« ថ្ងៃទី ៣១ ខែ ធ្នូ–ថ្ងៃទី ០៦ ខែ មករា ។ យើងទទួលខុសត្រូវចំពោះការរៀនសូត្រផ្ទាល់ខ្លួនរបស់យើង » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ៣១ ខែ ធ្នូ–ថ្ងៃទី ០៦ ខែ មករា ។ យើងទទួលខុសត្រូវចំពោះការរៀនសូត្រផ្ទាល់ខ្លួនរបស់យើង » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ថ្ងៃទី ៣១ ខែ ធ្នូ–ថ្ងៃទី ០៦ ខែ មករា
យើងទទួលខុសត្រូវចំពោះការរៀនសូត្រផ្ទាល់ខ្លួនយើង
កាលអ្នកអានព្រះគម្ពីរនៅក្នុងគម្រោងមេរៀននេះ សូមកត់ត្រាចំណាប់អារម្មណ៍ខាងវិញ្ញាណនានាដែលអ្នកទទួលបាន ។ អ្នកនឹងកត់សម្គាល់ឃើញថា គម្រោងមេរៀននីមួយៗនៅក្នុងសៀវភៅសិក្សានេះ មាននូវសកម្មភាពសម្រាប់កុមារតូចៗ និងកុមារធំៗ ប៉ុន្ដែអ្នកអាចសម្របសម្រួលសកម្មភាពណាមួយសម្រាប់ថ្នាក់រៀនរបស់អ្នក ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
នៅពេលចាប់ផ្ដើមថ្នាក់រៀននីមួយៗ សូមផ្ដល់ឱកាសដល់កុមារឲ្យចែកចាយនូវអ្វីដែលពួកគេកំពុងរៀនអំពីដំណឹងល្អ ។ ឧទាហរណ៍ នៅសប្ដាហ៍នេះអ្នកអាចអញ្ជើញឲ្យពួកគេចែកចាយរឿងសំណព្វចិត្តរបស់ពួកគេអំពីព្រះយេស៊ូវគ្រីស្ទ ។
បង្រៀនគោលលទ្ធិ
កុមារតូចៗ
ព្រះយេស៊ូវគ្រីស្ទសព្វព្រះទ័យឲ្យខ្ញុំដើរតាមទ្រង់ ។
អ្នក និងកុមារនឹងអាននូវរឿងជាច្រើនអំពីជីវប្រវត្តិរបស់ព្រះយេស៊ូវគ្រីស្ទនៅឆ្នាំនេះ ។ សូមជួយកុមារឲ្យយល់ថា ហេតុផលដែលយើងរៀនអំពីរឿងទាំងនេះគឺដើម្បីឲ្យយើងអាចដើរតាមគំរូដ៏ឥតខ្ចោះរបស់ព្រះយេស៊ូវគ្រីស្ទបានកាន់តែប្រសើរ ។
សកម្មភាពដែលអាចជ្រើសរើស
-
សូមអានការអញ្ជើញរបស់ព្រះអង្គសង្គ្រោះ « ចូរមកតាមខ្ញុំ » ដែលមាននៅក្នុង លូកា ១៨:២២ ។ លេងល្បែងកម្សាន្តមួយ ដែលកុមារម្នាក់ធ្វើកាយវិការ រួចហើយប្រាប់ដល់កុមារផ្សេងទៀតថា « ចូរមកតាមខ្ញុំ » ។ អញ្ជើញកុមារផ្សេងទៀតឲ្យធ្វើសកម្មភាពនេះសារឡើងវិញ ។
-
បង្ហាញរូបភាពមនុស្សដែលដើរតាមព្រះអង្គសង្គ្រោះតាមវិធីខុសៗគ្នា អំឡុងការបម្រើខាងសាច់ឈាមរបស់ទ្រង់ និងនៅជំនាន់របស់យើង ។ អ្នកអាចស្វែងរករូបភាពនានានៅក្នុង សៀវភៅរូបភាពដំណឹង ឬទស្សនាវដ្ដីសាសនាចក្រនានា ។ អ្នកក៏អាចចាក់បង្ហាញវីដេអូ « Light the World » ( LDS.org ) ។ អនុញ្ញាតឲ្យកុមាររកមើលនូវវិធីដែលមនុស្សដើរតាមព្រះអង្គសង្គ្រោះ ។
-
ជួយកុមារឲ្យគិតអំពីរឿងដែលពួកគេកំពុងធ្វើដើម្បីដើរតាមព្រះអង្គសង្គ្រោះ ។ ច្រៀងបទ « ស្វែងរកព្រះអម្ចាស់ពីក្មេង » សៀវភៅចម្រៀងកុមារ ទំព័រ ៦៧ អាចផ្ដល់ដល់ពួកគេនូវគំនិតមួយចំនួន ។ អនុញ្ញាតឲ្យពួកគេគូររូបភាពខ្លួនឯងដែលកំពុងធ្វើរឿងទាំងនេះ ។
ព្រះគម្ពីរគឺពិត ។
កុមារអាចទទួលបានទីបន្ទាល់មួយថា ព្រះគម្ពីរគឺពិត តាំងពីមុនពួកគេអាចអានបានទៅទៀត ។ កាលអ្នកសិក្សាព្រះគម្ពីរជាមួយនឹងកុមារនាឆ្នាំនេះ អ្នកអាចជួយពួកគេឲ្យដឹងដោយខ្លួនឯងថា ព្រះគម្ពីរគឺពិត ។
សកម្មភាពដែលអាចជ្រើសរើស
-
អញ្ជើញកុមារឲ្យប្រាប់អំពីអំណោយសំណព្វចិត្ត ដែលពួកគេបានទទួលសម្រាប់ថ្ងៃខួបកំណើត ឬក្នុងឱកាសផ្សេងទៀត ។ សូមនាំយកព្រះគម្ពីរមួយក្បាលដែលខ្ចប់ជាកាដូ ហើយឲ្យកុមារម្នាក់បើកកាដូនោះ រួចសូមថ្លែងទីបន្ទាល់ថា ព្រះគម្ពីរគឺជាអំណោយមួយសម្រាប់យើងមកពីព្រះវរបិតាសួគ៌ ។
-
បង្ហាញកុមារនូវសៀវភៅខ្លះៗដែលមាននូវរឿងប្រឌិត ហើយសួរពួកគេថារឿងមួយណាដែលពួកគេចូលចិត្តជាងគេ ។ បង្ហាញព្រះគម្ពីរដល់ពួកគេ ហើយថ្លែងទីបន្ទាល់ថា ព្រះគម្ពីររួមមាននូវបន្ទូលរបស់ព្រះសម្រាប់យើង ហើយប្រាប់អំពីមនុស្សដែលពិតជាបានរស់នៅពិតប្រាកដ ព្រមទាំងព្រឹត្តិការណ៍នានាដែលបានកើតឡើងពិតៗ ។
-
ចែកចាយសារដែលមាននៅក្នុង ធីម៉ូថេ ទី២ ៣:១៥ និង មរ៉ូណៃ ១០:៣–៥ ដោយជួយកុមារឲ្យអានពីរបីឃ្លា ។ ជួយពួកគេឲ្យយល់ថា ពួកគេអាចដឹងដោយខ្លួនឯងថា ព្រះគម្ពីរគឺពិត ។
-
សូមលាក់រូបភាពរបស់ព្រះអង្គសង្គ្រោះមួយ ហើយសូមផ្ដល់នូវតម្រុយនានាដល់កុមារដើម្បីជួយពួកគេឲ្យរកវាឃើញ ។ សូមជួយកុមារឲ្យយល់ពីរបៀប ដែលការស្រាវជ្រាវព្រះគម្ពីរអាចជួយយើងឲ្យស្គាល់ព្រះយេស៊ូវគ្រីស្ទ។ អនុញ្ញាតឲ្យកុមារប្ដូរវេនគ្នាលាក់រូបភាពនោះ ហើយផ្ដល់នូវតម្រុយដល់កុមារផ្សេងទៀត ។
-
ច្រៀងរួមគ្នាបទ « ស្វែងរកព្រះអម្ចាស់ពីក្មេង » និង « ស្វែងរក គិត អធិស្ឋាន » សៀវភៅចម្រៀងកុមារ ទំព័រ ៦៦–៦៧ ហើយជួយកុមារឲ្យច្នៃប្រឌិតកាយវិការឲ្យសមនឹងពាក្យពេចន៍ចម្រៀង ។ សូមចែកចាយបទគម្ពីរសំណព្វចិត្តមួយ ឬពីររបស់អ្នកជាមួយនឹងកុមារ ហើយប្រាប់ពួកគេពីរបៀបដែលអ្នកដឹងថា ព្រះគម្ពីរគឺពិត ។ ប្រសិនបើកុមារមានបទគម្ពីរ ឬរឿងមកពីព្រះគម្ពីរសំណព្វចិត្តណាមួយ សូមអញ្ជើញឲ្យពួកគេចែកចាយ ។
កុមារអាចទទួលបានទីបន្ទាល់ផ្ទាល់ខ្លួនរបស់ពួកគេអំពីសេចក្ដីពិតនៃព្រះគម្ពីរ ។
បង្រៀនគោលលទ្ធិ
កុមារធំៗ
ព្រះយេស៊ូវគ្រីស្ទសព្វព្រះទ័យឲ្យខ្ញុំរៀនអំពីទ្រង់ និងដើរតាមទ្រង់ ។
សូមគិតអំពីរបៀបដែលអ្នកបានស្គាល់ព្រះយេស៊ូវគ្រីស្ទ ។ តើអ្នកអាចធ្វើអ្វីខ្លះដើម្បីជួយដល់កុមារឲ្យរៀនសូត្រអំពីទ្រង់ ហើយដើរតាមទ្រង់ ?
សកម្មភាពដែលអាចជ្រើសរើស
-
សូមអញ្ជើញកុមារឲ្យរៀបរាប់អំពីមិត្តភក្ដិដ៏ជិតដិតម្នាក់ដែលពួកគេស្គាល់ ហើយប្រាប់ពីរបៀបដែលបុគ្គលរូបនេះបានក្លាយជាមិត្តម្នាក់ ។ សូមអាន និងពិភាក្សា យ៉ូហាន ៥:៣៩ និង យ៉ូហាន ១៤:១៥ ដើម្បីស្វែងរករបៀបដែលយើងអាចមានអារម្មណ៍ខិតជិតទៅព្រះយេស៊ូវ ។ សូមឲ្យកុមារចែកចាយពេលវេលាដែលពួកគេបានមានអារម្មណ៍ថាខិតជិតទៅទ្រង់ ។
-
សូមនាំសិស្សក្នុងថ្នាក់របស់អ្នកដើរជុំវិញអគារប្រជុំ ។ សូមអញ្ជើញឲ្យកុមារលើកដៃឡើង នៅពេលពួកគេឃើញអ្វីមួយនៅតាមផ្លូវដែលរំឭកពួកគេអំពីរបៀបមួយដែលពួកគេអាចដើរតាមព្រះអង្គសង្គ្រោះ ( ដូចជាអាងជ្រមុជទឹក ឬរូបភាពមួយ ) ។
-
ច្រៀងជាមួយនឹងកុមារបទ « ចូរមកតាមខ្ញុំ » ទំនុកតម្កើង ល.រ. ៦៣ ។ សូមឲ្យសិស្សចែកចាយពីគ្រាដែលពួកគេបានដើរតាមគំរូរបស់ព្រះអង្គសង្គ្រោះ ។
ខ្ញុំអាចសិក្សាព្រះគម្ពីរសម្រាប់ខ្លួនខ្ញុំ ។
កាលអ្នកអានព្រះគម្ពីរជាមួយនឹងកុមារ ហើយសួរសំណួរដល់ពួកគេ អ្នកអាចស្ថាបនានូវទំនុកចិត្តដល់ពួកគេថា ពួកគេអាចរៀនចេញពីព្រះគម្ពីរ ហើយរកឃើញនូវរតនសម្បត្តិដ៏មានតម្លៃជាចំណេះដឹង ។
សកម្មភាពដែលអាចជ្រើសរើស
-
សូមអានឮៗ យ៉ូហាន ៥:៣៩ និង កិច្ចការ ១៧:១០–១១ ហើយសួរកុមារពីអ្វីដែលពួកគេរៀនអំពីរបៀបសិក្សាព្រះគម្ពីរ ។
-
ជ្រើសរើសយកបទគម្ពីរសាមញ្ញដ៏មានអនុភាពពីរបីចេញពីព្រះគម្ពីរសញ្ញាថ្មី ហើយសរសេរបទគម្ពីរនីមួយៗនៅលើក្រដាសមួយសន្លឹក បន្ទាប់មកលាក់ក្រដាសនោះទុក ។ សូមបង្ហើបតម្រុយដែលដឹកនាំកុមារទៅរក « ការប្រមាញ់រករតនសម្បត្តិ » នៅក្នុងបរិវេណថ្នាក់រៀន ឬអគារសាសនាចក្រដើម្បីស្វែងរកបទគម្ពីរទាំងនេះ ។ ក្រោយពីពួកគេរកឃើញបទគម្ពីរនីមួយៗហើយ សូមពិភាក្សាពីអត្ថន័យនៃបទគម្ពីរនោះ និងពីមូលហេតុដែលវាគឺជារតនសម្បត្តិមួយ ។
-
សូមចែកចាយបទគម្ពីរពីរបីដែលអ្នកស្រឡាញ់ រួចពន្យល់ពីមូលហេតុដែលបទគម្ពីរនោះមានអត្ថន័យចំពោះអ្នក ។ នៅក្នុងថ្នាក់រៀនទាំងមូល សូមរក្សាទុកនូវបញ្ជីបទគម្ពីរដែលជារតនសម្បត្តិដែលកុមារបានរកឃើញនៅក្នុងព្រះគម្ពីរសញ្ញាថ្មីនាឆ្នាំនេះ—នៅផ្ទះ ឬអំឡុងថ្នាក់បឋមសិក្សា ។
-
សូមពិភាក្សាជាមួយនឹងកុមារអំពីមូលហេតុដែលពេលខ្លះវាពិបាកនឹងអានព្រះគម្ពីរ ។ សូមឲ្យកុមារចែកចាយដំបូន្មានដល់គ្នាទៅវិញទៅមកអំពីការសិក្សាព្រះគម្ពីរ ។ សូមឲ្យពួកគេចែកចាយនូវបទពិសោធន៍វិជ្ជមាននានាដែលពួកគេបានមានក្នុងការសិក្សាព្រះគម្ពីរផងដែរ ។
-
សូមជួយកុមារឲ្យបង្កើតប្រតិទិនសាមញ្ញដែលពួកគេអាចប្រើដើម្បីគូសចំណាំថាពួកគេបានអានព្រះគម្ពីរញឹកញាប់ប៉ុណ្ណា ។ ប្រតិទិនទាំងនេះអាចរំឭកពួកគេឲ្យអានព្រះគម្ពីរជារៀងរាល់ថ្ងៃ ។
ខ្ញុំត្រូវការទីបន្ទាល់ផ្ទាល់ខ្លួនខ្ញុំ ។
កុមារដែលអ្នកបង្រៀននឹងត្រូវការមានទីបន្ទាល់ផ្ទាល់ខ្លួនរបស់ពួកគេ ប្រសិនបើពួកគេត្រូវរក្សាសេចក្ដីជំនឿរបស់ពួកគេឲ្យនៅរឹងមាំ កាលឧបសគ្គនឹងកើតឡើង ។ តើអ្នកអាចធ្វើអ្វីខ្លះដើម្បីបំផុសគំនិតដល់ពួកគេឲ្យរៀនពីសេចក្ដីពិតដោយខ្លួនឯង ?
សកម្មភាពដែលអាចជ្រើសរើស
-
សូមចែកចាយរឿងស្រ្តីព្រហ្មចារីដប់នាក់ ( សូមមើល ម៉ាថាយ ២៥:១–១៣; សូមមើលផងដែរ « ជំពូកទី ៤៧ ៖ ស្រ្តីព្រហ្មចារីដប់នាក់ » រឿងព្រះគម្ពីរសញ្ញាថ្មី ទំព័រ ១១៨–២០ ឬវីដេអូដែលដូចគ្នានេះនៅលើគេហទំព័រ LDS.org ) ។ សូមសួរសិស្ស ៖ តើទីបន្ទាល់របស់យើងដូចជាចង្កៀងយ៉ាងដូចម្ដេច ? ហេតុអ្វីក៏វាសំខាន់ដើម្បីមានទីបន្ទាល់ផ្ទាល់ខ្លួនរបស់យើង ?
-
សូមពិភាក្សាពីអ្វីដែលយើងអាចធ្វើបានដើម្បីពង្រឹងសេចក្ដីជំនឿរបស់យើង ។ សម្រាប់គំនិតបន្ថែម សូមឲ្យកុមារស្រាវជ្រាវ យ៉ូហាន ៧:១៧ និង មរ៉ូណៃ ១០:៣–៥ ។ សូមឲ្យពួកគេចែកចាយអ្វីដែលពួកគេដឹងថាពិត ។
-
សូមឲ្យកុមារជួយអ្នកដាក់ឈ្មោះលើដុំជ័រប្រដាប់លេងសង់ផ្ទះនូវឃ្លាដែលពិពណ៌នាពីរឿងដែលយើងធ្វើដើម្បីស្ថាបនាទីបន្ទាល់របស់យើង ដូចជាការអធិស្ឋាន ។ អនុញ្ញាតឲ្យកុមារសង់សំណង់ផ្ទះមួយដែលតំណាងឲ្យទីបន្ទាល់មួយដោយប្រើដុំជ័រប្រដាប់លេងសង់ផ្ទះទាំងនោះ ។
លើកទឹកចិត្តឲ្យរៀនសូត្រនៅផ្ទះ
តើអ្នកអាចលើកទឹកចិត្តកុមារ និងឪពុកម្ដាយរបស់ពួកគេឲ្យរៀនសូត្រពីព្រះគម្ពីរសញ្ញាថ្មីនៅផ្ទះដោយរបៀបណា ? ឧទាហរណ៍ អ្នកអាចលើកទឹកចិត្តកុមារឲ្យទន្ទេញបទគម្ពីរមួយដែលអ្នកបានពិភាក្សានៅក្នុងថ្នាក់ ( វាអាចមានប្រយោជន៍ក្នុងការបំបែកបទគម្ពីរនោះទៅជាឃ្លាខ្លីៗ ) ហើយចែកចាយខគម្ពីរនោះជាមួយនឹងក្រុមគ្រួសាររបស់ពួកគេ ។
កែលម្អការបង្រៀនរបស់យើង
សូមកែប្រែសកម្មភាពនានាឲ្យសមស្របតាមអាយុរបស់កុមារដែលអ្នកបង្រៀន ។ កុមារតូចៗត្រូវការការពន្យល់លម្អិត ហើយរៀនសូត្រពីវិធីសាស្ដ្របង្រៀនផ្សេងៗគ្នា ។ កាលកុមារនោះធំទៅ ពួកគេអាចចូលរួមចំណែកបានច្រើនជាងមុន ហើយអាចចែកចាយគំនិតរបស់ពួកគេបានប្រសើរជាង ។ សូមផ្ដល់ឱកាសដល់ពួកគេឲ្យចែកចាយ ថ្លែងទីបន្ទាល់ និងចូលរួម ហើយផ្ដល់ជំនួយតាមសេចក្ដីត្រូវការ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ២៥–២៦ ) ។