវភាពរបស់ពួកគេចំពោះទ្រង់ ។
សកម្មភាពដែលអាចជ្រើសរើស
-
សូមអាន យ៉ូហាន ១:៣ ជាមួយនឹងកុមារ រួចហើយសូមបង្ហាញរូបភាពនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ។ សូមជួយកុមារឲ្យទន្ទេញចាំឃ្លា « គ្រប់របស់ទាំងអស់បានកើតមកដោយសារ [ ព្រះយេស៊ូវគ្រីស្ទ ] » ។
-
សូមនាំកុមារដើរលេងនៅខាងក្រៅ ។ ចូរឲ្យកុមារប្ដូរវេនគ្នារៀបរាប់ពីការបង្កើតដែលពួកគេឃើញ ហើយសូមឲ្យសិស្សក្នុងថ្នាក់ទាយថា ពួកគេកំពុងរៀបរាប់ពីអ្វី ។
-
សូមឲ្យកុមារគិតពីវិធីដែលពួកគេអាចថែទាំដល់ការបង្កបង្កើតទាំងឡាយដែលនៅជុំវិញគេនោះ ( ឧទាហរណ៍ ការចេះស្រឡាញ់សត្វ ) ។
ព្រះយេស៊ូវគ្រីស្ទបានបង្កើតពិភពលោកនេះ ព្រមទាំងគ្រប់របស់ទាំងអស់ដែលនៅលើនោះផង ។
ខ្ញុំអាចអញ្ជើញមនុស្សដទៃឲ្យមករកព្រះយេស៊ូវគ្រីស្ទ ហើយរៀនអំពីទ្រង់ ។
យ៉ូហាន ១ រួមមាននូវដំណើររឿងរបស់ពួកសាវក ដែលបានអញ្ជើញមនុស្សឲ្យ « តាមទៅមើល » ថា ព្រះយេស៊ូវគឺជាព្រះរាជបុត្រារបស់ព្រះ ។ សូម្បីតែកុមារតូចៗក៏អាចធ្វើតាមគំរូនេះដែរ ។
សកម្មភាពដែលអាចជ្រើសរើស
-
សូមរៀបរាប់ពីវិធីដែលយ៉ូហានបានបង្រៀនដល់អនទ្រេអំពីព្រះយេស៊ូវ និងប្រាប់ពីវិធីដែលអនទ្រេបានបង្រៀនដល់ពេត្រុសវិញ ( សូមមើល យ៉ូហាន ១:៣៥–៤២ ) ។ សូមចែកចាយពីរបៀបដែលអ្នកបានដឹងអំពីសាសនាចក្រ ឬអញ្ជើញឲ្យសមាជិកថ្មីមួយរូបចែកចាយពីរបៀបដែលគាត់បានដឹងអំពីសាសនាចក្រ ។
-
សូមចែកចាយរឿងរបស់ ភីលីព ដែលបានអញ្ជើញ ណាថាណែលឲ្យ « តាមទៅមើល » ( យ៉ូហាន ១:៤៣–៥១ ) ។ សូមលាក់រូបភាពព្រះយេស៊ូវនៅក្នុងប្រអប់មួយ ហើយសុំឲ្យកុមារម្នាក់មក « តាមទៅមើល » រូបនោះ រួចហើយប្រាប់ដល់កុមារផ្សេងទៀតអំពីអ្វីដែលគេបានឃើញ ។
-
សូមឲ្យកុមារផាត់ពណ៌ទំព័រសកម្មភាពសប្ដាហ៍នេះ ហើយលើកទឹកចិត្តពួកគេឲ្យប្រើវាដើម្បីអញ្ជើញនរណាម្នាក់ឲ្យរៀនអំពីព្រះយេស៊ូវ ។
-
សូមឲ្យកុមារមួយរូបប្រាប់អំពីគ្រាមួយ ដែលរូបគេបានចែកអ្វីមួយជាមួយនរណាម្នាក់ ដូចជាប្រដាប់លេង ឬអំណោយ ។ តើយើងអាចចែកចាយដំណឹងល្អដោយរបៀបណា ? សូមប្រាប់រឿងកុមារម្នាក់ដែលបានចែកចាយដំណឹងល្អដល់មិត្តម្នាក់ ដូចជារឿងរបស់អែលឌើរ អិម រ័សុល បាឡឺដ អំពីយ៉ូស្វេ ( « ការតាមដាន »Ensign ឬ លីអាហូណា ខែ ឧសភា ឆ្នាំ ២០១៤ ទំព័រ ៧៨–៨១ ) ។
បង្រៀនគោលលទ្ធិ
កុមារធំៗ
ព្រះយេស៊ូវបានគង់នៅជាមួយនឹងព្រះវរបិតាសួគ៌ពីមុនទ្រង់បានប្រសូតមក ។
តាំងពីមុនទ្រង់បានប្រសូតមក ព្រះយេស៊ូវបានដើរតួដ៏សំខាន់នៅក្នុងផែនការរបស់ព្រះវរបិតាសួគ៌រួចទៅហើយ ។ កាលអ្នកអាន យ៉ូហាន ១:១–៥ តើអ្វីដែលទាក់ទាញចំណាប់អារម្មណ៍អ្នកអំពីកិច្ចការរបស់ព្រះគ្រីស្ទនៅក្នុងជីវិតពីមុនជីវិតនៅលើផែនដីនេះ ?
សកម្មភាពដែលអាចជ្រើសរើស
-
សូមសួរកុមារថា តើពួកគេដឹងរឿងអ្វីខ្លះអំពីកិច្ចការដែលព្រះយេស៊ូវបានធ្វើ ពីមុនទ្រង់បានប្រសូតមក ។ សូមឲ្យពួកគេរកមើលចម្លើយនៅក្នុង យ៉ូហាន ១:១–៥ ។ វាអាចជួយដល់អ្នកបើអ្នកអាននៅក្នុង ការបកប្រែរបស់យ៉ូសែប ស្ម៊ីធ, យ៉ូហាន ១:១–៥ ( នៅក្នុងសេចក្ដីបន្ថែមគម្ពីរប៊ីប ) ។
-
សូមចែកចាយ « សេចក្ដីផ្ដើម ៖ ផែនការរបស់ព្រះវរបិតាសួគ៌យើង »រឿងព្រះគម្ពីរសញ្ញាថ្មី ទំព័រ ១–៥ ជាមួយនឹងកុមារ ឬចាក់បង្ហាញវីដេអូដែលដូចគ្នានោះ (LDS.org ) ។ សូមសួរកុមារថា តើពួកគេរៀនបានអ្វីខ្លះអំពីព្រះយេស៊ូវគ្រីស្ទ ។
-
សូមឲ្យកុមារមួយចំនួនមកកាន់ថ្នាក់រៀនត្រៀមសម្ដែង ឬរៀបរាប់ពីអ្វីមួយដែលពួកគេបានបង្កើតឡើង ។ សូមបង្ហាញរូបភាពមួយចំនួនពីការបង្កបង្កើតរបស់ព្រះអម្ចាស់ ហើយសូមប្រើ យ៉ូហាន ១:៣ ដើម្បីបង្ហាញថា ព្រះយេស៊ូវបានបង្កើតគ្រប់របស់ទាំងអស់ ។
ព្រះយេស៊ូវគ្រីស្ទគឺជាពន្លឺរបស់ខ្ញុំ ។
និមិត្តសញ្ញានៃពន្លឺអាចជួយកុមារឲ្យយល់ពីព្រះអង្គសង្គ្រោះ និងដំណឹងល្អរបស់ទ្រង់ ។ តើអ្នកអាចបំផុសគំនិតដល់កុមារឲ្យស្វែងរកពន្លឺរបស់ព្រះអង្គសង្គ្រោះ កាលពិភពលោកហាក់ដូចជាងងឹតបានយ៉ាងដូចម្ដេច ?
សកម្មភាពដែលអាចជ្រើសរើស
-
សូមឲ្យកុមារអាន ទំនុកតម្កើង ២៧:១; យ៉ូហាន ១:៤–៩; ម៉ូសាយ ១៦:៩; និង គោលលទ្ធិ និងសេចក្ដីសញ្ញា ៣៩:១–២ ហើយរកមើលឃ្លាដែលបទគម្ពីរទាំងនេះមានចំណុចរួមគ្នា ។ តើព្រះយេស៊ូវគ្រីស្ទដូចជាពន្លឺដោយរបៀបណា ?
-
សូមបង្ហាញរូបភាពរបស់ព្រះអង្គសង្គ្រោះមួយ និងវត្ថុមួយចំនួនដែលបញ្ចេញពន្លឺ ដូចជាពិល ។ តើព្រះយេស៊ូវគ្រីស្ទដូចជាវត្ថុទាំងនេះដោយរបៀបណា ? តើយើងអាចចែកចាយពន្លឺរបស់ទ្រង់ជាមួយនឹងមនុស្សដទៃដោយរបៀបណា ? សូមច្រៀងរួមគ្នានូវបទ « ទ្រង់ជាពន្លឺខ្ញុំ » ទំនុកតម្កើង ល.រ. ៣៩ ឬចម្រៀងផ្សេងទៀតអំពីពន្លឺនៃដំណឹងល្អ ។
-
សូមសួរកុមារថា តើពួកគេធ្វើអ្វី នៅពេលពួកគេស្ថិតនៅកន្លែងងងឹត ហើយភ័យខ្លាចនោះ ។ សូមថ្លែងទីបន្ទាល់ថា ពួកគេអាចងាកទៅរកព្រះអង្គសង្គ្រោះជានិច្ច នៅពេលដែលពួកគេភ័យខ្លាចនោះ ។
ក្នុងនាមជាអ្នកដើរតាមព្រះយេស៊ូវគ្រីស្ទ ខ្ញុំអញ្ជើញមនុស្សដទៃឲ្យដើរតាមទ្រង់ដែរ ។
សូមពិចារណាពីវិធីដែលអ្នកអាចប្រើគំរូនានាពីក្នុង យ៉ូហាន ១:៣៥–៥១ ដើម្បីលើកទឹកចិត្តដល់កុមារឲ្យអញ្ជើញមនុស្សដទៃឲ្យរៀនអំពីព្រះអង្គសង្គ្រោះ ។
សកម្មភាពដែលអាចជ្រើសរើស
-
សូមជួយកុមារឲ្យស្រាវជ្រាវក្នុង យ៉ូហាន ១:៣៥–៥១ រកមើលអ្វីដែលមនុស្សនិយាយដើម្បីអញ្ជើញមនុស្សដទៃឲ្យរៀនអំពីព្រះអង្គសង្គ្រោះ ។ សូមឲ្យពួកគេអនុវត្តអ្វីដែលពួកគេអាចនិយាយដើម្បីអញ្ជើញមិត្តម្នាក់ឲ្យរៀនអំពីទ្រង់ ។
-
សូមឲ្យកុមារប្រើទំព័រសកម្មភាពសប្ដាហ៍នេះដើម្បីធ្វើសំបុត្រអញ្ជើញមួយ ដែលពួកគេអាចប្រើដើម្បីអញ្ជើញមិត្តម្នាក់ ឬសមាជិកគ្រួសារមួយរូបឲ្យរៀនបន្ថែមអំពីព្រះយេស៊ូវគ្រីស្ទ ។
-
សូមផ្ដល់ឱកាសឲ្យកុមារបានប្រាប់ដល់សិស្សក្នុងថ្នាក់អំពីរឿងមួយចំនួនដែលពួកគេចូលចិត្ត ។ សូមជួយកុមារឲ្យឃើញថា ការចែកចាយដំណឹងល្អអាចដូចជាការចែកចាយរបស់ផ្សេងទៀតដែលយើងចូលចិត្ត ។ អ្នកក៏អាចចាក់បង្ហាញវីដេអូ « Good Things to Share » ( LDS.org ) ។
លើកទឹកចិត្តឲ្យរៀនសូត្រនៅផ្ទះ
សូមលើកទឹកចិត្តកុមារឲ្យអញ្ជើញនរណាម្នាក់ដែលពួកគេស្រឡាញ់ឲ្យរៀនបន្ថែមអំពីព្រះយេស៊ូវគ្រីស្ទ ។
កែលម្អការបង្រៀនរបស់យើង
សូមជួយកុមារឲ្យស្រមៃឃើញរឿងមួយ ។ សូមរិះរកវិធីផ្សេងៗដើម្បីបង្កើតរូបភាពមួយនៃរឿងរួមមាន រូបភាពដំណឹងល្អ គំនូរ វីដេអូ តុក្កតាអាយ៉ង ឬឆាកកំប្លែង ។