Si Kristo Nagsangyaw sa Kalibutan sa Espiritu, ni Robert T. Barrett

Nobyembre 25–Disyembre 1

1 ug 2 Pedro

“Nagakalipay sa Labihan Gayud Nianang Dili Ikaasoyng Kalipay ug Puno sa Himaya”

Sugdi ang imong pagtuon sa 1 ug 2 Pedro pinaagi sa pag-ampo. Hinumdumi nga ang imong labing maayo nga pagpangandam sa pagtudlo moabut pinaagi sa imong mga kasinatian sa personal ug tibuok pamilya nga pagtuon.

Irekord ang Imong mga Impresyon

Awhaga ang Pagpaambit

Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya ug dapita ang mga bata sa pagsulti kanimo og butang nga ilang nahibaloan mahitungod kang Pedro. Pahinumdumi sila nga si Pedro ang nangulo sa Simbahan human nabanhaw si Jesus, ug ipasabut nga ang 1 Pedro ug 2 ni Pedro mao ang mga sulat gikan niya ngadto sa mga miyembro sa Simbahan sa iyang panahon.

Itudlo ang Doktrina

Mas Gagmay nga mga Bata

1 Pedro 1:6–7; 3:14

Mahimo akong maglipay bisan sa lisud nga mga panahon.

Ikonsiderar kon unsaon nimo sa pagtudlo niini nga mga bersikulo sa paagi nga makatabang sa mga bata nga modangup sa Manluluwas kon mag-atubang sila og kalisdanan.

Posible nga mga Kalihokan

• Dapita ang mga bata sa pagpaambit og lisud nga mga butang nga gilahutay ni Jesus, sama sa pagkalansang sa krus. Ipasabut nga kitang tanan adunay lisud nga mga panahon sa atong kinabuhi. Basaha og dungan ang 1 Pedro 1:6–7; 3:14, ug pagpaambit og kasinatian sa dihang nag-atubang ka og “[pagsulay] sa inyong pagtuo.” O mahimo nimong ipaambit ang pag-ampo ni Propeta Joseph Smith diha sa bilanggoan sa Liberty ug ang kahupayan nga gihatag sa Dios kaniya (tan-awa sa D&P 121:1–8; 123:17). Sa unsang paagi ang pagbaton og pagtuo diha ni Jesus makatabang kanato nga makakaplag og kalipay sa mga panahon sa kalisud?

  

  Si Joseph Smith sa Bilanggoan sa Liberty, ni Greg K. Olsen

• Kantaha og dungan ang usa ka kanta nga nagtudlo unsaon sa pagkakaplag og kalipay, sama sa “Sundon Ko ang Plano sa Dios” (Songbook sa mga Bata, 86–87).

1 Pedro 2:9–12

Gusto sa Langitnong Amahan nga mahimo akong ehemplo ngadto sa uban.

Si Pedro nagtudlo nga kita “mga katawhan … sa Dios” ug nga ang atong maayong mga buhat “magahimaya sa Dios.”

Posible nga mga Kalihokan

• Paghulagway og mga butang nga lahi kaayo sa ilang palibut, o pagpakita og mga hulagway niana nga mga butang. Pananglitan, ang usa ka templo lahi kaayo kay sa mga building libut niini o ang usa ka bukid tataw kaayo ibabaw sa walog. Ipasabut nga kon motuman kita sa mga sugo, makita kita nga lahi ug ang ubang tawo makakita sa atong mga ehemplo. Paghisgut og pipila ka “maayong binuhatan” nga imong nakita nga gibuhat sa mga bata. Ipasabut nga ang maayong binuhatan nga sama niini “magahimaya sa Dios”—makatabang kini sa uban nga mobati og dugang nga gugma sa Dios ug pagtinguha nga moserbisyo Kaniya.

• Kompletuha ang pahina sa kalihokan uban sa mga bata. Sa unsang paagi ang mga tawo nga ilang nakita sa hulagway naghimaya sa Dios?

1 Pedro 3:18–20; 4:6

Ang mga espiritu sa kalibutan sa espiritu makakat-on sa ebanghelyo.

Human Siya namatay, si Jesus miadto sa kalibutan sa espiritu ug mipadala sa matarung nga mga espiritu sa pagtudlo sa ubang mga espiritu kinsa wala pa makadawat sa ebanghelyo.

Posible nga mga Kalihokan

• Sultihi ang mga bata mahitungod sa usa ka tawo nga imong kaila kinsa namatay. Ipasabut nga kon ang mga tawo mamatay, ang ilang mga espiritu mobiya sa ilang mga lawas ug moadto sa kalibutan sa espiritu. Basaha ang 1 Pedro 3:19 ug ipasabut nga sa dihang namatay si Jesus, mibisita siya sa kalibutan sa espiritu. Didto, gihangyo Niya ang matarung nga mga espiritu sa pagtudlo sa ebanghelyo ngadto sa ubang mga espiritu kinsa wala pa makadawat sa ebanghelyo (tan-awa sa D&P 138:30).

• Pagbutang og usa ka laray sa mga lingkuranan sa tunga sa kwarto aron magsilbing babag. Hangyoa ang pipila sa mga bata sa pagbarug sa pikas bahin aron morepresentar sa mga espiritu diha sa kalibutan sa espiritu kinsa wala mabunyagi panahon sa ilang yutan-ong kinabuhi. Hatagi ang usa sa ubang mga bata og dakong yawe nga papel nga dunay nakasulat nga “bunyag alang sa mga patay”, ug hangyoa siya sa pagkuha sa babag. Dayon ipasabut nga ang mga miyembro sa Simbahan nga 12 anyos pataas mahimong moadto sa templo ug magpabunyag alang sa ilang mga katigulangan kinsa wala mabunyagi samtang anaa pa dinhi sa yuta. Dayon kini nga mga katigulangan mahimong modawat sa ebanghelyo didto sa kalibutan sa espiritu.

• Tabangi ang mga bata sa pagsulat og yano nga family tree.

Itudlo ang Doktrina

Mas Dagko nga mga Bata

1 Pedro 3:12–17; 4:13–14, 16

Makakaplag ko og kalipay ug kalinaw bisan sa panahon sa kalisud.

Ang mga bata nga imong gitudloan tingali nakasinati og mga pagsungog-sungog o pagbugal-bugal tungod sa ilang gituohan. Kini nga mga bersikulo makatabang kanila niana nga mga panahon.

Posible nga mga Kalihokan

• Pag-summarize og pipila ka istorya mahitungod ni Jesus nga gilutos, o pabasaha ang mga bata niini—tan-awa, pananglit, sa Mateo 12:9–14 o Lucas 22:47–54. Pangutan-a ang mga bata kon nakasulay na ba sila nga gisungog o gibugal-bugalan tungod kay nagsunod sila sa mga pagtulun-an sa ebanghelyo. Dayon basaha og dungan ang 1 Pedro 3:12–14; 4:13–14, 16, ug hangyoa ang mga bata sa pagpangita kon unsay gisulti ni Pedro mahitungod sa pag-antus “tungod sa … pagbuhat og matarung.” Nganong mahimo gihapon kitang magmalipayon kon ang ubang tawo magbugal-bugal kanato tungod sa pagbuhat sa matarung?

• Pagdapit og usa ka miyembro sa ward nga mopaambit og kasinatian sa dihang nakakaplag siya og kalipay o kalinaw panahon sa usa ka pagsulay, o ipaambit kon sa unsang paagi si Propeta Joseph Smith nakakaplag og kalinaw sa dihang anaa siya sa bilanggoan sa Liberty (tan-awa sa D&P 121:1–8; 123:17). Unsaon nato sa pagkakaplag og kalipay ug kalinaw panahon sa atong mga pagsulay?

1 Pedro 3:15

Kinahanglang andam ako kanunay nga mopaambit sa ebanghelyo.

Ang mga bata nga imong gitudloan makabaton og daghang mga oportunidad sa tibuok nilang kinabuhi sa pagtubag og mga pangutana gikan sa ubang tawo kabahin sa ilang gituohan. Ikonsiderar unsay imong mahimo sa pagtabang kanila nga “kinahanglang andam … kanunay sa pagtubag.”

Posible nga mga Kalihokan

• Paghisgut og panahon sa dihang dunay nangutana nimo mahitungod sa Simbahan, ug ihulagway kon gibati ba nimo nga andam sa pagtubag. Hangyoa ang mga bata sa paghisgut kabahin sa bisan unsang panahon sa dihang dunay mga tawo nga nangutana kanila mahitungod sa Simbahan. Basaha og dungan ang 1 Pedro 3:15. Unsaon nato pagsunod ang tambag ni Pedro niini nga bersikulo?

• Uban sa tabang sa mga bata, paghunahuna og pipila ka mga pangutana nga tingali ipangutana sa mga tawo mahitungod sa mga pagtulun-an sa Simbahan. Papuli-puliha ang mga bata sa pagpasabut kon unsaon nila sa pagtubag niini nga mga pangutana aron mahimo silang “andam … kanunay.”

1 Pedro 3:18–20; 4:6

Ang mga espiritu sa kalibutan sa espiritu makakat-on sa ebanghelyo.

Tabangi ang mga bata nga makasabut nga kon ang mga matarung mamatay, moadto sila sa kalibutan sa espiritu aron sa pagtudlo sa ebanghelyo ngadto niadtong wala makadawat niini samtang dinhi sa yuta.

Posible nga mga Kalihokan

• Pagdrowing diha sa pisara og lingin nga adunay linya diha sa tunga. Isulat ang Paraiso sa Espiritu sa usa ka tunga sa lingin ug Bilanggoan sa Espiritu sa pikas tunga. Dapita ang usa sa mga bata sa pagbasa sa 1 Pedro 3:18–20; 4:6 (tan-awa ang 1 Pedro 4:6 sa Giya ngadto sa mga Kasulatan, alang sa mga kausaban gikan sa Hubad ni Joseph Smith). Ipasabut nga sa dihang namatay si Jesus, ang Iyang espiritu miadto sa paraiso sa espiritu. Gisugo Niya ang matarung nga mga espiritu didto sa pagtudlo sa ebanghelyo ngadto sa mga espiritu diha sa bilanggoan sa espiritu.

• Pagdapit og usa ka ginikanan o magulang sa usa sa mga bata sa pagsulti mahitungod sa pag-adto sa templo ug sa pagkompleto sa buhat alang sa usa sa ilang mga katigulangan.

• Dapita ang mga bata sa pagsulat og yano nga family tree.

Awhaga ang Pagkat-on diha sa Panimalay

Dapita ang mga bata sa pagpaambit sa ilang family tree ngadto sa mga sakop sa ilang pamilya ug sa pagpangayo sa ilang tabang sa pagdugang og mga ngalan diha niini.

Pagpalambo sa Atong Pagtudlo

Tinguhaa ang pagsabut sa mga bata nga imong gitudloan. Nakaila ka sa mga bata nga imong gitudloan, busa usba ang mga ideya niini nga outline kon gikinahanglan aron matubag ang ilang mga panginahanglan. Mahimo nimong gamiton ang mga kalihokan nga gisugyot niini nga outline, dili lang kadtong gisulat alang sa edad sa grupo nga imong gitudloan. (Tan-awa sa Pagtudlo sumala sa Pamaagi sa Manluluwas, 7.)