“ວັນທີ 24–30 ເດືອນເມສາ. ໂຢຮັນ 7–10: ‘ເຮົາເປັນຜູ້ລ້ຽງແກະທີ່ດີ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 24–30 ເດືອນເມສາ. ໂຢຮັນ 7–10,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

Neither Do I Condemn Thee [ເຮົາກໍບໍ່ລົງໂທດເຈົ້າເໝືອນກັນ], ໂດຍ ອີວາ ໂຄເລວາ ທິມະຕີ

ວັນທີ 24–30 ເດືອນເມສາ

ໂຢຮັນ 7–10

“ເຮົາເປັນຜູ້ລ້ຽງແກະທີ່ດີ”

ຂະນະທີ່ທ່ານອ່ານ ໂຢຮັນ 7–10, ທ່ານອາດໄດ້ຮັບຄວາມປະທັບໃຈຈາກພຣະວິນຍານບໍລິສຸດກ່ຽວກັບຫລັກທຳຄຳສອນຢູ່ໃນບົດເຫລົ່ານີ້. ການບັນທຶກຄວາມປະທັບໃຈຂອງທ່ານໄວ້ ສາມາດຊ່ວຍທ່ານວາງແຜນທີ່ຈະປະຕິບັດຕາມນັ້ນ.

ບັນທຶກຄວາມປະທັບໃຈຂອງທ່ານ

ເຖິງແມ່ນວ່າພຣະເຢຊູຄຣິດໄດ້ສະເດັດມາເພື່ອນຳ “ສັນຕິສຸກ [ແລະ ຄວາມປາດຖະໜາດີມາໃຫ້] ມະນຸດທັງປວງ” (ລູກາ 2:14), ແຕ່ “ປະຊາຊົນ [ກໍຍັງ] ມີຄວາມເຫັນແຕກແຍກກັນໃນເລື່ອງ [ພຣະອົງ]” (ໂຢຮັນ 7:43). ຜູ້ຄົນທີ່ໄດ້ເປັນພະຍານເຖິງເຫດການດຽວກັນ ແຕ່ມີຂໍ້ສະຫລຸບທີ່ແຕກຕ່າງກັນກ່ຽວກັບວ່າພຣະເຢຊູເປັນໃຜ. ບາງຄົນສະຫລຸບວ່າ, “ລາວເປັນຄົນດີ,” ຂະນະທີ່ບາງຄົນເວົ້າວ່າ, “ລາວຫລອກປະຊາຊົນ” (ໂຢຮັນ 7:12). ເມື່ອພຣະອົງໄດ້ປິ່ນປົວຜູ້ຊາຍທີ່ຕາບອດໃນວັນຊະບາໂຕ, ບາງຄົນໄດ້ຢືນຢັນວ່າ, “ຜູ້ທີ່ເຮັດການເຊັ່ນນີ້ບໍ່ໄດ້ມາຈາກພຣະເຈົ້າ, ເພາະລາວບໍ່ໄດ້ຖືຮັກສາກົດຂອງວັນຊະບາໂຕ,” ຂະນະທີ່ຄົນອື່ນຖາມວ່າ, “ຄົນບາບຈະເຮັດການອັດສະຈັນແນວນີ້ໄດ້ຢ່າງໃດ?” (ໂຢຮັນ 9:16). ເຖິງແມ່ນມີຄວາມສັບສົນທັງໝົດນີ້, ແຕ່ຜູ້ທີ່ສະແຫວງຫາຄວາມຈິງໄດ້ຮັບຮູ້ພະລັງຂອງພຣະຄຳຂອງພຣະອົງ, ເພາະ “ບໍ່ເຄີຍເຫັນຜູ້ໃດທີ່ເວົ້າເໝືອນດັ່ງຊາຍຄົນນີ້ຈັກເທື່ອ” (ໂຢຮັນ 7:46). ເມື່ອຊາວຢິວຂໍໃຫ້ພຣະເຢຊູ “ບອກໃຫ້ພວກເຮົາຮູ້ຄັກ” ວ່າພຣະອົງເປັນພຣະຄຣິດ, ພຣະອົງໄດ້ເປີດເຜີຍຫລັກທຳຂໍ້ໜຶ່ງ ທີ່ສາມາດຊ່ວຍເຮົາໃຫ້ຈຳແນກຄວາມຈິງຈາກຄວາມຜິດໄດ້: “ແກະຂອງເຮົາກໍຟັງສຽງຂອງເຮົາ,” ພຣະອົງກ່າວ, “ເຮົາຮູ້ຈັກພວກເຂົາ, ແລະ ພວກເຂົາກໍຕາມເຮົາໄປ” (ໂຢຮັນ 10:24, 27).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ໂຢຮັນ 7:14–17

ເມື່ອເຮົາດຳລົງຊີວິດຕາມຄວາມຈິງ ທິ່ສິດສອນໂດຍພຣະເຢຊູຄຣິດ, ເຮົາຈະຮູ້ຈັກວ່າມັນເປັນຄວາມຈິງ.

ຊາວຢິວປະຫລາດໃຈທີ່ພຣະເຢຊູຮູ້ຫລາຍພຽງນັ້ນ, ເຖິງແມ່ນພຣະອົງບໍ່ໄດ້ຮຽນກໍຕາມ (ເບິ່ງ ຂໍ້ທີ 15)—ຢ່າງໜ້ອຍ, ບໍ່ແມ່ນໃນທາງທີ່ພວກເຂົາຄຸ້ນເຄີຍ. ໃນຄຳຕອບຂອງພຣະເຢຊູ, ພຣະອົງໄດ້ສິດສອນຄວາມແຕກຕ່າງ ຂອງການຮູ້ຄວາມຈິງທີ່ມີໃຫ້ທຸກຄົນ, ໂດຍບໍ່ຄຳນຶງເຖິງການສຶກສາ ຫລື ປະຫວັດ. ອີງຕາມ ໂຢຮັນ 7:14–17, ທ່ານຈະຮູ້ຈັກວ່າຄຳສອນທີ່ພຣະເຢຊູໄດ້ສິດສອນເປັນຄວາມຈິງໄດ້ແນວໃດ? ຂະບວນການນີ້ຊ່ວຍທ່ານພັດທະນາປະຈັກພະຍານຂອງທ່ານເຖິງພຣະກິດຕິຄຸນແນວໃດ?

ໂຢຮັນ 8:2–11

ຄວາມເມດຕາຂອງພຣະຜູ້ຊ່ວຍໃຫ້ລອດມີໃຫ້ທຸກຄົນ.

ເມື່ອກ່າວກ່ຽວກັບຄວາມປະຕິສຳພັນຂອງພຣະຜູ້ຊ່ວຍໃຫ້ລອດກັບຜູ້ຍິງທີ່ຖືກນຳມາຫາພຣະອົງຖານຫລິ້ນຊູ້, ແອວເດີ ແດວ ຈີ ເຣັນລັນ ໄດ້ກ່າວວ່າ: “ແນ່ນອນ, ພຣະຜູ້ຊ່ວຍໃຫ້ລອດບໍ່ໄດ້ຍົກໂທດໃຫ້ນາງໃນການຫລິ້ນຊູ້. ແຕ່ພຣະອົງກໍບໍ່ໄດ້ປະນາມຜູ້ຍິງຄົນນັ້ນນຳອີກ. ພຣະອົງໄດ້ຊຸກຍູ້ໃຫ້ນາງປ່ຽນແປງຊີວິດຂອງນາງ. ນາງໄດ້ຮັບການກະຕຸ້ນໃຫ້ປ່ຽນແປງເພາະຄວາມເຫັນອົກເຫັນໃຈ ແລະ ຄວາມເມດຕາຂອງພຣະອົງ. ການແປພຣະຄຣິສຕະທຳຄຳພີຂອງໂຈເຊັບ ສະມິດ ຢືນຢັນເຖິງຜົນຂອງການເປັນສານຸສິດຂອງນາງວ່າ: ‘ແລະ ຍິງຄົນນັ້ນໄດ້ສັນລະເສີນພຣະເຈົ້ານັບຈາກຊົ່ວໂມງນັ້ນ, ແລະ ໄດ້ເຊື່ອໃນພຣະນາມຂອງພຣະອົງ’ [ເບິ່ງ ໂຢຮັນ 8:11, ໝາຍເຫດຢູ່ທາງລຸ່ມໜ້າປຶ້ມ ຄ]” (“Our Good Shepherd,” Liahona, May 2017, 30).

ເມື່ອໃດທີ່ທ່ານເຄີຍຮູ້ສຶກຄືກັນກັບຜູ້ຍິງຄົນນີ້, ໄດ້ຮັບຄວາມເມດຕາແທນທີ່ຈະຖືກກ່າວໂທດຈາກພຣະຜູ້ຊ່ວຍໃຫ້ລອດ? ເມື່ອໃດທີ່ທ່ານເຄີຍເປັນຄືກັນກັບພວກທຳມະຈານ ແລະ ພວກຟາຣີຊາຍ, ໄດ້ກ່າວຫາ ແລະ ຕັດສິນຄົນອື່ນ ເຖິງແມ່ນຕົວທ່ານເອງກໍບໍ່ປາດສະຈາກບາບ? (ເບິ່ງ ໂຢຮັນ 8:7). ທ່ານສາມາດຮຽນຮູ້ຫຍັງແດ່ຈາກວິທີທີ່ພຣະຜູ້ຊ່ວຍໃຫ້ລອດປະຕິສຳພັນກັບພວກທຳມະຈານ ແລະ ພວກຟາຣີຊາຍ ແລະ ກັບຜູ້ຍິງທີ່ຖືກຈັບຖານຫລິ້ນຊູ້? ທ່ານຮຽນຮູ້ຫຍັງແດ່ກ່ຽວກັບການໃຫ້ອະໄພຂອງພຣະຜູ້ເປັນເຈົ້າ ຂະນະທີ່ທ່ານອ່ານຂໍ້ເຫລົ່ານີ້?

ເບິ່ງ “Go and Sin No More” (ວິດີໂອ), ChurchofJesusChrist.org ນຳອີກ.

ໂຢຮັນ 9

ຖ້າຫາກເຮົາມີສັດທາ, ພຣະເຈົ້າສາມາດສະແດງພຣະອົງເອງໃຫ້ປະຈັກໃນຄວາມທຸກຂອງເຮົາໄດ້.

ໂຢຮັນ 9:1–3 ສິດສອນທ່ານຫຍັງແດ່ກ່ຽວກັບການທ້າທາຍ ແລະ ຄວາມທຸກຂອງຊີວິດ? ຂະນະທີ່ທ່ານອ່ານ ໂຢຮັນ 9, ໃຫ້ໄຕ່ຕອງວິທີທີ່ “ພາລະກິດຂອງພຣະເຈົ້າສຳແດງ” ໃນຊີວິດຂອງຜູ້ຊາຍທີ່ເກີດມາຕາບອດແນວໃດ. ມັນຖືກສະແດງໃຫ້ປະຈັກໃນຊີວິດຂອງທ່ານແນວໃດ—ລວມທັງໃນຄວາມທຸກຂອງທ່ານ?

ໂຢຮັນ 10:1–30

ພຣະເຢຊູຄຣິດຄືຜູ້ລ້ຽງແກະທີ່ດີ.

ເຖິງແມ່ນຖ້າຫາກທ່ານບໍ່ຄຸ້ນເຄີຍກັບຝູງແກະ ແລະ ການລ້ຽງດູແກະ, ການອ່ານ ໂຢຮັນ 10, ບ່ອນທີ່ພຣະຜູ້ຊ່ວຍໃຫ້ລອດກ່າວວ່າ, “ເຮົາເປັນຜູ້ລ້ຽງແກະທີ່ດີ,” ກໍສາມາດສິດສອນທ່ານເຖິງຄວາມຈິງທີ່ສຳຄັນກ່ຽວກັບພຣະອົງ. ເພື່ອຈະຊອກຫາຄວາມຈິງເຫລົ່ານີ້, ໃຫ້ຊອກຫາວະລີທີ່ບັນຍາຍວ່າ ຜູ້ລ້ຽງແກະທີ່ດີນັ້ນເປັນແບບໃດ ແລະ ວະລີທີ່ກ່ຽວຂ້ອງກັບພຣະຜູ້ຊ່ວຍໃຫ້ລອດ. ຂ້າງລຸ່ມແມ່ນບາງຕົວຢ່າງ:

ຂໍ້ທີ 3: “ເພິ່ນເອີ້ນແກະຂອງຕົນຕາມຊື່, ແລະ ພາອອກໄປ.”
ຂໍ້ທີ 11: ພຣະອົງ “ສະລະຊີວິດຂອງຕົນເພື່ອຝູງແກະ.”
ຂໍ້ທີ 16: “ເຮົາຈະເຕົ້າໂຮມພວກເຂົາເຂົ້າເປັນຝູງດຽວທີ່ມີຜູ້ລ້ຽງແຕ່ຜູ້ດຽວ.”

ຕໍ່ໄປນີ້ແມ່ນຄຳຖາມເພີ່ມເຕີມ ເພື່ອຊ່ວຍທ່ານໃຫ້ໄຕ່ຕອງບົດນີ້: ພຣະເຢຊູເປັນເໝືອນດັ່ງປະຕູແນວໃດ? (ເບິ່ງ ຂໍ້ທີ 7–9). ພຣະອົງໄດ້ມອບ “ຊີວິດ … ຢ່າງຄົບບໍລິບູນ” ໃຫ້ທ່ານແນວໃດ? (ຂໍ້ທີ 10). ທ່ານເຄີຍຮູ້ສຶກວ່າພຣະອົງຮູ້ຈັກທ່ານເປັນສ່ວນຕົວຕອນໃດ? (ເບິ່ງ ຂໍ້ທີ 14). ທ່ານຮູ້ຈັກສຽງຂອງຜູ້ລ້ຽງແກະທີ່ດີໄດ້ແນວໃດ? (ເບິ່ງ ຂໍ້ທີ 27).

ເບິ່ງ ເພງສັນລະເສີນ 23; ເອເຊກຽນ 34; ແອວມາ 5:37–39; 3 ນີໄຟ 15:21–16:5; Gerrit W. Gong, “Good Shepherd, Lamb of God,” Liahona, May 2019, 97–101 ນຳອີກ.

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ໂຢຮັນ 7:24.ເພື່ອຊ່ວຍຄອບຄົວຂອງທ່ານໃຫ້ເຂົ້າໃຈຄຳສອນຂອງພຣະເຢຊູໃນ ໂຢຮັນ 7:24, ທ່ານສາມາດສະແດງບາງສິ່ງທີ່ຂ້າງນອກແຕກຕ່າງຈາກຂ້າງໃນ. ຫລື ສະມາຊິກໃນຄອບຄົວສາມາດແບ່ງປັນປະສົບການທີ່ສິດສອນເຂົາເຈົ້າ ບໍ່ໃຫ້ຕັດສິນການປະກົດພາຍນອກ. ທ່ານກໍສາມາດຂຽນຄຸນສົມບັດຂອງສະມາຊິກໃນຄອບຄົວແຕ່ລະຄົນທີ່ຕາຫລຽວບໍ່ເຫັນລົງໄວ້ນຳອີກ (ເບິ່ງ 1 ຊາມູເອນ 16:7; Thomas S. Monson, “ເບິ່ງ Others as They May Become,” Liahona, Nov. 2012, 68–71 ນຳອີກ).

ໂຢຮັນ 8:31–36.ຄຳວ່າ “ຜູ້ຮັບໃຊ້ຂອງບາບ” ໝາຍຄວາມວ່າແນວໃດ? (ເບິ່ງ ໂມໂຣໄນ 7:11 ນຳອີກ). ຄວາມຈິງໃດແດ່ທີ່ພຣະເຢຊູສິດສອນ ສາມາດເຮັດໃຫ້ເຮົາເປັນອິດສະລະ?

ພຣະຄຣິດກຳລັງປິ່ນປົວຜູ້ຊາຍທີ່ຕາບອດ — Jesus Healing the Blind [ພຣະຄຣິດກຳລັງປິ່ນປົວຄົນຕາບອດ], ໂດຍ ຄາລ ເຮັນຣິກ ບະລ໊ອກ

ໂຢຮັນ 9.ທ່ານຈະສາມາດຊ່ວຍເຫລືອຄອບຄົວຂອງທ່ານໃຫ້ວາດພາບເຫັນເລື່ອງລາວທີ່ພຣະເຢຊູປິ່ນປົວຜູ້ຊາຍທີ່ຕາບອດໃນ ໂຢຮັນ 9 ໄດ້ແນວໃດ? ພວກທ່ານສາມາດສະແດງຕາມເລື່ອງນຳກັນ ຫລື ສາຍວິດີໂອ “Jesus Heals a Man Born Blind” (ChurchofJesusChrist.org). ໃຫ້ຢຸດວິດີໂອບາງຄັ້ງ ເພື່ອວ່າສະມາຊິກໃນຄອບຄົວຈະສາມາດອ່ານຂໍ້ທີ່ກ່ຽວພັນກັນຈາກ ໂຢຮັນ 9. ເຊື້ອເຊີນເຂົາເຈົ້າໃຫ້ສັງເກດເບິ່ງບົດຮຽນໃດໆທີ່ເຂົາເຈົ້າໄດ້ຮຽນຮູ້ຈາກເລື່ອງນີ້, ດັ່ງເຊັ່ນການປ່ຽນໃຈເຫລື້ອມໃສພຣະກິດຕິຄຸນຂອງພຣະເຢຊູຄຣິດ ໝາຍຄວາມວ່າແນວໃດ.

ໂຢຮັນ 10:1–18, 27–29.ເພື່ອໃຫ້ສະມາຊິກໃນຄອບຄົວມີສ່ວນຮ່ວມໃນການຮຽນຮູ້ຈາກຄຳອຸປະມາເລື່ອງຜູ້ລ້ຽງແກະທີ່ດີ, ໃຫ້ຂໍໃຫ້ແຕ່ລະຄົນແຕ້ມຮູບໜຶ່ງ ດັ່ງຕໍ່ໄປນີ້: ຂະໂມຍ, ປະຕູ, ຄົນລ້ຽງແກະ, ການວ່າຈ້າງ (ພະນັກງານທີ່ຖືກຈ້າງ), ໝາໄນ, ແລະ ໂຕແກະ. ເຊື້ອເຊີນເຂົາເຈົ້າໃຫ້ອ່ານ ໂຢຮັນ 10:1–18, 27–29, ແລະ ແລ້ວໃຫ້ສົນທະນາເປັນຄອບຄົວເຖິງສິ່ງທີ່ພຣະຜູ້ຊ່ວຍໃຫ້ລອດໄດ້ສິດສອນກ່ຽວກັບສິ່ງທີ່ເຂົາເຈົ້າແຕ້ມ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສຶກສາສ່ວນຕົວ

ຊອກຫາຖ້ອຍຄຳ ແລະ ວະລີທີ່ດົນໃຈ. ຂະນະທີ່ທ່ານອ່ານ, ພຣະວິນຍານອາດເຮັດໃຫ້ທ່ານສົນໃຈກັບຖ້ອຍຄຳ ຫລື ວະລີໃດໜຶ່ງ ທີ່ດົນໃຈ ຫລື ກະຕຸ້ນທ່ານ ຫລື ເບິ່ງຄືວ່າຖືກຂຽນສຳລັບທ່ານໂດຍສະເພາະ. ໃຫ້ຄິດທີ່ຈະຂຽນຖ້ອຍຄຳ ຫລື ວະລີໃນ ໂຢຮັນ 7–10 ທີ່ດົນໃຈທ່ານລົງໄວ້.

ພຣະຄຣິດກັບໂຕແກະ — Lost No More [ບໍ່ເສຍໄປອີກ], ໂດຍ ກະເຣກ ເຄ ອໍສັນ