Agosto 5–11. Taga Roma 1–6: ‘Ti Pannakabalin ti Dios a Maipaay iti Pannakaisalakan’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
Agosto 5–11. Taga Roma 1–6,” Umaykayo, Sumurot Kaniak—Para kadagiti Indibidual ken Pamilia: 2019
Agosto 5–11
Taga Roma 1–6
“Ti Pannakabalin ti Dios a Maipaay iti Pannakaisalakan”
Ti panangisurat kadagiti parikna ket mangtulongto kenka a lagipem no ania ti isursuro ti Espiritu kenka. Ibilangmo met ti panangisurat no kasano ti riknam maipapan kadagitoy a parikna.
Isuratmo Dagiti Impresionmo
Iti panawen nga insurat ni Pablo ti suratna kadagiti miembro ti Simbaan ti Roma, a dagitoy ket agduduma a grupo dagiti Judio ken Gentil, ti Simbaan ni Jesucristo ket dimmakkel iti ad-adayo nga amang manipud iti bassit a ragup dagiti mamati manipud ti Galilea. Agarup 20 a tawen kalpasan ti Panagungar ti Mangisalakan, adda pagu-ummongan dagiti Kristiano ti dandani amin a lugar a mangted iti rason kadagiti Apostol nga agbaniaga— agraman ti Roma, ti kabisera ti nakaad-adu nga imperio. Ngem uray a ti nasindadaan nga agdengdengngeg ken ni Pablo ket dagiti Santo ti Roma, ti mensahena ket para iti amin, a pakairamanantayo iti agdama: “Ti ebanghelio ni Cristo ti pannakabalin ti Dios a maipaay iti pannakaisalakan ti tunggal maysa a mamati” (Taga Roma 1:16 nainayon dagiti nagiray a sarita).
Dagiti Kapanunotan para iti Bukod a Panagadal iti Nasantuan a Kasuratan
Taga Roma–Filemon
Ania dagiti surat ken kasano ti pannakaurnosda?
Dagiti surat ket sursurat dagiti dadaulo ti Simbaan kadagiti Santo iti nadumaduma a paset ti lubong. Kaaduan kadagiti surat ti insurat ni Apostol Pablo iti Baro a Tulag—mangrugi iti Taga Roma ken naggibus iti Filemon. Naurnos dagiti suratna babaen ti kaatiddogda. Nupay ti Taga Roma ti umuna a surat iti Baro a Tulag, ti kinapudnona naisurat daytoy iti asideg ti ud-udi dagiti misionario a panagdaliasat ni Pablo. Para iti ad-adu pay nga impormasion maipapan kadagiti surat, kitaen iti Pangiwanwan iti Nasantuan a Kasuratan,“Sursurat ni Pablo.”
No maipakitak ti pammatik iti Mangisalakan babaen ti panangtungpalko kadagiti bilinna, naikkat dagiti basolko babaen ti paraburna.
Ti sumaganad a tsart ket mangtulongto kenka nga ad-adda a maawatam ti Surat kadagiti Taga Roma:
-
Ti linteg:Idi insurat ni Pablo maipapan “ti linteg,” dakdakamatenna ti linteg ni Moises. Kapadana, ti balikas a “dagiti aramid” kadagiti sinurat ni Pablo ket maiturong kadagiti seremonia ken ritual iti linteg ni Moises. Sinurngi ni Pablo daytoy a linteg iti “ti linteg ti pammati” (kitaen iti Taga Roma 3:27–31), wenno ti doktrina ni Jesucristo, nga isu ti pudno a pagtaudan ti pannakaisalakantayo.
-
Panagkugit, di pannakakugitIdi un-unana, ti pannakakugit ket pagilasinan wenno simbolo ti katulagan nga inaramid ti Dios ken ni Abraham. Inusar ni Pablo ti termino a “panagkugit” a mangitudo kadagiti Judio (dagiti natulagan a tao) ken “di pannakakugit” a mangitudo kadagiti Gentil (dagiti saan a nairaman iti katulagan ni Abraham). Ti pannakakugit ket saanen a kasapulan kas tanda ti katulagan ti Dios kadagiti taona (kitaen iti Dagiti Aramid 15:23–29).
-
Pannakapalinteg, mangikalintegan, nainkalintegan:Dagitoy a termino ket mangitudo iti pannakaugas, wenno panangpakawan, iti basol. Idi nainkalintegantayo, nakapakawantayo, impakdaartayo ti kinaawan ti pannakakonsensia, ket nawayawayaanen manipud iti agnanayon a pannusa para kadagiti basbasoltayo. Kas inlawlawag ni Pablo, naaramid daytoy a posible babaen ken ni Jesucristo (kitaen ti Pangiwanwan iti Nasantuan a Kasuratan, “Pannakapalinteg, Ikalintegan,” scriptures.lds.org, kitaen met iti D. Todd Christofferson, “Justification and Sanctification,”Ensign, Hunio 2001, 18–25). Iti Taga Roma, dagiti balikas a kas iti nalinteg ken kinalinteg ket mabalin a makita a kapada iti balikas a kas iti nalinteg ken pannakapalinteg.
-
Parabur:Ti parabur ket “nadiosan … a tulong wenno pigsa, naited babaen iti asi ken ayat ni Jesucristo.” Babaen ti parabur, agungarto ti amin a tao ket awatenda ti imortalidad. Mainayon pay, “Ti parabur ti mangpabael a bileg a mangpalugod kadagiti lallaki ken babbai a maikari iti agnanayon a biag ken pannakaitan-ok kalpasan a naipaayda ti bukod a kasayaatan a panagkagumaanda.” Saantayo a matgedan ti parabur babaen kadagiti panagkagumaantayo; ngem ketdi, mangted ti parabur kadatayo iti “pigsa ken pannarabay nga agobra iti nasayaat nga aramid a [ditayo] kabaelan a pagtalinaeden” (Pangiwanwan iti Nasantuan a Kasuratan, “Parabur”; kitaen met iti Dieter F. Uchtdorf, “The Gift of Grace,” Ensign wenno Liahona, Mayo 2015, 107; 2 Nephi 25: 23).
Dagiti akinruar a tignayko ket nasken a mangyanninaw ken mangpadur-as iti akin-uneg a kumbersion.
Ipakita dagiti pannursuro ni Pablo a sumagmamano kadagiti Judio ken Kristiano iti Roma ti namati latta a ti panagtungpal kadagiti seremonia ken ritual iti linteg ni Moises ket nangisangbay iti pannakaisalakan. Kasla maysa daytoy a problema a saanen a nasken a yaplikar agsipud ta saantayon nga agbibiag babaen ti linteg ni Moises. Ngem bayat ti panangbasam kadagiti sinurat ni Pablo, nangnangruna itiTaga Roma 2:17–29, panunotem ti maipapan iti bukodmo a panagkagumaan nga agbiag iti ebanghelio. Dagiti kadi akinruar a panagaramidmo, a kas pannakiranud iti sakramento wenno idadar-ay iti templo, ti mangiturturong kenka iti kumbersion ken panangpapigsa iti pammatim ken ni Cristo? (kitaen iti Alma 25:15–16). Kasano a masiguradom a dagiti akinruar a tignaymo ket mangiturturong kenka iti panagbalbaliw iti puso?
Kitaen met iti Dallin H. Oaks, “The Challenge to Become,” Ensign, Nob. 2000, 32–34.
Babaen ken ni Jesucristo, mapakawantayo kadagiti basbasoltayo.
Mabalin a makarikna iti pannakaupay ti sumagmamano a tao iti natured a panangibaga ni Pablo nga “awan ti nalinteg, awan, uray maysa” (Taga Roma 3:10). Ngem adda met dagiti manamnama a mensahe iti Taga Roma. Sapulen ida iti dagiti kapitulo 3 ken 5, ket ibilang no apay a ti pananglaglagip a ti “ta isuda amin nagbasolda ket agkurangda iti dayag ti Dios” (Taga Roma 3:23) ket maysa a napateg nga addang iti panagsursuro “ket agrag-o tayo iti namnama” babaen ken ni Jesucristo (Taga Roma 5:2).
Awisennak ti ebanghelio ni Jesucristo a “magna iti isasangbay iti baro a biag.”
Insuro ni Pablo a rumbeng a baliwan ti ebanghelio ti wagas ti panagbiagtayo. Ania dagiti palawag iti Taga Roma 6 a mausarmo a makatulong iti maysa a tao a makaawat no kasano a ti ebanghelio ket nakatulong kenka a “magna iti isasangbay ti baro a biag”? (bersikulo 34). Ania dagiti bukod a padas ti ibinglaymo?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Kasano nga ipakitatayo a “diak ibain ti ebanghelio ni Cristo”?
Ibaga ti sumagmamano a tao a gapu ta datayo ket “mapalinteg babaen ti parabur ti Dios” (Patarus ti Joseph Smith, Romans 3:24 [ iti taga Roma 3:24, footnote iti]), awan naidawat a kasapulan para kadatayo nga umawat iti parabur. Numan pay awan umdas a maaramidtayo tapno “maullo” ti parabur ti Dios, kiddawen ti Dios kadatayo a mangaramid iti sumagmamano a banag tapno maawattayo. Ania ti maaramidtayo tapno makaawat iti parabur?
Ania dagiti panagtutuok a napadasantayon? Kasano a nakatulong kadatayo dagitoy a panagtutuok a padur-asen ti panaganus, padas, ken namnama?
Ania ti nasao ni Pablo kadagitoy a bersikulo maipapan iti simbolismo ti panagbuniag? Nalabit a planuen ti pamiliam a dumar-ay iti umay a panagbuniag. Wenno maysa a tao iti pamiliayo ti makaiburay kadagiti ladawan wenno lagip manipud iti panagbuniagna. Kasano a ti panagaramid ken panagtungpal kadagiti katulagan ti panagbuniagtayo ket makatulong kadatayo a “magna iti isasangbay iti baro a biag”?
Ti panagbuniag ket isimbolona ti rugi ti baro a biag kas maysa a disipulo ni Cristo.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Agdamag kadagiti saludsod bayat ti panagadalmo Bayat ti panangadalmo kadagiti nasantuan a kasuratan, sumangbay dagiti saludsod iti panunotmo. Utobem dagitoy a saludsod ket sapulem dagiti sungbat. Kas pagarigan, iti Taga Roma 1–6 masapulanyo dagiti sungbat iti saludsod nga “Ania ti parabur?”
Dikay Agbuteng, ni Greg K. Olsen