“Enero 28–Pebrero 3. Mateo 3; Marcos 1; Lucas 3: ‘Andama Ninyo ang Dalan alang sa Ginoo’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Enero 28–Pebrero 3. Mateo 3; Marcos 1; Lucas 3,” UDali, Sunod Kanako—Alang sa mga Indibidwal ug mga Pamilya: 2019
Kinolorang bildo nga bintana sa Nauvoo Illinois Temple, ni Tom Holdman
Enero 28–Pebrero 3
Mateo 3; Marcos 1; Lucas 3
“Andama Ninyo ang Dalan alang sa Ginoo”
Sugdi pinaagi sa pagbasa sa Mateo 3; Marcos 1; ug Lucas 3. Samtang mag-ampo ka alang sa Espiritu Santo sa pagtabang nimo nga makasabut niini nga mga kapitulo, mopasabut Siya kanimo nga espesyal alang kanimo. Irekord kini nga mga impresyon, ug paghimo og mga plano sa pagbuhat niini.
Irekord ang Imong mga Impresyon
Si Jesukristo ug ang Iyang ebanghelyo makapausab ninyo. Mikutlo si Lucas og karaan nga panagna ni Isaias nga naghulagway sa misyon ni Juan nga Bautista ug sa epekto sa pag-anhi sa Manluluwas: “Ang tanang walog pagatabunan, ug ang tanang bukid ug bungtod pagapatagon, ug ang mga hiwi pagatul-iron, ug ang mga dalan nga sagalsalon pagahinloan” (Lucas 3:5; tan-awa usab sa Isaias 40:4). Mao kini ang mensahe alang natong tanan, lakip na niadtong nagtuo nga dili sila makausab o wala magkinahanglan og kausaban. Kon ang usa ka butang nga permanente sama sa usa ka bukid mahimong patagon, nan sa pagkatinuod ang Ginoo makatabang nato nga matul-id ang atong kaugalingong hiwi nga dalan (tan-awa sa Lucas 3:4–5). Sa atong pagdawat sa pagdapit ni Juan nga Bautista sa paghinulsol ug pag-usab, giandam nato ang atong mga hunahuna ug mga kasingkasing sa pagdawat ni Jesukristo aron nga kita usab “makakita sa kaluwasan gikan sa Dios” (Lucas 3:6).
Mga Ideya alang sa Personal nga Pagtuon sa Kasulatan
Ang Ebanghelyo ni Marcos
Kinsa si Marcos?
Sa mga tagsulat sa mga Ebanghelyo, gamay ra kita og nahibaloan bahin ni Marcos. Nasayud kita nga siya usa ka misyonaryo nga kompanyon nila ni Pablo, Pedro, ug pipila sa laing mga misyonaryo. Daghang mga eskolar sa biblia nagtuo nga si Pedro misugo ni Marcos sa pagrekord sa mga panghitabo sa kinabuhi sa Manluluwas. Ang Ebanghelyo ni Marcos ingon og gisulat sa wala pa ang laing tulo ka ebanghelyo.
Tan-awa usab Ang Giya ngadto sa mga Kasulatan, “Marcos.”
Mateo 3:1–12; Marcos 1:1–8; Lucas 3:2–18
Ang paghinulsol mao ang dakong kausaban sa hunahuna ug sa kasingkasing.
Ang misyon ni Juan nga Bautista mao ang pag-andam sa mga kasingkasing sa mga tawo sa pagdawat sa Manluluwas ug mahimong mas sama Kaniya. Giunsa niya sa paghimo niini? Mipahayag Siya, “Paghinulsol kamo” (Mateo 3:2). Migamit Siya og mga imahe sama sa bunga ug trigo aron paghatag og gibug-aton sa kaimportante sa paghinulsol aron modawat ni Kristo (tan-awa sa Lucas 3:9, 17).
Unsa ang ubang mga imahe nga imong nakita sa mga istorya sa pangalagad ni Juan nga Bautista? Ikonsiderar ang pagmarka niini sa imong mga kasulatan o pagdrowing og mga litrato niini sa usa ka study journal. Unsa ang gitudlo niini nga mga imahe bahin sa doktrina ug panginahanglan sa paghinulsol?
Ang tinuod nga paghinulsol mao ang “usa ka kausaban sa hunahuna, bag-ong panglantaw bahin sa Dios, bahin sa kaugalingon, ug bahin sa kalibutan. … [Nagpasabut kini] sa “pag-usab sa kasingkasing ug kabubut-on ngadto sa Dios” (Giya ngadto sa mga Kasulatan, “Paghinulsol”). Sa Lucas 3:7–14, unsa nga mga kausaban ang gidapit ni Juan nga himoon sa mga tawo sa pagpangandam sa pagdawat ni Kristo? Sa unsang paagi magamit nimo kini nga tambag? Unsaon nimo sa pagpakita nga ikaw tinud-anay nga naghinulsol? (tan-awa sa Lucas 3:8).
Tan-awa usab sa Hubad ni Joseph Smith, Lucas 3:4–11 (sa Giya ngadto sa mga Kasulatan); Giya ngadto sa mga Kasulatan, “Juan nga Bautista”; D. Todd Christofferson, “Ang Balaanong Gasa sa Paghinulsol,”Liahona, Nob. 2011, 38–41.
Kinsa ang mga Pariseo ug mga Saducio?
Ang mga Pariseo mao ang mga sakop sa relihiyusong grupo sa Judeo kinsa mapagarbuhon sa ilang kaugalingon sa estrikto nga pagsunod sa balaod ni Moises. Ilang gitumong ang pagpakunhod sa relihiyon ngadto sa pagtuman sa daghang mga seremonya. Ang mga Saducio mao ang mga adunahang grupo sa mga Judeo nga dunay dakong impluwensya sa relihiyon ug politika. Wala sila motuo sa doktrina sa pagkabanhaw. Kining duha ka grupo mipalayo gikan sa orihinal nga tuyo sa mga balaod sa Dios, ug daghan sa ilang mga miyembro nagdumili sa pagdawat sa mensahe sa propeta sa Dios, nga si Juan nga Bautista.
Tan-awa usab sa Mateo 23:27; Juan 1:19–24; Giya ngadto sa mga Kasulatan, “Pariseo, mga” ug “Saducio, mga.”
Mateo 3:13–17; Marcos1:9–11; Lucas 3:15–16, 21–22
Si Jesukristo, gibunyagan aron sa “pagtuman sa tanang pagkamatarung.”
Sa dihang nabunyagan ka, gisunod nimo ang ehemplo sa Manluluwas. Itandi sa unsay imong nakat-unan gikan niining mga istorya sa bunyag sa Manluluwas sa unsay nahitabo sa imong bunyag.
Kinsa ang nagbunyag ni Jesus, ug unsa nga awtoridad ang iyang gihuptan? |
Kinsa ang nagbunyag nimo, ug unsa nga awtoridad ang iyang gihuptan? |
Diin man bunyagi si Jesus? |
Diin man ka bunyagi? |
Sa unsa nga paagi gibunyagan si Jesus? |
Sa unsa nga paagi ikaw gibunyagan? |
Nganong gibunyagan man si Jesus? |
Nganong gibunyagan man ka? |
Sa unsa nga paagi ang Langitnong Amahan nagpakita nga Siya nahimuot ni Jesus? |
Giunsa pagpakita sa Langitnong Amahan nga Siya nahimuot sa dihang gibunyagan ka? Giunsa Niya pagpakita ang iyang pagtugot sukad niana? |
Girekord ni Nephi ang pipila ka importante nga mga pagtulun-an bahin sa bunyag sa Manluluwas. Unsa ang gitudlo niini nga mga pulong sa 2 Nephi 31 kanimo? Ikonsiderar ang pagrekord sa imong bunyag diha sa usa ka journal.
Tan-awa usab sa Juan 1:32–33; Mosiah 18:8–11; Doktrina ug mga Pakigsaad 13:1; 20:37, 68–74.
Mateo 3:16–17; Marcos 1:9–11; Lucas 3:21–22
Nagtudlo ba ang Biblia nga ang mga sakop sa Dios nga Kapangulohan tulo ka managlahi nga mga binuhat?
Ang Biblia adunay daghang mga ebidensya nga ang mga sakop sa Dios nga Kapangulohan tulo ka managlahi nga mga binuhat. Sama pananglit, ang istorya sa bunyag sa Manluluwas nagsuporta sa doktrina nga ang Dios nga Amahan, si Jesukristo, ug ang Espiritu Santo tulo ka managlahi nga mga binuhat. Ang Dios nga Amahan namulong gikan sa langit, ug ang Espiritu Santo (nga girepresentahan sa salampati) mikunsad samtang Siya gibunyagan. Ania ang pipila sa ubang mga kasulatan nga nagtudlo niining sama nga kamatuoran: Genesis 1:26–27; Mateo 17:1–5; Juan 17:20–23; Mga Buhat 7:55–56; ug Doktrina ug mga Pakigsaad 130:22.
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Si Juan Bautista naghupot sa Aaronic Priesthood. Unsay atong makat-unan bahin sa Aaronic Priesthood samtang magtuon kita bahin kaniya? Sa unsa nga paagi nga ang ehemplo ni Juan makatabang sa mga naghupot sa Aaronic Priesthood nga makatuman sa ilang mga katungdanan? (Tan-awa usab sa D&P 13:1; 20:46–60.)
Sa pagtudlo sa mga sakop sa pamilya bahin sa bunyag ug sa gasa sa Espiritu Santo, ikonsiderar ang pagpakita og hugaw nga butang ug pahugasi kini sa mga sakop sa pamilya og tubig. Sa unsa nga paagi nga kini nga kalihokan nagrepresentar sa bunyag? Dayon hangyoa ang mga sakop sa klase sa paghisgot og pipila ka makalimpyo nga butang sa kalayo. Ngano nga ang gasa sa Espiritu Santo naghulagway nga usa ka “bunyag sa kalayo”? (Tan-awa sa Giya ngadto sa mga Kasulatan, “Espiritu Santo.”)
Kon kita bunyagan, ang atong mga sala mahugasan.
Kanus-a kita mibati nga ang Dios nahimuot kanato? Unsay atong mahimo isip pamilya aron mahimuot ang Dios?
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Personal nga Pagtuon
Pangayo og tabang sa Ginoo. Ang mga kasulatan gihatag pinaagi sa pagpadayag, ug aron gayud masabtan kini nagkinahanglan kita og personal nga pagpadayag. Ang Ginoo misaad, “Pangayo, ug kamo pagahatagan; pangita, ug kamo makakaplag; pagtuktok, ug kamo pagaablihan” (Mateo 7:7).
Si Juan nga Bautista Nagbunyag ni Jesus, ni Greg K. Olsen