“Disyembre 23–29. Pinadayag 12–22: ‘Ang Magamadaugon Makapanag-iya Niining Maong Panulundon’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2019 (2019)
“Disyembre 23–29. Pinadayag 12–22,” Dali, Sunod Kanako—Alang sa mga Indibidwal ug mga Pamilya: 2019
Ang Mahangturong Siyudad, ni Keith Larson
Disyembre 23–29
Pinadayag 12–22
“Ang Magamadaugon Makapanag-iya Niining Maong Panulundon”
Samtang magbasa ka sa Pinadayag 12–22, pangita og kapareha tali sa unsay nakita ni Juan ug unsay imong nakita sa kalibutan karon. Tinguhaa ang espirituhanong giya aron ikaw matabangan sa pagpangita og personal nga mga leksyon samtang imong igugol ang imong kaugalingon sa pinulongan ni Juan nga dunay simbolo.
Irekord ang Imong mga Impresyon
Hunahunaa ang usa ka babaye “tungod sa kasakit sa pagbati.” Karon hunahunaa ang “usa ka dakong dragon nga mapula, nga may pito ka buok ulo ug napulo ka buok sungay” naglupad ibabaw sa babaye, nag-atang “aron iyang subaron ang bata inigkahimugso na niini” (Pinadayag 12:2–4). Aron masabtan kini nga mga bersikulo sa pinadayag ni Juan, hinumdumi nga kini nga mga imahe nagrepresentar sa Simbahan ug sa gingharian sa Dios ug sa kakuyaw nga ilang masinati. Alang sa mga Santos kinsa nakasinati og grabe nga pagpanggukod sa panahon ni Juan, ang kadaugan ibabaw sa dautan mora og dili posible. Kini nga kadaugan lisud usab nga lantawon sa panahon sama sa atoa, nga ang kaaway anaa “nakiggubat sa mga balaan” ug adunay “kagahum … ang tanang kabanayan ug katawhan ug pinulongan ug kanasuran” (Pinadayag 13:7). Apan sa katapusan sa pagpadayag ni Juan mahimayaong nagpakita nga ang maayo magpatigbabaw sa dautan. Ang Babilonia mapukan. Si Jesukristo maghari isip Hari sa mga Hari. “Ug iyang pagapahiran ang tanang luha,” ug ang matinud-anon maghari uban Kaniya ug “makapanag-iya niining maong panulundon” (Pinadayag 21:4, 7).
Mga Ideya alang sa Personal nga Pagtuon sa Kasulatan
Ang Gubat didto sa Langit nagpadayon dinhi sa yuta.
Wala kaayo kitay nahibaloan mahitungod sa Gubat sa Langit, apan adunay klaro nga mubo nga deskripsyon niini sa Pinadayag 12:7–11. Samtang magbasa ka niini nga mga bersikulo, handurawa ang imong kaugalingon nga isip kabahin niana nga premortal nga panagbangi. Unsa ang gitudlo niini nga mga bersikulo mahitungod kon unsaon nimo ug sa ubang matinud-anong mga anak sa Dios sa pagbuntog ni Satanas? Unsa ang gisugyot niini mahitungod kon unsaon nga mabuntog nimo siya sa atong panahon samtang magpadayon siya sa “pagpakiggubat batok [niadtong kinsa] nagahupot sa panghimatuod kang Jesukristo”? (bersikulo 17).
Tan-awa usab sa 1 Nephi 14:12–14; Giya ngadto sa mga Kasulatan, “Miguel,” “Gubat sa Langit.”
Kinsa ang anghel nga nakita ni Juan nga nagsangyaw sa ebanghelyo?
Usa sa katumanan sa panagna niini nga mga bersikulo nahitabo sa dihang si Moroni nagpakita ngadto ni Joseph Smith ug migiya kaniya ngadto sa mga rekord nga iyang gihubad ug gimantala nga ang Basahon ni Mormon. Kini nga basahon naglakip sa “walay katapusang Maayong Balita” nga gisugo nga atong isangyaw ngadto sa “tanang kanasuran ug kabanayan, ug pinulongan, ug katawhan” (Pinadayag 14:6).
Ang Ginoo midapit kanako sa pagpahilayo sa Babilonia ug sa mga sala niini.
Pinadayag 17–18 naglakip sa makahasol nga mga imahe nga naghulagway sa sala, materyalismo, ug mga kahigal sa Babilonia—ang simbolo sa pagkakalibutanon ug pagkadautan. Hunahunaa ang mga ehemplo sa mga kondisyon karon sa kalibutan nga pareha sa Babilonia, ug palandunga unsay imong mahimo sa pagsunod sa tambag sa “gomowa kamo” sa Babilonia ug “aron kamo dili makaapil sa iyang kasal-anan” (Pinadayag 18:4).
Ang tanang mga anak sa Dios pagahukman gikan sa basahon sa kinabuhi.
Pananglitan adunay tagsulat nga motanyag nga mosulat og usa ka basahon mahitungod sa imong kinabuhi. Unsa nga mga detalye o mga kasinatian ang imong gusto nga iapil? Kon ikaw nasayud nga ang imong umaabut nga mga aksyon irekord usab, sa unsang paagi nimo ipahimutang ang imong kinabuhi sa lahi nga paagi? Hunahunaa kini samtang magbasa ka mahitungod sa Adlaw sa Paghukom sa Pinadayag 20:12–15. Unsa ang imong gilauman nga isulat mahitungod nimo sa basahon sa kinabuhi?
Tan-awa usab sa Giya ngadto sa mga Kasulatan, “Basahon sa Kinabuhi.”
Kon ako matinud-anon, makadawat ko sa celestial nga himaya.
Sa pagtandi sa mga deskripsyon sa Babilonia, ang Pinadayag 21–22 naghulagway sa celestial nga himaya nga naghulat sa matinud-anong mga sumusunod ni Kristo. Unsa nga mga imahe, mga pulong, o mga saad niini nga kapitulo ang makapadasig nimo nga magpabilin nga matinud-anon bisan kon kini malisud?
Kini ba nga mga bersikulo nagpasabut nga wala nay laing bisan unsa nga dugang nga kasulatan gawas sa Biblia?
Ang pipila ka tawo mikutlo sa Pinadayag 22:18–19 isip rason sa pagsalikway sa Basahon ni Mormon ug ubang mga kasulatan sa ulahing mga adlaw. Bisan pa niana, si Elder Jeffrey R. Holland nagtudlo:
“May lig-on nga paghiusa karon ang mga iskolar sa Biblia nga kini nga bersikulo nagpasabut lamang sa basahon sa Pinadayag, dili sa tibuok Biblia. Kadtong mga iskolar sa atong panahon miila og daghang mga ‘basahon’ sa Bag-ong Tugon nga hapit kadaghanan nasulat human gayud sa pinadayag ni Juan nga nadawat didto sa Isla sa Patmos. …
“Apan may mas sayon nga tubag. … Ang tibuok Biblia sigun sa atong nahibaloan—usa ka koleksyon sa mga sinulat nga gihugpong sa usa ka libro—wala pa sa diha nga kanang mao nga bersikulo nasulat.” (“Ang Akong mga Pulong … dili Gayud Mohunong,” Liahona, Mayo 2008, 91).
Mga Ideya alang sa Pamilya nga Pagtuon sa Kasulatan ug Family Home Evening
Samtang magbasa ka sa mga kasulatan uban sa imong pamilya, ang Espiritu makatabang kanimo nga makahibalo unsa nga mga baruganan ang hatagan og gibug-aton ug hisgutan aron matubag ang mga panginahanglan sa imong pamilya. Ania ang pipila ka mga sugyot:
Ang pipila ka sakop sa pamilya tingali malingaw ug makabenepisyo sa pagdrowing og mga litrato sa mga panan-awon nga gihulagway sa Pinadayag. Pananglitan, magdrowing og mga litrato base sa Pinadayag 12 nga mahimong mosangpot sa mga panaghisgutan mahitungod sa Gubat sa Langit (tan-awa sa mga bersikulo 7–11). Ang mga litrato base sa Pinadayag 21 mahimong makaaghat og panagsultihanay mahitungod sa celestial nga gingharian. Mahimo usab nga imong ipakita ang litrato nga anaa niini nga outline ug mohangyo sa mga sakop sa pamilya sa pagpangita sa mga bersikulo sa Pinadayag 19 nga gipakita sa litrato.
Unsa kaha ang gipasabut sa mga pulong “ang pulong sa ilang pagpanghimatuod”? Sa unsa nga paagi nga ang atong pagpamatuod ni Jesukristo makatabang nato ug sa uban sa pagbuntog ni Satanas?
Unsa ang mga hunahuna sa mga sakop sa imong pamilya mahitungod sa nagpahisalaag nga mapintas nga mananap? Unsaon nato sa pag-ila ug paglikay sa pangilad nga atong makita sa kalibutan karon?
Sa unsa nga paagi nga ang 1 Nephi 22:26; Doktrina ug mga Pakigsaad 43:30–31 makatabang nato unsay ipasabut nga si Satanas “pagagapuson”?
Unsa ang kahulugan sa simbolo nga ang ngalan sa Manluluwas “anaa sa [atong] agtang”? (Pinadayag 22:4; tan-awa usab sa Pinadayag 13:16–17).
Alang sa dugang nga mga ideya sa pagtudlo sa mga bata, tan-awa sa outline karong semanaha diha sa Dali, Sunod Kanako—Alang sa Primary.
Pagpalambo sa Atong Pagtudlo
I-follow up ang mga pagdapit sa paglihok. “Kon imong i-follow up ang pagdapit sa paglihok, imong gipakita sa [imong mga sakop sa pamilya] nga nagpakabana ka kanila ug sa unsang paagi ang ebanghelyo nagpanalangin sa ilang mga kinabuhi. Imo usab silang gihatagan og mga oportunidad sa pagpaambit sa ilang mga kasinatian, nga naglig-on sa ilang pasalig ug nagtugot kanila sa pagsuporta sa usag usa sa pagsunod sa ebanghelyo” (Pagtudlo sumala sa Pamaagi sa Manluluwas, 35).
Si Kristo nagsul-ob og pula nga kupo nga naglingkod sa puti nga kabayo.