“ວັນທີ 8–14 ເດືອນພຶດສະພາ. ມັດທາຍ 19–20; ມາຣະໂກ 10; ລູກາ 18: ‘ມີສິ່ງໃດອີກທີ່ຂ້ານ້ອຍຍັງຂາດຢູ່?,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)
“ວັນທີ 8–14 ເດືອນພຶດສະພາ. ມັດທາຍ 19–20; ມາຣະໂກ 10; ລູກາ 18,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023
ວັນທີ 8–14 ເດືອນພຶດສະພາ
ມັດທາຍ 19–20; ມາຣະໂກ 10; ລູກາ 18
“ມີສິ່ງໃດອີກທີ່ຂ້ານ້ອຍຍັງຂາດຢູ່?”
ອ່ານ ແລະ ໄຕ່ຕອງ ມັດທາຍ 19–20; ມາຣະໂກ 10; ແລະ ລູກາ 18, ເອົາໃຈໃສ່ຕໍ່ການກະຕຸ້ນທີ່ທ່ານໄດ້ຮັບ. ໃຫ້ຂຽນສິ່ງທີ່ຖືກກະຕຸ້ນລົງໄວ້, ແລະ ເບິ່ງວ່າຈະປະຕິບັດຕາມການກະຕຸ້ນເຫລົ່ານັ້ນແນວໃດ.
ບັນທຶກຄວາມປະທັບໃຈຂອງທ່ານ
ຖ້າຫາກທ່ານມີໂອກາດຖາມພຣະຜູ້ຊ່ວຍໃຫ້ລອດ, ທ່ານຈະຖາມກ່ຽວກັບຫຍັງ? ເມື່ອມະຫາເສດຖີໜຸ່ມໄດ້ພົບກັບພຣະຜູ້ຊ່ວຍໃຫ້ລອດ ເປັນເທື່ອທຳອິດ, ລາວໄດ້ຖາມວ່າ, “ຂ້ານ້ອຍຕ້ອງເຮັດຄວາມດີຢ່າງໃດແດ່ ຈຶ່ງຈະໄດ້ຮັບຊີວິດນິລັນດອນ?” (ມັດທາຍ 19:16). ຄຳຕອບຂອງພຣະຜູ້ຊ່ວຍໃຫ້ລອດສະແດງໃຫ້ເຫັນທັງຄວາມຊື່ນຊົມໃນສິ່ງທີ່ດີ ທີ່ມະຫາເສດຖີໜຸ່ມໄດ້ເຮັດ ແລະ ການສະໜັບສະໜູນດ້ວຍຄວາມຮັກເພື່ອໃຫ້ເຮັດຕື່ມອີກ. ເມື່ອເຮົາໄຕ່ຕອງເຖິງຄວາມເປັນໄປໄດ້ຂອງຊີວິດນິລັນດອນ, ເຮົາອາດສົງໄສທີ່ຄ້າຍຄືກັນນັ້ນ ຖ້າຫາກວ່າ ມີສິ່ງໃດອີກທີ່ເຮົາຄວນເຮັດ. ເມື່ອເຮົາຖາມ, ໃນວິທີທາງຂອງເຮົາເອງທີ່ວ່າ, “ມີສິ່ງໃດອີກທີ່ຂ້ານ້ອຍຍັງຂາດຢູ່?” (ມັດທາຍ 19:20), ພຣະຜູ້ເປັນເຈົ້າສາມາດຕອບເຮົາໃນທາງສ່ວນຕົວ ຄືກັນກັບທີ່ພຣະອົງໄດ້ຕອບມະຫາເສດຖີໜຸ່ມຄົນນັ້ນ. ບໍ່ວ່າສິ່ງໃດກໍຕາມທີ່ພຣະຜູ້ເປັນເຈົ້າຂໍໃຫ້ເຮົາເຮັດ, ການເຮັດຕາມຄຳຕອບຂອງພຣະອົງ ຈະຮຽກຮ້ອງໃຫ້ເຮົາໄວ້ວາງໃຈໃນພຣະອົງຫລາຍກວ່າຄວາມຊອບທຳຂອງເຮົາເອງສະເໝີ (ເບິ່ງ ລູກາ 18:9–14) ແລະ ວ່າເຮົາຈະ “ຮັບເອົາອານາຈັກຂອງພຣະເຈົ້າເໝືອນດັ່ງເດັກນ້ອຍ” (ລູກາ 18:17; ເບິ່ງ 3 ນີໄຟ 9:22 ນຳອີກ).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ມັດທາຍ 19:3–9; ມາຣະໂກ 10:2–12
ການແຕ່ງງານລະຫວ່າງຊາຍ ແລະ ຍິງ ໄດ້ຖືກແຕ່ງຕັ້ງໄວ້ໂດຍພຣະເຈົ້າ.
ການສົນທະນາລະຫວ່າງພຣະຜູ້ຊ່ວຍໃຫ້ລອດ ແລະ ພວກຟາຣີຊາຍ ເປັນໜຶ່ງໃນສອງສາມຄັ້ງທີ່ຖືກບັນທຶກໄວ້ ຊຶ່ງໃນນັ້ນພຣະຜູ້ຊ່ວຍໃຫ້ລອດໄດ້ສິດສອນກ່ຽວກັບການແຕ່ງງານໂດຍສະເພາະ. ຫລັງຈາກທີ່ອ່ານ ມັດທາຍ 19:3–9 ແລະ ມາຣະໂກ 10:2–12 ແລ້ວ, ໃຫ້ຂຽນຂໍ້ຄວາມບາງຢ່າງທີ່ທ່ານຮູ້ສຶກ ໃນການສະຫລຸບທັດສະນະຂອງພຣະຜູ້ເປັນເຈົ້າກ່ຽວກັບການແຕ່ງງານລົງໄວ້. ແລ້ວໃຫ້ສຶກສາບາງແຫລ່ງຢູ່ໃນ “Marriage” (Gospel Topics, topics.ChurchofJesusChrist.org), ແລະ ຕື່ມຂໍ້ຄວາມໃສ່ກັບສິ່ງທີ່ທ່ານໄດ້ຂຽນໄວ້ແລ້ວ. ຄວາມຮູ້ຂອງທ່ານກ່ຽວກັບແຜນແຫ່ງຄວາມລອດຂອງພຣະບິດາ ມີຜົນກະທົບຕໍ່ວິທີທີ່ທ່ານຄິດ ແລະ ຮູ້ສຶກກ່ຽວກັບການແຕ່ງງານແນວໃດ?
ມັດທາຍ 19:3–9; ມາຣະໂກ 10:2–12
ພຣະເຢຊູໄດ້ສິດສອນວ່າ ການຢ່າຮ້າງເປັນສິ່ງທີ່ບໍ່ຖືກຍອມຮັບບໍ ຫລື ວ່າຜູ້ເປັນຮ້າງບໍ່ຄວນແຕ່ງງານອີກບໍ?
ໃນການກ່າວກ່ຽວກັບການຢ່າຮ້າງ, ປະທານດາລິນ ເອັຈ ໂອກສ໌ ໄດ້ສິດສອນວ່າ ພຣະບິດາເທິງສະຫວັນປະສົງໃຫ້ຄວາມສຳພັນຂອງການແຕ່ງງານເປັນນິລັນດອນ. ເຖິງຢ່າງໃດກໍຕາມ, ພຣະເຈົ້າເຂົ້າໃຈດີວ່າ ບາງເທື່ອກໍຈຳເປັນຕ້ອງມີການຢ່າຮ້າງ. ປະທານໂອກສ໌ໄດ້ອະທິບາຍວ່າ ພຣະຜູ້ເປັນເຈົ້າ “ອະນຸຍາດໃຫ້ຜູ້ຢ່າຮ້າງແຕ່ງງານອີກ ປາດສະຈາກມົນທິນຂອງການເຮັດຜິດສິນທຳ ທີ່ໄດ້ກຳນົດໄວ້ໃນກົດທີ່ສູງກວ່າ. ເວັ້ນເສຍແຕ່ສະມາຊິກຜູ້ຢ່າຮ້າງໄດ້ລ່ວງລະເມີດກົດຢ່າງຮ້າຍແຮງເທົ່ານັ້ນ, ເຂົາເຈົ້າຈະມີສິດໄດ້ຮັບໃບຮັບຮອງເຂົ້າພຣະວິຫານອີກ ພາຍໃຕ້ມາດຕະຖານແຫ່ງຄວາມມີຄຸນຄ່າພໍເໝືອນກັນກັບສະມາຊິກຄົນອື່ນໆ” (“Divorce,” Liahona, May 2007, 70).
ມັດທາຍ 19:16–22; ມາຣະໂກ 10:17–22; ລູກາ 18:18–23
ຖ້າຫາກເຮົາທູນຖາມພຣະຜູ້ເປັນເຈົ້າ, ພຣະອົງຈະສິດສອນເຮົາວ່າ ເຮົາຄວນເຮັດສິ່ງໃດຈຶ່ງຈະໄດ້ຮັບຊີວິດນິລັນດອນ.
ເລື່ອງລາວກ່ຽວກັບມະຫາເສດຖີໜຸ່ມຈະເຮັດໃຫ້ຢຸດ ແມ່ນແຕ່ກັບສານຸສິດທີ່ຊື່ສັດຕະຫລອດຊີວິດກໍຕາມ. ຂະນະທີ່ທ່ານອ່ານ ມາຣະໂກ 10:17–22, ມີຫລັກຖານຢ່າງໃດແດ່ທີ່ທ່ານພົບເຫັນໃນຄວາມຊື່ສັດ ແລະ ຄວາມຈິງໃຈຂອງມະຫາເສດຖີໜຸ່ມ? ພຣະຜູ້ເປັນເຈົ້າຮູ້ສຶກແນວໃດກັບມະຫາເສດຖີໜຸ່ມຄົນນີ້?
ເລື່ອງນີ້ອາດກະຕຸ້ນທ່ານໃຫ້ຖາມວ່າ, “ມີສິ່ງໃດອີກທີ່ຂ້ານ້ອຍຍັງຂາດຢູ່?” (ມັດທາຍ 19:20). ພຣະຜູ້ເປັນເຈົ້າຊ່ວຍເຮົາໃຫ້ຊົດເຊີຍສິ່ງທີ່ເຮົາຂາດເຫລືອແນວໃດ (ເບິ່ງ ອີເທີ 12:27). ເຮົາສາມາດເຮັດຫຍັງແດ່ເພື່ອກຽມຕົວເອງໃຫ້ຮັບເອົາຄຳສັ່ງສອນ ແລະ ຄວາມຊ່ວຍເຫລືອຂອງພຣະອົງ ຂະນະທີ່ເຮົາສະແຫວງຫາທີ່ຈະປັບປຸງຕົວເອງ?
ເບິ່ງ Larry R. Lawrence, “What Lack I Yet?,” Liahona, Nov. 2015, 33–35; S. Mark Palmer, “Then Jesus Beholding Him Loved Him,” Liahona, May 2017, 114–16 ນຳອີກ.
ທຸກຄົນສາມາດໄດ້ຮັບພອນແຫ່ງຊີວິດນິລັນດອນ, ບໍ່ວ່າເຂົາໄດ້ຮັບເອົາພຣະກິດຕິຄຸນເມື່ອໃດກໍຕາມ.
ທ່ານສາມາດເຂົ້າໃຈປະສົບການຂອງພວກພະນັກງານຢູ່ໃນສວນອະງຸ່ນບໍ? ບົດຮຽນໃດແດ່ທີ່ທ່ານພົບເຫັນສຳລັບຕົວທ່ານເອງ ຢູ່ໃນພຣະຄຳພີຂໍ້ນີ້? ຂ່າວສານຂອງແອວເດີ ແຈັບຟະຣີ ອາ ຮໍແລນ “The Laborers in the Vineyard” (Liahona, May 2012, 31–33) ອາດຊ່ວຍທ່ານເຫັນວິທີໃໝ່ທີ່ຈະນຳໃຊ້ຄຳອຸປະມານີ້. ການກະຕຸ້ນເພີ່ມເຕີມຢ່າງໃດແດ່ທີ່ພຣະວິນຍານມອບໃຫ້ແກ່ທ່ານ?
The Repentant Publican and the Self-Righteous Pharisee in the Temple [ຄົນເກັບພາສີທີ່ກັບໃຈ ແລະ ຄົນຟາຣີຊາຍທີ່ຄິດວ່າຕົວເອງຊອບທຳ ຢູ່ໃນພຣະວິຫານ], ໂດຍ ແຟຣ້ງ ອາດາມ
ເຮົາຄວນໄວ້ວາງໃຈໃນຄວາມເມດຕາຂອງພຣະເຈົ້າ, ບໍ່ແມ່ນໃນຄວາມຊອບທຳຂອງເຮົາເອງ.
ທ່ານຈະສະຫລຸບຄວາມແຕກຕ່າງລະຫວ່າງຄຳອະທິຖານທັງສອງ ຢູ່ໃນຄຳອຸປະມານີ້ແນວໃດ? ໃຫ້ໄຕ່ຕອງສິ່ງທີ່ທ່ານຮູ້ສຶກວ່າທ່ານຄວນເຮັດ ເພື່ອຈະໄດ້ເປັນເໝືອນດັ່ງຄົນເກັບພາສີຫລາຍຂຶ້ນ ຢູ່ໃນເລື່ອງນີ້ ແລະ ເປັນເໝືອນດັ່ງຄົນຟາຣີຊາຍໜ້ອຍລົງ.
ເບິ່ງ ຟີລິບປອຍ 4:11–13; ແອວມາ 31:12–23; 32:12–16 ນຳອີກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ມາຣະໂກ 10:13–16; ລູກາ 18:15–17.ເພື່ອຊ່ວຍສະມາຊິກໃນຄອບຄົວໃຫ້ໄຕ່ຕອງເລື່ອງລາວໃນຂໍ້ເຫລົ່ານີ້, ທ່ານສາມາດຮ້ອງເພງທີ່ກ່ຽວຂ້ອງນຳກັນ, ດັ່ງເຊັ່ນ “ເຮົາຄິດເມື່ອເຮົາອ່ານເລື່ອງແສນຫວານນັ້ນ” (Children’s Songbook, 66). ຈະເປັນແນວໃດຖ້າຫາກໄດ້ຢູ່ໃນທ່າມກາງພວກເດັກນ້ອຍທີ່ພຣະເຢຊູໄດ້ອວຍພອນ? ການ “ຮັບອານາຈັກຂອງພຣະເຈົ້າເໝືອນເດັກນ້ອຍ” ໝາຍຄວາມວ່າແນວໃດ? (ມາຣະໂກ 10:15).
-
ມາຣະໂກ 10:23–27.ແມ່ນຫຍັງຄືຄວາມແຕກຕ່າງລະຫວ່າງ ການມີ ຄວາມຮັ່ງມີ ແລະ ການໄວ້ວາງໃຈໃນ ຄວາມຮັ່ງມີ? (ເບິ່ງ ມາຣະໂກ 10:23–24). ຂະນະທີ່ທ່ານອ່ານ ຂໍ້ທີ 27, ທ່ານສາມາດຊີ້ບອກການແປຂອງໂຈເຊັບ ສະມິດ ທີ່ວ່າ: “ກັບມະນຸດ ທີ່ໄວ້ວາງໃຈໃນຄວາມຮັ່ງມີ, ມັນເປັນໄປບໍ່ໄດ້; ແຕ່ ເປັນໄປໄດ້ກັບມະນຸດທີ່ໄວ້ວາງໃຈໃນພຣະເຈົ້າ ແລະ ປະຖິ້ມທຸກຢ່າງເພື່ອເຫັນແກ່ເຮົາ, ເພາະກັບ ທຸກສິ່ງ ທັງໝົດ ເຫລົ່ານີ້ ມັນເປັນໄປໄດ້” (ການແປຂອງໂຈເຊັບ ສະມິດ, ມາຣະໂກ 10:26 [ໃນ ມາຣະໂກ 10:27, ໝາຍເຫດຢູ່ທາງລຸ່ມໜ້າປຶ້ມ ກ ]). ໃນຖານະຄອບຄົວ, ເຮົາຈະສະແດງໃຫ້ເຫັນວ່າ ເຮົາໄວ້ວາງໃຈໃນພຣະເຈົ້າຫລາຍກວ່າສິ່ງຂອງແນວໃດ?
-
ມັດທາຍ 20:1–16.ເພື່ອສາທິດຫລັກທຳໃນ ມັດທາຍ 20:1–16, ພວກທ່ານສາມາດຈັດການແຂ່ງຂັນແບບງ່າຍໆຂຶ້ນ, ດັ່ງເຊັ່ນການແລ່ນແຂ່ງໄລຍະສັ້ນ. ຫລັງຈາກທຸກຄົນໄດ້ແຂ່ງຂັນແລ້ວ, ໃຫ້ມອບລາງວັນແບບດຽວກັນໃຫ້ເຂົາເຈົ້າ, ເລີ່ມຕົ້ນຈາກຜູ້ແລ່ນເຖິງເສັ້ນໄຊຄົນສຸດທ້າຍ ຫາຜູ້ແລ່ນເຖິງເສັ້ນໄຊຄົນທຳອິດ. ສິ່ງນີ້ສິດສອນເຮົາຫຍັງແດ່ກ່ຽວກັບຜູ້ທີ່ໄດ້ຮັບພອນແຫ່ງຊີວິດນິລັນດອນ ໃນແຜນຂອງພຣະບິດາເທິງສະຫວັນ?
-
ມັດທາຍ 20:25–28; ມາຣະໂກ 10:42–45.ວະລີທີ່ວ່າ “ຖ້າຜູ້ໃດໃນພວກເຈົ້າຢາກເປັນເອກ, ລາວຕ້ອງເປັນຜູ້ຮັບໃຊ້ຂອງພວກເຈົ້າ” ໝາຍຄວາມວ່າແນວໃດ? (ມັດທາຍ 20:27). ພຣະເຢຊູຄຣິດເປັນຕົວຢ່າງເຖິງຫລັກທຳຂໍ້ນີ້ແນວໃດ? ເຮົາຈະສາມາດເຮັດຕາມຕົວຢ່າງຂອງພຣະອົງໃນຄອບຄົວຂອງເຮົາ, ໃນຫວອດ ຫລື ສາຂາຂອງເຮົາ, ແລະ ໃນຄຸ້ມບ້ານຂອງເຮົາໄດ້ແນວໃດ?
-
ລູກາ 18:1–14.ເຮົາຮຽນຮູ້ຫຍັງແດ່ກ່ຽວກັບການອະທິຖານຈາກຄຳອຸປະມາທັງສອງໃນຂໍ້ເຫລົ່ານີ້?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.
ເພງແນະນຳ: “ຂ້າຂໍຂອບພຣະໄທອົງບິດາ,” ເພງສວດ ແລະ ເພງຂອງເດັກນ້ອຍ, 67.
ການປັບປຸງການສຶກສາສ່ວນຕົວ
ຊອກຫາເວລາທີ່ສະດວກສຳລັບທ່ານ. ສ່ວນຫລາຍແລ້ວ ມັນເປັນສິ່ງງ່າຍທີ່ສຸດ ທີ່ຈະຮຽນຮູ້ ເມື່ອທ່ານສາມາດສຶກສາພຣະຄຳພີ ໂດຍປາດສະຈາກສິ່ງລົບກວນ. ໃຫ້ຊອກຫາເວລາທີ່ສະດວກສຳລັບທ່ານ, ແລະ ໃຫ້ສຶກສາຢ່າງສະໝ່ຳສະເໝີ ໃນເວລາດຽວກັນນັ້ນທຸກໆວັນ.
Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ