mudzimai achigovera vhangeri muchiteshi chechitima

Ndira 16–22

Johane 1

Tamuwana Mesiasi

Apo paunoverenga nekufungisisa Johane 1, nyora pasi manzwiro aunogamuchira. Mashoko api aunowana ayo anozova akanyanya kukosha kwauri nemhuri yako? Chii chaunokwanisa kugovera mumakirasi ako eChechi?

Nyora Pasi Manzwiro Ako

Wakambozvivhunza here kana waizoziva Jesu weNazareta seMwanakomana waMwari dai wakanga uri mupenyu panguva yehushumiri Hwake hwenyama? Kwemakore, vaIsraeri vakatendeka, kusanganisira Andreasi, Petro, Firipi, naNatanaeri, vakanga vamirira uye vanamatira kuuya kwaMesiasi akavimbiswa. Apo pavakasangana Naye, vakaziva sei kuti Aiva Iye wavakanga vachitsvaka? Nenzira imwecheteyo isu tose yatinosvika pakuziva Muponesi—kuburikidza nekutambira kukoka kwekuti “tiuye uye tione” pachedu (Johane 1:39). Tinoverenga pamusoro Pake mumagwaro matsvene. Tinonzwa dzidziso Yake. Tinocherechedza mararamiro Ake. Tinonzwa Mweya Wake. Tiri munzira, tinoona, sezvakaita Natanaeri, kuti Muponesi anotiziva uye anotida uye anoda kutigadzirira kugamuchira “zvinhu zvikuru” (Johane 1:50).

mufananidzo wekunzvera kwako wega

Mazano eKunzvera Magwaro Matsvene Kwako Wega

Johane aiva ani?

Johane aiva mudzidzi waJohane Mubapatidzi uye pashure akazova mumwe wevateveri vaJesu Kristu uye mumwe weVaapositori Gumi neVaviri. Akanyora vhangeri raJohane, mwadhi dzakatiwandei, uye bhuku raZvakazarurwa. Muvhangeri rake, akataura nezvake semudzidzi “aidikanwa naJesu” uye “mumwe mudzidzi” (Johane 13:23; 20:3). Chido chikurusa chaJohane chekuparidza vhangeri chaiva chakasimba zvikuru zvekuti akakumbira kugara panyika kusvikira Kuuya Kwechipiri kweMuponesi kuitira kuti agokwanisa kuunzae mweya kuna Kristu (ona Dzidziso neZvibvumirano 7:1–6).

Onawo Nhungamiro kuMagwaro Matsvene, “Johane,” “Johane, Mwanakomana waZebedia.”

Johane 1:1–5

Jesu Kristu aiva “pakutanga ari kuna Mwari.”

Johane akatanga vhangeri rake nekutsanangura basa rakaitwa naKristu asati Azvarwa: “Pakutanga … Shoko [Jesu Kristu] rakanga riri kuna Mwari.” Unodzidzei kubva pandima 1-5 pamusoro peMuponesi nebasa Rake? Unokwanisa kuwana jekeso dzinobatsira muDudziro yaJoseph Smith, Johane 1:1–5 (muNhungamiro kuMagwaro Matsvene). Apo paunotanga kunzvera kwako nezve upenyu hweMuponesi, sei zvakakosha kuziva pamusoro pebasa Rake Asati azvarwa panyika?

 

Johane 1:1–18

Jesu Kristu ndiye “Chiedza chechokwadi,” Mwanakomana waMwari.

Johane akakurudzirwa kutsvaka Muponesi nokuda kweuchapupu hwaJohane Mubhabhatidzi, uyo akazivisa kuti “wakatumwa kuti apupurire … Chiedza chechokwadi” (Johane 1:8–9). Johane pachake akapawo uchapupu hwakasimba hweupenyu nebasa reMuponesi.

Zvinogona kufadza kuita mudorongodzwa wezvokwadi izvo Johane zvaakasanganisira muuchapupu hwake hwekuvhura hwaKristu (ndima 1–18; onawo Dudziro yaJoseph Smith [Nhungamiro kuMagwaro Matsvene]). Sei uchifunga kuti Johane akatanga Vhangeri rake nezvokwadi izvi? Funga pamusoro pekunyora uchapupu hwako hwaJesu Kristu—chii chaungade kugovera? Zviitiko zvipi zvakakubatsira kuti usvike pakuziva nokutevera Muponesi? Ndiani angaropafadzwa nokunzwa uchapupu hwako?

Johane 1:11–13

Jesu Kristu anotipa “simba rokuva” vanakomana nevanasikana vaMwari.

Kunyangwe zvazvo tose tiri vanasikana nevanakomana vemweya vaMwari Baba, apo patinoita zvivi tinobviswa, kana kuparadzaniswa, kubva kwaVari. Jesu Kristu anotipa nzira yekudzokera kuburikidza nerudzikinuro Rwake rwekuzvipira. Fungisisa izvo zvinodzidziswa naJohane 1:11–13 pamusoro pokuva vanasikana nevanakomana vaMwari. Fungawo pamusoro pezvinodzidziswa nezvinyorwa zvitsvene izvi pamusoro pematambiriro atinoita chipo ichi: VaRoma 8:14–18; Mosaya 5:7–9; Dzidziso neZvibvumirano 25:1. Zvinorevei kwauri kuva “nesimba rekuva” mwanasikana kana mwanakomana waMwari?

Johane 1:18

Baba vanopupura nezve Mwanakomana Wavo.

Johane 1:18 inotaura kuti hapana munhu akaona Mwari. Zvisinei, Dudziro yaJoseph Smith yendima iyi inojekesa kuti “hakuna munhu ati aona Mwari panguva ipi zvayo, asi kuti ari apupura nezve Mwanakomana” (ona Johane 1:19, noti yepazasi c). Funga pamusoro pekuongorora zviitiko zvinotevera izvo mazviri Mwari Baba vakanzwikwa vachipupura nezve Mwanakomana: Mateo 3:17; 17:5; 3 Nifai 11:6–7; Nhoroondo—yaJoseph Smith 1:17.

Sei riri ropafadzo kuva netsananguro idzi? Chii chadzinokudzidzisa pamusoro pehukama hwaJesu Kristu naBaba Vake?

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

musikana achiverenga magwaro matsvene

Apo patinonzvera magwaro matsvene, tinozogamuchira femero yeupenyu hwedu.

Johane 1:4–10.Ungabatsire sei mhuri yako kufungidzira izvo zvavanoverenga pamusoro pechiedza mundima idzi? Unokwanisa kuita kuti nhengo dzemhuri dzichinjane kuvhenekera mwenje mumupanda une rima uye nekugovera kuti Muponesi Chiedza cheupenyu hwavo sei. Zvino, apo pamunoverenga Johane 1:4–10, nhengo dzemhuri dzingangova neimwe nzwisiso muuchapupu hwaJohane hwaJesu Kristu, Chiedza cheNyika.

Johane 11:35–36.Sei Johane Mubhabhatidzi angange akadaidza Jesu kuti “Gwayana raMwari”? Chii chatinodzidza pamusoro pezita iri kubva kushoko raGosa Jeffrey R. Holland “Behold the Lamb of God” kana shoko raElder Gerrit W. Gong “Good Shepherd, Lamb of God”? (Liahona, Chivabvu 2019, 44–46, 97–101)

Johane 1:35–46.Mhedzisiro dzeuchapupu hwaJohane dzaiva dzipi? Chii chingakwanisa kudzidzwa nemhuri yako kubva kuvanhu vakatsanangurwa mundima idzi pamusoro pemagoverero evhangeri?  

Johane 1:45–51.Chii chakaitwa naNatanaeri icho chakamubatsira kuwana uchapupu hweMuponesi? Koka nhengo dzemhuri kuti dzitaure pamusoro pekuti vakawana sei uchapupu hwavo.

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki..

Rumbo rwakapuwa: “Jesu Akazvarwa seMunhu,” rwiyo, nhamba 38.

Kunatsurudza Kudzidzisa Kwedu

Govera zvidzidzo zvinoshandisa zvinhu zvinobatika. Koka nhengo dzemhuri kuti vawane zvinhu izvo zvavanokwanisa kushandisa kuvabatsira kuti vanzwisise misimboti inowanikwa mumagwaro matsvene amuri kuverenga semhuri. Semuenzaniso, vangangoshandisa kenduru kumiririra Chiedza chaKristu (ona Johane 1: 4).

Jesu Kristu achisika nyika

Jehovah Creates the Earth [Jehova Anosika Nyika], naWalter Rane