Corinto, Makin-abagatan a Grecia, ti Forum ken Civic Center, naipinta a ladawan ni Balage Balogh

Agosto 19–25

1 Taga Corinto 1–7

“Naananay Koma ti Panagtitimpuyogyo”

Tulongannakanto ti Espiritu Santo a mangammo no ania dagiti pagbatayan ti ebanghelio iti 1 Taga Corinto 1–7 a makatulongto kadagiti ubbing a sursuruam. Bayat ti nainkararagan a panagbasam kadagitoy a kapitulo, isuratmo dagiti kapanunotan ken riknam a sumangbay kenka manipud iti Espiritu.

Isuratmo Dagiti Impresionmo

Yawis ti Panagbibinninglay

Iti sumagmamano nga aldaw a nasapsapa, awisem ti maysa wenno ad-adu pay kadagiti ubbing a mangsarak iti maysa a bersikulo iti 1 Taga Corinto 1–7 a mabalinda nga ibinglay iti klase. Mabalin nga awisem dagiti nagannak kadakuada a tumulong no kasapulan.

Isuro ti Doktrina

Dagiti In-inaudi nga Ubbing

1 Taga Corinto 2:11–14

Isuro kaniak ti Espiritu Santo dagiti kinapudno ti ebanghelio.

Maysa kadagiti akem ti Espiritu Santo ti mangisuro kadatayo iti kinapudno. Ania dagiti padas a mabalinmo nga ibinglay kadagiti ubbing a makatulong kadakuada a makaawat iti daytoy?

Dagiti Mabalin nga Aktibidad

• Ipakita dagiti banag wenno ladawan a mangibagi kadagiti wagas a makasursurotayo maipapan iti lubong (kas iti pagadalan, libro, wenno cell phone). Ania ti masursurotayo no usarentayo dagitoy a banag? Ilawlawag nga iti 1 Taga-Corinto 2:11, 14, insuro ni Pablo a babaen laeng ti Espiritu ti Dios a masursurotayo maipapan ti Epiritu ti Dios, nga isu ti Espiritu Santo. Ania ti mabalin nga aramidentayo tapno masursurotayo “dagiti banag ti Dios”?

• Pagsipatem dagiti imam no isaom ti tunggal syllable iti binatog a “Isuronatayo ti Espiritu Santo iti kinapudno.” Kiddawen kadagiti ubbing a pagsipaten dagiti imada ken ulitenda ti ragup dagiti balikas. Ibinglaymo kadagiti ubbing ti padasmo idi tinulongannaka ti Espiritu Santo a mangammo a pudno ti maysa a banag.

• Aggigiddan nga agkansion iti kanta maipapan iti Espiritu Santo. Tulongam dagiti ubbing a mangsapul kadagiti balikas ken ragup dagiti balikas iti kanta a mangisuro no kasano a makisao ti Espiritu Santo kadatayo ken no ania ti isurona kadatayo.

1 Taga-Corinto 3:10–11

Ni Jesuscristo ti pamuonko.

Agisasaad iti pamuon dagiti ubbing para kadagiti pammaneknekda, ken makatulongka kadakuada a mangbangon iti natibker a pamuon ken ni Jesucristo.

Dagiti Mabalin nga Aktibidad

• Ibaasm ti 1 Taga Corinto 3:11 kadagiti ubbing, ken ilawlawagmo a ni Jesucristo ti pamuontayo. Ipakita kadagiti ubbing dagiti sumagmamano a ladawan dagiti banag a maaddaantayo iti pammaneknek, a pakairamanan ti maysa a ladawan ni Jesucristo. Tulongam ida a mangurnos kadagiti ladawan tapno ti ladawan ni Jesus ti makimbaba a paset, kas maysa a pamuon, ken dagiti dadduma pay a ladawan a “nabangon” iti maysa a pammaneknek Kenkuana.

• Ikkam ti tunggal ubing iti bato nga addaan iti “Ni Jesucristo ti pamuonko” a nakasurat ditoy. Ipayawid dagiti bato tapno mangipalagip kadakuada no ania ti nasursuroda.

• Ibinglay dagiti ladawan a mangipakita iti sumagmamano a paggugustom nga estoria manipud iti biag ti Mangisalakan, ket kiddawen kadagiti ubbing nga ibagana kenka no ania ti mapaspasamak kadagiti ladawan. Paibinglay iti sumagmamano a paggustoda nga estoria maipapan ken Jesus. Ibinglaymo ti pammaneknekmo a ni Jesucristo ti pundasion ti pammatim.

 1 Taga Corinto 6:19

Maipada iti maysa a templo ti bagik.

Kasano a matulongam dagiti ubbing a mangbigbig iti pateg dagiti bagida kassagut manipud ti Dios ken maaddaanda iti dakdakkel a tarigagay a mangaywan kadagitoy?

Dagiti Mabalin nga Aktibidad

• Ipakita kadagiti ubbing dagiti ladawan ti templo (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia), ket basaen dagitoy a balikas manipud iti 1 Taga Corinto 6:19: “Ti bagiyo isu ti templo ti Espiritu Santo.” Tulongam dagiti ubbing a makaawat kayat ti Nailangitan nga Ama a pagtalinaedentayo a nadalus ken nasantuan dagiti bagitayo, a kas iti templo.

• Iparang iti ladawan ti maysa nga ubing, ket palawlawan daytoy kadagiti banag a nasayaat para kadagiti bagitayo ken dagiti banag a dakes. Awisem dagiti ubbing nga agsisinnublatda iti panangilasin kadagiti nasayaat a banag ken panangikkat kadagiti dakes.

• Aggigiddan nga agkansion ti kanta maipapan kadagiti bagi, ket kiddawen kadagiti ubbing no apay a managyaman para kadagiti bagitayo.

Isuro ti Doktrina

Dagiti In-inauna nga Ubbing

1 Taga Corinto 1:23–25

Ti Dios nasirsirib ngem dagiti tao, ket ipakitak ti pudno a sirib no mamatiak kadagiti pannursurona.

Maammuanto dagiti ubbing a sursuruam—no saanda pay—a dagiti sumagmamano a tao ti mangisuro kadagiti banag a mangsupiat iti sirib ti Dios. Ti panagadal iti 1 Taga Corinto 1:23–25 ket makatulong kadagiti ubbing a makaawat a ti Dios nasirsirib ngem dagiti tao.

Dagiti Mabalin nga Aktibidad

• Aggigiddan a basaen ti 1 Taga Corinto 1:23–25 , ket tulongam dagiti ubbing a mangsapul kadagiti balikas sirib ken kinamaag. Ilawlawag nga ipagarup ti adu a tattao a dagiti pannursuro ni Pablo ket maag, ngem inlawlawag ni Pablo a ti panangpaati iti ebanghelio ni Cristo ti pudno a sirib. Apay a nainsiriban ti mamati iti no ania ti isuro ti Dios?

• Tulongam dagiti ubbing a mangyakem no kasano a masungbatanda dagiti tao a mangipagarup a “maag” dagiti pannursuro ti Simbaan —dagiti pannursuro kas ti panamati iti Mangisalakan, panagtungpal iti Nainsiriban a Balikas, wenno panagtungpal iti linteg ti apagkapullo. Kas pagarigan, mabalinda a paneknekan maipapan kadagiti bendision nga isangbay ti panagtungpal kadagitoy a pannursuro.

• Iburaymo ti maysa a padas idi impagarup dagiti dadduma a minamaag ti pammatim, wenno ibinglaymo ti maysa a pagarigan manipud kadagiti nasantuan a kasuratan. Makaibinglay kadi dagiti ubbing iti kasta met la a padas? Kasano a ti 1 Taga-Corinto 1:25 ket makatulong kadatayo nga agtalinaed a napudno no dagiti dadduma awaganda a maag ti pammatitayo?

1 Taga Corinto 2:11–14

Isuro kaniak ti Espiritu Santo dagiti kinapudno ti ebanghelio.

Kasano a matulongam dagiti ubbing a mangbigbig a kasapulanda ti Espiritu Santo tapno maawatanda “dagiti banag ti Dios”?

Dagiti Mabalin nga Aktibidad

• Agaramid iti listaan dagiti wagas a masursurotayo maipapan iti lubong—kas pagarigan, ti libro, pagadalan, ken ti internet. Kalpasanna aggigiddan a basaen ti 1 Taga Corinto 2:11–14. Ania ti isuro dagitoy a bersikulo maipapan iti no kasano a masursurotayo “dagiti banag ti Dios”?

• Awisem dagiti ubbing a mangibinglay iti sumagmamano a kanito idi nariknada dagiti parikna ti Espiritu Santo, a maawagan met a “ti Espiritu ti Dios” (1 Taga Corinto 2:11–14). Kadagita a panawen mabalin nga iraman idi addada iti simbaan, panagkararag, wenno panagbasa iti nasantuan a kasuratan. Tulongam ida a makaawat a ti Espiritu Santo ket isursurona ida iti kinapudno, kas ti nailadawan ni Pablo.

• Awisen ti tunggal ubing a mangbasa iti maysa kadagitoy a nasantuan a kasuratan: 1 Taga Corinto 2:11–14; 1 Nephi 10:17; Moroni 10:3–5; ken Doktrina ken Katulagan 8:2–3. Kiddawen kadagiti ubbing nga ibilangda no ania ti nasursuroda manipud kadagitoy a nasantuan a kasuratan maipapan iti no kasano nga isuronatayo ti Espiritu Santo. Allukoyem ida a mangisurat kadagitoy a reperensia iti mardyin dagiti nasantuan a kasuratanda.

1 Taga Corinto 6:19–20

Nasken a tratuek ti bagik nga addaan iti respeto ket pagtalinaedek a nasantuan.

Ti pannakaawat a sagut manipud iti Nailangitan nga Ama dagiti bagitayo ket makatulongto kadagiti ubbing a mapagtalinaed a sagrado dagiti bagida, uray pay no masulisogda nga agaramid wenno saan.

Dagiti Mabalin nga Aktibidad

• Mangitugot iti naibungon a sagut a ladawan ti maysa nga ubing ken ti templo iti uneg. Awisem dagiti ubbing a mangbasa iti 1 Taga Corinto 6:19–20 ken patanganda no ania ti adda iti sagut. Paluktam dagiti sagut ket paglilinnawagan no kasano a maipada iti templo dagiti bagitayo.

• Isaritam kadagiti ubbing no kasano a nasken a tratuentayo ti templo. No kas templo dagiti bagitayo, kasano ti panagtratotayo dagiti bagitayo? Ti panagkansion wenno panagbasa ti balikas iti kanta maipapan iti templo, ket makatulong a mangsungbat iti daytoy a saludsod. No agaramidtayo kadagiti biddut, kasano a mapagbalintayo ti “templotayo” a nadalus manen?

• Awisem dagiti ubbing a mangilista iti pisarra ti balakad a nasapulanda maipapan iti no kasano ti mangaywan kadagiti bagitayo.

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada iti kanta a kinansionda iti klase ken no ania ti nasursuroda manipud iti daytoy.

Panangpadur-as iti Panangisurotayo

Mangipaneknek maipapan ken ni Jesucristo Maysa kadagiti kapatgan a banag a mabalinmo nga aramiden kas maysa a mannursuro ket ti mangipaneknek maipapan ken ni Jesucristo. Mangtulongto daytoy kadagiti ubbing a mangpapigsa kadagiti pammaneknekda ken mariknada ti ayat ti Mangisalakan para kadakuada.