« 22–28 nō ’ēperēra. Mataio 18 ; Luka 10: ‘E aha vau e noa’a ai te ora mure ’ore ?’ », Mai, pe’e mai—nō te ta’ata hō’ē ’e te ’utuāfare : Faufa’a ’Āpī 2019 (2019)
« 22–28 nō ’ēperēra. Mataio 18 ; Luka 10 », Mai, pe’e mai—nō te ta’ata hō’ē ’e te ’utuāfare : 2019
The Good Samaritan, nā Dan Burr
22–28 nō ’ēperēra
Mataio 18 ; Luka 10
« E aha vau e noa’a ai te ora mure ’ore ? »
’A tai’o ’e ’a feruri ai ’outou nā roto i te pure nō ni’a i te Mataio 18 ’e te Luka 10, ’a hi’o maita’i i te mau muhumuhu marū a te Vārua Maita’i. Nāna e parau mai nāhea teie mau ha’api’ira’a ’e teie mau ’ā’amu e tano i ni’a ia ’outou. ’A tāpa’opa’o i te mau mana’o e fāri’i ’oe.
Tāpa’opa’o i te mau mana’o e tae mai ia ’outou
’A ui ’outou i te hō’ē uira’a i te Fatu, penei a’e e fāri’i mai ’outou i te hō’ē pāhonora’a tīa’i-’ore-hia. ’O vai tō’u ta’ata tupu ? Te ta’ata ato’a i hina’aro i tā ’outou tauturu ’e tō ’outou here. ’O vai te rahi roa a’e i roto i te bāsileia o te ao ra ? Hō’ē tamari’i. ’Ua nava’i ānei ’ia fa’aore i te hapa a te hō’ē ta’ata e hitu taime ? ’Aita, tītauhia ’ia hitu ’ahuru i te hitura’a. (Hi’o Luka 10:29–37 ; Mataio 18:4, 21–22.) Mai te peu e ’imi ’outou i te hina’aro o te Fatu, ’eiaha nō te « fa’ati’a ia [’outou] iho » (Luka 10:29), nō te mea rā ’ua hina’aro mau ’outou i te ha’api’i mai iāna ra, e ha’api’i mai te Fatu ia ’outou nāhea i te ora i te orara’a e arata’i i te ora mure ’ore ’iāna ra.
Mau mana’o nō tā ’oe iho tuatāpapara’a pāpa’ira’a mo’a
E ti’a roa iā’u ’ia fa’aore i te hapa a vetahi ’ē nō te fāri’i mai i te fa’aorera’a hara a te Fatu.
Mai te huru ra ē e mea maita’i te mana’o o Petero e fa’aore i te hapa o te hō’ē ta’ata e hitu taime, ’ua ha’api’i rā Iesu i te hō’ē ture teitei a’e. Tāna pāhonora’a ē, « ’Aore au i parau atu ia ’oe ē, ’ia hitu : ’ia hitu rā ’ahuru i te hitura’a », e ’ere i te ha’api’ira’a nō ni’a i te nūmera, nō ni’a rā i te huru Mesia i te fa’aorera’a i te hapa. ’A tai’o ai ’oe i te parabole nō te tāvini aroha ’ore, ’a feruri i te mau taime ’ua putapū ’oe i te aroha ’e te aumihi a te Atua. E ta’ata ānei tei hina’aro ’ia putapū i te aroha ’e te aumihi mai roto mai ia ’oe ?
’Ua ha’api’i Elder David E. Sorensen nō te Hitu ’Ahuru ē : « Tē hina’aro nei au e ha’apāpū ē ’eiaha e mana’o ’ua riro te fa’a’orera’a hara ’ei fa’ati’amāra’a i te ’ino… ’Eiaha noa e fa’a’ore i te fa’a’ino a te hō’ē hoa ia tātou, ’ia ’imi rā tātou i te rāve’a ’ia ’ore roa taua mamae ra ’ia tupu fa’ahou » (« Nā te fa’a’orera’a hara e taui i te tairoiro i te here », Ensign ’aore rā Liahona, Mē 2003, 12).
’O vai te mau Hitu ’Ahuru ?
Mai te au i te hōho’a fa’anahora’a i ha’amauhia i te tau nō te Faufa’a Tahito (hi’o Exodo 24:1 ; Nūmera 11:16), ’ua « ha’apa’o [Iesu Mesia] i e hitu ’ahuru », ta’a ’ē i tāna Tino ’Ahuru Ma Piti ’āpōsetolo, nō te fa’a’ite pāpū iāna, nō te poro i tāna ’evanelia ’e nō te tauturu iāna i roto i tāna ’ohipa. Tē tāmau noa nei teie hōho’a fa’anahora’a i roto i te ’Ēkālesia tei fa’aho’ihia mai. ’Ua pi’ihia te mau Hitu ’Ahuru nō te tauturu i te Tino ’Ahuru Ma Piti i roto i tā rātou misiōni ’ei ’ite ta’a ’ē nō Iesu Mesia i te ao tā’āto’a. ’Ua fa’anahohia te mau Hitu ’Ahuru ’ei pupu autahu’ara’a. E fa’ata’ahia te mau melo nō nā pupu mātāmua e piti ’ei Hitu ’Ahuru Hui mana fa’atere rahi, ’e te mau melo nō te tahi atu nau pupu, ’ei Hitu ’Ahuru ārea. (Hi’o ato’a PH&PF 107:25–26, 33–34, 97.)
Nō te fāri’i i te ora mure ’ore, e mea ti’a roa iā’u ’ia here i te Atua ’e ’ia here i tō’u ta’ata tupu mai iā’u nei.
E mea tauturu ’ia ha’amana’o tātou ē, te parabole nō te ta’ata maita’i nō Samaria, ’o te pāhonora’a ïa a Iesu i te uira’a : « ’O vai ho’i tō’u ta’ata tupu ? » ’A tai’o ai ’oe i teie parabole, ’a tāpe’a noa i te reira uira’a i roto i te ferurira’a. E aha te mau pāhonora’a tā ’oe e ’ite ra ?
I te tau o Iesu, ’ua tenetere ’e tenetere te au-’ore-ra’a i roto i te mau ’āti Iuda ’e te mau ’āti Samaria. E hua’ai te ’āti Samaria nō te tahi ’āti Iuda tei ora i Samaria ’e tei fa’aipoipo i te nūna’a ’ētene. ’Ua hi’o te mau ’āti Iuda i te mau ’āti Samaria ’ei nūna’a tei vi’ivi’i nō tō rātou ’āmuira’a i te nūna’a ’ētene ’e tei tāiva. E fa’aātea roa te mau ’āti Iuda i tō rātou tere tau maile ’eiaha rātou e haere nā Samaria. (Hi’o ato’a Luka 9:52–54 ; 17:11–18 ; Ioane 4:9 ; 8:48.)
I tō ’oe mana’o, nō te aha te Fa’aora i mā’iti ai i te hō’ē ta’ata Samaria, e ta’ata au-’ore-roa-hia e te ’āti Iuda, ’ei hi’ora’a nō te aumihi ’e te herera’a i te ta’ata tupu ? E aha tā teie parabole e fa’auru nei ia ’oe ’ia rave nō te fa’a’ite rahi atu ā i te aroha ia vetahi ’ē ?
Hi’o ato’a Mosia 2:17 ; « Pe’e au ia ’oe », Te mau hīmene, n° 130.
’Ua mā’iti tātou i « taua mea ti’a ra » nā roto i te ravera’a i te mau mā’itira’a e arata’i i te ora mure ’ore.
’Ua ha’api’i te tuahine Bonnie D. Parkin, peresideni rahi tahito nō te Sōtaiete Tauturu ē : « ’O Maria ’e ’o Mareta ’o ’outou ïa ’e ’o vau nei… ’Ua here teie nâ vahine i te Fatu ’e tē hina’aro ato’a ra rāua i te fa’a’ite i taua here ra. I teie rā taime, tē mana’o nei au ē ’ua fa’a’ite Maria i tōna here nā roto i te fa’aro’ora’a i tāna mau parau, ’āre’a ’o Mareta ra, ’ua fa’a’ite ïa ’oia i tōna here nā roto i te tāvinira’a iāna… ’Aita roa Iesu i fa’ahape i te māna’ona’ora’a o Mareta terā rā, ’ua fa’a’āfaro ’oia i tōna mana’o ma te parau ē ’a maiti ‘i te mea ti’a ra’. E aha ïa taua mau mea ra ? Te mea hō’ē roa tei tītauhia, ’oia ho’i, te mā’itira’a i te ora mure ’ore [hi’o 2 Nephi 2:28]. E mā’iti tātou i te mau mahana ato’a » (« Te maitira’a i tearoha: I taua mea ti’a ra », Ensign ’aore rā Liahona, Nov. 2003, 104). E aha tā ’oe ha’apotora’a nō te parau a’o a te Fatu ia Mareta, nā roto i tā ’oe iho mau parau ? E hi’opo’a i tā ’oe tārena mahana—tē vai ra ānei te hō’ē mea « hina’arohia » tītauhia i te ha’apa’o rahi atu ā ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te purera’a pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu mai ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o :
E aha te mau hīmene tā tō ’outou ’utuāfare e nehenehe e hīmene ’o te tū’ati i te mau parau mau e ha’api’ihia ra i roto i teie mau pene ? Hō’ē hi’ora’a, « Pe’e au ia ’oe », Te mau hīmene, n° 130, tē vai fa’ahou rā. E aha te mau parau i roto i teie hīmene e tauturu nei i te ’utuāfare ’ia māramarama maita’i a’e i te mau ha’api’ira’a a te Fa’aora ?
Nō te aha Iesu e hina’aro ai ’ia riro tātou mai te tamari’i ri’i ? E aha te huru i roto i te mau tamari’i e fa’ariro rahi a’e ia tātou mai te Mesia te huru, ’ia ’apo tātou i te reira i roto i tō tātou orara’a ? (hi’o Mosia 3:19).
’Ua hina’aro Iesu ’ia riro tāna mau pipi mai te mau tamari’i ri’i te huru.
E aha te rāve’a nō te fa’aoraora i te parabole nō te ta’ata maita’i nō Samaria, nō tō ’outou ’utuāfare ? E au ānei rātou e ’ō’omo i te ’ahu ta’a ’ē ’e e ha’uti ta’ata ora i te reira ? E ha’apāpū maita’i ē, tē tauturu ra ’outou i te mau melo o te ’utuāfare ’ia ’ite nāhea i te riro mai te ta’ata maita’i nō Samaria. E ta’ata ānei i te ha’api’ira’a ’aore rā i te fare purera’a e hina’aro nei i te tauturu ’e ’aita tātou e tāu’a ra ? E aha tā tātou e nehenehe e rave nō terā ta’ata ?
E mea fifi roa ānei i teienei ’ia fa’aō i te mau mea pae vārua i roto i te tārena ’utuāfare ? E nehenehe te ’ā’amu o Maria ’e Mareta e fa’auru i te hō’ē ’āpo’ora’a ’utuāfare ’aore rā te hō’ē purera’a pō ’utuāfare nō ni’a i te reira. E nehenehe te ’utuāfare e fa’ati’a i te hō’ē tāpura nō te mau rāve’a ’ia mā’iti « i taua mea ti’a ra » (hi’o Luka 10:42).
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetoma i roto Mai, pe’e mai—nō te Paraimere.
Ha’amaita’i i tā tātou hōro’ara’a i te ha’api’ira’a
Aupuru i te vāhi au nō te here Te huru te mau melo o te ’utuāfare i ni’a i te tahi ’e te tahi, tō rātou mana’o nō ni’a i te tahi ’e te tahi, e nehenehe te reira e tauturu roa ’ino i te vārua i tō ’outou fare. ’A tauturu i te mau melo ato’a o te ’utuāfare ’ia rave i tā rātou tuha’a nō te ha’amau i te hō’ē fare nō te here ’e nō te fa’atura, ’ia vai te mana’o au nō te fa’a’ite i tei tupu nō rātou, nō te parau i te mau uira’a ’e nō te fa’a’ite i tō rātou ’itera’a pāpū. (Hi’o Ha’api’ira’a mai tā te Fa’aora, 15.)
Christ in the Home of Mary and Martha, nā Walter Rane