“ວັນທີ 1–7 ເດືອນພຶດສະພາ. ລູກາ 12–17; ໂຢຮັນ 11: ‘ຂ້ອຍດີໃຈຫລາຍ; ເພາະຂ້ອຍໄດ້ພົບແກະຂອງຂ້ອຍທີ່ເສຍໄປ; ຈົ່ງຮ່ວມກັນສະຫລອງເທາະ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 1–7 ເດືອນພຶດສະພາ. ລູກາ 12–17; ໂຢຮັນ 11,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

ຮູບພາບ

ຜູ້ຊາຍກຳລັງໂອບກອດລູກຊາຍຂອງລາວ

The Prodigal Son [ລູກຊາຍທີ່ເສຍ], ໂດຍ ລີສ໌ ລີມັນ ສະວິນໂດ

ວັນທີ 1–7 ເດືອນພຶດສະພາ

ລູກາ 12–17; ໂຢຮັນ 11

“ຂ້ອຍດີໃຈຫລາຍ; ເພາະຂ້ອຍໄດ້ພົບແກະຂອງຂ້ອຍທີ່ເສຍໄປ; ຈົ່ງຮ່ວມກັນສະຫລອງເທາະ”

ຂະນະທີ່ທ່ານອ່ານ ລູກາ 12–17 ແລະ ໂຢຮັນ 11, ໃຫ້ສະແຫວງຫາສິ່ງທີ່ພຣະບິດາເທິງສະຫວັນປະສົງໃຫ້ທ່ານຮູ້ ແລະ ເຮັດ ດ້ວຍການອະທິຖານ. ການສຶກສາບົດເຫລົ່ານີ້ສາມາດເປີດໃຈທ່ານຕໍ່ຂ່າວສານທີ່ມີຄວາມໝາຍສຳລັບທ່ານໂດຍສະເພາະ.

ບັນທຶກຄວາມປະທັບໃຈຂອງທ່ານ

ໃນກໍລະນີສ່ວນໃຫຍ່, 99 ຂອງ 100 ກໍຖືວ່າດີເລີດແລ້ວ—ແຕ່ມັນບໍ່ດີພໍ ເມື່ອມັນເປັນຈຳນວນທີ່ໝາຍເຖິງລູກໆທີ່ຮັກຂອງພຣະເຈົ້າ (ເບິ່ງ ຄຳສອນ ແລະ ພັນທະສັນຍາ 18:10). ໃນກໍລະນີນັ້ນ, ແມ່ນແຕ່ຈິດວິນຍານດວງດຽວກໍຄວນຖືກຄົ້ນຫາຢ່າງຖີ່ຖ້ວນ ແລະ ດ້ວຍຄວາມຕັ້ງໃຈ “ຈົນ [ເຮົາ] ພົບ” (ລູກາ 15:4), ດັ່ງທີ່ພຣະຜູ້ຊ່ວຍໃຫ້ລອດໄດ້ສິດສອນຢູ່ໃນຄຳອຸປະມາເລື່ອງແກະທີ່ເສຍໄປ. ແລ້ວສາມາດເລີ່ມປິຕິຍິນດີ, ເພາະ “ສະຫວັນຈະມີຄວາມຊົມຊື່ນຍິນດີຫລາຍ ທີ່ຄົນບາບຜູ້ໜຶ່ງຖິ້ມໃຈເກົ່າເອົາໃຈໃໝ່ຫລາຍກວ່າຄົນສິນທຳເກົ້າສິບເກົ້າຄົນ ທີ່ບໍ່ຕ້ອງການຖິ້ມໃຈເກົ່າເອົາໃຈໃໝ່” (ລູກາ 15:7). ຖ້າຫາກສິ່ງນັ້ນເບິ່ງຄືບໍ່ຍຸດຕິທຳ, ການຈື່ຈຳສິ່ງນີ້ຈະຊ່ວຍໄດ້, ໃນຄວາມຈິງແລ້ວ, ບໍ່ມີຄົນໃດທີ່ “ບໍ່ຈຳເປັນຕ້ອງກັບໃຈ.” ເຮົາທຸກຄົນຕ້ອງການ ການຊ່ວຍກູ້ຊີວິດ. ແລະ ເຮົາທຸກຄົນກໍສາມາດມີສ່ວນຮ່ວມໃນການຊ່ວຍກູ້ຊີວິດ, ປິຕິຍິນດີນຳກັນກັບຈິດວິນຍານແຕ່ລະດວງທີ່ຖືກຊ່ວຍໃຫ້ລອດ (ເບິ່ງ ຄຳສອນ ແລະ ພັນທະສັນຍາ 18:15–16).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ລູກາ 12; 14–16

ເຮົາໄດ້ຮັບພອນເມື່ອເຮົາຕັ້ງໃຈໃນສິ່ງທີ່ເປັນນິລັນດອນ.

ເປັນຫຍັງພຣະເຈົ້າຈຶ່ງກ່າວວ່າ “ຄົນໂງ່ເອີຍ” ກັບຊາຍທີ່ທຳງານໜັກ ແລະ ປະສົບຜົນສຳເລັດ ຜູ້ໄດ້ສ້າງເລົ້າໃຫຍ່ ແລະ ເອົາຜົນລະປູກ ແລະ ສິ່ງຂອງທັງໝົດຂອງລາວເກັບໄວ້ໃນນັ້ນ? (ເບິ່ງ ລູກາ 12:16–21). ຢູ່ໃນບົດເຫລົ່ານີ້ ໃນລູກາ, ພຣະຜູ້ຊ່ວຍໃຫ້ລອດສິດສອນຄຳອຸປະມາຫລາຍເລື່ອງ ທີ່ຊ່ວຍເຮົາໃຫ້ເບິ່ງໄປໄກກວ່າທາງໂລກ ໄປສູ່ນິລັນດອນ. ຄຳອຸປະມາບາງເລື່ອງເຫລົ່ານີ້ ຖືກລະບຸໄວ້ຢູ່ໃນນີ້. ທ່ານຈະສະຫລຸບຂ່າວສານຂອງແຕ່ລະເລື່ອງແນວໃດ? ທ່ານຄິດວ່າພຣະຜູ້ເປັນເຈົ້າກຳລັງບອກຫຍັງກັບທ່ານ?

ເສດຖີໂງ່ (ລູກາ 12:13–21)
ງານກິນລ້ຽງໃຫຍ່ (ລູກາ 14:12–24)
ລູກຊາຍທີ່ເສຍ (ລູກາ 15:11–32)
ຜູ້ຈັດການທີ່ບໍ່ສັດຊື່ (ລູກາ 16:1–12)
ເສດຖີກັບລາຊາໂຣ (ລູກາ 16:19–31)

ເບິ່ງ ມັດທາຍ 6:19–34; 2 ນີໄຟ 9:30; ຄຳສອນ ແລະ ພັນທະສັນຍາ 25:10 ນຳອີກ.

ລູກາ 15

ພຣະບິດາເທິງສະຫວັນປິຕິຍິນດີ ເມື່ອຜູ້ທີ່ເສຍໄປຖືກພົບເຫັນ.

ຂະນະທີ່ທ່ານອ່ານຄຳອຸປະມາທີ່ພຣະເຢຊູໄດ້ສິດສອນໃນ ລູກາ 15, ທ່ານຮຽນຮູ້ຫຍັງແດ່ເຖິງຄວາມຮູ້ສຶກຂອງພຣະບິດາເທິງສະຫວັນກ່ຽວກັບຜູ້ທີ່ໄດ້ເຮັດບາບ ຫລື ຜູ້ທີ່ “ເສຍ” ໄປ? ຜູ້ນຳທາງວິນຍານ—ຫລື ເຮົາແຕ່ລະຄົນ—ຮູ້ສຶກແນວໃດຕໍ່ເຂົາເຈົ້າ? ໃຫ້ພິຈາລະນາວິທີທີ່ພວກຟາຣີຊາຍ ແລະ ພວກທຳມະຈານຈະຕອບຄຳຖາມເຫລົ່ານີ້ແນວໃດ (ເບິ່ງ ລູກາ 15:1–2). ຄຳຕອບຂອງພຣະເຢຊູມີຢູ່ໃນຄຳອຸປະມາສາມເລື່ອງເຫລົ່ານີ້ ໃນ ລູກາ 15. ຂະນະທີ່ທ່ານອ່ານ, ໃຫ້ຄິດກ່ຽວກັບວ່າ ພຣະເຢຊູໄດ້ສິດສອນພວກທຳມະຈານ ແລະ ພວກຟາຣີຊາຍຫຍັງແດ່ດ້ວຍຄຳອຸປະມາເຫລົ່ານີ້.

ທ່ານກໍສາມາດຄິດທີ່ຈະຂຽນສິ່ງທີ່ຄ້າຍຄືກັນ ແລະ ສິ່ງທີ່ແຕກຕ່າງລະຫວ່າງຄຳອຸປະມາເຫລົ່ານີ້ນຳອີກ. ຍົກຕົວຢ່າງ, ທ່ານສາມາດຊອກຫາສິ່ງທີ່ເສຍໄປ ຢູ່ໃນຄຳອຸປະມາ ແລະ ເປັນຫຍັງມັນຈຶ່ງເສຍໄປ, ວິທີທີ່ມັນຖືກພົບເຫັນ, ແລະ ຜູ້ຄົນມີປະຕິກິລິຍາແນວໃດ ເມື່ອພົບເຫັນມັນ. ພຣະເຢຊູມີຂ່າວສານຢ່າງໃດແດ່ສຳລັບຜູ້ທີ່ “ເສຍ” ໄປ—ລວມທັງຜູ້ທີ່ຄິດວ່າ ຕົວເອງບໍ່ໄດ້ເສຍໄປໃສ? ມີຂ່າວສານໃດແດ່ທີ່ພຣະອົງມີສຳລັບຜູ້ທີ່ຊອກຫາຜູ້ທີ່ເສຍໄປ?

ເບິ່ງ ຄຳສອນ ແລະ ພັນທະສັນຍາ 18:10–16; Jeffrey R. Holland, “The Other Prodigal,” Ensign, May 2002, 62–64 ນຳອີກ.

The Lost Piece of Silver [ຫລຽນທີ່ເສຍ], ໂດຍ ເຈມສ໌ ທີໂຊ

ລູກາ 16:1–12

ແມ່ນຫຍັງຄືຄຳສອນຂອງພຣະຄຣິດຢູ່ໃນຄຳອຸປະມາເລື່ອງຜູ້ຈັດການທີ່ບໍ່ສັດຊື່?

ແອວເດີ ເຈມສ໌ ອີ ທາເມດ ໄດ້ອະທິບາຍບົດຮຽນບົດໜຶ່ງທີ່ເຮົາສາມາດຮຽນຮູ້ຈາກຄຳອຸປະມາວ່າ: “ຈົ່ງພາກພຽນ; ເພາະເວລາທີ່ທ່ານສາມາດໃຊ້ຊັບສິນທີ່ຫລວງຫລາຍໃນໂລກນີ້ ບໍ່ດົນກໍຈະໝົດໄປແລ້ວ. ໃຫ້ຮັບເອົາບົດຮຽນຈາກແມ່ນແຕ່ຄົນບໍ່ຊື່ສັດ ແລະ ຄົນຊົ່ວ; ຖ້າຫາກພວກເຂົາຮອບຄອບພໍທີ່ຈະຈັດຫາອະນາຄົດດຽວທີ່ພວກເຂົາຄິດນຳ, ແລ້ວທ່ານຄວນຮອບຄອບກວ່ານັ້ນຫລາຍພຽງໃດ, ຜູ້ເຊື່ອໃນອະນາຄົດທີ່ເປັນນິລັນດອນ, ທີ່ຈະຕ້ອງຈັດຫາ! ຖ້າຫາກທ່ານຍັງບໍ່ໄດ້ຮຽນຮູ້ສະຕິປັນຍາ ແລະ ຄວາມຮອບຄອບເທື່ອ ໃນການໃຊ້ ‘ຊັບສິນອັນບໍ່ຍຸດຕິທຳ’ ແລ້ວທ່ານຈະໄດ້ຮັບຄວາມໄວ້ເນື້ອເຊື່ອໃຈກັບຊັບສິນທີ່ຍືນຍົງຫລາຍກວ່ານັ້ນໄດ້ແນວໃດ?” (Jesus the Christ [1916], 464). ມີບົດຮຽນອື່ນໃດແດ່ທີ່ທ່ານພົບເຫັນຢູ່ໃນຄຳອຸປະມານີ້?

ລູກາ 17:11–19

ຄວາມກະຕັນຍູສຳລັບພອນຂອງເຮົາຈະນຳພາເຮົາໃຫ້ເຂົ້າໃກ້ພຣະເຈົ້າຫລາຍຂຶ້ນ.

ຖ້າຫາກທ່ານເປັນຄົນໜຶ່ງໃນຈຳນວນຄົນຂີ້ທູດສິບຄົນ, ທ່ານຄິດວ່າ ທ່ານຈະກັບຄືນໄປຂອບໃຈພຣະຜູ້ຊ່ວຍໃຫ້ລອດບໍ? ມີພອນອື່ນຕື່ມອີກຢ່າງໃດແດ່ທີ່ຄົນຂີ້ທູດຜູ້ຮູ້ບຸນຄຸນໄດ້ຮັບ ຍ້ອນວ່າລາວໄດ້ກັບຄືນໄປຂອບໃຈ?

ທ່ານກໍສາມາດໄຕ່ຕອງພຣະຄຳຂອງພຣະຜູ້ຊ່ວຍໃຫ້ລອດນຳອີກ ທີ່ວ່າ, “[ສັດທາ] ຂອງເຈົ້າໄດ້ເຮັດໃຫ້ເຈົ້າຫາຍດີແລ້ວ” (ຂໍ້ທີ 19). ໃນຄວາມຄິດເຫັນຂອງທ່ານ, ຄວາມກະຕັນຍູ ແລະ ສັດທາກ່ຽວຂ້ອງກັນແນວໃດ? ທັງສອງຢ່າງຊ່ວຍເຮົາໃຫ້ຫາຍດີແນວໃດ? ວິດີໂອ “President Russell M. Nelson on the Healing Power of Gratitude” (ChurchofJesusChrist.org) ສາມາດຊ່ວຍທ່ານໃຫ້ໄຕ່ຕອງຄຳຖາມເຫລົ່ານີ້ໄດ້.

ເບິ່ງ Dale G. Renlund, “Consider the Goodness and Greatness of God,” Liahona, May 2020, 41–44 ນຳອີກ.

ໂຢຮັນ 11:1–46

ພຣະເຢຊູຄຣິດເປັນເຫດໃຫ້ຄົນທັງປວງເປັນຄືນມາ, ທັງເປັນຊີວິດ.

ຄວາມມະຫັດສະຈັນໃນການເຮັດໃຫ້ລາຊາໂຣເປັນຄືນມາຈາກຕາຍ ເປັນປະຈັກພະຍານທີ່ມີພະລັງ ແລະ ໂຕ້ຖຽງບໍ່ໄດ້ວ່າ ພຣະເຢຊູເປັນພຣະບຸດຂອງພຣະເຈົ້າ ແລະ ເປັນພຣະເມຊີອາທີ່ສັນຍາໄວ້ແທ້ໆ. ມີຖ້ອຍຄຳ, ວະລີ, ຫລື ລາຍລະອຽດຢ່າງໃດແດ່ໃນ ໂຢຮັນ 11:1–46 ທີ່ເພີ່ມຄວາມເຂັ້ມແຂງໃຫ້ສັດທາຂອງທ່ານ ວ່າພຣະເຢຊູຄຣິດ ເປັນເຫດໃຫ້ຄົນທັງປວງ “ເປັນຄືນມາ, ທັງເປັນຊີວິດ”? ພຣະເຢຊູ ເປັນເຫດໃຫ້ຄົນທັງປວງ “ເປັນຄືນມາ, ທັງເປັນຊີວິດ” ມີຄວາມໝາຍແນວໃດຕໍ່ທ່ານ?

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ລູກາ 15:1–10.ສະມາຊິກໃນຄອບຄົວຂອງທ່ານເຂົ້າໃຈບໍ ເຖິງຄວາມຮູ້ສຶກຕອນທີ່ສູນເສຍບາງຢ່າງໄປ—ຫລື ຫລົງທາງໄປ? ການເວົ້າລົມກັນກ່ຽວກັບປະສົບການຂອງເຂົາເຈົ້າ ສາມາດເລີ່ມຕົ້ນການສົນທະນາກ່ຽວກັບຄຳອຸປະມາເລື່ອງແກະທີ່ເສຍໄປ ແລະ ເງິນຫລຽນທີ່ເສຍໄປໄດ້. ຫລື ພວກທ່ານສາມາດຫລິ້ນເກມ ທີ່ໃຫ້ຄົນໜຶ່ງໄປລີ້ ແລະ ໃຫ້ສະມາຊິກໃນຄອບຄົວຄົນອື່ນໆໄປຊອກຫາ. ກິດຈະກຳນີ້ຊ່ວຍເຮົາໃຫ້ເຂົ້າໃຈຄຳອຸປະມາເຫລົ່ານີ້ແນວໃດ?

ລູກາ 15:11–32.ເຮົາຈະສາມາດເປັນຄືກັນກັບພໍ່ຜູ້ຢູ່ໃນເລື່ອງນີ້ໄດ້ແນວໃດ ເມື່ອເຮົາມີບາງຄົນທີ່ເຮົາຮັກເສຍໄປ? ເຮົາຮຽນຮູ້ຫຍັງແດ່ຈາກປະສົບການຂອງລູກຊາຍຜູ້ໃຫຍ່ ທີ່ສາມາດຊ່ວຍເຮົາໃຫ້ເປັນເໝືອນດັ່ງພຣະຄຣິດຫລາຍຂຶ້ນ? ໃນທາງໃດແດ່ທີ່ພໍ່ຢູ່ໃນຄຳອຸປະມາເລື່ອງນີ້ຄືກັນກັບພຣະບິດາເທິງສະຫວັນ?

ລູກາ 17:11–19.ເພື່ອຊ່ວຍສະມາຊິກໃນຄອບຄົວໃຫ້ນຳໃຊ້ເລື່ອງລາວກ່ຽວກັບຄົນຂີ້ທູດສິບຄົນ, ທ່ານສາມາດເຊື້ອເຊີນເຂົາເຈົ້າໃຫ້ຂຽນຂໍ້ຄວາມບອກຂອບໃຈໃຫ້ກັນແລະກັນແບບລັບໆ. ພວກທ່ານກໍສາມາດຮ້ອງເພງ “ນັບພຣະພອນຂອງທ່ານ” (ເພງສວດ ແລະ ເພງຂອງເດັກນ້ອຍ, 8) ນຳກັນ ແລະ ນັບພຣະພອນທີ່ຄອບຄົວຂອງທ່ານໄດ້ຮັບນຳອີກ.

ໂຢຮັນ 11:1–46.ສະມາຊິກໃນຄອບຄົວສາມາດເບິ່ງວິດີໂອຊື່ “Lazarus Is Raised from the Dead” (ChurchofJesusChrist.org) ແລະ ແບ່ງປັນປະຈັກພະຍານເຖິງພຣະເຢຊູຄຣິດ.

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ປັນຍາ ແລະ ຄວາມຮັກຍິ່ງໃຫຍ່,” ເພງສວດ ແລະ ເພງຂອງເດັກນ້ອຍ, 20.

ການປັບປຸງການສິດສອນຂອງເຮົາ

ໃຊ້ເລື່ອງເລົ່າ ແລະ ຕົວຢ່າງເພື່ອສິດສອນຫລັກທຳພຣະກິດຕິຄຸນ. ພຣະຜູ້ຊ່ວຍໃຫ້ລອດມັກສິດສອນກ່ຽວກັບຫລັກທຳພຣະກິດຕິຄຸນ ໂດຍການໃຊ້ເລື່ອງເລົ່າ ແລະ ຄຳອຸປະມາ. ໃຫ້ຄິດຫາຕົວຢ່າງ ແລະ ເລື່ອງເລົ່າຈາກປະສົບການຂອງທ່ານເອງ ທີ່ສາມາດເຮັດໃຫ້ຫລັກທຳພຣະກິດຕິຄຸນເກີດເປັນຕົວເປັນຕົນ ສຳລັບຄອບຄົວຂອງທ່ານ (ເບິ່ງ Teaching in the Savior’s Way, 22).