Hingpit nga Gugma, ni Del Parson

Disyembre 2–8

1–3 Juan; Judas

“Ang Dios Gugma”

Samtang magbasa ka sa mga Sulat [Epistola] ni Juan ug Judas, pagtinguha og inspirasyon mahitungod kon unsaon nga ikaw makapakita sa imong gugma ngadto sa Dios. Irekord kini nga mga impresyon ug buhata kini.

Irekord ang Imong mga Impresyon

Sa dihang si Juan ug Judas misulat sa ilang mga epistola [sulat], ang gitagna nga Apostasiya nagsingabut na, resulta sa hilabihan nga pagpanggukod ug sayop nga doktrina. Ang ubang mini nga mga magtutudlo mikwestyon gani kon nagpakita ba gayud si Jesukristo “sa unod” (pananglitan, tan-awa sa 1 Juan 4:1–3; 2 Juan 1:7). Mao nga si Apostol Juan misugod sa iyang unang sulat pinaagi sa paghatag sa iyang personal nga pagsaksi sa Manluluwas: “Mao kini ang pagpamatuod nga among ihatag bahin niana nga gikan sa sinugdanan, nga among nadungog, nga among nakita, nga among nasud-ong, ug nahikap sa among mga kamot, ang Pulong sa kinabuhi” (Joseph Smith Translation, 1 John 1:1 ). Apan tingali ang labing kusog nga mensahe sa mga sulat ni Juan mao ang gugma: Ang gugma sa Dios alang kanato ug ang atong gugma alang Kaniya ug sa Iyang tanang mga anak. Human sa tanan, personal nga nakasinati si Juan sa gugma sa Manluluwas (tan-awa sa Juan 13:23; 20:2), ug gusto siya nga ang mga Santos mobati sa samang gugma atubangan sa kalisud ug oposisyon, kay “ang kahadlok wala diha sa gugma, hinonoa ang hingpit nga gugma nagahingilin sa kahadlok” (1 Juan 4:18).

Mga Ideya alang sa Personal nga Pagtuon sa Kasulatan

1 Juan

Ang Dios kahayag, ug ang Dios gugma.

Kon kamo mopili og usa o duha ka pulong sa paghulagway sa Dios, unsa kaha kini? Sa iyang mga sulat, si Juan migamit sa mga pulong “kahayag” ug “gugma” (1 Juan 1:5; 4:8, 16). Samtang magbasa ka sa 1 Juan, palandunga ang kasinatian ni Juan sumala sa narekord sa Ebanghelyo ni Juan, ug ikonsiderar sa unsa nga paagi kini nga mga kasinatian nakatudlo ni Juan mahitungod sa kahayag ug gugma sa Dios. Unsa ang personal nga mga kasinatian ang nakatudlo nimo nga ang Dios mao ang kahayag ug gugma?

Tan-awa usab sa Juan 3:16–21; 15:9–17; 2 Nephi 26:24; Doktrina ug mga Pakigsaad 50:24; 88:6, 12–13; 93:36–37.

1 Juan 2:24–3:3

Makahimo ko nga mahimong sama ni Jesukristo.

Ang tumong ba nga mahimong sama ni Kristo ingon og taas kaayo nga tumong alang kanimo? Ikonsiderar ang makaawhag nga tambag ni Juan: “Mga anak, pabilin kamo diha kaniya; aron nga igapadayag na siya unya, kita may pagsalig … [ug] kita mahisama kaniya” (1 Juan 2:28; 3:2). Unsay imong nakita sa 1 Juan 2:24–3:3 nga makahatag nimo og pagsalig ug kahupayan isip disipulo ni Jesukristo? Samtang magtuon ka sa mga sulat ni Juan, pangitaa ang ubang mga baruganan o tambag nga makatabang nimo sa imong paningkamot nga mahimong mas sama ni Kristo.

Tan-awa usab sa Moroni 7:48; Doktrina ug mga Pakigsaad 88:67–68; “Becoming Like God,” Gospel Topics, topics.lds.org.

Hubad ni Joseph Smith, 1 Juan 4:12

“Walay tawo … nga nakakita sa Dios sa bisan unsa nga higayon”?

Ang Hubad ni Joseph Smith, sa 1 Juan 4:12 miklaro nga “walay tawo nga nakakita sa Dios sa bisan unsa nga higayon, gawas kanila kinsa nagtuo” ( tan-awa usab sa Juan 6:46; 3 Juan 1:11). Ang mga kasulatan nagrekord sa pipila ka higayon sa dihang ang Dios nga Amahan nagpakita sa Iyang kaugalingon ngadto sa matinud-anong mga indibidwal, lakip ni Juan mismo (tan-awa sa Pinadayag 4; tan-awa usab sa Mga Buhat 7:55–56; 1 Nephi 1:8; Doktrina ug mga Pakigsaad 76:23; Joseph Smith—Kasaysayan 1:16–17).

1 Juan 5

Kon magpakita ko og pagtuo kang Jesukristo ug matawo ko pag-usab, mabuntog nako ang kalibutan.

Ang ideya sa pagbuntog sa kalibutan makita sa makadaghan nga higayon sa mga sinulat ni Juan. Girekord ni Juan nga nag-ingon si Jesus, “Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan” (Juan 16:33). Ug sa Pinadayag 2–3, girekord ni Juan ang mga saad sa Ginoo ngadto niadtong kinsa mobuntog sa kalibutan. Unsa ang gisulti ni Juan mahitungod sa pagbuntog sa kalibutan sa 1 Juan 5:3–5? Samtang magbasa ka sa 1 Juan 5, pangitaa kon unsay angay natong buhaton sa pagbuntog sa kalibutan ug pag-angkon og kinabuhing dayon. Unsa kaha mahisama ang pagbuntog sa kalibutan diha sa imong kinabuhi? Makakita usab ikaw og mga tubag ug mga pagpasabut sa mensahe ni Elder Neil L. Andersen “Pagbuntog sa Kalibutan” (Liahona, Mayo 2017, 58–62).

Mga Ideya alang sa Pamilya nga Pagtuon sa Kasulatan ug Family Home Evening

Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:

1 Juan 2:8–11

Sa pagtabang sa imong pamilya nga mamalandong sa mga pagtulun-an ni Juan, pagpundok sa usa ka ngitngit nga kwarto ug pasinatia ang mga sakop sa pamilya sa kalainan tali sa paglakaw “diha sa kangitngit” ug paglakaw “diha sa kahayag.” Sa unsa nga paagi nga ang kasilag maoy nakaingon nga kita naglakaw sa kangitngit ug mahisukamod? Sa unsa nga paagi nga ang paghigugma sa usag usa makahatag og kahayag sa atong kinabuhi?

1 Juan 3:21–22

Unsa ang anaa niini nga mga bersikulo ang nagdugang sa atong “pagsalig” sa Dios ug sa atong abilidad sa pagdawat og mga tubag sa atong pag-ampo? Masiksik usab nimo ang “Pag-ampo” diha sa , Giya ngadto sa mga Kasulatan (scriptures.lds.org), o Gospel Topics (topics.lds.org).

1 Juan 5:2–3

Aduna bay bisan unsa nga sugo nga gikonsiderar nato nga “mabug-at” o lisud sundon? Sa unsa nga paagi nga ang atong gugma sa Dios makausab sa atong pagbati mahitungod sa Iyang mga sugo?

Ang pagtuman sa mga sugo sa Dios makatabang nato nga mabuntog ang kalibutan.

Judas 1:3–4

Aduna bay bisan unsa nga espirituhanong mga kakuyaw nga “nanagpakasulod” sa atong kinabuhi ug pamilya? (Judas 1:4). Unsaon nato pagsunod ang pahimangno ni Judas nga “makigbisog sa pagpanalipod sa tinuohan” ug mobatok niini nga mga kakuyaw? (Judas 1:3). Unsay atong mahimo sa pagsiguro nga ang “kalinaw, ug gugma, pagadayagaon” sa atong pamilya? (Judas 1:2).

Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.

Pagpalambo sa Personal nga Pagtuon

Pangitaa ang gugma sa Dios. Si Elder M. Russell Ballard mitudlo, “[Ang] ebanghelyo mao ang ebanghelyo sa gugma—gugma alang sa Dios ug alang sa usag usa” (“God’s Love for His Children,” Ensign, Mayo 1988, 59). Samtang magbasa ka sa mga kasulatan, ikonsiderar ang paghinumdom o pagmarka sa mga pulong nga nagpakita sa ebidensya sa gugma sa Dios.

Lakaw uban Nako, ni Greg K. Olsen