“Agosto 5–11. Taga Roma 1–6: ‘Ti Pannakabalin ti Dios iti Pannakaisalakan’” Umaykayo, Sumurot Kaniak—Para iti Primary: Baro a Tulag 2019 (2019)
“Agosto 5–11. Mateo 1–6,” Umaykayo, Sumurot Kaniak—Para iti Primary: 2019
Agosto 5–11
Taga-Roma 1–6
“Ti Pannakabalin ti Dios iti Pannakaisalakan”
Ania dagiti parikna a naawatyo bayat ti panangbasam iti Taga Roma 1–6? Makatulong kenka dagitoy a parikna a mangpili manipud kadagiti sumaganad a kapanunotan iti panangisuro.
Isuratmo Dagiti Impresionmo
Yawis ti Panagbibinninglay
Awisem dagiti ubbing a mangibinglay no ania ti inaramidda a kas sungbat iti ania man nga awis nga intedmo kadakuada iti maudi a lawas tii adalen. Kas pagarigan, kinasaritada kadi dagiti pamiliada maipapan iti pannakadadael ti barko a nailadawan iti Dagiti Aramid 27 ken maipapan iti panangsurot iti propeta?
Isuro ti Doktrina
Dagiti In-inaudi nga Ubbing
Maipakitak ti pammatik ken ni Jesucristo babaen ti panangsurot Kenkuana.
Insuro ni Pablo a ti ebanghelio ket addaan iti pannakabalin a mangipaay iti pannakaisalakan iti tunggal maysa nga agbiag babaen ti pammati ken ni Jesucristo. Kasano a matulongam dagiti ubbing a mangipakita iti pammatida ken ni Jesucristo babaen ti panangsurot Kenkuana?
Dagiti Mabalin nga Aktibidad
-
Tulongam dagiti ubbing a sapulenda ti Roma iti maysa a mapa. Ilawlawag a naglaon ti libro ti Taga Roma iti surat nga insurat ni Pablo kadagiti Santo idiay Roma tapno makatulong kadakuada a makaawat kadagiti pagbatayan ti ebanghelio kas iti pammati.
-
Ibasam ti Taga Roma 1:17 kadagiti ubbing, ken tulongam ida a mangyulo iti ragup dagiti balikas a “Ti nalinteg agbiagto gapu iti pammati.” Mabalinmo a dutokan ti tunggal ubing ti maysa a balikas iti ragup dagiti balikas ket kiddawem kadakuada a mangisao iti dayta a balikas no itudom dagitoy. Ilawlawag a ti kaipapanan daytoy a ragup dagiti balikas ket nasken nga agbiagtayo iti tunggal aldaw nga addaan iti pammati ken ni Jesucristo. Ammo kadi dagiti ubbing no ania ti pammati? Ipakitam ti ladawan ni Jesucristo ket ilawlawagmo a patientayo nga Isu ket pudno nupay saantayo pay a nakita Isuna. Daytoy ti pammati—panamati iti maysa a banag nupay saantayo pay a nakita daytoy.
-
Ilawlawag a maipakitatayo ti pammatitayo ken ni Jesucristo babaen ti panagtulnog Kenkuana. Ilemmeng ti ladawan iti lawlaw ti siled nga addaan kadagiti tao nga agar-aramid iti no ania ti indawat ni Jesus nga aramidentayo. Panagsinnublatem dagiti ubbing a mangsarak ken mangiladawan kadagiti ladawan. Ania ti maaramidtayo a mangsurot ken ni Jesus?
-
Piringam ti maysa kadagiti ubbing, ken tarabayem isuna iti ibaballasiwna iti siled nga agturong iti maysa a ladawan ni Jesus. Bay-an a maaddaan iti batang ti tunggal ubing . Tulongam dagiti ubbing a makaawat a nasken a surotenda dagiti pannursuro ni Jesus a kas iti panagsurotda iti pannarabaymo.
Maipada ti panagbuniag ti panagbalin a maysa a baro a tao.
Agsagsagana dagiti ubbing a sursuruam para iti panagbuniag. Ania ti masursuroda maipapan iti panagbuniag manipud iti panangiturong ni Pablo iti “magnatayo koma iti baro a panagbiag”?
Dagiti Mabalin nga Aktibidad
-
Awisem dagiti ubbing a mangulit iti ragup dagiti balikas a “Magnatayo koma iti baro a panagbiag” (Taga Roma 6:4). Ilawlawag a no mabuniagantayo, mapakawantayo kadagiti basoltayo. Addaantayo iti gundaway a rumang-ay iti masakbayan babaen ti panagaramid kadagiti nasayaat a pili, panagbabawi no agaramidtayo iti biddut, ken panagkarigatantayo nga agbalin a kas ken ni Jesus. Usarem ti aktibidad itay a lawas tapno masuruam dagiti ubbing a ti panagbuniag ket makatulong kadatayo nga agbalin a kas baro a tao.
-
Ibagam kadagiti ubbing no kasano ti nariknam idi nabuniaganka, ket awisem ida a mangibinglay kadagiti padas idi dinar-ayanda ti maysa a panagbuniag. Awisem ida nga agdrowing iti ladawan ti bagbagida iti masakbayan nga aldaw ti panagbuniagda ket ibinglayda no ania ti mabalinda nga aramiden tapno agsaganada para iti panagbuniagda.
-
Makipagkansion kadagiti ubbing iti kanta maipapan iti panagbuniag. Ania ti masursurotayo manipud iti daytoy a kanta?
Isimbolo ti panagbuniag ti rugi ti baro a biag kas maysa a disipulo ni Cristo.
Isuro ti Doktrina
Dagiti In-inauna nga Ubbing
Maipakitak ti pammatik ken ni Jesucristo babaen ti panangsurot Kenkuana.
Insuro ni Pablo a ti ebanghelio ket addaan iti pannakabalin a mangipaay iti pannakaisalakan iti tunggal maysa nga agbiag babaen ti pammati ken ni Jesucristo. Ti pammati ti umuna a pagbatayan ti ebanghelio. Daytoy ti mangparegta kadatayo nga agtungpal kadagiti bilin. Kasano a matulongam dagiti ubbing a nasaysayaat a maawatanda daytoy a kinapudno.
Dagiti Mabalin nga Aktibidad
-
Kiddawem iti maysa nga ubing a mangsapul iti Roma iti maysa a mapa. Tulongam dagiti ubbing a makaawat a kadagiti sumaruno a sumagmamano a lawas, makasursurodanto manipud kadagiti surat a insurat ni Pablo kadagiti miembro ti Simbaan iti nadumaduma a luglugar, mangrugi iti suratna kadagiti Taga Roma.
-
Isurat ti teksto manipud iti Taga Roma 1:16 iti pisarra, a mangsukat iti sumagmamano a balikas kadagiti blangko. Kiddawen kadagiti ubbing akitaenda iti nasantuan a kasuratan ket punuanda dagiti blangko. Ilawlawag ti ragup dagiti balikas a “Diak ibain ti ebanghelio ni Cristo,” ket awisem dagiti ubbing nga ibinglayda no ania ti kaipapanan daytoy a ragup dagiti balikas kadakuada.
-
Awisem ti maysa nga ubing a mangbasa iti napigsa ti Taga Roma 1:17, ket padengngeg kadagiti dadduma pay nga ubbing ti balikas a maulit. Ania ti kayat a sawen ti “agbiag gapu iti pammati”? Tulongam dagiti ubbing a mangsarak iti kayulogan ti pammati iti maysa a pagadawan a kas iti Pangiwanwan iti Nasantuan a Kasuratan, “Napudno iti Pammati,” scriptures.lds.org. Kasano a maiduma ti biagtayo no awanantayo ti pammati ken ni Jesucristo?
-
Ipakita kadagiti ubbing ti mula ken ti bukel, ket saludsodem no kasano a matulongantayo ti maysa a bukel nga agbalin a mula. Ilawlawag a no agmula ken sibugantayo iti maysa a bukel, maipakitatayo nga addaantayo iti pammati a dumakkelto daytoy. Kasano a maipakitatayo nga adda pammatitayo ken ni Jesucristo? Ibilang ti panagkansion iti kanta maipapan iti pammati, kas paset daytoy nga aktibidad.
Kasapulantayo amin ni Jesucristo tapno mapakawan kadagiti basbasoltayo.
Tinarigagayan ni Pablo kadagiti Romano a maawatanda a ti pannakaisalakan ket umay babaen laeng ken ni Jesucristo ken iti paraburna. Utobem no kasano a maisurom daytoy a kinapudno kadagiti ubbing.
Dagiti Mabalin nga Aktibidad
-
Awisem ti maysa kadagiti ubbing a basaenna ti Taga Roma 3:23–24. Ania iti panagkuna dagiti ubbing nga isursuro dagitoy a bersikulo kadatayo? Ilawlawag a ti “parabur” iti bersikulo 24 kaipapananna ti sagut ti ayat ken asi ti Mangisalakan, a pinagbalinna a posible para kadatayo nga umawat iti pannakapakawan kadagiti basbasoltayo.
-
Mangibitin ti makan wenno ladawan iti ngatuen ti pader wenno iti sabali a lugar a saan a mabalin a mangragpat dagiti ubbing iti bagbagida. Ipapadasmo kadakuada a manggaw-at iti daytoy, ket idilig daytoy iti no ania ti irsuro ni Pablo iti Taga Roma 3:23. Kalpasanna tulongam ida a manggaw-at iti daytoy. Ania ti inaramid ti Mangisalakan para kadatayo a ditayo maaramid para iti bagbagitayo? Awisem dagiti ubbing a mangibinglay iti no kasano ti panagriknada maipapan iti Mangisalakan no panunotenda no ania ti naaramidnan para kadakuada.
Maipada ti panagbuniag ti panagbalin a maysa a baro a tao.
Insuro ni Pablo nga isimbolo ti panagbuniag iti ipapatay ken Panagungar ni Cristo. Isimbolo pay daytoy ti “ipapatay” dagiti managbasol a bagitayo ken maitagtag-ay a “magna iti baro a panagbiag” (Taga Roma 6:4). Pabaruentayo ti panagkumittayo a magna iti baro a panagbiag iti tunggal kanito a makiranudtayo iti sakramento.
Dagiti Mabalin nga Aktibidad
-
Awisem ti maysa nga ubing a basaenna ti Taga Roma 6:3–6 Ania ti kinuna ni Pablo a “kaasping ti” ti panagbuniag?
-
Paglilinnawagan no kasano nga isimbolo ti panagbuniag ti ipapatay ken panagungar. Apay a ti ipapatay ken panagungar ket nasayaat a simbolo ti no ania ti mapasamak no mabuniagantayo?
-
Aggigiddan a basaen dagiti kararag ti sakramento (kitaen iti DkK 20:77, 79). Ipalagip kadagiti ubbing nga no makiranudtayo iti sakramento, pabaruentayo ti panagkumit nga inaramidtayo idi nabuniagantayo a mangsurot ken Jesucristo. Kasano a makatulong ti sakramento kadatayo a “magna iti baro a panagbiag”?
-
Awisem dagiti ubbing nga agaramidda kadagiti poster a mangipakita no ania ti kaipapanan kadakuada ti “magna iti baro a panagbiag.” Mabalin nga ibitin dagiti ubbing dagitoy kadagiti siledda tapno makatulong kadakuada a manglagip nga agaramid kadagiti nasayaat a pili.
Yallukoy ti Panagsursuro iti Pagtaengan
Allukoyem dagiti ubbing a kiddawenda kadagiti miembro ti pamiliada nga ipakaammo kadakuada no makitada dagiti annakda nga agar-aramid iti maysa a banag a mangipakita iti pammati.
Panangpadur-as iti Panangisurotayo
Bangonem ti panagtalek dagiti ubbing. Tapno matulongam dagiti ubbing a mangbangon iti panagtalek a masursuroda iti ebanghelio iti bukodda, dayawen ida iti pannakiramanda iti klase.