Agdayawtayo Koma Kenkuana, ni Dana Mario Wood

Enero 9–15

Mateo 2; Lucas 2

Immaykami Agdaydayaw Kenkuana

Rugiam babaen ti panangbasam iti Mateo 2 ken Lucas 2, ipamaysam ti pasnekmo kadagiti ania man a naespirituan a pannakaammo ken pannakaawat a maawatmo. Makatulong kenka dagiti kapanunotan iti panagadal iti daytoy a balabala a mangilasin kadagiti napapateg ken adda pakainaiganna a pagbatayan kadagitoy a kapitulo.

Isuratmo dagiti Impresionmo

Manipud iti aldaw ti pannakayanakna, nalawag a saan a gagangay nga ubing ni Jesus. Saan laeng a ti baro a bituen kadagiti langit wenno ti naragsak nga immanghel a waragawag a namagbalin iti naidumduma a kinamaladaga ni Jesus. Daytoy pay ti kinapudno a dagiti kasta a nadumaduma a napudno a tattao—manipud iti nadumaduma a pagilian, propesion, ken nagtaudan—nariknada a dagus ti yaasidegda Kenkuana. Uray pay idi sakbay nga impeksana ti awisna nga “umayka, surotennak,” immayda (Lucas 18:22). Saan nga immay ti amin kenkuana, siempre. Adu dagiti saan a nangikankano Kenkuana, ken maysa a nailem a mangituray ti nangpanggep pay a mangpapatay Kenkuana. Ngem dagiti napakumbaba, natarnaw, napasnek nga agkalkalikagum iti kinalinteg ti nakakita Kenkuana no asino Isuna—ti naikari a Mesiasda. Ti debosionda ti mangparegta iti bukodtayo, ta ti “naimbag a damag ti naindaklan a rag-o” a naidanon kadagiti pastor ket para iti “amin a tao,” ken ti “Mangisalakan, a ni Cristo nga Apo” ket nayanak iti dayta nga aldaw iti amin kadatayo (kitaen iti Lucas 2:10–11).

Dagiti Kapanunotan para iti Bukod a Panagadal iti Nasantuan a Kasuratan

Lucas 2:1–7

Nayanak ni Jesucristo kadagiti nanumo a kasasaad.

Nupay ni Jesucristo ket addaan ti gloria iti Dios Ama “sakbay ti lubong” (Juan 17:5), Isu ket natallugod a mayanak iti nanumo a kasasaad ket agbiag kadatayo iti daga. Bayat ti panangbasam iti Lucas 2:1–7, utobem no ania ti isuro kenka daytoy a pakaammuan iti pannakayanakna maipapan Kenkuana? Padasem ti mangilasin kadagiti detalye wenno nalawag a pannakaammo ken pannakaawat [insight] iti daytoy nga estoria a saanmo a nadlaw idi. Kasano a ti panangilasin kadagitoy a banag ket mangapekto iti riknam a maiturong Kenkuana?

Kitaen met iti “The Christ Child” (video), ChurchofJesusChrist.org.

Mateo 2:1–12; Lucas 2:8–38

Adu dagiti saksi iti pannakayanak ni Cristo.

Idi maladaga ni Cristo adu dagiti tao a simmarungkar ken nagdaydayaw kenkuana manipud iti adu a nadumaduma ti kasasaad ti kagimongan ken propesion. Bayat ti panagsukisokmo kadagiti estoriada, ania ti masursurom maipapan kadagiti wagas ti panagdaydayaw ken panagsaksi ken ni Cristo?

Saksi ni Cristo	Ania ti masursurok maipanggep iti panagdaydayaw ken panagsaksi ken ni Cristo?
Saksi ni Cristo Dagiti Pastor (Lucas 2:8–20)	Ania ti masursurok maipanggep iti panagdaydayaw ken panagsaksi ken ni Cristo?
Saksi ni Cristo Simon (Lucas 2:25–35)	Ania ti masursurok maipanggep iti panagdaydayaw ken panagsaksi ken ni Cristo?
Saksi ni Cristo Ana (Lucas 2:36–38)	Ania ti masursurok maipanggep iti panagdaydayaw ken panagsaksi ken ni Cristo?
Saksi ni Cristo Masirib a Lallaki (Mateo 2:1–12)	Ania ti masursurok maipanggep iti panagdaydayaw ken panagsaksi ken ni Cristo?

Kitaen met iti 1 Nephi 11:13–23; 3 Nephi 1:5–21; “Shepherds Learn of the Birth of Christ” ken “The Christ Child Is Presented at the Temple” (dagiti video), ChurchofJesusChrist.org.

Mateo 2:13–23

Makaawat dagiti nagannak iti paltiing a mangsalaknib kadagiti pamiliada.

Iti kaano man saan koma a naaramid ni Jose no ania ti naipaaramid kenkuana—ti mangsalaknib ken Jesus iti kinaubingna—no awan ti tulong ti langit. Kas kadagiti Masirib a Lallaki, inawatna ti maysa a paltiing a nangballaag kenkuana iti peggad. Bayat ti panangbasam maipapan iti padas ni Jose iti Mateo 2:13–23, panunotem maipapan kadagiti pisikal ken naespirituan a pagpeggadan a pakaipasanguantayo iti agdama. Utoben dagiti padas idi nariknam ti pannarabay ti Dios iti panangsalaknibna kenka ken dagiti patpatgem. Ibilangmo ti panangiburay kadagitoy a padas iti dadduma. Ania ti maaramidmo tapno maawat ti kasta a pannarabay iti masakbayan?

Mainayon pay, mabalin nga ibilangmo ti panagbuya iti video “The First Christmas Spirit” (ChurchofJesusChrist.org) para iti pannakailadawan ti no ania ti narikna ni Jose bayat ti panangsangona ti pagrebbengan a panangaywan iti Anak ti Dios.

Lucas 2:40–52

Kas maysa nga agtutubo, impamaysa ni Jesus ti panagaramidna iti pagayatan ti Amana.

Kas maysa nga agtutubo, insuro ti Mangisalakan ti ebanghelio a sibibileg a nagsiddaawan uray pay dagiti mannursuro iti templo iti “saririt ti isipna ken kadagidi sungbatna” (Lucas 2:47). Ania ti masursurom manipud kadagitoy a bersikulo maipapan iti Mangisalakan kas maysa nga agtutubo? Kasano nga ikarkarigatan dagiti agtutubo nga am-ammom a mangaramid kadagiti “bambanag ti Ama[da]”? (Lucas 2:49). Kasano a nakatulong kenka dagiti agtutubo ken ubbing tapno manggun-od iti naun-uneg a pannakaawat iti ebanghelio? Ania pay ti masursurom manipud iti pagwadan ti panagubing ni Jesus iti Lucas 2:40–52 ken iti Patarus ni Joseph Smith, Mateo 3:24–26 (iti Pangiwanwan iti Nasantuan a Kasuratan)?

“Dikay ammo a masapul a sanguek dagiti bambanag ti Amak?” (Lucas 2:49).

Ania ti Patarus ni Joseph Smith?

Gapu ta “adu a nalawag ken napateg” a kinapudno ti napukaw manipud iti Biblia kadagiti napalabas a siglo (1 Nephi 13:28; kitaen met iti Moises 1:41), binilin ti Apo ni Joseph Smith nga agaramid iti naparegta a rebision ti Biblia, a maawagan iti Patarus ni Joseph Smith. Adu dagiti narebisar nga inaramid ti Propeta a nairaman iti apendiks iti Latter-day Saint nga edision dagiti nasantuan a kasuratan. Ti Patarus ni Joseph Smith ti Mateo 24, a maam-ammo a Joseph Smith—Mateo, masarakan iti Perlas a Kapatgan. Para iti ad-adu pay nga impormasion, kitaen iti “Patarus ni Joseph Smith (PJS)” iti Pangiwanwan iti Nasantuan a Kasuratan ken ti Gospel Topics article “Bible, Inerrancy of” (topics.ChurchofJesusChrist.org).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Lucas 2.Awisem dagiti miembro ti pamilia a pumili iti maysa a tao a nailadawan iti Lucas 2, basaen ti sumagmamano a bersikulo maipapan iti pannakipulapol dayta a tao iti Mangisalakan, ket ibinglay ti maysa a banag a nasursuroda a mangpapigsa iti pammatida ken ni Jesucristo. Aggigiddan a mangkanta iti “Marys Lullaby” wenno “The Nativity Song” (Children’s Songbook, 44–45, 52–53). Ania ti masursurotayo manipud kadagitoy a kanta maipanggep iti pannakayanak ti Mangisalakan?

Ibilangmo no kasano a mabalin a mapapintas ti artwork ti panaglilinnawag maipapan iti pannakayanak ni Cristo. (Kas pagarigan, kitaen iti Libro ti Arte iti Ebanghelio wenno history.lds.org/exhibit/birth-of-christ.)

Mateo 2:1–12.Ania ti masursurotayo maipanggep ti panangsapul ken panangsarak iti Mangisalakan manipud kadagiti Masirib a Lallaki?

Lucas 2:41–49.Ania ti “[aramid] a bambanag ti Ama”? (Lucas 2:49; kitaen iti Moises 1:39; Sapasap a Handbukk: Panagserbi iti Ti Simbaan ni Jesucristo dagiti Santo iti Ud-udina nga Aldaw, 1.2, ChurchofJesusChrist.org). Ania ti masursurom maipapan iti aramid a bambanag manipud iti Lucas 2:41-49? Ibilangmo ti panangisurat iti sumagmamano a wagas a mabalin a pakairamanan ti pamiliam iti aramid a bambanag ti Ama ket ipanmo dagitoy iti maysa a garapon. Kabayatan ti umay a lawas, no agsapsapul ti pamiliam kadagiti wagas a pangtulongan iti trabaho ti Nailangitan nga Ama, mabalinda ti pumili kadagiti kapanunotan manipud iti garapon. Planuem ti maysa a panawen a mabalinmonto ti mangibinglay kadagiti padasmo.

Lucas 2:52.Ania ti masursurotayo manipud iti Lucas 2:52 maipanggep iti no kasano a dimmur-as ni Jesus iti biagna? Ania dagiti bukod wenno sangapamiliaan a panggep a tun-oyen a mabalintayo nga ituding tapno dumakkeltayo “iti kinasirib ken kinatayag, ken iti parabur ti Dios ken tao”?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Stars Were Gleaming,” Children’s Songbook, 37.

Panangpadur-as iti Bukod a Panagadal

Usaren dagiti tulong iti panagadal iti nasantuan a kasuratan. Tapno magun-od dagiti nayon a pannakammo ken pannakaawat bayat ti panagadalmo kadagiti nasantuan a kasuratan, usarem dagiti resources kas iti footnotes, Topical Guide, Bible Dictionary, Pangiwanwan iti Nasantuan a Kasuratan, ken dadduma pay a tulong iti panangadal a masarakan iti ChurchofJesusChrist.org.

Immay ditoy daga ti Mangisalakan ti Lubong iti nanumo a kasasaad.