“Nobiembre 18–24. Santiago: ‘Managtungpalkay Koma iti Sao ket Saan Laeng a Managdengngeg’”Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Nobiembre 18–24. Santiago,” Umaykayo, Sumurot Kaniak—Para kadagiti Indibidual ken Pamilia: 2019
Ni Abraham kadagiti Kapatagan ti Mamre, ni Grant Romney Clawson
Nobiembre 18–24
Santiago
Santiago: “Managtungpalkay koma iti Sao ket Saan Laeng a Managdengngeg”
Bayat ti panangbasam iti Surat ni Santiago, ania dagiti balikas ken ragup dagiti balikas a nalawag kenka, ket isuratmo ida? Kasano a naguyugoyka nga agbiag kadagitoy a kinapudno?
Isuratmo Dagiti Impresionmo
No dadduma maysa laeng a bersikulo ti nasantuan a kasuratan ket makapagbalbaliw iti lubong. Santiago 1:5 ket kasla simple lang a balakad—no kasapulam ti kinasirib, agdawat iti Dios. Ngem idi basaen ti 14-ti tawenna a Joseph Smith dayta a bersikulo, “a kas man la simmeksek a napnuan bileg iti amin a rikna ti puso[na]” (Joseph Smith—Pakasaritaan 1:12). Kasta a naparegta,nagtignay ni Joseph iti balakad ni Santiago ket nagdawat iti kinasirib manipud iti Dios babaen ti kararag. Ket kinapudnona sikakaasi ti Dios, a nangted ken niJoseph iti maysa kadagiti kangrunaan a kinanakaskasdaaw a nailangitan nga isasarungkar iti pakasaritaan ti tao—ti Umuna a Parmata. Binaliwan daytoy a parmata ti turong ti biag ni Joseph ket nangidalan iti Pannakaisubli ti Simbaan ni Jesucristo iti rabaw ti daga. Nabendisionantayo amin iti agdama gapu ta nagbasa ket inyakem ni Joseph Smith ti Santiago 1:5.
Ania ti masarakam bayat ti panangadal iti Surat ni Santiago? Nalabit a bersikulo wenno dua ket mabalbaliwannaka wenno maysa a tao nga ay-ayatem. Masarakam ti pannarabay bayat ti panagkalikagummo nga ipatungpal ti misionmo iti biag. Masarakam ti pammaregta nga agsao a siaasi wenno agbalin a naan-anus. Ania man a makaparegta kenka,ipalubosmo dagitoy a balikas a “sumrek … iti amin a rikna ti puso[m].” Laglagipen nga “awatenyo a sieemma ti … sao,” kas insurat ni Santiago, ”isu a mannakabalin a mangisalakan kadagiti karkararua” (Santiago 1:21).
Dagiti Kapanunotan para iti Bukod a Panagadal iti Nasantuan a Kasuratan
Asino idi ni Santiago?
Gagangay a pinati ti otor ti Surat ni Santiago a ti anak a lalaki ni Maria, ti ina ni Jesucristo, ket ngarud kabsat ti Mangisalakan. Ni Santiago ket nadakamat iti Mateo 13:55; Marcos 6:3; Dagiti Aramid 12:17; 15:13; 21:18; ken Taga Galacia 1:19; 2:9. Agparang manipud kadagitoy a nasantuan a kasuratan a ni Timoteo ket maysa a lider idi iti Simbaan iti Jerusalem, ket naawagan kas maysa nga Apostol (kitaen iti Taga Galacia 1:19).
Naanus a panagandur ti mangiturong iti kinaan-anay
“Ti agur-uray ket mabalin a narigat,” insuro ni Presidente Dieter F. Uchtdorf. “Kayattayo no ania ti kayattayo, ket kayattayo itan. Ngarud, ti nalawag a kapanunotan panggep ti kinaanus ket kasla saan a nasayaat” (“Agtultuloy iti Kinaanus,” Ensign wenno Liahona, Mayo 2010, 56). Kalpasan ti panangbasam iti Santiago 1:2–4; 5:7–11, ania ti masaom iti kangrunaan a mensahe ni Santiago maipapan iti kinaanus? Ania dagitin nayon a nauneg a pannakaammo ken pannakaawat nga adda kenka kalpasan ti panangbasam iti dadduma pay a mensahe ni Presidente Uchtdorf? Kasano a maipakitam iti Apo a sitatallugodka nga agbalin a naanus?
Santiago 1:3–8, 21–25; 2:14–26; 4:17
Ti pammati ket agkasapulan iti panagtignay.
Kasano nga ammom no addaanka iti pammati ken ni Jesucristo? Kasano dagiti aramidmo ket iladawanda ti pammatim iti Dios? Panunotem ti maipapan kadagitoy a saludsod bayat ti panangadalmo kadagiti pannursuro ni Santiago maipapan iti pammati. Mabalin a makaparegta a basaen pay ti maipapan kada Abraham ken ni Rahab, dua a pagwadan a nadakamat ni Santiago (kitaen iti Genesis 22:1–12; Josue 2). Kasano nga impakitada nga adda pammatida iti Dios?
Iti panangbasbasam iti Santiago 1:3–8, 21–25; 2:14–26; 4:17 ket mabalin a makatulong kenka a mangpanunot kadagiti wagas a mabalin a nasaysayaatka a mangipatungpal iti balikas. Isuratmo ti aniaman nga impresion nga maawatmo, ket agaramid kadagiti plano nga agtignay kadakuada.
Kitaen met iti Alma 34:27–29; 3 Nephi 27:21.
Dagiti balikas nga isaok ket adda bilegda a mangpasakit wenno mangbendision kadagiti dadduma.
Kadagiti nabaknang a panangiladawan nga inaramat ni Santiago iti pakabuklan ti suratna, sumagmamano kadagiti nalawag a pagsasao ket masarakan iti balakadna maipapan iti lengguahe. Ibilangyo ti panangted iti maysa a listaan ti amin a wagas nga inladawan ni Santiago a ti pagsasao wenno ngiwat. Ania ti isingasing ti tunggal panangidasig wenno ladawan maipapan kadagiti balikas nga isaotayo? Mangpanunotka iti maysa a banag a maaramidmo a mangbendision iti maysa a tao kadagiti balikasmo (kitaen iti DkK 108:7).
Kas disipulo ni Jesucristo, ikagumaanak nga ayaten amin a tattao, ania man dagiti kasasaadda.
Binallaagan ni Santiago dagiti Santo partikular iti panangbusor iti panangpabpabor dagiti babaknang ken panangum-umsi dagiti nakurapay, ngem ti ballaagna ket mayaplikar iti ania man a panangayon wenno dakes a panangipapan nga adda kadatayo a maiturong kadagiti dadduma. Mabalin a narigat a bigbigen dagiti negatibo a wagastayo a mangkeddeng iti dadduma, ngem inkari ti Apo a tulungannatayo a kitaen no sadino ti kasapulantayo a padur-asen (kitaen iti Ether 12:27). Bayat ti nainkakararagan a panangadalmo iti Santiago 2:1–9, sapulen ti bukodmo a puso ken denggem dagiti parikna ti Espiritu Santo. Makariknaka kadi kadagiti ania man a panagbalbaliw a kasapulam nga aramiden iti wagas a tratuem wenno panunoten dagiti dadduma?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Ibilang ti panangbasa iti Santiago 1:5 ken panangawis iti maysa a miembro ti pamilia tapno manggupgop iti pakaammuan iti Umuna a Parmata (kitaen iti Joseph Smith—Pakasaritaan 1:8–13 wenno ti video “Kiddawem ti Dios: Joseph Smith iti Umuna a Parmata” iti LDS.org). Awisem ti sumagmamano a miembro ti pamilia a mangibinglay iti pammaneknekda ken ni Propeta Joseph Smith ken dagiti padas idi nasungbatan ti Nailangitan nga Ama dagiti kararagda.
Ibilangmo nga agbuybuya kadagiti video “Pudno a Kristianismo” (LDS.org) a mainaig kadagitoy a bersikulo. Kalpasanna basaem ti kaipapanan ti natarnaw a relihion babaen ken ni Santiago ket paglilinnawagan dagiti wagas ti pamiliayo nga ipakat a natartarnaw ti relihionyo.
Santiago 3 iramanna dagiti adu a ladawan a mabalin a mangparegta kadagiti nakallalagip nga object lessons a mangtulong iti pamiliam a lagipen ti naasi a panagsao. Kas pagarigan, mabalinyo a paglilinnawagan no kasano a ti bassit a parsiak ti beggang wenno posporo ket mabalin a mangparnuay iti dakkel nga apuy, ken dagiti miembro ti pamilia ket agpanunot kadagiti panawen idi maysa a nasabrak a balikas ket nakaigapu iti problema (kitaen iti bersikulo 5–6). Wenno mabalinmo ti mangted iti maysa a banag a naalsem wenno napait iti maysa a banag a gagangay a mausar iti taraon a nasam-it—kas lemon juice iti garapon ti diro ti uyokan. Mangiturong daytoy iti panaglilinnawag maipapan iti panangsigurado a dagiti balikastayo ket naamo ken mangitag-ay (kitaen dagiti verses 9–14).
Apay a nasken nga “umadani[kayo] iti Dios no sumangotayo iti sulisog?
Nalabit a ti panangibinglay iti bukod a padas maipapan iti panangawat iti bendision ti priesthood ket mangparegta kadagiti miembro ti pamilia a “dumawat iti pammendision ti priesthood no masapul[da] ti naespirituan a bileg” (Dallin H. Oaks, “Ti Kinapateg dagiti Bendision ti Priesthood,” New Era, Hulio 2012, 4).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Agtignay iti no ania ti nasursurom. Bayat ti panagadalmo, dumngeg kadagiti parikna manipud iti Espiritu maipapan iti no kasano nga ipakatmo ti no ania ti ad-adalem iti biagmo. Ikumitmo a suroten dagitoy a parikna ken agbiag a naan-anay iti ebanghelio. (Kitaen iti Panangisuro iti Wagas ti Mangisalakan, 35.)
Agdawat Koma iti Dios, ni John McNaughton