« ថ្ងៃទី ៣០ ខែ កញ្ញា–ថ្ងៃទី ១៣ ខែ តុលា ។ អេភេសូរ ៖ ‹ ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ៣០ ខែ កញ្ញា–ថ្ងៃទី ១៣ ខែ តុលា ។ អេភេសូរ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០១៩
ថ្ងៃទី ៣០ ខែ កញ្ញា–ថ្ងៃទី ១៣ ខែ តុលា
អេភេសូរ
« ប្រយោជន៍នឹងនាំឲ្យពួកបរិសុទ្ធបានគ្រប់លក្ខណ៍ឡើង »
តើបងប្អូនមើលឃើញទំនាក់ទំនងរវាងសារលិខិតនៅក្នុងសន្និសីទទូទៅ និងសំបុត្ររបស់ប៉ុលទៅកាន់ពួកអេភេសូរឬទេ ?
កត់ត្រាចំណាប់អារម្មណ៍របស់បងប្អូន
នៅពេលដំណឹងល្អចាប់ផ្ដើមផ្សាយទៅកាន់ក្រុងអេភេសូរ វាបានបណ្ដាលឲ្យ « កើតមានវឹកវរជាធំ » ( កិច្ចការ ១៩:២៣ ) នៅក្នុងចំណោមពួកអេភេសូរ ។ ជាងក្នុងមូលដ្ឋានដែលធ្វើរូបសំណាកព្រះដ៏ភ្លឺចិញ្ចែងសម្រាប់ឲ្យមនុស្សជឿលើព្រះផ្សេងៗមួយក្រុមបានឃើញថាគ្រីស្ទានគឺជាការគម្រាមគំហែងមួយចំពោះការរស់នៅរបស់ពួកគេ មិនយូរប៉ុន្មាន « ពួកគេមានពេញដោយសេចក្ដីកំហឹង… នោះក៏កើតមានវឹកវរពេញក្នុងក្រុង » ( សូមមើល កិច្ចការ ១៩:២៧–២៩ ) ។ សូមនឹកស្រមៃថា បងប្អូនជាសមាជិកដែលផ្លាស់ប្រែចិត្តជឿថ្មីមួយរូបមកក្នុងដំណឹងល្អនៅក្នុងស្ថានភាពដូច្នោះ ។ មានពួកអេភេសូរជាច្រើនបានទទួលយក ហើយរស់នៅតាមដំណឹងល្អនៅក្នុងចំណោម « ពួកបះបោរ » ( កិច្ចការ ១៩:៤០ ) ហើយប៉ុលបានអះអាងនឹងពួកគេថា « ព្រះគ្រីស្ទ …គឺជាស្ពានមេត្រីនៃយើងរាល់គ្នា » ( អេភេសូរ ២:១៣–១៤ ) ។ ពាក្យទាំងនេះ ព្រមជាមួយនឹងការអញ្ជើញរបស់គាត់ឲ្យ « ចូរខំដកគ្រប់ទាំងសេចក្ដីជូរ ល្វីង ក្ដៅក្រហាយ កំហឹង ឡូឡា ជេរប្រមាថ និងគ្រប់ទាំងសេចក្ដីអាក្រក់ចេញពីពួកអ្នករាល់គ្នា » ( អេភេសូរ ៤:៣១ ) ហាក់ដូចជាចំពេល និងមានការលួងលោមចិត្តក្នុងពេលឥឡូវនេះ ក៏ដូចជាពីជំនាន់នោះដែរ ។ ចំពោះពួកអេភេសូរ និងបងប្អូន កម្លាំងដើម្បីប្រឈមនឹងមារសត្រូវកើតមាន « ក្នុងព្រះអម្ចាស់ដោយឬទ្ធិបារមីរបស់ព្រះចេស្ដាទ្រង់ » ( អេភេសូរ ៦:១០–១៣ ) ។
គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន
តើព្រះបាន « ជ្រើសរើស » ឬ « តម្រូវទុកជាមុន » ឲ្យកូនចៅរបស់ទ្រង់មួយចំនួនដើម្បីត្រូវបានសង្គ្រោះដែរឬទេ ?
ប៉ុលបាននិយាយអំពីពួកបរិសុទ្ធដែលត្រូវបាន « តម្រូវទុកជាមុន » ដោយព្រះ ហើយទ្រង់បាន « ជ្រើសរើស…តាំងពីមុនកំណើតលោកិយមកម្ល៉េះ » ដើម្បីធ្វើជារាស្ត្រទ្រង់ ។ ដូចប្រធាន ហិនរី ប៊ី អាវរិង បានកត់សម្គាល់ កត្តាដែលមនុស្សជាច្រើនរស់នៅ និងស្លាប់ទៅវិញដោយគ្មានឱកាសទទួលដំណឹងល្អ បានបណ្ដាលឲ្យមនុស្សមួយចំនួន « សរុបសេចក្ដីថា ព្រះត្រូវតែកំណត់ទុកជាមុនថាកូនចៅរបស់ទ្រង់រូបណាដែលទ្រង់នឹងសង្គ្រោះ ហើយធ្វើឲ្យដំណឹងល្អមានសម្រាប់ពួកគេ ខណៈដែលអ្នកដែលពុំបានស្ដាប់ឮដំណឹងល្អ គឺមិនត្រូវបាន ‹ ជ្រើសរើស › ឡើយ ។ ប៉ុន្តែ…ផែនការរបស់ព្រះគឺមានក្ដីស្រឡាញ់ដ៏មហិមាជាងគ្រាន់តែធ្វើដូច្នោះ ។ ព្រះវរបិតាសួគ៌របស់យើងមានព្រះទ័យអន្ទះសារដើម្បីប្រមូលផ្ដុំ ហើយប្រទានពរដល់គ្រួសារទាំងមូលរបស់ទ្រង់ » ( « Gathering the Family of God » Ensign ឬ Liahona ខែឧសភា ឆ្នាំ ២០១៧ ទំព័រ ២០–២១ ) ។ កូនចៅទាំងអស់របស់ព្រះអាចទទួលយកដំណឹងល្អ ហើយនឹងពិធីបរិសុទ្ធនានាដោយសារតែកិច្ចការនេះបានធ្វើឡើងសម្រាប់មរណជននៅក្នុងព្រះវិហារបរិសុទ្ធ ។
ទោះបីជាពុំមាននរណាម្នាក់ត្រូវបានតម្រូវទុកជាមុនថានឹងត្រូវបានសង្គ្រោះ ឬពុំបានសង្គ្រោះក្ដី ក៏វិវរណៈសម័យទំនើបបង្រៀនថា មនុស្សមួយចំនួនត្រូវបានជ្រើសរើស ឬ « តែងតាំងពីមុនផែនដី » នៅក្នុងពិភពមុនឆាកជីវិតនេះដើម្បីបំពេញការទទួលខុសត្រូវជាក់លាក់នានានៅលើផែនដីនេះ ។ រឿងនេះរាប់បញ្ចូលទាំងការទទួលខុសត្រូវថាពួកបរិសុទ្ធថ្ងៃចុងក្រោយទាំងអស់ត្រូវចែកចាយដំណឹងល្អ ហើយជួយដល់កូនចៅទាំងអស់របស់ព្រះដែលនៅទាំងសង្ខាងនៃវាំងននឲ្យមករកព្រះគ្រីស្ទ ។ ( សូមមើល « Foreordination » ប្រធានបទដំណឹងល្អ topics.lds.org ) ។
ព្រះនឹង « បំព្រួមគ្រប់ទាំងអស់ក្នុងព្រះគ្រីស្ទ » ។
តើបងប្អូនធ្លាប់ងឿងឆ្ងល់អំពីថាតើ « គ្រាកាន់កាប់ត្រួតត្រានៃពេលពេញកំណត់ » ជាអ្វី ឬថាតើឃ្លា « បំព្រួមគ្រប់ទាំងអស់ក្នុងព្រះគ្រីស្ទ » មានន័យយ៉ាងណាទេ ? នៅពេលបងប្អូនពិចារណាអំពីឃ្លាទាំងនេះ សូមអានបទគម្ពីរដូចខាងក្រោម ៖ អេភេសូរ ៤:១៣; នីហ្វៃទី ២ ៣០:៧–៨; គោលលទ្ធិ និង សេចក្ដីសញ្ញា ១១០:១១–១៦; ១១២:៣០–៣២; ១២៨:១៨–២១ ។ បងប្អូនអាចនឹងទទួលអារម្មណ៍បំផុសគំនិតឲ្យសរសេរការពន្យល់ផ្ទាល់ខ្លួនអំពីឃ្លាទាំងនេះ ។
សាសនាចក្រត្រូវបានស្ថាបនាឡើងនៅលើពួកសាវក និងពួកព្យាការី ហើយព្រះយេស៊ូវគ្រីស្ទគឺជាថ្មជ្រុងយ៉ាងឯក ។
ការអាននូវការបង្រៀនរបស់ប៉ុលអំពីពួកសាវក និងពួកព្យាការី អាចជួយបងប្អូនឲ្យរៀបចំខ្លួនស្ដាប់សារលិខិតរបស់ពួកសាវក និងពួកព្យាការីសម័យទំនើបអំឡុងសន្និសីទទូទៅ ។ ស្របតាម អេភេសូរ ២:១៩–២២; ៤:១១–១៦ ហេតុអ្វីបានជាយើងមានពួកព្យាការី និងពួកសាវក ? តើការបង្រៀនរបស់ពួកគាត់បានជួយបងប្អូនកុំឲ្យ « ត្រូវខ្យល់នៃសេចក្ដីបង្រៀនបោក » យ៉ាងដូចម្ដេច ?
សូមមើលផងដែរ កិច្ចការ ៤:១០–១២ ។
ព្រះអម្ចាស់ហៅពួកព្យាការី និងពួកសាវកឲ្យដឹកនាំសាសនាចក្ររបស់ទ្រង់ ។
ខ្ញុំអាចពង្រឹងទំនាក់ទំនងគ្រួសារខ្ញុំ ។
នៅពេលបងប្អូនអាន អេភេសូរ ៥:២១–៦:៤ តើមានគំនិតអ្វីខ្លះកើតមានក្នុងគំនិតបងប្អូនអំពីរបៀបដើម្បីពង្រឹងទំនាក់ទំនងគ្រួសាររបស់បងប្អូន ?
វាសំខាន់ដើម្បីកត់ចំណាំថា ពាក្យសម្ដីរបស់ប៉ុលនៅក្នុង អេភេសូរ ៥:២២ ត្រូវបានកត់ត្រាទុកនៅក្នុងបរិបទនៃទំនៀមទម្លាប់សង្គមនៃសម័យរបស់គាត់ ។ ពួកព្យាការី និងពួកសាវកនៅសព្វថ្ងៃនេះបង្រៀនថា បុរសគឺពុំមែនធ្វើមេលើស្ត្រីទេ ហើយថាប្ដីប្រពន្ធគួរតែជា « ដៃគូស្មើភាពគ្នា » ( សូមមើល « ក្រុមគ្រួសារ ៖ ការប្រកាសដល់ពិភពលោក » Ensign ឬ Liahona ខែ ឧសភា ឆ្នាំ ២០១៧ ទំព័រ ១៤៥ ) ។ ទោះជាដូច្នោះក្ដី បងប្អូននៅតែអាចរកឃើញដំបូន្មានស្រដៀងគ្នានៅក្នុង អេភេសូរ ៥:២៣–៣៣ ជាពិសេសបើបងប្អូនបានរៀបការហើយ ឬត្រៀមខ្លួនដើម្បីរៀបការ ។ ឧទាហរណ៍ តើព្រះគ្រីស្ទបង្ហាញសេចក្ដីស្រឡាញ់របស់ទ្រង់ចំពោះពួកបរិសុទ្ធយ៉ាងដូចម្ដេច ? តើការណ៍នេះបញ្ជាក់អំពីរបៀបដែលស្វាមីគួរប្រព្រឹត្តចំពោះភរិយារបស់ពួកគេយ៉ាងណា ? តើមានសារលិខិតអ្វីខ្លះដែលបងប្អូនរកឃើញសម្រាប់ខ្លួនឯងនៅក្នុងបទគម្ពីរទាំងនេះ ?
ការពាក់ « គ្រប់គ្រឿងសឹករបស់ព្រះ » នឹងជួយការពារខ្ញុំពីសេចក្ដីអាក្រក់ ។
នៅពេលបងប្អូនអាន អេភេសូរ ៦:១០–១៨ សូមពិចារណាថាហេតុអ្វីបានជាប៉ុលបានដាក់ឈ្មោះគ្រឿងសឹកនីមួយៗយ៉ាងដូច្នោះ ។ តើ « គ្រប់គ្រឿងសឹករបស់ព្រះ » នឹងការពារយើងពីអ្វី ? តើបងប្អូនអាចធ្វើអ្វីខ្លះដើម្បីពាក់គ្រប់បំណែកនៃគ្រឿងសឹកឲ្យបានកាន់តែពេញលេញជារៀងរាល់ថ្ងៃ ?
សូមមើលផងដែរ នីហ្វៃទី ២ ១:២៣; គោលលទ្ធិ និង សេចក្ដីសញ្ញា ២៧:១៥–១៨ ។
គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារ
នៅពេលបងប្អូនអានគម្ពីរជាមួយនឹងគ្រួសាររបស់បងប្អូន នោះព្រះវិញ្ញាណអាចជួយបងប្អូនឲ្យស្គាល់ថាគោលការណ៍អ្វីដែលត្រូវគូសបញ្ជាក់ និងពិភាក្សាដើម្បីបំពេញតាមតម្រូវការរបស់គ្រួសារបងប្អូន ។ នេះគឺជាការផ្ដល់យោបល់មួយចំនួន ៖
តាមរយៈការស្ដារឡើងវិញនៅថ្ងៃចុងក្រោយ ព្រះកំពុងប្រមូលផ្ដុំអ្វីៗទាំងអស់មកជាតែមួយ រួមទាំងគ្រប់គោលការណ៍ និងពិធីបរិសុទ្ធទាំងឡាយនៃដំណឹងល្អ ។ ដើម្បីបង្ហាញអំពីគំនិតនេះ បងប្អូនអាចលាក់វត្ថុ ឬឃ្លាដែលបានសរសេរទុក នៅជុំវិញផ្ទះរបស់បងប្អូនដែលតំណាងឲ្យអ្វីៗដែលបានស្ដារឡើងវិញនៅជំនាន់របស់យើង ( ដូចជា កូនសោបព្វជិតភាព ពិធីបរិសុទ្ធនៅក្នុងព្រះវិហារបរិសុទ្ធ ព្រះគម្ពីរ និង អំណោយទានខាងវិញ្ញាណ ) ។ សមាជិកគ្រួសារអាចស្រាវជ្រាវរកវា ហើយ « ប្រមូលផ្ដុំ » វាមកជុំគ្នា ។ ហេតុអ្វីក៏យើងមានអំណរគុណដើម្បីរស់នៅក្នុង «សម័យកាន់កាប់ត្រួតត្រានៃពេលពេញកំណត់ » នេះដូច្នេះ ?
សូមអញ្ជើញសមាជិកគ្រួសារឲ្យចែកចាយពីបទពិសោធន៍ទាំងឡាយដែលពួកគេបានទទួលអារម្មណ៍នៃសេចក្ដីស្រឡាញ់ និងសេចក្ដីមេត្តាករុណារបស់ព្រះ និងព្រះយេស៊ូវគ្រីស្ទ ដែលបានពិពណ៌នានៅក្នុងខគម្ពីរទាំងនេះ ។
គ្រួសាររបស់បងប្អូនអាចនឹងរីករាយក្នុងការសង់ជញ្ជាំងដោយដាក់តម្រៀបខ្នើយ ឬវត្ថុផ្សេងទៀតដែលបងប្អូនមាននៅផ្ទះ បន្ទាប់មករំលំវាចុះ ។ តើជញ្ជាំងប្រភេទណា ដែលបានញែកមនុស្សចេញពីគ្នាសព្វថ្ងៃនេះ ? តើព្រះយេស៊ូវ « រុះជញ្ជាំងដែលខាន់កណ្ដាលយើង » និងព្រះដោយរបៀបណា ?
គ្រួសាររបស់បងប្អូនអាចធ្វើ « គ្រឿងសឹកនៃព្រះ » ខ្លួនឯងដោយប្រើវត្ថុនៅក្នុងផ្ទះ ។ វីដេអូ « គ្រឿងសឹកនៃព្រះ » ( LDS.org ) អាចជួយសមាជិកគ្រួសារឲ្យមើលឃើញនឹងភ្នែកនូវគ្រឿងសឹកនេះ ហើយពួកគេអាចរកឃើញការពន្យល់សាមញ្ញៗនៅក្នុង « The Whole Armor of God » ( Friend ខែ មិថុនា ឆ្នាំ ២០១៦ ទំព័រ ២៤–២៥ ) ។ តើបំណែកនីមួយៗនៃគ្រឿងសឹកការពារយើងខាងវិញ្ញាណយ៉ាងដូចម្ដេច ? តើយើងអាចធ្វើអ្វីខ្លះដើម្បីជួយគ្នាទៅវិញទៅមកឲ្យ « ពាក់គ្រប់គ្រឿងសឹករបស់ព្រះ » ( អេភេសូរ ៦:១១ ) ជារៀងរាល់ថ្ងៃ ?
សម្រាប់គំនិតបន្ថែមដើម្បីបង្រៀនកុមារ សូមមើល គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់ថ្នាក់អង្គការបឋមសិក្សា ។
ការកែលម្អដល់ការសិក្សាផ្ទាល់ខ្លួន
ចូរឲ្យព្រះវិញ្ញាណដឹកនាំការសិក្សារបស់បងប្អូន ។ សូមរំញោចដឹងពីព្រះវិញ្ញាណ នៅពេលទ្រង់ដឹកនាំបងប្អូនឆ្ពោះទៅរកអ្វីៗដែលបងប្អូនចាំបាច់ត្រូវរៀនជារៀងរាល់ថ្ងៃ ទោះជារឿងនេះនាំបងប្អូនឲ្យសិក្សាប្រធានបទមួយដែលបងប្អូនពុំបានរៀបចំពីដំបូងក្ដី ។
ការពាក់គ្រប់គ្រឿងសឹកនៃព្រះអាចការពារយើងខាងវិញ្ញាណ ។