“Disyembre 23–29. Pinadayag 12–22: ‘Ang Magamadaugon Makapanag-iya Niining Maong Panulondon’” Dali, Sunod Kanako—Alang sa Primary: Bag-ong Tugon 2019 (2019)
“Disyembre 23–29. Pinadayag 12–22,” Dali, Sunod Kanako—Alang sa Primary: 2019
Ang Mahangturong Dakbayan, ni Keith Larson
Disyembre 23–29
Pinadayag 12–22
“Ang Magamadaugon Makapanag-iya Niining Maong Panulondon”
Samtang mangandam ka sa pagtudlo, gamita ang imong kasinatian sa pagtuon sa Pinadayag 12–22 sa personal o uban sa imong pamilya. Unsay kahulugan niini kanimo? Unsa nga mga impresyon ang imong nadawat? Hinumdumi nga ang mga kalihokan nga gisugyot dinhi mahimong mapahiangay sa mga bata sa bisan unsang edad.
Irekord ang Imong mga Impresyon
Awhaga ang Pagpaambit
Dapita ang mga bata sa pagpaambit nganong gusto nilang mopuyo pag-usab uban sa Langitnong Amahan. Sa tibuok leksyon, tabangi sila sa pagpangita og mga butang nga ilang mahimo aron mangandam sa pagbalik ngadto Kaniya.
Itudlo ang Doktrina
Mas Gagmay nga mga Bata
Mipakita ko og pagtuo diha ni Jesukristo didto sa premortal nga kinabuhi.
Sa Gubat sa Langit, ang matinud-anong mga anak sa Dios mibuntog ni Satanas pinaagi “sa pulong sa ilang pagpanghimatuod” ug pinaagi sa pagpakita og pagtuo diha ni Jesukristo (Pinadayag 12:11).
Posible nga mga Kalihokan
-
Aron matabangan ang mga bata nga makasabut unsay gipasabut sa pagsunod sa ehemplo sa usa ka tawo, pagpili og usa ka bata nga mahimong “pangulo”, ug hangyoa ang uban nga mosunod kaniya pinaagi sa pagbuhat sa bisan unsa nga iyang buhaton. Dayon tuguti ang ubang mga bata nga mahimong lider. Basaha ang Pinadayag 12:7–11 ngadto sa mga bata ug ipasabut nga sa wala pa kita matawo, mipili kita sa pagsunod ni Jesus ug dili ni Satanas.
-
Kantaha og dungan ang usa ka kanta mahitungod sa premortal nga kinabuhi, sama sa “Sundon Ko ang Plano sa Dios” (Songbook sa mga Bata, 86–87 ). Pangutana og sama sa, Unsay nahitabo sa langit sa wala pa kita natawo? Unsa ang atong gipili nga buhaton? (Tan-awa usab sa “Pasiuna: Ang Plano sa Atong Langitnong Amahan,” Mga Istorya sa Bag-ong Tugon, 1-5.)
Makapangandam ako alang sa Ikaduhang Pag-anhi ni Jesukristo pinaagi sa pagpili sa matarung.
Unsaon nimo pagtabang ang mga bata nga makasabut nga ang Ikaduhang Pag-anhi mahimong usa ka malipayon nga panghitabo alang kanato kon mosunod kita sa mga sugo ni Jesus?
Posible nga mga Kalihokan
-
Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug basaha ang Pinadayag 19:7. Ipasabut nga ang “kasal sa Kordero” nagrepresentar sa Ikaduhang Pag-anhi ni Jesukristo. Nganong “managhugyaw” man ang mga tawo? Pangutan-a ang mga bata kon nakatambong ba sila sukad og kasal. Sama sa unsa kadto? Nganong malipayon man ang mga tawo?
-
Ipaambit sa mga bata nganong nagpaabut ka sa Ikaduhang Pag-anhi ni Jesus. Mahimo usab ninyong kantahon og dungan ang usa ka kanta mahitungod sa Ikaduhang Pag-anhi, sama sa “Kon Siya Moanhi Pag-usab” (Songbook sa mga Bata, 46–47).
-
Dapita ang mga bata sa pagpaambit kon unsay ilang ginabuhat aron mangandam sa pagsimba sa Dominggo. Nganong buhaton man nato kining mga butanga sa dili pa kita moadto sa simbahan? Nganong kinahanglan man kitang mangandam sa Ikaduhang Pag-anhi ni Kristo? Sa pahina sa kalihokan karong semanaha, ipadrowing sa mga bata kon unsay ilang mabuhat aron mangandam sa Ikaduhang Pag-anhi.
Pinadayag 21:1, 3–4, 22–27; 22:1–2
Makapuyo ako sa celestial nga gingharian uban sa Langitnong Amahan ug sa mga tawo nga akong gimahal.
Sa katapusang duha ka mga kapitulo sa Pinadayag, si Juan migamit og matahum nga mga pinulongan aron sa paghulagway sa celestial nga himaya nga matagamtam sa mga matinud-anon.
Posible nga mga Kalihokan
-
Ipadrowing sa mga bata diha sa pisara ang kahoy nga gihulagway diha sa Pinadayag 22:2. Ipasabut nga kini nga kahoy mao ang kahoy sa kinabuhi, ug ang mga bunga niini nagrepresentar sa gugma sa Dios (tan-awa sa 1 Nephi 11:21–22). Hatagi ang mga bata og mga piraso sa papel nga giporma og bunga, ug dapita sila sa pagdrowing diha sa papel sa usa ka butang nga nakatabang nila nga mobati sa gugma sa Langitnong Amahan. Ipasabut nga kadtong mga matinud-anon mopuyo uban sa Langitnong Amahan sa celestial nga gingharian.
-
Ipaambit sa mga bata ang pipila ka hulagway o mga detalye nga gigamit ni Juan sa paghulagway sa celestial nga himaya (tan-awa sa Pinadayag 21:1, 3–4, 22–27; 22:1–2), ug dapita ang mga bata sa pagdrowing og mga hulagway niining mga butanga.
-
Kantaha og dungan ang usa ka kanta mahitungod sa plano sa Dios, sama sa “Sundon Ko ang Plano sa Dios” (Songbook sa mga Bata, 86–87). Dapita ang mga bata sa pagtino kon unsay ilang mabuhat aron makapuyo pag-usab uban sa Langitnong Amahan.
Itudlo ang Doktrina
Mas Dagko nga mga Bata
Mipakita ko og pagtuo diha ni Jesukristo didto sa premortal nga kinabuhi.
Ang mga bata nga imong gitudloan anaa sa kalibutan tungod kay sila adunay pagtuo diha ni Jesukristo sa premortal nga kinabuhi ug mipili sa pagsunod Kaniya.
Posible nga mga Kalihokan
-
Basaha og dungan ang Pinadayag 12:7–11, ug isulat diha sa pisara ang mga pulong nga dragon, Gubat sa Langit, gitambog, pagpanghimatuod, ug Kordero. Hangyoa ang mga bata sa pag-summarize niini nga mga bersikulo gamit ang mga pulong diha sa pisara. Unsay atong makat-unan mahitungod ni Jesukristo (ang Kordero) gikan niini nga mga bersikulo? Unsa ang atong makat-unan mahitungod sa mga pagpili nga atong gihimo didto sa premortal nga kinabuhi?
-
Diha sa pisara, paghimo og tulo ka kolum ug sulati kini og Sa wala pa kini nga kinabuhi, Panahon niini nga kinabuhi, ug Ang duha. Pag-andam og mga ginunting nga papel nga nagsulti og mga kamatuoran mahitungod sa premortal nga kinabuhi ug mahitungod sa mortal nga kinabuhi, sama sa Aduna kitay mga lawas, Wala kitay mga lawas, Nagpuyo kita sa presensya sa Dios, Nakiggubat kita kang Satanas, Mopakita kita og pagtuo diha ni Jesukristo, ug Mosunod kita sa plano sa Dios. Papuli-puliha ang mga bata sa pagkuha og usa ka ginunting nga papel ug sa pagdesisyon kon hain nga kolum kini nalakip. Ipaambit ang imong pagsalig nga ang mga bata makapadayon sa pagpakita og pagtuo diha kang Kristo.
Makapangandam ako alang sa Ikaduhang Pag-anhi ni Jesukristo pinaagi sa pagpili sa matarung.
Unsaon nimo pagtabang ang mga bata nga imong gitudloan nga makasabut nga ang Ikaduhang Pag-anhi ni Jesukristo mahimong usa ka malipayong panghitabo alang sa mga matarung?
Posible nga mga Kalihokan
-
Basaha og dungan ang Pinadayag 19:7–8, ug tabangi ang mga bata sa pagsabut sa mga simbolismo niini nga mga bersikulo—ang kasal mao ang Ikaduhang Pag-anhi sa Manluluwas, ang Kordero mao ang Manluluwas, ug ang Iyang asawa mao ang Simbahan (o kitang tanan). Unsaon sa mga tawo sa pagpangandam alang sa kasal? Unsa nga mga butang ang atong buhaton aron mangandam sa pag-anhi pag-usab sa Manluluwas?
-
Ribyuha ug isag-ulo ang Mga Artikulo sa Hugot nga Pagtuo 1:10 uban sa mga bata. Ipasabut nga kini nga artikulo sa hugot nga pagtuo naghulagway sa makahinam, mahimayaon nga mga panghitabo nga mahitabo sa pag-anhi pag-usab ni Jesus. Ipakita ang hulagway sa Ikaduhang Pag-anhi ni Jesus diha sa Dali, Sunod Kanako—Alang sa mga Indibidwal ug mga Pamilya, ug dapita ang mga bata sa pagdrowing kon sama sa unsa kaha ang Ikaduhang Pag-anhi ni Jesus.
Pinadayag 21:1, 3–4, 22–27; 22:1–2, 17
Makapuyo ako sa celestial nga gingharian uban sa Langitnong Amahan ug sa mga tawo nga akong gimahal.
Samtang mangandam ka sa pagtudlo mahitungod sa celestial nga gingharian, pamalandungi kon unsa ang kahulugan sa celestial nga gingharian nganha kanimo. Unsaon nimo sa pagpaambit sa imong pagpamatuod sa mga bata nga imong gitudloan?
Posible nga mga Kalihokan
-
Dapita ang mga bata sa pagsiksik sa mosunod nga mga bersikulo alang sa pipila ka mga imahe o mga detalye nga gigamit ni Juan sa paghulagway sa celestial nga himaya: Pinadayag 21:1, 3–4, 22–27; 22:1–2. Papilia sila og usa ka imahe o detalye nga ganahan nilang idrowing. Dayon mahimo nilang hisgutan ang ilang mga drowing diha sa klase. Awhaga sila sa pagpakita sa ilang mga drowing ngadto sa ilang mga pamilya sa panimalay.
-
Basaha og dungan ang Pinadayag 22:17, ug ipasabut nga ang pangasaw-unon kinsa miingon og “Umari ka” mao ang Simbahan. Unsa ang gusto natong dapiton sa uban nga ilang “ari-on [anhion]”? Unsa ang pipila ka maayo nga mga paagi sa pagdapit sa mga tawo aron “umari [moanhi]”?
Awhaga ang Pagkat-on diha sa Panimalay
Tabangi ang mga bata nga mangandam sa pagbasa sa Basahon ni Mormon sa sunod tuig pinaagi sa pagdapit kanila sa paghangyo sa usa ka sakop sa pamilya o higala sa pagpaambit og paborito nga bersikulo o istorya gikan sa Basahon ni Mormon.
Pagpalambo sa Atong Pagtudlo
Tudloi ang mga bata sa pagrekord sa mga impresyon. Kon makakat-on ang mga bata sa gawi sa pagrekord og mga impresyon, makatabang kini kanila sa pag-ila ug pagsunod sa Espiritu. Ang mga bata makarekord sa mga impresyon pinaagi sa pagmarka sa mga kasulatan, pagdrowing og mga hulagway, o paghimo og yano nga mga pagsulat diha sa journal. (Tan-awa sa Pagtudlo sumala sa Pamaagi sa Manluluwas, 30.)