« ថ្ងៃទី ៧–១៣ ខែ មករា ។ ម៉ាថាយ ១; លូកា ១ ៖ ‹ សូមឲ្យបានសម្រេចដូចពាក្យលោកចុះ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ៧–១៣ ខែ មករា ។ ម៉ាថាយ ១; លូកា ១ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ថ្ងៃទី ៧–១៣ ខែ មករា
ម៉ាថាយ ១; លូកា ១
« សូមឲ្យបានសម្រេចដូចពាក្យលោកចុះ »
សូមចាប់ផ្ដើមដោយការអាន ម៉ាថាយ ១ និង លូកា ១ ។ ចូរមកតាមខ្ញុំ—សម្រាប់បុគ្គល និងក្រុមគ្រួសារ អាចជួយអ្នកឲ្យយល់ពីជំពូកទាំងនេះ ហើយគម្រោងមេរៀននេះអាចផ្ដល់នូវគំនិតបង្រៀននានាដល់អ្នក ។ ប្រសិនបើអ្នកត្រូវការជំនួយបន្ថែមក្នុងការបង្រៀនដល់កុមារតូចៗ សូមមើល « ការបំពេញតាមតម្រូវការរបស់កុមារតូចៗ » នៅខាងដើមនៃធនធាននេះ ។
កត់ត្រាចំណាប់អារម្មណ៍របស់អ្នក
អញ្ជើញឲ្យចែកចាយ
សូមឲ្យកុមារអង្គុយជារង្វង់ រួចហើយសុំឲ្យកុមារម្នាក់ចែកចាយអ្វីមួយដែលគាត់បានរៀនចេញពីព្រះគម្ពីរនៅសប្ដាហ៍នេះ ឬពេលណាផ្សេង ។ បន្ទាប់មក កុមារនោះអាចបោះកូនបាល់ ឬចង្អុលទៅកុមារម្នាក់ទៀតនៅក្នុងរង្វង់នោះ ដែលនឹងត្រូវចែកចាយបន្ទាប់ ។
បង្រៀនគោលលទ្ធិ
កុមារតូចៗ
ទេវតាប្រកាសអំពីកំណើតព្រះយេស៊ូវ
ទាំងម៉ារា និងយ៉ូសែប ត្រូវបានទេវតាមួយអង្គយាងមកជួប ដែលបានប្រកាសអំពីការប្រសូតរបស់ព្រះយេស៊ូវគ្រីស្ទ ។ បទពិសោធន៍ទាំងនេះអាចជួយឲ្យកុមារឃើញពីសារៈសំខាន់នៃការប្រសូតរបស់ព្រះគ្រីស្ទ ។
សកម្មភាពដែលអាចជ្រើសរើស
-
សូមអញ្ជើញឪពុកម្ដាយរបស់កុមារម្នាក់ឲ្យមកក្នុងថ្នាក់រៀន ដោយស្លៀកពាក់ជាម៉ារា និងយ៉ូសែប ។ សូមឲ្យពួកគាត់ចែកចាយបទពិសោធន៍របស់ពួកគាត់ដូច ដែលបានកត់ត្រានៅក្នុង ម៉ាថាយ ១:១៨–២៥ និង លូកា ១:២៦–៣៨ ។
-
សូមតំណាលរឿងដែលទេវតាបានលេចមកឯម៉ារា និងយ៉ូសែប ដូចដែលបានកត់ត្រានៅក្នុងខគម្ពីរទាំងនេះ ។ ( សូមមើលផងដែរ « ជំពូកទី ២ ៖ ម៉ារា និងទេវតា » និង « ជំពូកទី ៤ ៖ យ៉ូសែប និងទេវតា » រឿងព្រះគម្ពីរសញ្ញាថ្មី ទំព័រ ៨–៩, ១២ ឬវីដេអូដូចគ្នានេះនៅលើគេហទំព័រ LDS.org ) ។ អ្នកអាចបង្ហាញរូបភាពនៅក្នុង គម្រោងសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គល និងក្រុមគ្រួសារ ។ អញ្ជើញកុមារឲ្យតំណាលរឿងនេះសារឡើងវិញប្រាប់អ្នក ។
-
សូមឲ្យកុមារគូររូបភាពរឿងនេះដែលមានកត់ត្រានៅក្នុង ម៉ាថាយ ១:១៨–២៥ និង លូកា ១:២៦–៣៨ ។
ព្រះវរបិតាសួគ៌ឆ្លើយតបការអធិស្ឋានរបស់ខ្ញុំ ។
សាការី និងអេលីសាបិត ប្រហែលជាបានអធិស្ឋានសុំកូនមួយអស់រយៈពេលជាច្រើនឆ្នាំមកហើយ ។ នៅទីបំផុត ព្រះវរបិតាសួគ៌បានឆ្លើយតបនឹងការអធិស្ឋានរបស់ពួកគេ ដោយបញ្ជូនកូនប្រុសម្នាក់ឈ្មោះ យ៉ូហាន បាទីស្ទ ដល់ពួកគេ ។ តើអ្នកអាចប្រើរឿងនេះដើម្បីបង្រៀនដល់កុមារថា ព្រះវរបិតាសួគ៌ឆ្លើយតបនឹងការអធិស្ឋានដោយរបៀបណា ?
សកម្មភាពដែលអាចជ្រើសរើស
-
សូមចែកចាយរឿងនៅក្នុង លូកា ១:៥–២០, ៥៧–៦៣ ជាសម្ដីរបស់អ្នកផ្ទាល់ ។ អ្នកអាចសុំកុមារឲ្យតំណាលរឿងនេះសារឡើងវិញពីរបីដង ។ សូមចាត់តាំងឲ្យកុមារដើរតួធ្វើជាទេវតា សាការី និងអេលីសាបិត ហើយសម្ដែងរឿងនេះ ។ សូមសង្កត់ធ្ងន់ថា ព្រះវរបិតាសួគ៌បានឆ្លើយតបនឹងការអធិស្ឋានរបស់អេលីសាបិត និងសាការី ហើយសូមចែកចាយបទពិសោធន៍មួយ ដែលព្រះវរបិតាសួគ៌បានឆ្លើយតបនឹងការអធិស្ឋានរបស់អ្នក ។
-
សូមប្រើ « យើងបន្ទន់កេសា » សៀវភៅចម្រៀងកុមារ ទំព័រ ១៨ ឬចម្រៀងផ្សេងទៀតដើម្បីបង្រៀនកុមារឲ្យចេះអធិស្ឋាន ។ អ្នកក៏អាចច្រៀងបទ « ការអធិស្ឋានរបស់កុមារ » សៀវភៅចម្រៀងកុមារ ទំព័រ ៦ ផងដែរ ។ រាល់ពេលដែលកុមារច្រៀងដល់ពាក្យ « អធិស្ឋាន » ឬ « ការអធិស្ឋាន » សូមឲ្យពួកគេឱនក្បាលរបស់ពួកគេចុះ ហើយឱបដៃ ។
-
សូមឲ្យកុមារម្នាក់ៗធ្វើកាយវិការដែលតំណាងឲ្យអ្វីមួយដែលគេអាចអធិស្ឋានសុំ ។ អញ្ជើញកុមារផ្សេងទៀតឲ្យទស្សន៍ទាយថា តើកាយវិការនោះតំណាងឲ្យអ្វី ។ ពួកគេអាចរកឃើញគំនិតនៅលើទំព័រសកម្មភាពនាសប្ដាហ៍នេះ ។
ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។
ព្រះយេស៊ូវគ្រីស្ទគឺជាព្រះរាជបុត្រារបស់ព្រះវរបិតាសួគ៌ និងម៉ារា ។ តើអ្នកអាចធ្វើអ្វីខ្លះដើម្បីជួយដល់កុមារឲ្យរៀនសូត្របន្ថែមទៀតអំពីទ្រង់ ?
សកម្មភាពដែលអាចជ្រើសរើស
-
សូមប្រាប់កុមារថា ទេវតាបានមានបន្ទូលទៅម៉ារាថា ទារករបស់នាងនឹងត្រូវបានហៅថា ព្រះរាជបុត្រារបស់ព្រះ ( សូមមើល លូកា ១:៣៥ ) ។ សូមជួយកុមារឲ្យថាឃ្លា « ព្រះយេស៊ូវគ្រីស្ទគឺជាព្រះរាជបុត្រារបស់ព្រះ » សារឡើងវិញ ។ សូមជួយកុមារឲ្យស្គាល់ថា នរណាជាឪពុកម្ដាយរបស់ព្រះយេស៊ូវ ដោយឲ្យពួកគេគូររូបឪពុកម្ដាយរបស់ពួកគេ ។ កាលពួកគេធ្វើដូច្នេះ សូមប្រាប់ពួកគេថា ព្រះយេស៊ូវក៏មានឪពុកម្ដាយដែរ—គឺម៉ារា និងព្រះវរបិតាសួគ៌ ។ លើសពីនេះ យ៉ូសែប ត្រូវបានសុំឲ្យជួយការពារ និងមើលថែដល់ព្រះយេស៊ូវ កាលទ្រង់បានរស់នៅលើផែនដីនេះ ។
-
សូមចែកចាយទីបន្ទាល់របស់អ្នកថា ដោយសារព្រះយេស៊ូវគឺជាព្រះរាជបុត្រារបស់ព្រះ នោះទ្រង់អាចសុគតសម្រាប់អំពើបាបរបស់យើង ហើយទទួលបានព្រះជន្មជាថ្មី ។ សូមបង្ហាញរូបភាព ការឆ្កាងរបស់ព្រះយេស៊ូវ និងការរស់ឡើងវិញ ( សូមមើល សៀវភៅរូបភាពដំណឹងល្អ ល.រ. ៥៧, ៥៩ ) ។
បង្រៀនគោលលទ្ធិ
កុមារធំៗ
ការអ្វីដែលព្រះទ្រង់ធ្វើពុំបាននោះ គ្មានសោះឡើយ ។
ការប្រសូតរបស់ព្រះយេស៊ូវ និងយ៉ូហាន បាទិស្ទ អាចធ្វើទៅបានតែតាមរយៈព្រះចេស្ដានៃព្រះប៉ុណ្ណោះ ។ ការរៀនសូត្រអំពីអព្ភូតហេតុទាំងនេះអាចពង្រឹងដល់សេចក្ដីជំនឿរបស់កុមារថា ព្រះមានអំណាចធ្វើអព្ភូតហេតុនៅក្នុងជីវិតរបស់ពួកគេ ។
សកម្មភាពដែលអាចជ្រើសរើស
-
កាលអ្នក និងកុមាររំឭកខគម្ពីរ ម៉ាថាយ ១:១៨–២៥ និង លូកា ១:៥–៣៧ នោះសូមសួរដល់កុមារនូវសំណួរដូចជា « តើប្អូននឹងនិយាយអ្វី ប្រសិនបើប្អូនគឺជាម៉ារានោះ ? » ឬ « តើប្អូននឹងមានអារម្មណ៍យ៉ាងណា ប្រសិនបើប្អូនជាសាការីនោះ ? »
-
សូមតំណាលរឿងអំពីកំណើតរបស់យ៉ូហាន បាទីស្ទ និងព្រះយេស៊ូវគ្រីស្ទជាពាក្យងាយស្ដាប់បាន ។ សូមឲ្យកុមារលើកដៃឡើង នៅពេលពួកគេស្ដាប់ឮអ្វីមួយដែលមើលទៅមិនអាចកើតមានឡើង បើគ្មានអំណាចរបស់ព្រះទេនោះ ។ តើមានរឿងផ្សេងទៀតណាខ្លះ ដែលកុមារអាចចែកចាយ ដែលក្នុងរឿងនោះព្រះបានធ្វើអ្វីមួយដែលមើលទៅហាក់ដូចជាមិនអាចទៅរួច ?
-
សូមជួយកុមារឲ្យទន្ទេញ លូកា ១:៣៧ ។ ដើម្បីទន្ទេញវាចាំ អ្នកអាចសរសេរខគម្ពីរនេះនៅលើក្ដារខៀន ហើយឲ្យកុមារសូត្រវាបីបួនដង ។ បន្ទាប់ពីសូត្របានម្ដង សូមលុបពាក្យមួយចោល ។
ម៉ាថាយ ១:២១–២៥; លូកា ១:៣០–៣៥, ៤៦–៤៧
ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។
ព្រះយេស៊ូវគ្រីស្ទគឺជាព្រះរាជបុត្រារបស់ព្រះវរបិតាសួគ៌ និងម៉ារា ។ តើអ្នកអាចជួយកុមារឲ្យរៀនពីសេចក្ដីពិតនេះតាមរបៀបណា ?
សកម្មភាពដែលអាចជ្រើសរើស
-
សូមឲ្យកុមារអាន លូកា ១:៣០–៣៥ ហើយរកមើលចម្លើយចំពោះសំណួរទាំងនេះ ៖ « តើនរណាជាមាតារបស់ព្រះយេស៊ូវ ? » និង « តើនរណាជាព្រះបិតារបស់ព្រះយេស៊ូវ ? » សូមជួយពួកគេឲ្យយល់ថា ព្រះយេស៊ូវគ្រីស្ទគឺជាអង្គតែមួយគត់ដែលមានឪពុកខាងសាច់ឈាមជាព្រះវរបិតាសួគ៌ ( សូមមើលផងដែរ នីហ្វៃទី ១ ១១:១៨–២១ ) ។
-
កាលអ្នកអានខគម្ពីរទាំងនេះ សូមឲ្យកុមារស្វែងរកឈ្មោះ ឬងាររបស់ព្រះយេស៊ូវគ្រីស្ទ ។ តើឈ្មោះទាំងនេះមានន័យដូចម្ដេច ហើយតើវាបង្រៀនយើងអ្វីខ្លះអំពីព្រះយេស៊ូវ ?
-
សូមចែកចាយទីបន្ទាល់របស់អ្នកអំពីព្រះយេស៊ូវគ្រីស្ទ ហើយសុំឲ្យកុមារចែកចាយដែរ ។
ការជូនដំណឹង ដោយ ចន ស្កត
ព្រះវរបិតាសួគ៌ព្រះសណ្ដាប់ ហើយឆ្លើយតបការអធិស្ឋានរបស់ខ្ញុំ ។
ព្រះឆ្លើយតបការអធិស្ឋាន ប៉ុន្ដែវាមិនតាមរបៀបដែលយើងរំពឹងទុកជានិច្ចនោះទេ ។ តើអ្នកអាចប្រើដំណើររឿងរបស់សាការី និងអេលីសាបិត បង្រៀនដល់កុមារអំពីសេចក្ដីពិតនេះដោយរបៀបណា ?
សកម្មភាពដែលអាចជ្រើសរើស
-
សូមសួរកុមារថា តើពួកគេនឹងប្រាប់នរណាម្នាក់ ដែលបានអធិស្ឋានសុំពរជ័យ ប៉ុន្ដែមិនទាន់បានទទួលពរជ័យនោះនៅឡើយដូចម្ដេច ។ សូមឲ្យពួកគេគិតអំពីសំណួរនេះ កាលពួកគេអាចរួមគ្នាក្នុង លូកា ១:៥–២៥, ៥៧–៨០ ។ ( សូមមើលផងដែរ « ជំពូកទី ១ ៖ អេលីសាបិត និងសាការី » និង « ជំពូកទី ៣ ៖ យ៉ូហាន បាទីស្ទបានចាប់កំណើត » រឿងព្រះគម្ពីរសញ្ញាថ្មី ទំព័រ ៦–៧, ១០–១១ ឬវីដេអូដូចគ្នានេះនៅលើ LDS.org ) ។ តើសាការី និងអេលីសាបិត អាចប្រាប់នរណាម្នាក់ដែលបានមានអារម្មណ៍ថា ការអធិស្ឋានរបស់ពួកគេមិនបានទទួលចម្លើយសោះយ៉ាងដូចម្ដេច ?
-
សុំកុមារបីបួននាក់ពីមុនថ្នាក់ចាប់ផ្ដើម ឲ្យចែកចាយបទពិសោធន៍នានា នៅពេលដែលព្រះវរបិតាសួគ៌បានឆ្លើយតបការអធិស្ឋានរបស់ពួកគេ ។ សូមចែកចាយគ្រាមួយដែលអ្នកបានមានអារម្មណ៍ថា ការអធិស្ឋានរបស់អ្នកទទួលបានចម្លើយតាមរបៀបដែលមិនបានរំពឹងទុកមួយ ។
-
សុំកុមារគូររូបភាពមួយនៃគ្រាដែលព្រះវរបិតាសួគ៌បានឆ្លើយតបការអធិស្ឋាន—ជាពិសេសចំពោះការអធិស្ឋានមួយរបស់ពួកគេ ។ សូមឲ្យពួកគេចែកចាយគំនូររបស់ពួកគេជាមួយនឹងសិស្សនៅក្នុងថ្នាក់ ។
លើកទឹកចិត្តឲ្យរៀនសូត្រនៅផ្ទះ
សូមឲ្យកុមារចែកចាយរូបភាពដែលពួកគេបានគូរនោះដល់គ្រួសាររបស់ពួកគេ រួចហើយសុំឲ្យសមាជិកគ្រួសាររបស់គេចែកចាយនូវគ្រាដែលព្រះបានឆ្លើយតបការអធិស្ឋានរបស់ពួកគាត់ ។
កែលម្អការបង្រៀនរបស់យើង
សូមជួយកុមារតូចៗឲ្យរៀនចេញពីព្រះគម្ពីរ ។ ដើម្បីជួយកុមារតូចៗឲ្យរៀនចេញពីព្រះគម្ពីរ សូមផ្ដោតលើខគម្ពីរតែមួយ ឬតែឃ្លាគន្លឹះមួយឃ្លាប៉ុណ្ណោះ ។ អ្នកអាចឲ្យកុមារក្រោកឈរ ឬលើកដៃឡើង នៅពេលពួកគេឮពាក្យ ឬឃ្លានោះ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ២១ ) ។