“ວັນທີ 15–21 ເດືອນພຶດສະພາ. ມັດທາຍ 21–23; ມາຣະໂກ 11; ລູກາ 19–20; ໂຢຮັນ 12: ‘ເບິ່ງແມ, ກະສັດຂອງພວກເຈົ້າກຳລັງສະເດັດມາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ພຣະຄຳພີໃໝ່ 2023 (2022)

“ວັນທີ 15–21 ເດືອນພຶດສະພາ. ມັດທາຍ 21–23; ມາຣະໂກ 11; ລູກາ 19–20; ໂຢຮັນ 12,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2023

Zacchaeus in the Sycamore Tree [ຊັກຂ່າຍຢູ່ເທິງຕົ້ນຊຸກະໂມນ], ໂດຍ ເຈມສ໌ ທີໂຊ

ວັນທີ 15–21 ເດືອນພຶດສະພາ

ມັດທາຍ 21–23; ມາຣະໂກ 11; ລູກາ 19–20; ໂຢຮັນ 12

“ເບິ່ງແມ, ກະສັດຂອງພວກເຈົ້າກຳລັງສະເດັດມາ”

ກ່ອນອ່ານແນວຄິດຢູ່ໃນໂຄງຮ່າງນີ້, ໃຫ້ອ່ານ ມັດທາຍ 21–23; ມາຣະໂກ 11; ລູກາ 19–20; ແລະ ໂຢຮັນ 12. ບັນທຶກຄວາມປະທັບໃຈທີ່ທ່ານສາມາດແບ່ງປັນກັບຄອບຄົວຂອງທ່ານ ຫລື ກັບຫ້ອງຮຽນຢູ່ໂບດຂອງທ່ານ.

ບັນທຶກຄວາມປະທັບໃຈຂອງທ່ານ

ພຣະຜູ້ຊ່ວຍໃຫ້ລອດໄດ້ຫິວເຂົ້າຫລັງຈາກທີ່ໄດ້ເດີນທາງຈາກເມືອງເບັດທານີ ໄປຫານະຄອນເຢຣູຊາເລັມ, ແລະ ໄດ້ເຫັນຕົ້ນໝາກເດື່ອເທດຢູ່ແຄມທາງ ເບິ່ງຄືວ່າຈະເປັນແຫລ່ງໃຫ້ອາຫານໄດ້. ແຕ່ເມື່ອພຣະເຢຊູເຂົ້າໄປຫາຕົ້ນໝາກເດື່ອເທດຕົ້ນນັ້ນ, ພຣະອົງເຫັນວ່າ ມັນບໍ່ມີໝາກ (ເບິ່ງ ມັດທາຍ 21:17–20; ມາຣະໂກ 11:12–14, 20). ໃນທາງປຽບທຽບ, ຕົ້ນໝາກເດື່ອເທດກໍຄືກັນກັບຜູ້ນຳພາສາດສະໜາທີ່ໜ້າຊື່ໃຈຄົດໃນນະຄອນເຢຣູຊາເລັມ: ຄຳສອນປາກເປົ່າ ແລະ ການສະແດງອອກພາຍນອກເຖິງຄວາມບໍລິສຸດຂອງພວກເຂົາ ບໍ່ໄດ້ໃຫ້ການບຳລຸງລ້ຽງທາງວິນຍານເລີຍ. ພວກຟາຣີຊາຍ ແລະ ພວກທຳມະຈານປະກົດວ່າຄືໄດ້ຮັກສາພຣະບັນຍັດຫລາຍຂໍ້ ແຕ່ລືມຮັກສາພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້: ຈົ່ງຮັກພຣະເຈົ້າ ແລະ ຮັກເພື່ອນບ້ານເໝືອນຮັກຕົນເອງ (ເບິ່ງ ມັດທາຍ 22:34–40; 23:23).

ກົງກັນຂ້າມ, ຫລາຍຄົນໄດ້ເລີ່ມຕົ້ນຮັບຮູ້ຜົນດີໃນຄຳສອນຂອງພຣະເຢຊູ. ເມື່ອພຣະອົງໄດ້ໄປເຖິງນະຄອນເຢຣູຊາເລັມ, ພວກເຂົາໄດ້ຕ້ອນຮັບພຣະອົງ ດ້ວຍການປູກ້ານຕານ ຕາມເສັ້ນທາງ, ປິຕິຍິນດີທີ່ໃນທີ່ສຸດ, ກໍເປັນຕາມຄຳທຳນາຍທີ່ກ່າວວ່າ, “ກະສັດຂອງພວກເຈົ້າກຳລັງສະເດັດມາ” (ເຊກາຣີຢາ 9:9). ຂະນະທີ່ທ່ານອ່ານໃນອາທິດນີ້, ໃຫ້ຄິດກ່ຽວກັບໝາກຜົນຂອງຄຳສອນ ແລະ ການເສຍສະລະຊົດໃຊ້ຂອງພຣະຜູ້ຊ່ວຍໃຫ້ລອດໃນຊີວິດຂອງທ່ານ ແລະ ວິທີທີ່ທ່ານຈະ “ເກີດຜົນຫລາຍ” ແນວໃດ (ໂຢຮັນ 12:24).

ແນວຄິດສຳລັບການສຶກສາພຣະຄຳພີເປັນສ່ວນຕົວ

ລູກາ 19:1–10

ພຣະຜູ້ເປັນເຈົ້າບໍ່ຕັດສິນຕາມການປະກົດພາຍນອກ ແຕ່ຕາມຄວາມປາດຖະໜາຂອງໃຈ.

ໃນວັນເວລາຂອງພຣະເຢຊູ, ຫລາຍຄົນໄດ້ສັນນິຖານວ່າ ຄົນເກັບພາສີເປັນຄົນບໍ່ຊື່ສັດ ແລະ ຂະໂມຍຈາກປະຊາຊົນ. ສະນັ້ນ ຍ້ອນວ່າຊັກຂ່າຍ, ເປັນຫົວໜ້າຄົນເກັບພາສີ ແລະ ຮັ່ງມີ, ລາວຈຶ່ງຖືກສົງໄສຕື່ມອີກ. ແຕ່ພຣະເຢຊູໄດ້ເບິ່ງທີ່ໃຈຂອງຊັກຂ່າຍ. ລູກາ 19:1–10 ເປີດເຜີຍຫຍັງແດ່ກ່ຽວກັບໃຈຂອງຊັກຂ່າຍ? ທ່ານສາມາດຂຽນຂໍ້ຄວາມຢູ່ໃນຂໍ້ເຫລົ່ານີ້ ທີ່ບັນຍາຍເຖິງສິ່ງທີ່ຊັກຂ່າຍໄດ້ເຮັດ ເພື່ອສະແດງເຖິງການອຸທິດຕົນຂອງລາວຕໍ່ພຣະຜູ້ຊ່ວຍໃຫ້ລອດ. ແມ່ນຫຍັງຄືຄວາມປາດຖະໜາຂອງໃຈທ່ານ? ທ່ານກຳລັງເຮັດຫຍັງເພື່ອສະແຫວງຫາພຣະຜູ້ຊ່ວຍໃຫ້ລອດ, ດັ່ງທີ່ຊັກຂ່າຍໄດ້ເຮັດ?

ເບິ່ງ ຄຳສອນ ແລະ ພັນທະສັນຍາ 137:9 ນຳອີກ.

ມັດທາຍ 23; ລູກາ 20:45–47

ພຣະເຢຊູປະນາມຄວາມໜ້າຊື່ໃຈຄົດ.

ຄວາມປະຕິສຳພັນຂອງພຣະຜູ້ຊ່ວຍໃຫ້ລອດກັບພວກທຳມະຈານ ແລະ ພວກຟາຣີຊາຍ ແມ່ນແຕກຕ່າງຈາກຄວາມປະຕິສຳພັນຂອງພຣະອົງກັບຊັກຂ່າຍ. ດັ່ງທີ່ປະທານດີເດີ ແອັບ ອຸກດອບ ໄດ້ອະທິບາຍວ່າ, “[ພຣະເຢຊູ] ພຣະພິໂລດໃນທາງທີ່ຊອບທຳ ຕໍ່ຄົນໜ້າຊື່ໃຈຄົດ ເຊັ່ນກັບພວກທຳມະຈານ, ພວກຟາຣີຊາຍ, ແລະ ພວກຊາດູກາຍ—ພວກເຂົາຖືຕົນເອງວ່າເປັນຄົນຊອບທຳ ເພື່ອຈະໄດ້ຮັບການຍ້ອງຍໍ, ເພື່ອຈະມີອິດທິພົນ, ແລະ ຮັ່ງມີເປັນດີ ດ້ວຍສິ່ງຂອງທາງໂລກ, ໃນເວລາດຽວກັນ, ພວກເຂົາໄດ້ຂົ່ມເຫັງຜູ້ຄົນ ທີ່ພວກເຂົາຄວນຊ່ວຍເຫລືອ” (“On Being Genuine,” Liahona, May 2015, 81).

ໃນ ມັດທາຍ 23, ພຣະຜູ້ຊ່ວຍໃຫ້ລອດໄດ້ໃຊ້ການປຽບທຽບຫລາຍຢ່າງ ເພື່ອບັນຍາຍເຖິງຄວາມໜ້າຊື່ໃຈຄົດ. ໃຫ້ຄິດທີ່ຈະໝາຍ ຫລື ຂຽນການປຽບທຽບເຫລົ່ານີ້ ແລະ ສັງເກດເບິ່ງສິ່ງທີ່ມັນສິດສອນກ່ຽວກັບຄວາມໜ້າຊື່ໃຈຄົດ. ແມ່ນຫຍັງຄືຄວາມແຕກຕ່າງລະຫວ່າງຄວາມໜ້າຊື່ໃຈຄົດ ແລະ ຄວາມອ່ອນແອຂອງມະນຸດ ທີ່ເຮົາທຸກຄົນປະເຊີນ ຂະນະທີ່ເຮົາພະຍາຍາມດຳລົງຊີວິດຕາມພຣະກິດຕິຄຸນ? ທ່ານໄດ້ຮັບການດົນໃຈໃຫ້ເຮັດສິ່ງໃດທີ່ແຕກຕ່າງ ຍ້ອນຄຳສອນຂອງພຣະຜູ້ຊ່ວຍໃຫ້ລອດ?

ເບິ່ງ Bible Dictionary, “Hypocrite” ນຳອີກ.

ມັດທາຍ 21:1–11; ມາຣະໂກ 11:1–11; ລູກາ 19:29–44; ໂຢຮັນ 12:1–8, 12–16

ພຣະເຢຊູຄຣິດເປັນກະສັດຂອງເຮົາ.

ເມື່ອພຣະເຢຊູໄປເຖິງນະຄອນເຢຣູຊາເລັມພາຍໃນສອງສາມວັນກ່ອນພຣະອົງໄດ້ສຳເລັດການຊົດໃຊ້ຂອງພຣະອົງ, ຜູ້ທີ່ຮັບຮູ້ພຣະອົງໄດ້ສະແດງການອຸທິດຕົນຂອງພວກເຂົາ ໂດຍການຫົດສົງພຣະອົງ, ໄດ້ປູທາງເຂົ້າສູ່ນະຄອນເຢຣູຊາເລັມດ້ວຍເສື້ອຜ້າ ແລະ ກ້ານຕານ, ແລະ ໂຮ່ຮ້ອງສັນລະເສີນ. ໃຫ້ພິຈາລະນາແຫລ່ງດັ່ງຕໍ່ໄປນີ້ວ່າ ສາມາດໃຫ້ຄວາມເຂົ້າໃຈຢ່າງເລິກເຊິ່ງແກ່ທ່ານ ກ່ຽວກັບເຫດການເຫລົ່ານີ້ໄດ້ແນວໃດ, ຊຶ່ງເລີ່ມຕົ້ນອາທິດສຸດທ້າຍຂອງພຣະຊົນຊີບຂອງພຣະຜູ້ຊ່ວຍໃຫ້ລອດ.

ຕົວຢ່າງການຫົດສົງບາງຄົນໃຫ້ເປັນກະສັດໃນສະໄໝບູຮານ: 2 ກະສັດ 9:1–6, 13
ຄຳທຳນາຍໃນສະໄໝບູຮານເຖິງການເດີນເຂົ້ານະຄອນຢ່າງຜູ້ມີໄຊ: ເຊກາຣີຢາ 9:9
ຄວາມໝາຍຂອງຄຳວ່າ ໂຮຊັນນາ: “ໂຮຊັນນາ” ໃນ ຄູ່ມືພຣະຄຳພີ (scriptures.ChurchofJesusChrist.org)
ຄຳທຳນາຍກ່ຽວກັບວິທີທີ່ພຣະຜູ້ຊ່ວຍໃຫ້ລອດຈະສະເດັດມາອີກ: ພຣະນິມິດ 7:9–12

ທ່ານຈະໃຫ້ກຽດ ແລະ ຮັບເອົາພຣະຜູ້ຊ່ວຍໃຫ້ລອດ ວ່າເປັນພຣະຜູ້ເປັນເຈົ້າ ແລະ ພຣະກະສັດຂອງທ່ານແນວໃດ?

ເບິ່ງ Gerrit W. Gong, “Hosanna and Hallelujah—The Living Jesus Christ: The Heart of Restoration and Easter,” Liahona, May 2020, 52–55; “The Lord’s Triumphal Entry into Jerusalem” (ວິດີໂອ), ChurchofJesusChrist.org ນຳອີກ.

ມັດທາຍ 22:34–40

ພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້ ແມ່ນໃຫ້ຮັກພຣະເຈົ້າ ແລະ ຮັກຄົນອື່ນເໝືອນຮັກຕົນເອງ.

ຖ້າຫາກທ່ານຮູ້ສຶກໜັກໃຈ ຂະນະທີ່ທ່ານພະຍາຍາມເຮັດຕາມພຣະຄຳຂອງພຣະເຢຊູຄຣິດ, ພຣະຜູ້ຊ່ວຍໃຫ້ລອດ ທີ່ກ່າວກັບທຳບັນດິດໃນ ມັດທາຍ 22 ສາມາດຊ່ວຍທ່ານລົດຄວາມຊັບຊ້ອນ ແລະ ເອົາໃຈໃສ່ຕໍ່ການເປັນສານຸສິດຂອງທ່ານຫລາຍຂຶ້ນ. ຕໍ່ໄປນີ້ແມ່ນວິທີໜຶ່ງໃນການເຮັດສິ່ງນີ້: ຂຽນພຣະບັນຍັດຂອງພຣະຜູ້ເປັນເຈົ້າຫລາຍຂໍ້. ແຕ່ລະຢ່າງຢູ່ໃນຈຳນວນທີ່ທ່ານຂຽນໄວ້ກ່ຽວຂ້ອງກັບພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້ແນວໃດ? ການເອົາໃຈໃສ່ຕໍ່ພຣະບັນຍັດຂໍ້ໃຫຍ່ ແລະ ຂໍ້ຕົ້ນສອງຂໍ້ ຊ່ວຍທ່ານຮັກສາຂໍ້ອື່ນໆແນວໃດ?

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ມັດທາຍ 21:12–14.ພຣະຄຳ ແລະ ການກະທຳຂອງພຣະເຢຊູໃນ ມັດທາຍ 21:12–14 ສະແດງໃຫ້ເຫັນວ່າ ພຣະອົງຮູ້ສຶກກ່ຽວກັບພຣະວິຫານແນວໃດ? ເຮົາຈະສະແດງໃຫ້ເຫັນວ່າ ເຮົາຮູ້ສຶກກ່ຽວກັບພຣະວິຫານແນວໃດ? ເຮົາຈະ “ຂັບໄລ່” ສິ່ງໃດແດ່ (ຂໍ້ທີ 12) ອອກຈາກຊີວິດຂອງເຮົາ ເພື່ອເຮັດໃຫ້ບ້ານເຮືອນຂອງເຮົາເປັນເໝືອນດັ່ງພຣະວິຫານຫລາຍຂຶ້ນ? ໃຫ້ຄິດທີ່ຈະຮ້ອງເພງກ່ຽວກັບພຣະວິຫານນຳກັນ, ດັ່ງເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68).

ມັດທາຍ 21:28–32.ບົດຮຽນໃດແດ່ຈາກຄຳອຸປະມາເລື່ອງຜູ້ຊາຍທີ່ມີລູກຊາຍສອງຄົນ ສາມາດຊ່ວຍຄອບຄົວຂອງທ່ານໄດ້? ຍົກຕົວຢ່າງ, ທ່ານສາມາດໃຊ້ເລື່ອງນີ້ເພື່ອສົນທະນາເຖິງຄວາມສຳຄັນຂອງການເຊື່ອຟັງ ແລະ ການກັບໃຈທີ່ຈິງໃຈ. ບາງທີຄອບຄົວຂອງທ່ານສາມາດຂຽນບົດລະຄອນ ເພື່ອສະແດງຄຳອຸປະມາ ແລະ ປ່ຽນກັນແອັກທ່າໃນບົດບາດທີ່ແຕກຕ່າງກັນ.

ມັດທາຍ 22:15–22; ລູກາ 20:21–26.ເດັກນ້ອຍອາດມັກເຮັດເງິນຫລຽນປອມ ທີ່ມີ “ຮູບ ແລະ ຄຳຈາລຶກ” ຂອງພຣະເຢຊູຢູ່ໃນນັ້ນ. ເຂົາເຈົ້າສາມາດຂຽນບາງ “ສິ່ງທີ່ເປັນຂອງພຣະເຈົ້າ” ໃສ່ທາງຫລັງ (ມັດທາຍ 22:21) ທີ່ເຮົາສາມາດມອບໃຫ້ແກ່ພຣະອົງ. ພວກທ່ານກໍຍັງສາມາດເວົ້າລົມກັນອີກກ່ຽວກັບວ່າ ການມີ “ຮູບ ແລະ ຄຳຈາລຶກ” ຂອງພຣະຜູ້ຊ່ວຍໃຫ້ລອດຢູ່ໃນຕົວ ເຮົາ ໝາຍຄວາມວ່າແນວໃດ (ມັດທາຍ 22:20; ເບິ່ງ ໂມໄຊຢາ 5:8; ແອວມາ 5:14 ນຳອີກ).

ໂຢຮັນ 12:1–8.ນາງມາຣີໄດ້ສະແດງຄວາມຮັກຂອງນາງຕໍ່ພຣະຜູ້ຊ່ວຍໃຫ້ລອດແນວໃດ? ເຮົາຈະສະແດງຄວາມຮັກຂອງເຮົາຕໍ່ພຣະອົງແນວໃດ?

ຜູ້ຍິງກຳລັງເຊັດພຣະບາດຂອງພຣະເຢຊູດ້ວຍຜົມຂອງນາງ — Washing Jesus’s Feet [ການລ້າງພຣະບາດຂອງພຣະເຢຊູ], ໂດຍ ບຣາຍແອນ ຄອລ໌

ໂຢຮັນ 12:42–43.ຜົນທາງສັງຄົມຢ່າງໃດແດ່ທີ່ບາງເທື່ອເຮັດໃຫ້ເຮົາທໍ້ແທ້ຈາກການສະແດງ ຫລື ການປົກປ້ອງຄວາມເຊື່ອຂອງເຮົາໃນພຣະຄຣິດ? ສຳລັບຕົວຢ່າງຂອງຜູ້ຄົນທີ່ບໍ່ຍອມແພ້ຕໍ່ຄວາມກົດດັນຂອງສັງຄົມ, ໃຫ້ເບິ່ງ ດານີເອນ 1:3–20; 3; 6; ໂຢຮັນ 7:45–53; 9:1–38; ແລະ ໂມໄຊຢາ 17:1–4. ເຮົາຈະສະແດງຄວາມນັບຖືຕໍ່ຄົນອື່ນ ຂະນະທີ່ເຂົາເຈົ້າສະແດງ ຫລື ປົກປ້ອງຄວາມເຊື່ອທາງສາດສະໜາຂອງເຂົາເຈົ້າແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ this week’s outline ໃນ Come, Follow Me—For Primary.

ເພງສວດແນະນຳ: “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5.

ການປັບປຸງການສິດສອນຂອງເຮົາ

ໃຊ້ຮູບພາບເພື່ອດຶງດູດຄວາມສົນໃຈຂອງສະມາຊິກໃນຄອບຄົວ. “ປຶ້ມຮູບພາບພຣະກິດຕິຄຸນ ແລະ Gospel Media Library ຢູ່ທີ່ ChurchofJesusChrist.org ບັນຈຸຮູບພາບ ແລະ ວິດີໂອຢ່າງຫລວງຫລາຍ ທີ່ສາມາດຊ່ວຍຄອບຄົວຂອງທ່ານໃຫ້ວາດພາບຄວາມຄິດ ຫລື ວາດພາບເຫດການໄດ້” (Teaching in the Savior’s Way, 22).

Triumphal Entry [ການເດີນເຂົ້ານະຄອນຢ່າງຜູ້ມີໄຊ], ໂດຍ ວາວເຕີ ເຣນ