“ວັນທີ 3–9 ເດືອນເມສາ. ອີດສະເຕີ: ‘ໂອ ຄວາມຕາຍເອີຍ, ໄຊຊະນະຂອງມຶງຢູ່ໃສ?,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 3–9 ເດືອນເມສາ. ອີດສະເຕີ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ສວນອຸບມຸງ

ວັນທີ 3–9 ເດືອນເມສາ

ອີດສະເຕີ

“ໂອ ຄວາມຕາຍເອີຍ, ໄຊຊະນະຂອງມຶງຢູ່ໃສ?”

ຂະນະທີ່ທ່ານອ່ານປະຈັກພະຍານເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ໃນໂຄງຮ່າງນີ້, ໃຫ້ສັງເກດເບິ່ງຄວາມຮູ້ສຶກ ແລະ ຄວາມປະທັບໃຈທີ່ມາສູ່ທ່ານ ຈາກພຣະວິນຍານບໍລິສຸດ.

ບັນທຶກຄວາມປະທັບໃຈຂອງທ່ານ

ລະຫວ່າງອາທິດສຸດທ້າຍຂອງພຣະຊົນຊີບຂອງພຣະຜູ້ຊ່ວຍໃຫ້ລອດ, ຊາວຢິວຫລາຍຄົນທີ່ຢູ່ອ້ອມຂ້າງພຣະອົງກຳລັງມີພາກສ່ວນໃນປະເພນີງານປັດສະຄາ. ພວກເຂົາໄດ້ກະກຽມອາຫານ, ຮ້ອງເພງ, ແລະ ເຕົ້າໂຮມກັນເພື່ອລະນຶກເຖິງການປົດປ່ອຍຂອງເຊື້ອສາຍອິດສະຣາເອນຈາກການເປັນຂ້າທາດຂອງຊາວເອຢິບ. ຄອບຄົວຟັງເລື່ອງເລົ່າກ່ຽວກັບທູດຜູ້ທຳລາຍໄດ້ຜ່ານກາຍເຮືອນຂອງບັນພະບຸລຸດຂອງພວກເຂົາ ຜູ້ທີ່ໄດ້ໝາຍຂອບປະຕູເຮືອນດ້ວຍເລືອດຂອງລູກແກະ. ທ່າມກາງການສະເຫລີມສະຫລອງທັງໝົດເຫລົ່ານີ້ທີ່ເຕັມໄປດ້ວຍສັນຍາລັກຂອງການປົດປ່ອຍ, ມີໜ້ອຍຄົນທີ່ຮູ້ວ່າພຣະເຢຊູຄຣິດ, ພຣະເມສາຂອງພຣະເຈົ້າ, ພວມຈະປົດປ່ອຍພວກເຂົາຈາກການເປັນຂ້າທາດຂອງຄວາມຜິດບາບ ແລະ ຄວາມຕາຍ—ຜ່ານທາງການຊົດໃຊ້ຂອງພຣະອົງ, ການສິ້ນພຣະຊົນຂອງພຣະອົງ, ແລະ ການຟື້ນຄືນພຣະຊົນຂອງພຣະອົງ. ເຖິງປານນັ້ນ, ກໍຍັງມີຜູ້ທີ່ຮັບຮູ້ພຣະເຢຊູວ່າເປັນພຣະເມຊີອາທີ່ສັນຍາໄວ້ຂອງພວກເຂົາ, ຜູ້ປົດປ່ອຍນິລັນດອນຂອງພວກເຂົາ. ຈາກເວລານັ້ນເປັນຕົ້ນມາ, ສານຸສິດຂອງພຣະເຢຊູຄຣິດໄດ້ເປັນພະຍານຕໍ່ທັງທົ່ວໂລກວ່າ “ພຣະຄຣິດຊົງສິ້ນພຣະຊົນເພື່ອຄວາມຜິດບາບຂອງເຮົາທັງຫລາຍ … ; ແລະ ພຣະອົງໄດ້ຖືກຝັງໄວ້, ແລະ ໃນວັນຖ້ວນສາມໄດ້ຖືກຊົງບັນດານໃຫ້ເປັນຄືນມາສູ່ຊີວິດ” (1 ໂກຣິນໂທ 15:3–4).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 21–28

ພຣະເຢຊູຄຣິດປົດປ່ອຍເຮົາຈາກບາບ ແລະ ຄວາມຕາຍ, ໃຫ້ຄວາມເຂັ້ມແຂງແກ່ເຮົາ ໃນຄວາມອ່ອນແອຂອງເຮົາ, ແລະ ປອບໂຍນເຮົາໃນການທົດລອງຂອງເຮົາ.

ວິທີໜຶ່ງໃນການສຸມໃຈໃສ່ການຊົດໃຊ້ຂອງພຣະຜູ້ຊ່ວຍໃຫ້ລອດໃນອາທິດນີ້ ແມ່ນທີ່ຈະໃຊ້ເວລາທຸກມື້ກັບການອ່ານກ່ຽວກັບອາທິດສຸດທ້າຍຂອງພຣະຊົນຊີບຂອງພຣະເຢຊູ (ຕາຕະລາງການອ່ານທີ່ເປັນໄປໄດ້ຢູ່ຂ້າງລຸ່ມ). ທ່ານພົບເຫັນຫຍັງແດ່ຢູ່ໃນບົດເຫລົ່ານີ້ ທີ່ຊ່ວຍທ່ານໃຫ້ຮູ້ສຶກເຖິງຄວາມຮັກຂອງພຣະຜູ້ຊ່ວຍໃຫ້ລອດ? ໃຫ້ໄຕ່ຕອງສິ່ງທີ່ບົດເຫລົ່ານີ້ສິດສອນທ່ານກ່ຽວກັບວ່າ ພຣະອົງສາມາດປົດປ່ອຍທ່ານຈາກບາບ, ຄວາມຕາຍ, ການທົດລອງ, ແລະ ຄວາມອ່ອນແອແນວໃດ. ທ່ານຈະໃຊ້ສັດທາໃນອຳນາດແຫ່ງການປົດປ່ອຍຂອງພຣະອົງແນວໃດ?

ວັນອາທິດ: ການເຂົ້າໄປໃນນະຄອນເຢຣູຊາເລັມຢ່າງຜູ້ມີໄຊ (ມັດທາຍ 21:6–11)
ວັນຈັນ: ການຊຳລະພຣະວິຫານ (ມັດທາຍ 21:12–16)
ວັນອັງຄານ: ການສິດສອນໃນເຢຣູຊາເລັມ (ມັດທາຍ 21–23)
ວັນພຸດ: ສືບຕໍ່ສິດສອນ (ມັດທາຍ 24–25)
ວັນພະຫັດ: ງານປັດສະຄາ ແລະ ການຮັບທຸກທໍລະມານຂອງພຣະຄຣິດໃນສວນເຄັດເຊມາເນ (ມັດທາຍ 26)
ວັນສຸກ: ການສອບສວນ, ການຄຶງ, ແລະ ການຝັງ (ມັດທາຍ 27:1–61)
ວັນເສົາ: ພຣະສົບຂອງພຣະຄຣິດວາງຢູ່ໃນອຸບມຸງ (ມັດທາຍ 27:62–66) ຂະນະທີ່ພຣະອົງປະຕິບັດສາດສະໜາກິດຢູ່ໃນໂລກວິນຍານ (ຄຳສອນ ແລະ ພັນທະສັນຍາ 138)
ວັນອາທິດ: ການຟື້ນຄືນພຣະຊົນຂອງພຣະເຢຊູຄຣິດ ແລະ ການປະກົດຕົວຕໍ່ພວກສາວົກຂອງພຣະອົງ (ມັດທາຍ 28:1–10)

ເບິ່ງ Easter.ComeuntoChrist.org ນຳອີກ.

Crucifixion [ການຄຶງ], ໂດຍ ຫລູອີສ໌ ພາກເກີ

ມັດທາຍ 28:1–10; ລູກາ 24:13–35; ໂຢຮັນ 20:19–29; 1 ໂກຣິນໂທ 15:1–8, 55

ຫລາຍຄົນເປັນພະຍານເຖິງການຟື້ນຄືນພຣະຊົນຂອງພຣະເຢຊູຄຣິດ.

ໃຫ້ຈິນຕະນາການເບິ່ງວ່າ ສານຸສິດຈະຮູ້ສຶກແນວໃດ ເມື່ອເຫັນພຣະເຢຊູຖືກເຍາະເຍີ້ຍ, ຖືກທາລຸນ, ແລະ ຖືກຄຶງ. ພວກເຂົາໄດ້ເປັນພະຍານເຖິງອຳນາດຂອງພຣະອົງ, ຮູ້ສຶກເຖິງຄວາມຈິງຂອງຄຳສອນຂອງພຣະອົງ, ແລະ ມີສັດທາວ່າ ພຣະອົງເປັນພຣະບຸດຂອງພຣະເຈົ້າ. ການເຫັນພຣະອົງສິ້ນພຣະຊົນ ຄົງເຮັດໃຫ້ສານຸສິດຂອງພຣະອົງຮູ້ສຶກໂສກເສົ້າ ແລະ ສັບສົນ. ແຕ່ບໍ່ດົນພວກເຂົາໄດ້ກາຍເປັນພະຍານເຖິງການອັດສະຈັນທີ່ຍິ່ງໃຫຍ່ເຖິງການຟື້ນຄືນພຣະຊົນຂອງພຣະອົງ.

ທ່ານຮຽນຮູ້ຫຍັງແດ່ຈາກເລື່ອງລາວຂອງຜູ້ທີ່ໄດ້ເປັນພະຍານເຖິງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ? ໃຫ້ໝາຍ ຫລື ຂຽນປະສົບການຂອງແຕ່ລະຄົນໃນ ມັດທາຍ 28:1–10; ລູກາ 24:13–35; ໂຢຮັນ 20:19–29; ແລະ 1 ໂກຣິນໂທ 15:1–8, 55. (ປະຈັກພະຍານຂອງຄົນອື່ນເຖິງການຟື້ນຄືນພຣະຊົນຂອງພຣະຄຣິດ ມີຢູ່ໃນ 3 ນີໄຟ 11; ມໍມອນ 1:15; ອີເທີ 12:38–39; ຄຳສອນ ແລະ ພັນທະສັນຍາ 76:19–24; 110:1–10; ແລະ ໂຈເຊັບ ສະມິດ—ປະຫວັດ 1:15–17.) ແມ່ນຫຍັງທີ່ປະທັບໃຈທ່ານກ່ຽວກັບປະຈັກພະຍານຂອງພະຍານເຫລົ່ານີ້? ຫລັງຈາກການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ, ຄົນອື່ນໆກໍໄດ້ຟື້ນຄືນຊີວິດ ແລະ ປະກົດຕົວຕໍ່ຫລາຍຄົນ (ເບິ່ງ ມັດທາຍ 27:52–53; 3 ນີໄຟ 23:9). ສັດທາຂອງທ່ານໃນພຣະຜູ້ຊ່ວຍໃຫ້ລອດ ແລະ ຄຳສັນຍາຂອງການຟື້ນຄືນຊີວິດ ມີອິດທິພົນຕໍ່ວິທີທີ່ທ່ານດຳລົງຊີວິດແນວໃດ?

ເບິ່ງ “Jesus Is Resurrected,” “The Risen Lord Appears to the Apostles,” “Blessed Are They That Have Not Seen, and Yet Have Believed” (ວິດີໂອ), ChurchofJesusChrist.org ນຳອີກ.

1 ເປໂຕ 1:3–11

ພຣະເຢຊູຄຣິດໃຫ້ຄວາມຫວັງ ແລະ ຄວາມຊື່ນຊົມແກ່ເຮົາ.

ຄຳໃດ ຫລື ວະລີໃດຢູ່ໃນ 1 ເປໂຕ 1:3–11 ທີ່ໃຫ້ຄວາມຫວັງແກ່ທ່ານ ເພາະພຣະເຢຊູຄຣິດ? ທ່ານເຄີຍຮູ້ສຶກເຖິງຄວາມຫວັງນັ້ນເມື່ອໃດ?

ແອວເດີ ແກຣິດ ດັບເບິນຢູ ກອງ ໄດ້ເປັນພະຍານວ່າ ການຟື້ນຄືນພຣະຊົນ “ໃຫ້ຄວາມຫວັງຕໍ່ຜູ້ທີ່ໄດ້ສູນເສຍແຂນຂາ; ຜູ້ທີ່ບໍ່ສາມາດຫລຽວເຫັນ, ໄດ້ຍິນ, ຫລື ຍ່າງ; ຫລື ຜູ້ທີ່ມີຄວາມຈຳເສື່ອມ, ເປັນໂຣກຈິດ, ຫລື ຜູ້ທີ່ມີຄວາມສາມາດລົດນ້ອຍຖອຍລົງ. ພຣະອົງຊອກຫາເຮົາ. ພຣະອົງປິ່ນປົວເຮົາໃຫ້ຫາຍດີ. … [ພ້ອມນີ້,] ຍ້ອນວ່າ ‘ພຣະເຈົ້າເອງ … ຊົດໃຊ້ແທນບາບຂອງໂລກ’ [ແອວມາ 42:15], … ດ້ວຍຄວາມເມດຕາ, ພຣະອົງຈຶ່ງສາມາດຊ່ວຍເຫລືອເຮົາ ອີງຕາມຄວາມອ່ອນແອຂອງເຮົາ. … ເຮົາກັບໃຈ ແລະ ເຮັດທຸກສິ່ງທີ່ເຮົາສາມາດເຮັດໄດ້. ພຣະອົງໄດ້ໂອບກອດເຮົາໄວ້ຊົ່ວນິລັນດອນ ‘ໃນອ້ອມພຣະພາຫາແຫ່ງຄວາມຮັກຂອງພຣະອົງ’ [2 ນີໄຟ 1:15]” (“Hosanna and Hallelujah—The Living Jesus Christ: The Heart of Restoration and Easter,” Liahona, May 2020, 54).

ເບິ່ງ ແອວມາ 27:28; 36:1–24; 3 ນີໄຟ 9:11–17; ໂມໂຣໄນ 7:40–41 ນຳອີກ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ComeuntoChrist.org.Easter.ComeuntoChrist.org ບັນຈຸເສັ້ນເວລາ ແລະ ຄຳບັນຍາຍເຖິງສິ່ງທີ່ໄດ້ເກີດຂຶ້ນໃນແຕ່ລະວັນຂອງອາທິດສຸດທ້າຍຂອງພຣະຊົນຊີບຂອງພຣະຜູ້ຊ່ວຍໃຫ້ລອດ. ແຕ່ລະມື້ພາຍໃນອາທິດ, ຄອບຄົວຂອງທ່ານສາມາດທົບທວນຄຳບັນຍາຍເຫລົ່ານີ້ ເພື່ອເບິ່ງສິ່ງທີ່ພຣະຜູ້ຊ່ວຍໃຫ້ລອດໄດ້ເຮັດໃນມື້ນັ້ນ, ຫລື ທ່ານສາມາດອ່ານກ່ຽວກັບອາທິດສຸດທ້າຍຂອງພຣະອົງ ຢູ່ໃນພຣະຄຳພີເປັນຄອບຄົວ (ເບິ່ງ ສິ່ງແນະນຳໃນ “ແນວຄິດສຳລັບການສຶກສາພຣະຄຳພີເປັນສ່ວນຕົວ” ຢູ່ຂ້າງເທິງ).

ເພງສວດ ແລະ ເພງຂອງເດັກນ້ອຍ.ໃຫ້ຄິດທີ່ຈະຮ້ອງເພງນຳກັນກ່ຽວກັບການຊົດໃຊ້ ແລະ ການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ລະຫວ່າງອາທິດນີ້, ລວມທັງເພງທີ່ພວກທ່ານບໍ່ຄຸ້ນເຄີຍ. (ເບິ່ງ ດັດຊະນີຫົວຂໍ້ຂອງ ເພງສວດ ແລະ ເພງຂອງເດັກນ້ອຍ, ເພື່ອຊອກຫາເພງທີ່ກ່ຽວກັບ “ການຊົດໃຊ້,” “ອີດສະເຕີ,” ຫລື “ການຟື້ນຄືນພຣະຊົນ.”) ເພື່ອຊ່ວຍສະມາຊິກໃນຄອບຄົວຮຽນຮ້ອງເພງ, ທ່ານສາມາດສະແດງຮູບທີ່ເຂົ້າກັບເນື້ອເພງ.

ສິ່ງທີ່ຮວບຮວມຢູ່ກ້ອງຫົວຂໍ້ “ພຣະເຢຊູຄຣິດ” ໃນຫ້ອງສະໝຸດພຣະກິດຕິຄຸນ.ສິ່ງທີ່ຮວບຮວມຢູ່ກ້ອງຫົວຂໍ້ “ພຣະເຢຊູຄຣິດ” ໃນຫ້ອງສະໝຸດພຣະກິດຕິຄຸນ ແມ່ນລວມທັງ ວິດີໂອ, ຮູບພາບ, ແລະ ເພງທີ່ສາມາດຊ່ວຍຄອບຄົວຂອງທ່ານໃຫ້ສະເຫລີມສະຫລອງການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ແລະ ອີດສະເຕີ.

“ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ.”ໃຫ້ອ່ານ “ພຣະຄຣິດທີ່ຊົງພຣະຊົນ: ປະຈັກພະຍານຂອງອັກຄະສາວົກ” (ChurchofJesusChrist.org ເປັນຄອບຄົວ). ເຊື້ອເຊີນສະມາຊິກແຕ່ລະຄົນໃນຄອບຄົວໃຫ້ເລືອກເອົາຂ່າວສານອີດສະເຕີຈາກປະຈັກພະຍານນີ້ ເພື່ອແບ່ງປັນກັບຄົນອື່ນ. ຍົກຕົວຢ່າງ, ທ່ານສາມາດເຮັດໂປສເຕີ້ເພື່ອສະແດງຢູ່ໃນສື່ສານມວນຊົນ, ຕິດໄວ້ຢູ່ປະຕູໜ້າບ້ານ, ຫລື ຢູ່ໃນເຮືອນຂອງທ່ານ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະອົງຊົງຟື້ນ,” ເພງສວດ ແລະ ເພງຂອງເດັກນ້ອຍ, 60.

ການປັບປຸງການສຶກສາສ່ວນຕົວ

ຕັ້ງເປົ້າໝາຍທີ່ສາມາດບັນລຸໄດ້. ການໃຊ້ເວລາສຶກສາພຣະຄຳພີພຽງສອງສາມນາທີໃນແຕ່ລະວັນ ກໍສາມາດເປັນພອນໃຫ້ແກ່ຊີວິດຂອງທ່ານໄດ້. ເຮັດຄຳໝັ້ນສັນຍາທີ່ຈະສຶກສາທຸກມື້, ຊອກຫາວິທີເພື່ອເຕືອນຕົວເອງເຖິງຄຳໝັ້ນສັນຍານັ້ນ, ແລະ ພະຍາຍາມຈົນສຸດຄວາມສາມາດທີ່ຈະປະຕິບັດຕາມ. ຖ້າຫາກທ່ານລືມ, ຢ່າທໍ້ຖອຍໃຈ. ໃຫ້ເລີ່ມຕົ້ນໃໝ່.