“ວັນທີ 10–16 ເດືອນເມສາ. ມັດທາຍ 15–17; ມາຣະໂກ 7–9: ‘ພຣະອົງເປັນພຣະຄຣິດ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 10–16 ເດືອນເມສາ. ມັດທາຍ 15–17; ມາຣະໂກ 7–9,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

The Transfiguration [ການປ່ຽນສະພາບພຣະກາຍຂອງພຣະຄຣິດ], ໂດຍ ຄາລ ເຮັນຣິກ ບະລ໊ອກ

ວັນທີ 10–16 ເດືອນເມສາ

ມັດທາຍ 15–17; ມາຣະໂກ 7–9

“ພຣະອົງເປັນພຣະຄຣິດ”

ການອ່ານພຣະຄຳພີເຊື້ອເຊີນພຣະວິນຍານບໍລິສຸດໃຫ້ມາສະຖິດຢູ່ໃນຊີວິດຂອງທ່ານ. ພາລະກິດທີ່ສຳຄັນຢ່າງໜຶ່ງຂອງພຣະວິນຍານບໍລິສຸດແມ່ນເພື່ອເປັນພະຍານເຖິງພຣະເຢຊູຄຣິດ. ຂະນະທີ່ທ່ານອ່ານພຣະຄຳພີໃນອາທິດນີ້, ໃຫ້ເອົາໃຈໃສ່ຕໍ່ຄວາມຮູ້ສຶກທາງວິນຍານ ທີ່ເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານເຖິງພຣະຜູ້ຊ່ວຍໃຫ້ລອດ.

ບັນທຶກຄວາມປະທັບໃຈຂອງທ່ານ

ມັນເປັນເລື່ອງແປກບໍ ທີ່ພວກຟາຣີຊາຍ ແລະ ພວກຊາດູກາຍໄດ້ສັ່ງໃຫ້ພຣະເຢຊູສະແດງ “[ໝາຍສຳຄັນ] ຢ່າງໜຶ່ງຈາກສະຫວັນ” ໃຫ້ພວກເຂົາເບິ່ງ? ການອັດສະຈັນທີ່ຮູ້ຈັກກັນດີ ຍັງບໍ່ພຽງພໍສຳລັບພວກເຂົາບໍ? ສ່ວນຄຳສອນທີ່ມີພະລັງຂອງພຣະອົງເດ ຫລື ວິທີຕ່າງໆທີ່ພຣະອົງໄດ້ເຮັດໃຫ້ຄຳທຳນາຍຂອງສະໄໝບູຮານສຳເລັດຄົບຖ້ວນຍັງບໍ່ພຽງພໍບໍ? ຄຳສັ່ງຂອງພວກເຂົາບໍ່ແມ່ນເປັນເພາະພວກເຂົາບໍ່ເຫັນໝາຍສຳຄັນຫລາຍພໍ ແຕ່ເປັນເພາະຄວາມບໍ່ເຕັມໃຈທີ່ຈະ “ສັງເກດໝາຍສຳຄັນ” ແລະ ຮັບຮູ້ມັນ. (ເບິ່ງ ມັດທາຍ 16:1–4.)

ເປໂຕ, ເໝືອດັ່ງພວກຟາຣີຊາຍ ແລະ ພວກຊາດູກາຍ, ໄດ້ເຫັນການອັດສະຈັນຂອງພຣະຊ່ວຍໃຫ້ລອດ ແລະ ໄດ້ຍິນຄຳສອນຂອງພຣະອົງ. ແຕ່ປະຈັກພະຍານທີ່ແນ່ນອນຂອງເປໂຕ ທີ່ວ່າ, “ພຣະອົງເປັນພຣະຄຣິດ, ພຣະບຸດຂອງພຣະເຈົ້າ,” ບໍ່ໄດ້ມີມາຜ່ານທາງຄວາມຮູ້ສຶກທາງຮ່າງກາຍຂອງເພິ່ນ—“ເນື້ອໜັງ ແລະ ເລືອດ” ຂອງເພິ່ນ. ປະຈັກພະຍານຂອງເພິ່ນໄດ້ຖືກເປີດເຜີຍຕໍ່ເພິ່ນ ໂດຍ “ພຣະບິດາຜູ້ຊຶ່ງຢູ່ໃນສະຫວັນ” ຂອງເຮົາ. ການເປີດເຜີຍ ແມ່ນດານຫີນ ຊຶ່ງພຣະຜູ້ຊ່ວຍໃຫ້ລອດໄດ້ສ້າງສາດສະໜາຈັກຢູ່ເທິງນັ້ນ ໃນເວລານັ້ນ ແລະ ໃນເວລານີ້—ການເປີດເຜີຍຈາກສະຫວັນຕໍ່ຜູ້ຮັບໃຊ້ຂອງພຣະອົງ. ແລະ ນີ້ແມ່ນດານຫີນຊຶ່ງເຮົາໄດ້ສ້າງການເປັນສານຸສິດໄວ້ເທິງນັ້ນ—ການເປີດເຜີຍວ່າພຣະເຢຊູຄືພຣະຄຣິດ ແລະ ວ່າຜູ້ຮັບໃຊ້ຂອງພຣະອົງດຳລົງ “ຂໍກະແຈແຫ່ງຣາຊອານາຈັກ.” ເມື່ອເຮົາຖືກສ້າງຂຶ້ນເທິງຮາກຖານນີ້, “ປະຕູແຫ່ງແດນມໍລະນາຈະເອົາຊະນະ [ເຮົາ] ບໍ່ໄດ້” (ມັດທາຍ 16:15–19).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ມັດທາຍ 16:13–17

ປະຈັກພະຍານເຖິງພຣະເຢຊູຄຣິດມີມາຜ່ານທາງການເປີດເຜີຍ.

ຖ້າຫາກພຣະເຢຊູຄຣິດຖາມຜູ້ຄົນໃນທຸກວັນນີ້ວ່າ, “ຄົນທັງຫລາຍເວົ້າກັນວ່າ ບຸດມະນຸດເປັນຜູ້ໃດ?” ພວກເຂົາຈະຕອບວ່າແນວໃດ? ທ່ານຈະຕອບວ່າແນວໃດ ຖ້າຫາກພຣະເຢຊູຖາມທ່ານວ່າ, “ເຈົ້າເດ ວ່າເຮົາເປັນຜູ້ໃດ?” (ເບິ່ງ ມັດທາຍ 16:13–15.)

ໃຫ້ໄຕ່ຕອງປະຈັກພະຍານຂອງທ່ານກ່ຽວກັບພຣະຜູ້ຊ່ວຍໃຫ້ລອດ ແລະ ວິທີທີ່ທ່ານໄດ້ຮັບປະຈັກພະຍານ. ທ່ານຮຽນຮູ້ຫຍັງແດ່ຈາກ ມັດທາຍ 16:15–17 ທີ່ສາມາດເພີ່ມຄວາມເຂັ້ມແຂງໃຫ້ມັນ? ຖ້າຫາກທ່ານຢາກຮຽນຮູ້ຫລາຍຕື່ມອີກກ່ຽວກັບປະຈັກພະຍານ ແລະ ການເປີດເຜີຍສ່ວນຕົວ, ໃຫ້ຄົ້ນຄວ້າຂໍ້ພຣະຄຳພີເຫລົ່ານີ້: ໂຢຮັນ 15:26; 2 ນີໄຟ 31:17–18; ແອວມາ 5:45–48; ແລະ ຄຳສອນ ແລະ ພັນທະສັນຍາ 8:2–3.

ເບິ່ງ “President Nelson: Hear Him—Personal Revelation” (ວິດີໂອ), ChurchofJesusChrist.org ນຳອີກ.

0:59

ມັດທາຍ 16:13–19; 17:1–9; ມາຣະໂກ 9:2–9

“ຂໍກະແຈແຫ່ງອານາຈັກສະຫວັນ” ມີຢູ່ເທິງແຜ່ນດິນໂລກໃນທຸກວັນນີ້.

“ຂໍກະແຈແຫ່ງອານາຈັກສະຫວັນ” ທີ່ພຣະຜູ້ຊ່ວຍໃຫ້ລອດໄດ້ສັນຍາວ່າຈະມອບໃຫ້ເປໂຕ ແມ່ນຂໍກະແຈຂອງຖານະປະໂລຫິດ (ມັດທາຍ 16:19). ຂໍກະແຈຂອງຖານະປະໂລຫິດຄືຫຍັງ? ເປັນຫຍັງເຮົາຈຶ່ງຕ້ອງການຂໍກະແຈເຫລົ່ານັ້ນ? ໃຫ້ໄຕ່ຕອງຄຳຖາມເຫລົ່ານີ້ ຂະນະທີ່ທ່ານອ່ານກ່ຽວກັບຄຳສັນຍາຂອງພຣະຜູ້ຊ່ວຍໃຫ້ລອດໃນ ມັດທາຍ 16:13–19 ແລະ ຄວາມສຳເລັດຄົບຖ້ວນຂອງມັນໃນ ມັດທາຍ 17:1–9; ມາຣະໂກ 9:2–9 (ເບິ່ງ ການແປຂອງໂຈເຊັບ ສະມິດ, ມາຣະໂກ 9:3 [ໃນ ມາຣະໂກ 9:4, ໝາຍເຫດຢູ່ທາງລຸ່ມໜ້າປຶ້ມ ກ ] ນຳອີກ).

ແຫລ່ງອື່ນອີກທີ່ຊ່ວຍທ່ານຮຽນຮູ້ກ່ຽວກັບຂໍກະແຈຂອງຖານະປະໂລຫິດແມ່ນລວມທັງ ຄຳສອນ ແລະ ພັນທະສັນຍາ 65:2; 107:18–20; 110:11–16; 128:9–11; “ຂໍກະແຈຂອງຖານະປະໂລຫິດ” ໃນ ຄູ່ມືພຣະຄຳພີ (scriptures.ChurchofJesusChrist.org); ແລະ ຂ່າວສານຂອງແອວເດີ ແກຣີ ອີ ສະຕີບເວັນສັນ “Where Are the Keys and Authority of the Priesthood?,” (Liahona, May 2016, 29–32). ຂະນະທີ່ສຶກສາແຫລ່ງເຫລົ່ານີ້, ໃຫ້ຄິດທີ່ຈະຂຽນສິ່ງທີ່ທ່ານໄດ້ຮຽນຮູ້ລົງໄວ້ ກ່ຽວກັບຂໍກະແຈຂອງຖານະປະໂລຫິດ ແລະ ພອນທີ່ມີມາຈາກຂໍກະແຈເຫລົ່ານັ້ນ. ທ່ານຄິດວ່າເປັນຫຍັງຂໍກະແຈຈຶ່ງເປັນສັນຍາລັກທີ່ດີຢ່າງໜຶ່ງ ສຳລັບສິດທີ່ຈະຊີ້ນຳການຮັບໃຊ້ຂອງຖານະປະໂລຫິດ?

ເບິ່ງ Dallin H. Oaks, “The Melchizedek Priesthood and and the Keys,” Liahona, May 2020, 69–72; Bible Dictionary, “Transfiguration, Mount of” ນຳອີກ.

ຮູບປັ້ນຂອງເປໂຕທີ່ກຳລັງຖືກະແຈ — ຂໍກະແຈຂອງຖານະປະໂລຫິດຄືສິດອຳນາດທີ່ຈະຊີ້ນຳການນຳໃຊ້ຖານະປະໂລຫິດ.

ມັດທາຍ 17:14–21; ມາຣະໂກ 9:14–29

ເມື່ອສະແຫວງຫາສັດທາທີ່ຍິ່ງໃຫຍ່ກວ່າ, ເຮົາສາມາດເລີ່ມຕົ້ນດ້ວຍສັດທາທີ່ເຮົາມີຢູ່.

ຜູ້ເປັນພໍ່ທີ່ກ່າວເຖິງໃນ ມັດທາຍ 17 ແລະ ມາຣະໂກ 9 ມີເຫດຜົນທີ່ຈະຮູ້ສຶກບໍ່ໝັ້ນໃຈວ່າ ພຣະເຢຊູສາມາດປິ່ນປົວລູກຊາຍຂອງລາວ. ລາວໄດ້ຂໍໃຫ້ພວກສາວົກຂອງພຣະເຢຊູປິ່ນປົວລູກຊາຍຂອງລາວ, ແລະ ພວກເພິ່ນບໍ່ສາມາດ. ແຕ່ເມື່ອລາວໄດ້ຂໍການອັດສະຈັນຈາກພຣະຜູ້ຊ່ວຍໃຫ້ລອດ, ລາວໄດ້ເລືອກສະແດງສັດທາຂອງລາວ. “[ຂ້ານ້ອຍວາງໃຈເຊື່ອແລ້ວ, ພຣະອົງເຈົ້າເອີຍ],” ລາວເວົ້າ. ແລ້ວ, ໃນການຮັບຮູ້ວ່າ ລາວຍັງບໍ່ມີສັດທາຢ່າງເຕັມປ່ຽມ, ລາວໄດ້ເວົ້າຕື່ມວ່າ, “ໂຜດຊ່ວຍຂ້ານ້ອຍໃຫ້ມີຄວາມເຊື່ອຫລາຍກວ່ານີ້ແດ່ທ້ອນ.”

ພຣະວິນຍານໄດ້ສິດສອນທ່ານຫຍັງແດ່ ຂະນະທີ່ທ່ານອ່ານກ່ຽວກັບການອັດສະຈັນນີ້? ພຣະບິດາເທິງສະຫວັນໄດ້ຊ່ວຍທ່ານໃຫ້ມີສັດທາຫລາຍຂຶ້ນແນວໃດ? ທ່ານສາມາດເຮັດສິ່ງໃດເພື່ອເພີ່ມສັດທາໃສ່ກັບສັດທາທີ່ທ່ານມີຢູ່ແລ້ວ? ບາງທີທ່ານສາມາດຮວບຮວມຂໍ້ພຣະຄຳພີ, ຂ່າວສານຈາກກອງປະຊຸມໃຫຍ່, ຫລື ປະສົບການທີ່ໄດ້ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານ.

ເບິ່ງ Jeffrey R. Holland, “Lord, I Believe,” Liahona, May 2013, 93–95 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 15:7–9; ມາຣະໂກ 7:6–7.ແມ່ນຫຍັງຄືຄວາມແຕກຕ່າງລະຫວ່າງການໃຫ້ກຽດແກ່ພຣະເຈົ້າ ດ້ວຍຄຳວາຈາ, ຫລື ຄຳເວົ້າຂອງເຮົາ, ແລະ ການໃຫ້ກຽດແກ່ພຣະອົງດ້ວຍໃຈຂອງເຮົາ?

ມັດທາຍ 15:17–20; ມາຣະໂກ 7:18–23.ເປັນຫຍັງເຮົາຈຶ່ງຕ້ອງລະມັດລະວັງກ່ຽວກັບສິ່ງທີ່ເຮົາເອົາເຂົ້າໃສ່ປາກ? ອີງຕາມສິ່ງທີ່ພຣະເຢຊູໄດ້ສິດສອນຢູ່ໃນຂໍ້ເຫລົ່ານີ້, ເປັນຫຍັງເຮົາຈຶ່ງຕ້ອງລະມັດລະວັງຫລາຍຂຶ້ນກ່ຽວກັບສິ່ງທີ່ອອກມາຈາກປາກຂອງເຮົາ—ແລະ ອອກມາຈາກໃຈຂອງເຮົາ? ເຮົາຈະຮັກສາໃຈຂອງເຮົາໃຫ້ບໍລິສຸດໄດ້ແນວໃດ?

ມັດທາຍ 16:15–17.ພຣະເຈົ້າໄດ້ເປີດເຜີຍຕໍ່ເຮົາວ່າ ພຣະເຢຊູເປັນ “ພຣະຄຣິດ, ພຣະບຸດຂອງພຣະເຈົ້າ” ແນວໃດ? (ຂໍ້ທີ 16). ເຮົາຈະກະກຽມຕົວເອງເພື່ອຮັບເອົາການເປີດເຜີຍນີ້ຈາກພຣະອົງໄດ້ແນວໃດ?

ມັດທາຍ 16:13–19; 17:1–9.ເພື່ອທີ່ຈະສິດສອນເດັກນ້ອຍກ່ຽວກັບຂໍກະແຈຂອງຖານະປະໂລຫິດ, ທ່ານສາມາດເລົ່າເລື່ອງລາວຂອງແອວເດີ ແກຣີ ອີ ສະຕີບເວັນສັນ ກ່ຽວກັບການລືມກະແຈໄວ້ຢູ່ໃນລົດຂອງເພິ່ນ (ເບິ່ງ ວິດີໂອ “Where Are the Keys?” ທີ່ ChurchofJesusChrist.org). ທ່ານສາມາດປ່ອຍໃຫ້ເດັກນ້ອຍໃຊ້ກະແຈເພື່ອເປີດເຮືອນ, ເປີດລົດ, ຫລື ເປີດສິ່ງອື່ນໆ. ໃຫ້ຄິດທີ່ຈະສະແດງຮູບປະທານຂອງສາດສະໜາຈັກ ແລະ ເປັນພະຍານວ່າ ເພິ່ນມີຂໍກະແຈຂອງຖານະປະໂລຫິດທຸກຢ່າງ, ເໝືອນດັ່ງເປໂຕມີ.

2:51

ມັດທາຍ 17:20.ສາດສະດາທີ່ມີສັດທາໃນພຣະເຢຊູຄຣິດໄດ້ຍ້າຍພູເຂົາແທ້ໆ (ເບິ່ງ ຢາໂຄບ 4:6; ໂມເຊ 7:13). ແຕ່ຕາມປົກກະຕິແລ້ວ, ນັ້ນບໍ່ແມ່ນການອັດສະຈັນທີ່ເຮົາຕ້ອງການ. ປະທານເອັມ ຣະໂຊ ບາເລີດ ໄດ້ສິດສອນວ່າ: “ຖ້າເຮົາມີສັດທານ້ອຍໆທໍ່ເມັດຜັກກາດ, ພຣະຜູ້ເປັນເຈົ້າສາມາດຊ່ວຍເຮົາໃຫ້ເຄື່ອນພູເຂົາແຫ່ງຄວາມທໍ້ຖອຍ ແລະ ຄວາມສົງໄສໃນວຽກງານທີ່ຢູ່ຕໍ່ໜ້າເຮົາ ຂະນະທີ່ເຮົາຮັບໃຊ້ກັບລູກໆຂອງພຣະເຈົ້າ, ຮ່ວມທັງສະມາຊິກໃນຄອບຄົວ, ສະມາຊິກຂອງສາດສະໜາຈັກ, ແລະ ຜູ້ຄົນທີ່ຍັງບໍ່ທັນເປັນສະມາຊິກຂອງສາດສະໜາຈັກເທື່ອ” (“Precious Gifts from God,” Liahona, May 2018, 10). ມີພູເຂົາຢ່າງໃດແດ່ໃນຊີວິດຂອງເຮົາ ທີ່ຈຳເປັນຕ້ອງຍ້າຍມັນໜີ? ເຮົາຈະສາມາດສະແດງສັດທາໃນອຳນາດຂອງພຣະເຈົ້າ ເພື່ອຊ່ວຍເຮົາໃຫ້ຍ້າຍພູເຂົາເຫລົ່ານີ້ໄດ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສິດສອນຂອງເຮົາ

ເຕົ້າໂຮມກັນເລື້ອຍໆ. ປະທານເຮັນຣີ ບີ ໄອຣິງ ໄດ້ສິດສອນວ່າ: “ຢ່າພາດໂອກາດທີ່ຈະເຕົ້າໂຮມລູກໆ ເພື່ອຮຽນຮູ້ຄຳສອນຂອງພຣະເຢຊູຄຣິດ. ໂອກາດເຊັ່ນນັ້ນແມ່ນຫາໄດ້ຍາກ ເມື່ອປຽບທຽບກັບຄວາມພະຍາຍາມຂອງສັດຕູ” (“The Power of Teaching Doctrine,” Ensign, May 1999, 74).

ຜູ້ຊາຍກັບລູກຊາຍທີ່ປ່ວຍໂຊ ຢູ່ຕໍ່ພຣະພັກຂອງພຣະເຢຊູ — Master, I Have Brought unto Thee My Son [ອາຈານເອີຍ, ຂ້ານ້ອຍໄດ້ນຳລູກຊາຍຂອງຂ້ານ້ອຍມາຫາທ່ານ], ໂດຍ ວາວເຕີ ເຣນ