gorosi raibva kukohwa

Kurume 20–26

Mateo 13; Ruka 8; 13

“Unenzeve dzoKunzwa, Ngaanzwe”

Apo paunoverenga Mateo 13 uye Ruka 8; 13, funga pamusoro pamagadziriro aunozozviita “kunzwa” uye kuziva dzidziso dzeMuponesi mungano dzemufananidzo idzi. Chii chaunozoita kuti ushandise dzidziso idzi muupenyu hwako?

Nyora Pasi Manzwiro Ako

Dzimwe dzedzidziso dzinonyanyisa kurangarirwa dzeMuponesi dzaiva muchimiro chenyaya dzakareruka dzaidaidzwa kuti ngano dzemufananidzo. Idzi dzaireva zvakawanda kupfuura kungova nyaya dzinonakidza pamusoro pezvinhu kana zviitiko zvamazuva ose. Dzaiva nezvokwadi zvikurusa pamusoro peumambo hwaMwari zvaavo vaiva vakagadzirira panezvemweya. Rumwe rwengano dzomufananidzo dzokutanga rwakanyorwa muTestamente Itsva—rungano rwemufananidzo rwemukushi (ona Mateo 13:3–23)—rwunotikoka kuwongorora gadziriro yedu kugamuchira shoko raMwari. “Nokuti ani nani anogamuchira,” Jesu akazivisa kuti, “kwaari kuchapuwa, uye achava nezvakawanda” (Dudziro yaJoseph Smith 13:10). Saka apo patinogadzirira kunzvera ngano dzemufananidzo dzeMuponesi—kana dzimwe dzedzidziso Dzake—nzvimbo yakanaka kutangira ndeyekuwongorora mwoyo yedu uye toona kana tiri kupa shoko raMwari “ivhu rakanaka” (Mateo 13:8) umo marinokura, kutumbuka, kuwanda, uye nokubereka michero iyo inozoropafadza isu uye mhuri dzedu muhuwandu hukuru.

mufananidzo wekunzvera kwako wega

Mazano eKunzvera Magwaro Matsvene Kwako Wega

Marko 13:3–23; Ruka 8:4–15; 13:6–9

Mwoyo wangu unofanira kuva wakagadzirira kugamuchira shoko raMwari.

Sei dzimwe nguva mwoyo yedu ichigamuchira chokwadi, asi pane dzimwe nguva tinoedzwa kuchiramba? Kuverenga rungano rwomufananidzo rwemukushi kunokwanisa kupa mukana wakanaka wokufunga pamusoro pokuti unogamuchira zvakanaka sei chokwadi chinobva kuna Ishe. Zvingangobatsira kufananisa ndima 3–8 dzaMateo 13 nedudziro dzinopuwa mundima 18–23. Chii chaunokwanisa kuita kuti ukudziridze “ivhu rakanaka” mauri? Chii chingangova mimwe “minzwa” inokudzivirira kubva mukunzwa uye nokutevera zvirokwazvo shoko raMwari? Ungakunda sei “minzwa” iyi?

Kunzvera kwako rungano rwomufananidzo urwu kunokwanisawo kushandura maverengero aunoita rungano rwomufananidzo rwuri muna Ruka 13:6–9. Ndezvipi “zvibereko” izvo Ishe zvavanotsvaka kubva kwatiri? Tinonozoriritira sei ivhu redu kuitira kuti “tigobereka zvibereko”?

Onawo Mosaya 2:9; Aruma 12:10–11; 32:28–43

Mateo 13:24–35, 44–52;; Ruka 13:18–21

Ngano dzomufananidzo dzaJesu dzinondibatsira kunzwisisa kukura uye neramangwana reChechi Yake.

Muporofita Joseph Smith akadzidzisa kuti ngano dzomufananidzo muna Mateo 13 dzinotsanangura kukura uye ramangwana reChechi mumazuva ekupedzisira. Funga pamusoro peizvo zvaunodzidziswa nengano dzomufananidzo dzinotevera pamusoro peChechi yaIshe:

• Zviyo namashawi (13:24–30, 36–43)

• Mbeu yemastarda (13:31–32)

• Mbiriso (13:33)

• Pfuma yakavanzwa uye parera rinomutengo mukuru (13:44–46)

• Rutava (13:47–50)

• Mwene weimba (13:52)

Mushure mokufungisisa ngano dzomufananidzo idzi, chii chaunonzwa kukurudzirwa kuita kuti utore chinhanho zvakanyanya kuzara mubasa reChechi yamazuva ekupedzisira yaKristu?

Onawo Nhungamiro kuMagwaro Matsvene, “Umambo hwaMwari kana Umambo hweKudenga,” “Rungano rwoMufananidzo,” scriptures.ChurchofJesusChrist.org.

parera

Vhangeri raJesu Kristu “parera rinomutengo mukuru” (Mateo 13:46).

Mateo 13:24–30, 36–43

Vakarurama vanofanira kukura pakati pavanyangadzi kusvikira kumagumo kwenyika.

Imwe nzira yokuwongorara rungano rwomufananidzo urwu ndeye kudhirowa mufananidzo wayo uye kunyora pauri dudziro dziri muna Mateo 13:36–43 uye Dzidziso neZvibvumirano 86:1–7. Shawi “ibundo rine chepfu, iro, kusvikira rakura, rinenge rakafanana mumaratidzikiro negorosi” (Nhungamiro kuMagwaro Matsvene, “Shawi”). Ndezvipi zvokwadi zviri murungano rwemufananidzo urwu zvinokukurudzira kuramba wakatendeka zvisinei nohunyangadzi huri munyika?

Ruka 8:1–3

Inzira dzipi idzo “vamwe vakadzi” dzavakashumira nadzo Muponesi?

“Vadzidzi vechikadzi vakafamba naJesu uye naVane Gumi naVaviri, vachidzidza kubva kuna [Jesu] zvapamweya uye vachiMushandira panyama. … Pamusoro pokugamuchira hushumiri hwaJesu—mashoko akanaka evhangeri Rake uye maropafadzo simba rokuporesa Rake—madzimai aya akashumira kwaAri, vachigovera hupfumi hwavo uye kuzvipira kwavo” (Daughters in My Kingdom [2017]. 4). Madzimai ayo akatevera Muponesi vakapupurawo uchapupu hwakasimba pamusoro Pake.

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

Mateo 13.Apo nhengo dzemhuri yenyu padzinoverenga ngano dzomufananidzo dzoMuponesi, vangangonakidzwa nokufunga nezve ngano dzomufananidzo dzavo pachavo idzo dzinodzidzisa zvokwadi zvimwechetezvo pamusoro peumambo hwekudenga (Chechi), vachishandisa zvinhu kana mamiriro ezvinhu izvo zvavanoziva.

Mateo 13:3–23; Ruka 8:4–15.Mushure mokuverenga rungano rwemukushi pamwechete, mhuri yenyu ingangokurukura mibvunzo yakafanana neiyi: Chii chingakwanisa kuita “ivhu” redu (mwoyo yedu) “ruware” kana “kuvunga” shoko? Tingakwanise sei kuita chokwadi chokuti ivhu redu rakanaka uye rinobereka zvakawanda?

Kana uine vana vadiki mumhuri mako zvinokwanisa kuva zvinonakidza kukoka nhengo dzemhuri kuti dziite mutambo unotaridza nzira dzakasiyana siyana dzokugadzirira nadzo mwoyo yedu kunzwa shoko raMwari dzimwe nhengo dzemhuri dzichifembera izvo zvavari kuita.

Mateo 13:13–16.Ungabatsire sei nhengo dzemhuri yako kunzwisisa kukosha kwekugamuchira nechido shoko raKristu? Kuratidza “nzeve [idzo] dzisinganzwi,” ungangovhara nzeve dzenhengo yemhuri apo iwe paunenge uchiverenga nekazevezeve Mateo 13:13–16. Nhengo yemhuri iyoyo yanzwisisa zvakawanda zvakadii kubva mundima dzacho? Ndedzipi nzira idzo dzatinokwanisa kuvhura maziso, edu, nzeve dzedu, uye nemwoyo yedu kushoko raMwari?

Mateo 13:44–46.Ndezvipi izvo varume vaviri vari mungano dzomufananidzo idzi zvavainazvo zvakafanana? Pane zvimwe zvinhu here zvatinofanira kunge tichiita savanhu pachavo uye semhuri kuti tiise umambo hwaMwari pokutanga muupenyu hwedu?

Ruka 13:11–17.Nhengo dzemhuri dzakambova nezviitiko here izvo zvakavakonzera kunzwa kuti vaiva vasingakwanisi “kusimuka [voga]”? Tinoziva here mumwe munhu anonzwa zvakadaro? Tingakwanisa kubatsira sei? Muponesi “anotisunungura” sei kubva kuurwere hwedu?

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

­

Kunatsurudza Kudzidzisa Kwedu

Dzidza chinyorwa chitsvene nemusoro Sarudzai ndima yechinyorwa chitsvene yakanyanya kukosha kumhuri yenyu, uye wokoka nhengo dzemhuri kuti dziidzidze nemusoro. Gosa Richard G. Scott vakadzidzisa kuti, “Chinyorwa chitsvene chakadzidzwa nemusoro chinova shamwari inogara iripo nguva dzose isingashayiswi simba nekufamba kwenguva” (“The Power of Scripture,” Liahona, Mbudzi 2011, 6).

murume achikusha mbeu

Parable of the Sower [Rungano rwoMufananidzo rwemukushi], naGeorge Soper